Ang iring naay kinaiya nga manghinlo sa kaugalingon. Bayente kuwatro porsiyento sa panahon nga mata sila gamiton nila sa pagpanghinlo sa kaugalingon. Mahinloan nila pag-ayo ang ilang kaugalingon tungod sa ilang makapahingangha nga dila.

 Hunahunaa: Ang dila sa iring naay 290 ka papilla. Gagmay ni nga tunoktunok nga naghandag pasulod ug halos parehas ni ka gahi sa kuko. Ang matag papilla dunay kanalkanal nga masudlag laway dihang ang dila sa iring naa sa sulod sa baba niini. Samtang tilapan sa iring ang iyang balhibo, masudlay sa mga papilla ang balhibo ug maadto sa panit ang iyang laway.

 Ang gidaghanon sa laway nga madala sa dila sa iring ngadto sa panit ug balhibo niini maoy mga 48 milliliters (1.6 oz) kada adlaw. Ang laway dunay mga enzyme nga makahinlo o makatangtang sa bisan unsa nga makadaot sa iring. Dugang pa, samtang moalisngaw ang laway, makatabang ni nga mobugnaw ang lawas sa iring. Ug importante kaayo ni kay ang iring dili kaayo panington.

 Kon ang papilla makaigo ug naglambod nga balhibo, mopailalom ni sa balhibo, nga makadugang sa puwersa sa papilla, mao nga mabungkag ang naglambod nga balhibo. Ang tumoy sa papilla naa poy maayong epekto sa panit sa iring dihang tilapan niya ang iyang balhibo. Gisundog sa mga researcher ang dila sa iring dihang naghimo sila ug hairbrush. Kon itandi sa komon nga hairbrush, kining gieksperimento nga hairbrush dili kaayo magkinahanglag puwersa ug mas sayon hinloan​—unya makabungkag pa gyod ug naglambod nga buhok. Ang mga researcher nagtuo nga ang dila sa iring makatabang nila sa pag-imbento ug mas maayong mga paagi sa paghinlo sa balhiboong mga butang. Magamit sab ni sa pagpauswag sa mga paagi sa pagpahid ug losyon o tambal sa panit nga balbon.

 Unsay imong hunahuna? Ang dila ba sa iring mitungha pinaagig ebolusyon? O gidisenyo kini?