Ang mga robotics engineer naghimog gamit nga makatabang sa mga doktor sa pag-opera sa piot nga mga parte sa lawas nga dili ra dagkoon paglaslas. Usa sa ilang mga imbensiyon gisundog gikan sa mabawogbawog nga gaway sa kugita.

 Hunahunaa: Ang kugita makabira, makakupot, ug makaipit ug mga butang gamit ang walo ka gaway nga maunat-unat ug mabawogbawog, bisan sa piot kaayong mga dapit. Gawas nga ang mga gaway niini mabawogbawog sa lainlaing direksiyon, mapagahi sab sa kugita ang lainlaing bahin sa gaway niini kon gikinahanglan.

 Nagtuo ang mga researcher nga ang usa ka robotic arm nga humok ug mabawogbawog dakog tabang sa pag-opera nga dili na kinahanglag dagkong laslas. Pinaagi niini, posible nang operahan ang mga pasyente nga dili na kinahanglang moagig komplikadong mga operasyon.

 Tan-awa ang mabawogbawog nga gaway sa kugita

 Duna nay naimbento nga ingon ana nga robotic arm ug gigamit na sa gihimong mga eksperimento sa pag-opera. Ang usa ka bahin sa 135 milimetro (5 ka pulgada) nga arm makaaswat ug makakupot sa humok nga mga organo sa lawas nga dili ra maunsa, samtang ang usa ka bahin niini maoy maghimo sa aktuwal nga operasyon. Sumala ni Dr. Tommaso Ranzani, membro sa team nga naggama niini, “nagtuo mi nga kini maoy sinugdanan sa bag-o ug mas maayong bersiyon nga dunay mas high-tech nga mga feature.”

 Unsay imong hunahuna? Ang gaway ba sa kugita mitungha pinaagig ebolusyon? O kini ba gidisenyo?