Sa kinaiyahan, ang usa sa mga kinamaayohang molupad mao ang mga liso sa dandelion. Dihang huypon sa hangin ang bulak sa dandelion, ang gagmayng mga liso niini mapadpad ug molupad nga samag gagmayng parachute. Bisan pag mubo lang ang paglupad niini, ang ubang liso makaabot sa gilay-ong usa ka kilometro (0.6 ka milya) o kapin pa. Sa unsang paagi naposible kini? Bag-o lang nadiskobrehan sa mga siyentista nga ang paagi sa paglupad sa liso sa dandelion maoy upat ka pilo nga mas episyente ug mas stable kay sa nianang ordinaryo nga parachute.

 Hunahunaa: Ang liso sa dandelion nahimutang sa tumoy sa usa ka lindog o stem ug sa pikas tumoy naay nigpis nga buhokbuhok, nga gitawag ug pappus. Ang pappus nagsilbing parachute nga nakatabang aron ang liso makapadayon sa pag-utaw-utaw sa kahanginan.

 Pero dili lang kay kana ang ginahimo sa pappus. Samtang moagi ang hangin sa mga buhokbuhok niini, dunay mapormang vortex sa hangin sa ibabaw sa pappus. Nagatuyok ang hangin niini nga vortex ug moresulta nig low pressure nga mobira paibabaw sa pappus. Tungod niini, dili dayon ni mahulog sa yuta.

 Tungod sa maayo kaayo nga pagkaplastar sa buhokbuhok sa pappus, dali rang makalapos ang hangin. Mora nig parachute nga mas episyente ug stable. Dugang pa, 90 porsiyento sa pappus haw-ang o space lang! Busa gamay lang nga porsiyento niini ang mga buhokbuhok.

 Ang mga siyentista nangitag mga paagi nga masundog ang paglupad sa liso sa dandelion. Kini nga impormasyon puwede nilang magamit sa pagdisenyog gagmayng drone nga makalupad gamit ang diyutay lang nga enerhiya. Kini nga mga drone puwedeng gamiton sa lainlaing paagi sama sa pagmonitor sa polusyon sa hangin.

 Unsay imong hunahuna? Ang paglupad ba sa liso sa dandelion mitungha pinaagig ebolusyon? O gidisenyo kini?