Ang Salag sa Malleefowl

I-PLAY

Ang malleefowl sa southern inland Australia nagmentinar sa temperatura sa salag niini nga dili moubos o molapas ug duha o tulo ka degree gikan sa 34 degrees Celsius (93°F). Giunsa pagmentinar niini nga langgam kini nga temperatura adlaw ug gabii sa tibuok tuig?

Kada tingtugnaw, ang mga langgam magkalot ug dakong lungag nga mga usa ka metro (3 piye) ang giladmon ug tulo ka metro (10 piye) ang gilapdon, nga pun-on sa laki ug mga sagbot, dahon, ug uban pang tanom. Human ni mahumod sa ulan sa hinapos sa tingtugnaw, ang laki magkalot ug gamayng lungag niini ug tabonan ang tibuok bungdo ug balason nga yuta. Sa dili madugay, ang mga tanom magsugod nag kalata ug moinit, ug magsilbi kining incubator.

Aron mapusa ang mga itlog (A), gamiton sa malleefowl ang kainit sa adlaw ug ang kainit nga gikan sa nangalata nga mga tanom (B). Pinaagi sa pag-adjust sa gibagaon sa yuta nga gitabon (C), mamentinar sa malleefowl ang temperatura sa mga itlog sa mga 34 degrees Celsius (93ºF) sulod sa daghang bulan. Aron mahimo kini, kakhaon sa langgam ang yuta nga nagtabon sa salag niini ug ibalik kini (D)

Dihang andam nang mangitlog ang baye, kakhaon sa laki ang yuta aron makapangitlog ang baye sa gamayng lungag. Dayon, ang bungdo tabonag balik sa laki ug yuta. Ang baye makapangitlog ug hangtod sa 35 ka itlog gikan sa Septiyembre hangtod sa Pebrero. a

Sagad ilubong sa mga langgam ang ilang sungo sa balas aron mahibaloan ang temperatura niini. Dayon, ilang i-adjust ang bungdo depende sa panahon. Pananglitan:

Panahon sa tingpamulak, dihang init na kaayo ang temperatura sa salag tungod sa nangalata nga mga tanom, kakhaon sa laki ang yuta ibabaw sa gamayng lungag aron mogawas ang kainit. Pagkataudtaod, kon bugnaw na ang yuta, iya ning ibalik ug tabon sa salag.
Panahon sa ting-init, dugangan sa laki ug yuta ang ibabaw sa bungdo aron dili mainitan sa adlaw ang mga itlog. Pero matag sayo sa buntag, kakhaon niya ang yuta ug ibalik kini dihang bugnaw na ang salag ug ang balas.
Panahon sa tinglarag, dihang madugta na ang tanang tanom, kakhaon sa laki ang halos tanang yuta aron mainitan sa adlaw ang mga itlog ug ang kinakha nga yuta. Unya ang bungdo tabonan niyag balik sa nainitan nga yuta aron mainitan ang mga itlog panahon sa gabii.

Kada adlaw, moaberids ang laki ug kapig lima ka oras sa pagpangakha ug pagtabon ug mga 850 ka kilo nga yuta. Tungod kay kanunayng makakha ang yuta, dili kini mabantok. Makatabang ni nga dali rang makagawas ang mga piso sa bungdo dihang mapusa na ang mga itlog.