Ang balat, o sea cucumber, nagpuyo sa salog sa dagat ug sa mga coral reef. Ang lawas niini bukolbukolon o tunokon. Kini mabawogbawog pag-ayo, nga mahimong sama ka humok sa talo (o, wax) o sama ka gahi sa kahoy sulod lang sa mga minuto o bisan segundo. Tungod niana, ang balat makasuksok sa gagmayng espasyo ug unya magpagahi aron dili kini mabira sa manunukob. Mahimo kana sa balat tungod sa talagsaong panit niini.

 Hunahunaa: Ang panit sa balat mahimong mogahi, dili kaayo mogahi, ug mohumok. Mahimo kini sa balat pinaagi sa pag-connect o pag-disconnect sa mga fiber sa panit niini. Gamiton sa balat ang lainlaing pangpagahi o pangpahumok nga protina sa paghimo niini.

 Ang pangpagahi nga mga protina mag-connect sa mga fiber mao nga mogahi ang panit. Ang pangpahumok nga mga protina mag-disconnect sa mga fiber mao nga mohumok ang panit. Ang panit sa balat mohumok pag-ayo nga mora na kinig matunaw.

 Ang mga siyentista naningkamot sa paghimog mga butang nga nagsundog sa disenyo sa panit sa balat. Usa sa ilang mga tumong mao ang paghimog mga electrode nga gamiton sa pag-opera sa utok. Gusto nilang maghimog electrode nga sakto ang kagahi aron mabutang kini sa eksaktong dapit sa utok ug pagkahuman mohumok ra. Ang maong matang sa electrode makatabang aron modako ang posibilidad nga magmalamposon ang operasyon.

 Unsay imong hunahuna? Ang talagsaong panit ba sa balat mitungha pinaagig ebolusyon? O gidisenyo kini?