Amos 1:1-15
1 Ang mga pulong ni Amos, nga usa sa mga tigbuhig karnero gikan sa Tekoa,+ nga iyang nakita sa panan-awon labot sa Israel+ sa mga adlaw ni Uzzias+ nga hari sa Juda ug sa mga adlaw ni Jeroboam+ nga anak nga lalaki ni Joas,+ nga hari sa Israel, duha ka tuig sa wala pa ang linog.+
2 Ug siya miingon:
“Si Jehova—gikan sa Zion siya mongulob,+ ug gikan sa Jerusalem siya mopagula sa tingog;+ ug ang mga sibsibanan sa mga magbalantay sa kahayopan magbangotan, ug ang kinapungkayan sa Carmelo momala.”+
3 “Mao kini ang giingon ni Jehova, ‘“Tungod sa tulo ka pag-alsa sa Damasco,+ ug tungod sa upat, dili ko kini isibog, tungod sa ilang paggiok sa Gilead+ pinaagi sa puthawng mga galamiton sa paggiok.
4 Ug ako magpadalag kalayo+ sa balay ni Hazael,+ ug kini molamoy sa mga puloy-anang torre ni Ben-hadad.+
5 Ug akong gub-on ang trangka sa Damasco+ ug laglagon ang mga molupyo gikan sa Bikat-aven, ug ang naghupot sa setro gikan sa Bet-eden; ug ang katawhan sa Sirya madestiyero gayod ngadto sa Kir,”+ miingon si Jehova.’
6 “Mao kini ang giingon ni Jehova, ‘“Tungod sa tulo ka pag-alsa sa Gaza,+ ug tungod sa upat, dili ko kini isibog, tungod sa ilang pagdestiyero sa tibuok hugpong sa mga destiyero+ aron itugyan ngadto sa Edom.+
7 Ug ako magpadalag kalayo ngadto sa paril sa Gaza,+ ug lamyon niini ang iyang mga puloy-anang torre.
8 Ug putlon ko ang mga molupyo gikan sa Asdod,+ ug ang naghupot sa setro gikan sa Askelon;+ ug ibalik ko ang akong kamot+ ibabaw sa Ekron,+ ug ang mahibilin sa mga Filistehanon mangalaglag,”+ miingon ang Soberanong Ginoong Jehova.’
9 “Mao kini ang giingon ni Jehova, ‘Tungod sa tulo ka pag-alsa sa Tiro,+ ug tungod sa upat, dili ko kini isibog, tungod sa ilang pagtugyan sa tibuok hugpong sa mga destiyero ngadto sa Edom, ug tungod kay sila wala mahinumdom sa pakigsaad sa mga igsoon.+
10 Ug ako magpadalag kalayo ngadto sa paril sa Tiro, ug lamyon niini ang iyang mga puloy-anang torre.’+
11 “Mao kini ang giingon ni Jehova, ‘Tungod sa tulo ka pag-alsa sa Edom,+ ug tungod sa upat, dili ko kini isibog, tungod kay iyang gigukod sa espada ang kaugalingon niyang igsoon,+ ug tungod kay iyang gidaot ang kaugalingon niyang maluluy-ong mga hiyas,+ ug ang iyang kasuko nagpadayon sa pagwataswatas hangtod sa kahangtoran; ug ang iyang mabangis nga kasuko—iyang gihambin kini hangtod sa kahangtoran.+
12 Ug ako magpadalag kalayo ngadto sa Teman,+ ug lamyon niini ang mga puloy-anang torre sa Bozra.’+
13 “Mao kini ang giingon ni Jehova, ‘“Tungod sa tulo ka pag-alsa sa mga anak sa Ammon,+ ug tungod sa upat, dili ko kini isibog,+ tungod sa ilang pagyasyas sa babayeng mabdos sa Gilead, aron pasangkaron ang kaugalingon nilang teritoryo.+
14 Ug pasilaoban ko sa kalayo ang paril sa Raba,+ ug lamyon niini ang iyang mga puloy-anang torre, uban ang pasidaan sa adlaw sa gubat, uban ang kusog nga bagyo sa adlaw sa unos.+
15 Ug ang ilang hari madestiyero gayod, siya ug ang iyang mga prinsipe sa tingob,”+ miingon si Jehova.’
