Jonas 1:1-17
1 Ug ang pulong ni Jehova midangat kang Jonas+ nga anak nga lalaki ni Amitai, nga nag-ingon:
2 “Tindog, adto sa Nineve+ nga dakong siyudad, ug imantala batok kaniya nga ang ilang pagkadaotan midangat sa akong atubangan.”+
3 Ug si Jonas mitindog ug mikalagiw ngadto sa Tarsis+ gikan sa atubangan ni Jehova;+ ug sa kataposan siya milugsong sa Jope+ ug nakakaplag ug barko nga mopaingon sa Tarsis. Busa siya mibayad sa plete ug misakay niini, aron moadto uban kanila sa Tarsis gikan sa atubangan ni Jehova.
4 Ug si Jehova nagpadalag usa ka makusog nga hangin ibabaw sa kadagatan,+ ug miabot ang usa ka kusog kaayong bagyo+ sa dagat; ug bahin sa barko, kini hapit na maguba.
5 Ug ang mga marinero nangahadlok ug nagpakitabang, ang tagsatagsa ngadto sa iyang diyos.+ Ug gipanglabay nila sa dagat ang mga butang diha sa barko, aron kini pagaanan nila.+ Apan si Jonas nanaog ngadto sa kinailadmang bahin sa inandanahang sakayan, ug siya mihigda ug nahinanok sa pagkatulog.+
6 Unya ang kapitan sa barko miduol kaniya ug miingon: “Naunsa god ka, hingatulgon? Bangon, sangpita ang imong diyos!+ Basin pag ang matuod nga Diyos mahingawa kanato, ug kita dili mangamatay.”+
7 Ug sila miingon sa usag usa: “Ari kamo, ug magripa kita,+ aron atong mahibaloan kon kinsay hinungdan niining maong katalagman.”+ Ug nagripa sila, ug sa kataposan ang ripa natunong kang Jonas.+
8 Busa sila miingon kaniya: “Isulti kanamo, palihog, kinsa ang hinungdan niining atong katalagman?+ Unsa may imong trabaho, ug diin ka gikan? Tagadiin ka nga yuta, ug gikan ka sa unsa nga katawhan?”
9 Niana siya miingon kanila: “Usa ako ka Hebreohanon,+ ug si Jehova nga Diyos sa kalangitan+ ang akong gikahadlokan,+ ang Usa nga nagbuhat sa dagat ug sa mamalang yuta.”+
10 Ug ang mga tawo nangahadlok sa hilabihan, ug miingon kaniya: “Unsa kining imong nabuhat?”+ Kay nahibaloan sa maong mga tawo nga siya mikalagiw gikan sa atubangan ni Jehova, tungod kay siya nagsugilon man kanila.
11 Sa kataposan sila miingon kaniya: “Unsay among buhaton kanimo,+ aron ang dagat molinaw alang kanamo?” Kay misamot kakusog ang bagyo sa dagat.
12 Busa siya miingon kanila: “Alsaha ninyo ako ug itambog ako sa dagat, ug ang dagat molinaw alang kaninyo; kay ako nasayod nga tungod kanako nga kining kusog kaayong bagyo midangat kaninyo.”+
13 Apan ang mga tawo naninguha sa pagsungasong, aron ibalik ang barko ngadto sa mamalang yuta; apan wala sila makahimo, tungod kay misamot kakusog ang bagyo sa dagat batok kanila.+
14 Ug sila mituaw kang Jehova ug miingon:+ “Intawon, Oh Jehova, palihog, hinaot nga kami dili mangamatay tungod sa kalag niining maong tawo! Ug ayaw ibutang sa ibabaw namo ang inosenteng dugo,+ sanglit ikaw, Oh Jehova, nagbuhat sumala sa imong gikahimut-an!”+
15 Unya ilang gialsa si Jonas ug gitambog siya sa dagat; ug ang dagat mihunong sa iyang kabangis.+
16 Niana ang mga tawo nangahadlok kang Jehova sa hilabihan,+ ug busa sila nanaghalad ug halad kang Jehova+ ug nanagpanaad.+
17 Karon si Jehova nag-andam ug usa ka dakong isda aron molamoy kang Jonas,+ mao nga si Jonas didto sa kahiladmang mga bahin sa isda tulo ka adlaw ug tulo ka gabii.+
