Levitico 21:1-24
21 Ug si Jehova miingon kang Moises: “Pakigsultihi ang mga saserdote, ang mga anak nga lalaki ni Aaron, ug magaingon ka kanila, ‘Walay usa nga maghugaw sa iyang kaugalingon taliwala sa iyang katawhan tungod sa usa ka kalag nga namatay.+
2 Apan tungod sa usa ka kadugo nga suod kaniya, tungod sa iyang inahan ug tungod sa iyang amahan ug tungod sa iyang anak nga lalaki ug tungod sa iyang anak nga babaye ug tungod sa iyang igsoong lalaki
3 ug tungod sa iyang igsoong babaye, usa ka ulay nga suod niya, nga wala mapanag-iya sa usa ka lalaki, tungod kaniya mahimo niyang hugawan ang iyang kaugalingon.
4 Dili niya hugawan ang iyang kaugalingon [tungod sa usa ka babaye nga gipanag-iya] sa usa ka tag-iya taliwala sa iyang katawhan nga tungod niana mahugawan ang iyang kaugalingon.
5 Kinahanglan nga dili sila magpaupaw sa ilang mga ulo,+ ug dili magbalbas sa tumoy sa ilang bungot,+ ug dili magsamad sa ilang unod.+
6 Kinahanglan nilang pamatud-an ang ilang kaugalingon nga balaan ngadto sa ilang Diyos,+ ug dili gayod nila pasipalahan ang ngalan sa ilang Diyos,+ tungod kay sila kadtong nagatanyag sa mga halad ni Jehova nga gihimo pinaagi sa kalayo, ang tinapay sa ilang Diyos;+ ug ilang pamatud-an ang ilang kaugalingon nga balaan.+
7 Dili sila mangasawa ug usa ka pampam+ o babayeng giamong-amongan; ug dili sila mangasawa+ ug usa ka babaye nga gidiborsiyohan+ sa iyang bana, tungod kay balaan siya alang sa iyang Diyos.
8 Busa balaanon mo siya,+ tungod kay siya ang nagahalad sa tinapay sa imong Diyos. Siya kinahanglan nga mahimong balaan kanimo,+ tungod kay ako si Jehova, nga nagabalaan kaninyo, maoy balaan.+
9 “‘Karon kon ang anak nga babaye sa usa ka saserdote maghugaw sa iyang kaugalingon pinaagi sa pagpamampam, ang iyang amahan ang iyang gipasipalahan. Kinahanglan siyang sunogon sa kalayo.+
10 “‘Ug kon bahin sa hataas nga saserdote sa iyang mga igsoon kansang ulo pagabuboan sa igdidihog nga lana+ ug kansang kamot gipuno sa gahom aron makasul-ob sa mga besti,+ dili niya pasagdan nga magkalkag ang buhok sa iyang ulo,+ ug dili niya gision ang iyang mga besti.+
11 Ug dili siya moadto sa bisan unsang patay nga kalag.+ Dili niya hugawan ang iyang kaugalingon tungod sa iyang amahan ug sa iyang inahan.
12 Dili usab siya mogula sa sangtuwaryo ug dili pasipalahan ang sangtuwaryo sa iyang Diyos,+ tungod kay ang ilhanan sa pahinungod, ang igdidihog nga lana sa iyang Diyos,+ anaa man kaniya. Ako mao si Jehova.
13 “‘Ug sa iyang bahin, siya magakuha ug babaye nga ulay.+
14 Kon bahin sa usa ka balo nga babaye o diborsiyada ug usa nga giamong-amongan, usa ka pampam, niini nila siya dili magkuha, hinunoa siya magkuha ug usa ka ulay gikan sa iyang katawhan ingong asawa.
15 Ug kinahanglan nga dili niya hugawan ang iyang binhi taliwala sa iyang katawhan,+ tungod kay ako si Jehova nga nagabalaan kaniya.’”+
16 Ug si Jehova nagpadayon sa pagsulti kang Moises, nga nag-ingon:
17 “Sultihi si Aaron, nga mag-ingon, ‘Sa tanan nilang kaliwatan walay lalaki sa imong binhi nga may depekto+ ang makaduol sa paghalad sa tinapay sa iyang Diyos.+
18 Kon si bisan kinsa nga lalaki nga adunay depekto, siya dili makaduol: usa ka lalaki nga buta o bakol o may gisi sa iyang ilong o taas kaayo ang usa ka sangkap,+
19 o usa ka lalaki nga may bali sa tiil o sa kamot,
20 o buktot o niwang o may sakit sa iyang mga mata o kagiron o may bun-i o napusa ang iyang mga itlog.+
21 Bisan kinsa sa binhi ni Aaron nga saserdote nga kaniya may depekto dili makaduol aron sa paghalad sa mga halad ni Jehova nga gihimo pinaagi sa kalayo.+ Siya may depekto. Siya dili makaduol sa paghalad sa tinapay sa iyang Diyos.+
22 Makakaon siya sa tinapay sa iyang Diyos gikan sa labing balaang mga butang+ ug gikan sa balaang mga butang.+
23 Apan, siya dili makasulod duol sa kortina,+ ug siya dili makaduol sa halaran,+ tungod kay siya may depekto;+ ug kinahanglan nga dili niya pasipalahan ang akong sangtuwaryo,+ kay ako mao si Jehova nga nagabalaan kanila.’”+
24 Niana si Moises misulti kang Aaron ug sa iyang mga anak nga lalaki ug sa tanang anak sa Israel.
