Ang Balaang Bibliya maoy sinulat nga pagpakigkomunikar sa Diyos kanatong tanan. Kinahanglan nato kining tun-an aron mailhan ang Awtor niini. (Juan 17:3; 2 Timoteo 3:16) Diha niini, gipadayag ni Jehova nga Diyos ang iyang katuyoan alang sa katawhan ug sa yuta.​—Genesis 3:15; Pinadayag 21:3, 4.

Walay laing basahon nga may ingon niana ka dakong epekto sa kinabuhi sa mga tawo. Ang Bibliya nagdasig kanato sa pagbanaag sa gugma, kaluoy, ug pagkamabination ni Jehova. Kini naghatag ug paglaom, nga nakatabang sa mga tawo sa paglahutay bisan sa grabeng pag-antos. Ug padayon niining giyagyag ang “mga butang” niining kalibotana nga dili uyon sa hingpit nga kabubut-on sa Diyos.​—Salmo 119:105; Hebreohanon 4:12; 1 Juan 2:15-17.

Sa orihinal, ang Bibliya gisulat sa Hebreohanon, Aramaiko, ug Grego. Ug kini, ang tibuok o bahin niini, gihubad sa kapig 3,000 ka pinulongan. Sa kasaysayan, kini gayod ang labing kaylap nga nahubad ug naapod-apod nga basahon. Makadahom gayod kita niini kay ang Bibliya nagtagna: “Kining maayong balita sa Gingharian [ang pangunang mensahe sa Bibliya] isangyaw sa tibuok yuta sa pagpamatuod ngadto sa tanang kanasoran, ug unya moabot ang kataposan.”​—Mateo 24:14.

Kay nasayod nga importante ang mensahe sa Bibliya, tumong namo nga mahubad kini dili lang nga tukma sa orihinal kondili tin-aw usab ug sayon basahon. Ang mga artikulo sa Apendise nga “Mga Prinsipyo sa Paghubad sa Bibliya,” “Makapainteres nga mga Bahin Niini nga Rebisyon,” ug “Kon sa Unsang Paagi Nakaabot Kanato ang Bibliya” naghisgot sa pipila ka prinsipyo nga gisunod sa paghubad, ingon man ang mga eksplinasyon sa makapainteres nga mga bahin niini nga rebisyon.

Kadtong mga nahigugma kang Jehova nga Diyos ug nagsimba kaniya nagtinguhag tukma ug sayon sabton nga hubad sa Pulong sa Diyos. (1 Timoteo 2:4) Busa gihimo namong mabatonan kini nga rebisyon sa Cebuano, kay tuyo namo nga mahubad ang New World Translation sa daghang pinulongan kutob sa mahimo. Kami naglaom ug nag-ampo nga kini nga edisyon sa Balaang Kasulatan makatabang kanimo, minahal nga magbabasa, samtang naningkamot ka sa ‘pagpangita sa Diyos, ug imo siyang makaplagan.’​—Buhat 17:27.