Unang Cronicas 12:1-40
-
Mga tigpaluyo sa pagkahari ni David (1-40)
12 Mao kini ang mga lalaki nga miadto kang David sa Ziklag+ samtang siya nagtagotago tungod kang Saul+ nga anak ni Kis, ug lakip sila sa banggiitang mga manggugubat nga misuportar kaniya sa gubat.+
2 Sila armadog pana, ug sila makalambuyog ug mga bato+ o makapana gamit ang ilang tuong kamot ug walang kamot.+ Sila maoy mga igsoon ni Saul, gikan sa tribo ni Benjamin.+
3 Si Ahiezer mao ang pangulo, uban kang Joas, nga mga anak ni Semaa nga Gibeahanon;+ si Jeziel ug Pelet nga mga anak ni Azmavet,+ si Beraca, si Jehu nga taga-Anatot,
4 si Ismaias nga Gabaonhon,+ usa ka banggiitang manggugubat nga lakip sa 30+ ug maoy nagdumala sa 30; ug si Jeremias, Jahaziel, Johanan, Jozabad nga Gederahanon,
5 Eluzai, Jerimot, Bealias, Semarias, Sepatias nga Hariphanon,
6 Elkana, Isia, Azarel, Joezer, ug Jasobeam, nga mga Korehanon;+
7 ug si Joela ug Zebadias nga mga anak ni Jeroham sa Gedor.
8 Ang ubang Gadhanon miadto kang David didto sa iyang dangpanan sa kamingawan+ sa pagdapig kaniya; sila maoy banggiitang mga manggugubat, mga sundalo nga nabansay alang sa gubat, nga hanas sa paggamit sa dakong taming ug bangkaw, kansang mga nawong sama nianang sa mga leyon ug sila sama ka tulin sa mga gasela diha sa kabukiran.
9 Si Ezer mao ang pangulo, si Abdias ang ikaduha, si Eliab ang ikatulo,
10 si Mismana ang ikaupat, si Jeremias ang ikalima,
11 si Atai ang ikaunom, si Eliel ang ikapito,
12 si Johanan ang ikawalo, si Elzabad ang ikasiyam,
13 si Jeremias ang ika-10, si Makbanai ang ika-11.
14 Kini sila maoy mga Gadhanon,+ mga pangulo sa kasundalohan. Ang kinaubsan kanila katumbas sa 100, ug ang kinalabwan katumbas sa 1,000.+
15 Mao kini ang mga lalaki nga mitabok sa Jordan sa unang bulan dihang kini miawas sa mga tampi niini, ug ilang gigukod ang tanang nagpuyo sa ubos nga kapatagan, ngadto sa sidlakan ug ngadto sa kasadpan.
16 Ang ubang lalaki sa Benjamin ug Juda nangadto usab kang David didto sa iyang dangpanan.+
17 Unya si David migula ug miatubang kanila ug miingon: “Kon alang sa pakigdait nga kamo mianhi kanako sa pagtabang kanako, ang akong kasingkasing mahiusa kaninyo. Apan kon mianhi mo sa pagbudhi kanako ngadto sa akong mga kaaway bisag walay nahimong kasaypanan ang akong mga kamot, hinaot makita kini sa Diyos sa atong katigulangan ug siya maghukom.”+
18 Unya ang espiritu sa Diyos milihok kang Amasai,+ ang pangulo sa 30, ug siya miingon:
“Imo kami, Oh David, ug kauban mi nimo, Oh anak ni Jese.+
Kalinaw, ang kalinaw maimo ug maanaa usab sa nagatabang kanimo,+Kay ang imong Diyos nagtabang kanimo.”
Busa gidawat sila ni David ug gitudlo usab sila ingong mga pangulo sa kasundalohan.
19 Ang uban sa tribo ni Manases midapig usab kang David dihang miuban siya sa mga Filistehanon sa pagpakiggubat kang Saul; apan wala siya motabang sa mga Filistehanon, kay human sa pagsabotsabot sa mga magmamando sa mga Filistehanon,+ ila siyang gipalakaw kay matod pa nila: “Siya motalikod kanato ug modapig sa iyang ginoong si Saul, ug mameligro ang atong kinabuhi.”+
20 Dihang siya miadto sa Ziklag,+ mao kini ang midapig kaniya gikan sa tribo ni Manases: si Adna, Jozabad, Jediael, Miguel, Jozabad, Elihu, ug Ziletai, nga mga pangulo sa linibo sa tribo ni Manases.+
21 Sila mitabang kang David batok sa mga bandido, kay silang tanan kusgan ug isog nga mga lalaki,+ ug sila nahimong mga pangulo sa kasundalohan.
22 Kada adlaw dunay mga tawo nga mangadto kang David+ sa pagtabang kaniya hangtod nga nanaghan ang iyang kasundalohan nga sama ka daghan sa kasundalohan sa Diyos.+
23 Mao kini ang gidaghanon sa mga pangulo niadtong armado alang sa gubat nga miadto kang David sa Hebron+ aron itugyan kaniya ang pagkahari ni Saul sumala sa mando ni Jehova.+
24 Ang mga lalaki sa Juda nga nagdalag dagkong taming ug bangkaw maoy 6,800, nga armado alang sa gubat.
25 Sa mga Simeonhon, ang kusgan ug isog nga mga sundalo maoy 7,100.
26 Sa mga Levihanon, 4,600.
27 Si Jehoiada+ mao ang pangulo sa mga anak ni Aaron,+ ug ang kauban niya maoy 3,700,
28 ingon man si Zadok,+ nga kusgan ug isog nga batan-ong lalaki, kauban ang 22 ka pangulo gikan sa iyang banay.*
29 Sa mga Benjaminhon, nga mga igsoon ni Saul,+ dihay 3,000, nga kadaghanan kanila maunongon kaniadto kang Saul ug sa iyang panimalay.
30 Sa mga Epraimnon, dihay 20,800 ka kusgan, isog, ug bantogan nga mga tawo sa ilang banay.*
31 Sa katunga sa tribo ni Manases, dihay 18,000 nga gipili nga moadto kang David aron himoon siyang hari.
32 Sa tribo ni Isacar, dihay 200 sa ilang mga pangulo nga nakasabot sa mga panahon ug nahibalo kon unsay angay nga buhaton sa Israel, ug ang tanan nilang igsoon nailalom kanila.
33 Sa tribo ni Zabulon, dihay 50,000 nga andam sa pagpakiggubat ug armado sa tanang hinagiban. Silang tanan miadto kang David ug miunong gayod kaniya.*
34 Sa tribo ni Neptali, dihay 1,000 ka pangulo, ug kauban nila ang 37,000 nga may dagkong taming ug bangkaw.
35 Sa mga Danhanon, dihay 28,600 nga andam sa pagpakiggubat.
36 Ug sa tribo ni Aser, dihay 40,000 nga andam sa pagpakiggubat.
37 Gikan sa tabok sa Jordan,+ sa mga Rubenhon, Gadhanon, ug sa katunga sa tribo ni Manases, dihay 120,000 ka sundalo nga armado sa tanang matang sa hinagiban.
38 Kini silang tanan maoy mga manggugubat, nga andam mohan-ay alang sa pagpakiggubat; sila miadto sa Hebron nga determinado gayod sa paghimo kang David nga hari sa tibuok Israel, ug usab ang uban pa sa Israel nagkahiusa sa ilang tinguha* nga himoong hari si David.+
39 Ug sila nagpabilin didto uban kang David sulod sa tulo ka adlaw, nga nangaon ug nanginom, kay ang ilang mga igsoon nag-andam alang kanila.
40 Dugang pa, kadtong anaa sa ilang duol, ug bisan kadtong anaa sa mga dapit nga ingon ka layo sa Isacar, Zabulon, ug Neptali, nagdalag pagkaon sakay sa mga asno, kamelyo, mula, ug baka—harina, mga tinapay nga hinimo sa pinisa nga mga igos ug pasas, bino, lana, ug daghan kaayong baka ug karnero, kay dihay pagsadya sa Israel.
Mga Footnote
^ Sa linya sa amahan.
^ Sa linya sa amahan.
^ O “Ang tanan nga miadto kang David dili dobleg kasingkasing.”
^ Literal, “may usa ka kasingkasing.”
