Unang Cronicas 13:1-14
13 Si David mikonsulta sa mga pangulo sa kada 1,000, sa mga pangulo sa kada 100, ug sa matag pangulo.+
2 Unya si David miingon sa tibuok kongregasyon sa Israel: “Kon maayo alang kaninyo ug kon dalawaton kang Jehova nga atong Diyos, padalhan natog mensahe ang uban natong mga igsoon sa tanang dapit sa Israel ug ang mga saserdote ug ang mga Levihanon diha sa ilang mga siyudad+ nga may mga sibsibanan, nga manganhi sila ug moduyog kanato.
3 Ug atong ibalik dinhi ang Kaban+ sa atong Diyos.” Kay ila kining gipasagdan sa mga adlaw ni Saul.+
4 Ang tibuok kongregasyon miuyon niana, kay daw maayo kana sa panan-aw sa tibuok katawhan.
5 Busa gitigom ni David ang tibuok Israel, gikan sa suba* sa Ehipto hangtod sa Lebo-hamat,*+ aron dad-on ang Kaban sa matuod nga Diyos gikan sa Kiriat-jearim.+
6 Si David ug ang tibuok Israel mitungas sa Baala,+ sa Kiriat-jearim, nga sakop sa Juda, aron kuhaon didto ang Kaban sa matuod nga Diyos, si Jehova, nga naglingkod sa trono ibabaw* sa mga kerubin,+ diin ginatawag ang iyang ngalan.
7 Apan gisakay nila ang Kaban sa matuod nga Diyos diha sa bag-ong karomata+ ug gidala kini gikan sa balay ni Abinadab, ug si Uzah ug Ahio mao ang naggiya sa karomata.+
8 Si David ug ang tibuok Israel nagsadya pag-ayo sa atubangan sa matuod nga Diyos, nga dinuyogan ug mga awit, mga alpa, ug ubang dekuwerdas nga mga instrumento, mga tamborin,+ mga simbal,+ ug mga trompeta.+
9 Apan pag-abot nila sa giokanan sa Kidon, gikab-ot ug gihawiran ni Uzah ang Kaban kay hapit kining malintuwad sa mga baka.
10 Tungod niana misilaob ang kasuko ni Jehova kang Uzah, ug Iyang gipatay siya kay iyang gikab-ot ang Kaban,+ ug siya namatay didto atubangan sa Diyos.+
11 Apan nasuko si* David kay miulbo ang kasuko ni Jehova kang Uzah; ug kadtong dapita gitawag nga Perez-uzah* hangtod niining adlawa.
12 Busa si David nahadlok sa matuod nga Diyos niadtong adlawa ug miingon: “Unsaon man nako pagdala sa Kaban sa matuod nga Diyos nganhi kanako?”+
13 Wala dad-a ni David ang Kaban ngadto kaniya sa Siyudad ni David, apan siya nagsugo nga dad-on kini sa balay ni Obed-edom nga Gitihanon.
14 Ang Kaban sa matuod nga Diyos didto uban sa panimalay ni Obed-edom, nga nagpabilin sa iyang balay sulod sa tulo ka bulan, ug si Jehova nagpanalangin sa panimalay ni Obed-edom ug sa tanan nga iyaha.+
Mga Footnote
^ O “Sihor.”
^ O “utlanan sa Hamat.”
^ O posible, “taliwala.”
^ O “nasamok ang kasingkasing ni.”
^ Kahulogan, “Kasuko nga Miulbo Batok Kang Uzah.”
