Unang Cronicas 14:1-17
14 Si Haring Hiram+ sa Tiro nagpadalag mga mensahero kang David, ingon man mga kahoyng sedro, mga mason,* ug mga panday aron magtukod ug balay* alang kaniya.+
2 Ug si David nahibalo nga gipalig-on ni Jehova ang iyang pagkahari sa Israel,+ kay ang iyang pagkahari gibayaw pag-ayo alang sa Israel nga Iyang katawhan.+
3 Si David nagkuhag dugang mga asawa+ sa Jerusalem, ug nadugangan usab ang mga anak nga lalaki ug anak nga babaye ni David.+
4 Mao kini ang mga ngalan sa iyang mga anak nga natawo sa Jerusalem:+ si Samua, Sobab, Natan,+ Solomon,+
5 Ibhar, Elisua, Elpelet,
6 Noga, Nepeg, Japia,
7 Elisama, Beeliada, ug Elipelet.
8 Pagkadungog sa mga Filistehanon nga si David gidihogan na ingong hari sa tibuok Israel,+ ang tanang Filistehanon miadto sa pagpangita kang David.+ Pagkahibalo niini ni David, siya miadto aron makig-away kanila.
9 Unya ang mga Filistehanon miabot ug gisulong ang Walog* sa Repaim.+
10 Si David nagpakisayod sa Diyos: “Moadto ba ko sa pagpakig-away sa mga Filistehanon? Imo ba silang itugyan sa akong kamot?” Si Jehova mitubag: “Adto, ug itugyan gyod nako sila sa imong kamot.”+
11 Busa si David mitungas sa Baal-perazim+ ug gipamatay niya sila didto. Ug si David miingon: “Ang matuod nga Diyos nagpukan sa akong mga kaaway pinaagi sa akong kamot, samag paril nga nabungkag tungod sa tubig.” Mao nga ilang ginganlan kadtong dapita ug Baal-perazim.*
12 Gibiyaan sa mga Filistehanon ang ilang mga diyos didto, ug sumala sa mando ni David, kini gipangsunog.+
13 Sa ulahi ang mga Filistehanon misulong na usab sa walog.*+
14 Si David nagpakisayod na usab sa Diyos, apan ang matuod nga Diyos miingon: “Ayaw silag atakeha nga inatubangay. Lipota sila, ug atakeha sila atubangan sa mga kahoykahoy nga baca.+
15 Ug inigkadungog nimo nga daw may dinahunog sa pagmartsa diha sa ibabaw sa mga kahoykahoy nga baca, atakeha dayon sila, kay ang matuod nga Diyos nag-una na kanimo sa paglaglag sa kasundalohan sa mga Filistehanon.”+
16 Busa gibuhat gayod ni David ang gisugo sa matuod nga Diyos kaniya,+ ug gipamatay nila ang kasundalohan sa mga Filistehanon gikan sa Gabaon hangtod sa Gezer.+
17 Ug si David nabantog sa tanang kayutaan, ug gipahinabo ni Jehova nga siya kahadlokan sa tanang nasod.+
Mga Footnote
^ O “magtutukod ug paril.”
^ O “palasyo.”
^ O “Ubos nga Patag.”
^ Kahulogan, “Agalon sa Pagpamungkag.”
^ O “ubos nga patag.”