Unang Cronicas 15:1-29
15 Ug siya nagpadayon sa pagtukod ug mga balay alang sa iyang kaugalingon sa Siyudad ni David, ug siya nag-andam ug dapit alang sa Kaban sa matuod nga Diyos ug nagpatindog ug tolda alang niini.+
2 Niadtong panahona si David miingon: “Walay bisan kinsa nga magdala sa Kaban sa matuod nga Diyos gawas sa mga Levihanon, kay gipili sila ni Jehova sa pagdala sa Kaban ni Jehova ug sa pag-alagad kaniya sa kanunay.”+
3 Unya gitigom ni David ang tibuok Israel didto sa Jerusalem aron dad-on ang Kaban ni Jehova ngadto sa dapit nga iyang giandam alang niini.+
4 Gitigom ni David ang mga kaliwat ni Aaron+ ug ang mga Levihanon:+
5 sa mga Kohatnon, si Uriel nga pangulo ug 120 sa iyang mga igsoon;
6 sa mga Merarihanon, si Asaias+ nga pangulo ug 220 sa iyang mga igsoon;
7 sa mga Gersomhon, si Joel+ nga pangulo ug ang 130 sa iyang mga igsoon;
8 sa mga kaliwat ni Elizapan,+ si Semaias nga pangulo ug 200 sa iyang mga igsoon;
9 sa mga kaliwat ni Hebron, si Eliel nga pangulo ug 80 sa iyang mga igsoon;
10 sa mga kaliwat ni Uziel,+ si Aminadab nga pangulo ug 112 sa iyang mga igsoon.
11 Dugang pa, gitawag ni David ang mga saserdote nga si Zadok+ ug Abiatar+ ug ang mga Levihanon nga si Uriel, Asaias, Joel, Semaias, Eliel, ug Aminadab,
12 ug giingnan sila: “Kamo ang mga pangulo sa banay* sa mga Levihanon. Balaana ang inyong kaugalingon, kamo ug ang inyong mga igsoon, ug dad-a ang Kaban ni Jehova nga Diyos sa Israel ngadto sa dapit nga akong giandam alang niini.
13 Kay dili man kamo ang nagdala niini sa unang higayon nga gidala kini,+ miulbo ang kasuko ni Jehova nga atong Diyos batok kanato,+ kay wala nato sunda ang hustong pamaagi.”+
14 Busa gibalaan sa mga saserdote ug sa mga Levihanon ang ilang kaugalingon aron dad-on ang Kaban ni Jehova nga Diyos sa Israel.
15 Unya gidala sa mga Levihanon ang Kaban sa matuod nga Diyos pinaagi sa pagpas-an sa mga yayongan niini,+ sumala sa gisugo ni Jehova pinaagi kang Moises.
16 Unya giingnan ni David ang mga pangulo sa mga Levihanon nga itudlo ang ilang mga igsoon nga mga mag-aawit sa pag-awit nga malipayon, nga dinuyogan sa mga instrumento sa musika: dekuwerdas nga mga instrumento, mga alpa,+ ug mga simbal.+
17 Busa gitudlo sa mga Levihanon si Heman+ nga anak ni Joel ug, sa iyang mga igsoon, si Asap+ nga anak ni Berekias ug, sa mga Merarihanon nga ilang mga igsoon, si Etan+ nga anak ni Kusaias.
18 Uban kanila ang ilang mga igsoon sa ikaduhang dibisyon,+ si Zacarias, Ben, Jaaziel, Semiramot, Jehiel, Uni, Eliab, Benaias, Maaseias, Matitias, Elipelehu, ug Mikneias ug si Obed-edom ug Jeiel nga mga magbalantay sa ganghaan.
19 Ang mga mag-aawit nga si Heman,+ Asap,+ ug Etan mao ang nagpatugtog sa mga simbal nga tumbaga;*+
20 ug si Zacarias, Aziel, Semiramot, Jehiel, Uni, Eliab, Maaseias, ug Benaias nagpatugtog sa dekuwerdas nga mga instrumento sa tono sa Alamot;*+
21 ug si Matitias,+ Elipelehu, Mikneias, Obed-edom, Jeiel, ug Azazias nagpatugtog sa mga alpa sa tono sa Sheminith,*+ sa pag-alagad ingong mga tigdumala.
22 Si Kenanias+ nga pangulo sa mga Levihanon mao ang nagdumala sa pagdala sa Kaban, kay siya batid niini,
23 ug si Berekias ug Elkana mao ang mga magbalantay sa ganghaan alang sa Kaban.
24 Ang mga saserdote nga si Sebanias, Josapat, Netanel, Amasai, Zacarias, Benaias, ug Eliezer nagpalanog sa mga trompeta sa atubangan sa Kaban sa matuod nga Diyos,+ ug si Obed-edom ug Jehias nag-alagad usab ingong mga magbalantay sa ganghaan alang sa Kaban.
25 Unya si David ug ang mga ansiyano sa Israel ug ang mga pangulo sa kada 1,000 miadto nga masadyaon sa pagdala sa kaban sa pakigsaad ni Jehova gikan sa balay ni Obed-edom.+
26 Kay gitabangan sa matuod nga Diyos ang mga Levihanon nga nagdala sa kaban sa pakigsaad ni Jehova, sila naghalad ug pito ka toreyong baka ug pito ka laking karnero.+
27 Si David nagsul-ob ug besti nga walay bukton nga gama sa maayong klase nga panapton, ingon man ang tanang Levihanon nga nagdala sa Kaban, ang mga mag-aawit, ug si Kenanias nga nagdumala sa pagdala sa Kaban ug sa mga mag-aawit; si David nagsul-ob usab ug epod nga lino.+
28 Samtang gidala sa tanang Israelinhon ang kaban sa pakigsaad ni Jehova, sila naninggit sa kalipay,+ nga nagpatingog ug budyong, mga trompeta,+ ug mga simbal, ug nagpatugtog ug kusog sa dekuwerdas nga mga instrumento ug mga alpa.+
29 Apan dihang miabot ang kaban sa pakigsaad ni Jehova sa Siyudad ni David,+ si Mikal+ nga anak ni Saul midungaw sa bentana ug iyang nakita si Haring David nga nagluksolukso ug nagsadya pag-ayo; ug iyang gitamay siya diha sa iyang kasingkasing.+
