Unang Cronicas 19:1-19
19 Sa ulahi si Nahas nga hari sa mga Ammonhanon namatay, ug ang iyang anak nahimong hari puli kaniya.+
2 Si David miingon: “Pakitaan nakog maunongong gugma+ si Hanun nga anak ni Nahas, kay ang iyang amahan nagpakita kanakog maunongong gugma.” Busa gipaadto ni David ang iyang mga mensahero aron hupayon siya sa pagkamatay sa iyang amahan. Apan pag-adto sa mga alagad ni David sa yuta sa mga Ammonhanon+ sa paghupay kang Hanun,
3 ang mga prinsipe sa mga Ammonhanon miingon kang Hanun: “Nagtuo ba ka nga si David nagpadala kanimog mga maghuhupay isip pagpasidungog sa imong amahan? Dili kaha nga gipadala niya ang iyang mga alagad kanimo sa paghimog bug-os nga pagsusi ug sa pagpukan kanimo ug sa pagpangespiya sa yuta?”
4 Busa gikuha ni Hanun ang mga alagad ni David ug gibalbasan sila+ ug giputlan ang ilang mga besti abot sa ilang sampot ug gipalakaw sila.
5 Dihang si David giingnan bahin sa iyang mga alagad, dihadiha nagpadala siyag mga tawo sa pagsugat kanila, kay sila naulawan pag-ayo; ug ang hari miingon kanila: “Pabilin mo sa Jerico+ hangtod manubo ang inyong bungot, unya pamauli mo.”
6 Unya nakita sa mga Ammonhanon nga gidumtan sila ni David, busa si Hanun ug ang mga Ammonhanon nagpadalag 1,000 ka talanton* nga plata aron mag-abang ug mga karo ug magsuhol ug mga mangangabayo gikan sa Mesopotamia,* Aram-maaca, ug Zoba.+
7 Busa sila nag-abang ug 32,000 ka karo ug nagsuhol sa hari sa Maaca ug sa iyang katawhan. Unya sila nangabot ug nagkampo sa atubangan sa Medeba.+ Ang mga Ammonhanon nagtigom gikan sa ilang mga siyudad ug nangadto alang sa gubat.
8 Pagkadungog ni David niini, iyang gipadala si Joab+ ug ang tibuok kasundalohan, lakip ang kinakusgan niyang mga manggugubat.+
9 Ug ang mga Ammonhanon nanggula ug mihan-ay sa entrada sa siyudad aron makiggubat samtang ang mga hari nga nangabot didto mihan-ay sa kapatagan.
10 Dihang nakita ni Joab nga dihay nag-asdang batok kaniya gikan sa atubangan ug sa luyo, siya nagpilig pipila sa kinamaayohang mga sundalo sa Israel ug gipahan-ay sila sa pagpakig-away sa mga Siryanhon.+
11 Ang uban pa sa mga sundalo iyang gipadumala* sa iyang igsoong si Abisai,+ aron pahan-ayon sila sa pagpakig-away sa mga Ammonhanon.
12 Unya siya miingon: “Kon imong makita nga morag mapildi ko sa mga Siryanhon,+ adtoa ko ug tabangi ko; apan kon makita nako nga morag mapildi ka sa mga Ammonhanon, ako kang tabangan.
13 Kinahanglang magmalig-on ug magmaisogon+ kita alang sa atong katawhan ug alang sa mga siyudad sa atong Diyos, ug himoon ni Jehova kon unsay maayo sa iyang panan-aw.”
14 Unya si Joab ug ang iyang mga tawo miasdang sa pagpakig-away sa mga Siryanhon, ug sila nangalagiw gikan kaniya.+
15 Dihang nakita sa mga Ammonhanon nga nangalagiw ang mga Siryanhon, sila usab mikalagiw gikan kang Abisai nga iyang igsoon ug nanulod sa siyudad. Human niini, si Joab mibalik sa Jerusalem.
16 Dihang nakita sa mga Siryanhon nga sila napildi sa Israel, sila nagpadalag mga mensahero aron tawgon ang mga Siryanhon nga didto sa rehiyon sa Suba,*+ uban kang Sopak nga pangulo sa kasundalohan ni Hadadezer nga maoy nanguna kanila.+
17 Dihang gibalita kini kang David, dihadiha iyang gitigom ang tibuok Israel ug sila mitabok sa Jordan ug miadto ug mihan-ay batok kanila. Gipahan-ay ni David ang iyang mga sundalo sa pagpakigharong sa mga Siryanhon, ug sila nakig-away kaniya.+
18 Apan ang mga Siryanhon nangalagiw gikan sa Israel; ug napatay ni David ang 7,000 ka magkakaro ug 40,000 ka nagbaktas nga sundalo sa mga Siryanhon, ug gipatay niya si Sopak nga pangulo sa kasundalohan.
19 Dihang nakita sa mga alagad ni Hadadezer nga sila napildi sa Israel,+ dihadiha sila nakigdait kang David ug nahimong iyang mga sakop;+ ug ang Sirya dili na gustong motabang sa mga Ammonhanon.
Mga Footnote
^ Ang usa ka talanton katumbas sa 34.2 kilos. Tan-awa ang Apendise B14.
^ Literal, “Aram-naharaim.”
^ Literal, “gitugyan sa kamot.”
^ Ang Euprates.
