Unang Cronicas 21:1-30
21 Unya si Satanas* mibarog batok sa Israel ug miaghat kang David sa pag-ihap sa Israel.+
2 Busa si David miingon kang Joab+ ug sa mga pangulo sa katawhan: “Lakaw, ipha ang Israel gikan sa Beer-seba hangtod sa Dan;+ unya ipahibalo kini kanako aron akong mahibaloan ang ilang gidaghanon.”
3 Apan si Joab miingon: “Hinaot padaghanon ni Jehova ug 100 ka pilo ang iyang katawhan! Akong ginoong hari, dili ba silang tanan mga alagad na man sa akong ginoo? Nganong gusto kining buhaton sa akong ginoo? Nganong himoon man niyang hinungdan ang iyang kaugalingon nga makasala ang Israel?”
4 Apan mipatigbabaw ang pulong sa hari sa pulong ni Joab. Busa si Joab mibiya ug milibot sa tibuok Israel, ug human niana siya miadto sa Jerusalem.+
5 Karon, gihatag ni Joab kang David ang gidaghanon sa narehistro nga katawhan. Ang tibuok Israel may 1,100,000 ka lalaki nga armadog mga espada, ug ang Juda may 470,000 ka lalaki nga armadog mga espada.+
6 Apan ang Levi ug Benjamin wala irehistro uban kanila,+ kay ang pulong sa hari dulumtanan man kang Joab.+
7 Kini wala gayod mauyoni sa matuod nga Diyos, busa iyang gihampak ang Israel.
8 Unya si David miingon sa matuod nga Diyos: “Nakahimo kog dakong sala+ tungod sa akong gibuhat. Ug karon, palihog pasayloa ang kasaypanan sa imong alagad,+ kay ako milihok gayod nga binuangbuang.”+
9 Ug si Jehova miingon kang Gad,+ ang bisyonaryo* ni David:
10 “Lakaw ug sultihi si David, ‘Mao kini ang giingon ni Jehova: “Hatagan ka nakog tulo ka kapilian. Pagpili kon hain niini ang akong ipahamtang kanimo.”’”
11 Busa si Gad miadto kang David ug miingon kaniya: “Mao kini ang giingon ni Jehova, ‘Pagpili
12 kon tulo ba ka tuig nga dunay gutom,+ o tulo ka bulan nga mapildi ka sa imong mga kaaway samtang hampakon ka sa espada sa imong mga kaaway,+ o tulo ka adlaw nga silot sa espada ni Jehova, diin may kamatay sa yuta+ ug ang anghel ni Jehova magpahamtang ug kalaglagan+ sa tibuok teritoryo sa Israel.’ Karon hunahunaa kon unsay akong itubag sa Usa nga nagpadala kanako.”
13 Busa si David miingon kang Gad: “Makapaguol kaayo kini kanako. Hinaot nga ako itugyan ngadto sa kamot ni Jehova, kay dako kaayo ang iyang kaluoy;+ apan ayaw kog itugyan sa kamot sa tawo.”+
14 Unya si Jehova nagpahamtang ug kamatay+ sa Israel, mao nga 70,000 ang nangamatay sa Israel.+
15 Dugang pa, ang matuod nga Diyos nagpadalag anghel ngadto sa Jerusalem aron laglagon kini; apan sa dihang himoon na niya kini, nakita kini ni Jehova ug siya nagbasol* tungod sa kamatay,+ ug iyang gisultihan ang anghel nga nagpahamtang sa kalaglagan: “Igo na!+ Ipaubos na ang imong kamot.” Ang anghel ni Jehova nagbarog duol sa giokanan ni Ornan+ nga Jebusihanon.+
16 Pagyahat ni David sa iyang mga mata, iyang nakita ang anghel ni Jehova nga nagbarog sa taliwala sa yuta ug sa langit nga may gikuptang espada+ nga gipunting sa Jerusalem. Dihadiha si David ug ang mga ansiyano, nga nagsul-ob ug sakong panapton,+ nanghapa.+
17 Si David miingon sa matuod nga Diyos: “Dili ba ako man ang nagsugo nga iphon ang katawhan? Ako ang nakasala ug ako ang nakabuhat ug sayop;+ apan kining mga karnero—unsa may ilang nabuhat? Oh Jehova nga akong Diyos, palihog, ibakyaw ang imong kamot batok kanako ug sa panimalay sa akong amahan; apan ayaw ipahamtang kini nga hampak sa imong katawhan.”+
18 Unya giingnan sa anghel ni Jehova si Gad+ nga sultihan si David sa pagtungas ug sa paghimog halaran alang kang Jehova didto sa giokanan ni Ornan nga Jebusihanon.+
19 Busa si David mitungas sumala sa pulong ni Gad, nga iyang gisulti sa ngalan ni Jehova.
20 Sa kasamtangan, si Ornan naggiok ug trigo. Paglingi niya, iyang nakita ang anghel, ug ang iyang upat ka anak nga lalaki nga kauban niya nanago.
21 Samtang nagpadulong si David kaniya, si Ornan milantaw ug iyang nakita si David, ug siya migula dayon gikan sa giokanan ug miluhod ug miyukbo kang David.
22 Si David miingon kang Ornan: “Ibaligya* kanako ang luna sa giokanan, aron maghimo kog halaran alang kang Jehova diha niini. Ibaligya kini kanako kon pila gayoy kantidad niini, aron mohunong ang hampak sa katawhan.”+
23 Apan si Ornan miingon kang David: “Imoha na kini, akong ginoong hari, ug buhata kon unsay maayo alang kanimo.* Aniay mga baka alang sa mga halad nga sinunog ug ania usab ang panggiok nga balsa+ alang sa sugnod ug ang trigo ingong halad nga lugas. Ihatag nako kining tanan.”
24 Apan si Haring David miingon kang Ornan: “Dili, paliton gayod nako kini kon pila gyoy kantidad niini, kay dili ko magkuhag butang nga imoha unya ihatag kini kang Jehova o magtanyag ug mga halad nga sinunog nga dili ko mogasto.”+
25 Busa gihatagan ni David si Ornan ug bulawan nga motimbang ug 600 ka siklo* alang sa maong luna.
26 Ug si David naghimog halaran+ didto alang kang Jehova ug nagtanyag ug mga halad nga sinunog ug mga halad sa panag-ambit, ug siya mitawag kang Jehova, nga karon mitubag kaniya pinaagi sa pagpadalag kalayo+ gikan sa langit ngadto sa halaran sa halad nga sinunog.
27 Unya gisugo ni Jehova ang anghel+ nga iuli ang iyang espada sa sakoban niini.
28 Niadtong panahona, dihang nakita ni David nga gitubag siya ni Jehova diha sa giokanan ni Ornan nga Jebusihanon, siya nagpadayon sa paghalad didto.
29 Apan ang tabernakulo ni Jehova nga gihimo ni Moises sa kamingawan ug ang halaran sa halad nga sinunog didto niadtong panahona sa taas nga dapit sa Gabaon.+
30 Apan si David wala makaadto didto aron sa pagkonsulta sa Diyos, kay siya nahadlok tungod sa espada sa anghel ni Jehova.
Mga Footnote
^ O posible, “usa ka magsusupak.”
^ Tawo nga ginapakitaan sa Diyos ug panan-awon.
^ O “naguol.”
^ Literal, “Ihatag.”
^ Literal, “kon unsay maayo sa iyang mga mata.”
^ Ang usa ka siklo katumbas sa 11.4 gramos. Tan-awa ang Apendise B14.
