Deuteronomio 7:1-26
7 “Dihang dad-on mo ni Jehova nga inyong Diyos sa yuta nga hapit na ninyong adtoon aron panag-iyahon,+ paphaon sab niya gikan sa inyong atubangan ang mga nasod nga daghag molupyo:+ ang mga Hitihanon, Girgasihanon, Amorihanon,+ Canaanhon, Perizihanon, Hivihanon, ug Jebusihanon,+ pito ka nasod nga mas daghag molupyo ug mas gamhanan kay kaninyo.+
2 Itugyan sila kaninyo ni Jehova nga inyong Diyos, ug mapildi gyod ninyo sila.+ Kinahanglang laglagon ninyo sila.+ Ayaw paghimog bisan unsang pakigsaad uban nila ug ayaw silag kaluy-i.+
3 Ayaw pakigminyo nila. Ayaw ihatag ang inyong mga anak nga babaye sa ilang mga anak nga lalaki ug ayaw kuhaa ang ilang mga anak nga babaye para sa inyong mga anak nga lalaki.+
4 Kay ilang hayloon ang inyong mga anak nga mohunong sa pag-alagad sa Diyos aron moalagad sa ubang mga diyos.+ Unya si Jehova masuko pag-ayo ninyo ug laglagon dayon mo niya.+
5 “Kini hinuon ang angay ninyong buhaton nila: Tumpaga ang ilang mga halaran, gub-a ang ilang sagradong mga haligi,+ putla ang ilang sagradong mga poste,*+ ug sunoga ang ilang kinulit nga mga larawan.+
6 Kay kamo maoy balaang katawhan para kang Jehova nga inyong Diyos, ug gipili mo ni Jehova nga inyong Diyos aron mahimong iyang katawhan, iyang espesyal* nga katigayonan, gikan sa tanang katawhan sa yuta.+
7 “Tungod ba kay kamo ang kinadaghanan sa tanang katawhan mao nga gipakitaan mog pagmahal ug gipili ni Jehova?+ Dili. Sa tinuod lang kamo ang kinagamyan sa tanang katawhan.+
8 Apan tungod kini sa gugma ni Jehova kaninyo ug tungod kay iyang gituman ang iyang gipanumpa sa inyong mga katigulangan+ mao nga gipagawas mo ni Jehova pinaagi sa iyang gamhanang kamot, aron tubson mo gikan sa pagkaulipon,+ gikan sa kamot* sa Paraon nga hari sa Ehipto.
9 Nahibalo mo pag-ayo nga si Jehova nga inyong Diyos mao ang matuod nga Diyos, ang kasaligan nga Diyos, nga nagatuman sa iyang pakigsaad ug nagapakita sa iyang maunongong gugma niadtong nahigugma niya ug nagatuman sa iyang mga sugo hangtod sa usa ka libo ka henerasyon.+
10 Apan kadtong mga nagdumot niya iyang balosag kalaglagan.+ Dili siya maglangaylangay sa pagsilot sa mga nagdumot niya; iya gyod silang baslan.
11 Busa tumana gyod ang mga sugo, mga regulasyon, ug hudisyal nga mga hukom nga akong gihatag ninyo karon.
12 “Kon padayon mong mamati niining hudisyal nga mga hukom ug inyo ning tumanon, tumanon sab ni Jehova nga inyong Diyos ang pakigsaad ug padayon niyang ipakita ang maunongong gugma nga iyang gipanumpa sa inyong mga katigulangan.
13 Iya mong higugmaon, panalanginan, ug padaghanon. Panalanginan gyod mo niyag daghang anak*+ ug abot sa yuta, mga lugas, bag-ong bino, lana,+ ug mga nati sa inyong mga baka ug karnero didto sa yuta nga iyang gipanumpa sa inyong mga katigulangan nga ihatag kaninyo.+
14 Panalanginan mo niya labaw sa tanang katawhan.+ Ang tanan ninyong lalaki, babaye, ug hayop makabaton ug mga anak.+
15 Kuhaon ni Jehova kaninyo ang tanang sakit, ug dili niya ipahamtang kaninyo ang grabeng mga sakit nga inyong nahibaloan sa Ehipto.+ Iya hinuon kining ipahamtang niadtong mga nagdumot ninyo.
16 Laglaga* ang tanang katawhan nga itugyan ni Jehova nga inyong Diyos kaninyo.+ Ayaw silag kaluy-i+ ug ayawg alagara ang ilang mga diyos,+ kay mahimo kining lit-ag kaninyo.+
17 “Kon maghunahuna mo,* ‘Kining mga nasora mas daghan kay kanamo. Unsaon man namo sila pag-abog?’+
18 ayaw mog kahadlok nila.+ Hinumdomi kon unsay gibuhat ni Jehova nga inyong Diyos sa Paraon ug sa tibuok Ehipto,+
19 ang grabeng mga paghukom* nga inyong nakita ug ang mga ilhanan ug ang mga milagro+ ug ang dako kaayong gahom ni Jehova nga inyong Diyos nga iyang gigamit sa pagpagawas ninyo.+ Kana ang buhaton ni Jehova nga inyong Diyos sa tanang katawhan nga inyong gikahadlokan.+
20 Ipahinabo ni Jehova nga inyong Diyos nga mangaluya* sila, hangtod nga kadtong mga nahibilin+ ug kadtong mga nanago mangalaglag.
21 Ayawg pangurog tungod nila, kay nagauban ninyo si Jehova nga inyong Diyos,+ ang gamhanan ug kahibulongang Diyos.+
22 “Abogon gyod ni Jehova nga inyong Diyos kining mga nasora gikan sa inyong atubangan nga anam-anam.+ Dili mo niya tugotan nga laglagon dayon sila, aron dili modaghan ang ihalas nga mga mananap sa kapatagan nga makapameligro ninyo.
23 Itugyan sila kaninyo ni Jehova nga inyong Diyos ug pildihon niya sila hangtod mahurot sila.+
24 Itugyan niya kaninyo ang ilang mga hari,+ ug inyong papason ang ilang mga ngalan gikan sa yuta.*+ Walay makabarog batok ninyo,+ hangtod mapuo ninyo sila.+
25 Sunoga ang kinulit nga mga larawan sa ilang mga diyos.+ Ayawg tinguhaa o kuhaa ang ilang mga plata* ug bulawan+ aron dili mo malit-agan niini, kay dulumtanan kini kang Jehova nga inyong Diyos.+
26 Ayaw pagpasulod sa inyong balay ug butang nga gidumtan sa Diyos, aron dili mo laglagon sa Diyos uban niining mga butanga. Kalud-i ug dumti gayod kini, kay angay kining laglagon.
Mga Footnote
^ O “bililhon.”
^ O “gahom.”
^ Literal, “Panalanginan ang bunga sa inyong tagoangkan.”
^ Literal, “Lamya.”
^ O “moingon mo sa inyong kasingkasing.”
^ O “pagsulay.”
^ O posible, “malisang; mahadlok.”
^ Literal, “sa ilalom sa langit.”
^ Iningles, silver.
