Ecclesiastes 5:1-20
5 Bantayi ang imong lakang kon moadto ka sa balay sa matuod nga Diyos;+ mas maayo nga moduol aron mamati+ kay sa maghalad sama sa ginabuhat sa mga hungog,+ kay sila wala masayod nga daotan ang ilang ginabuhat.
2 Ayaw pagdalidalig sulti, ug ayaw padalidaliag sulti ang imong kasingkasing atubangan sa matuod nga Diyos,+ kay ang matuod nga Diyos atua sa kalangitan apan ikaw ania sa yuta. Busa angay kang mag-amping sa imong ginasulti.+
3 Ang mga tawo magdamgo tungod sa kadaghan sa gihunahuna,*+ ug ang hungog mosultig kabuangan tungod sa kadaghan sa mga pulong.+
4 Kon manaad ka sa Diyos, tumana dayon kana,+ kay siya walay kalipay sa mga hungog.+ Kon unsay imong gipanaad, tumana.+
5 Mas maayo pang dili ka manaad kay sa manaad ka apan dili nimo tumanon.+
6 Ayawg tugoti nga makasala ka* tungod sa imong baba,+ ug ayawg ingon atubangan sa anghel* nga kadto sayop.+ Nganong pasuk-on man nimo ang matuod nga Diyos tungod sa imong gisulti nga tungod niana iyang gub-on ang buhat sa imong mga kamot?+
7 Kay sama nga magdamgo ang mga tawo kon daghag gihunahuna,+ ang daghang pulong moresulta usab sa kakawangan. Apan kahadloki ang matuod nga Diyos.+
8 Kon makita nimo nga ang kabos gidaogdaog ug ang hustisya ug pagkamatarong gilapas diha sa imong distrito, ayawg katingala niana.+ Kay ang maong taas nga opisyal ginabantayan sa usa nga mas taas kay kaniya, ug duna pay uban nga mas taas kay kanila.
9 Dugang pa, ang abot sa yuta gibahinbahin nilang tanan; bisan ang ginakaon sa hari naggikan sa uma.+
10 Ang mahigugmaon sa plata dili matagbaw sa plata, ug ang mahigugmaon sa bahandi dili matagbaw sa iyang kinitaan.+ Kini usab kawang.+
11 Dihang modaghan ang maayong mga butang, modaghan usab ang magpahimulos niana.+ Ug unsay kapuslanan niana ngadto sa tag-iya, gawas sa pagtan-aw niana?+
12 Lami ang pagkatulog sa usa nga nagaalagad, diyutay man o daghan ang iyang ginakaon, apan ang dato dili makatulog tungod sa kadaghan sa iyang kabtangan.
13 Duna koy nakita nga grabeng katalagman ilalom sa adlaw: mga bahandi nga gitipigan sa tag-iya niini alang sa iyang kaugalingong kadaot.
14 Ang maong mga bahandi nahanaw tungod sa dili malamposong paningkamot,* ug dihang nahimo siyang amahan, wala na siyay ikahatag nga panulondon sa iyang anak.+
15 Sama nga ang usa hubo nga migula sa tagoangkan sa iyang inahan, ingon usab niana ang iyang pagbiya.+ Ug wala siyay madala nga bisan unsa sa tanan niyang hinagoan.+
16 Kini usab maoy grabeng katalagman: Sama gayod sa iyang pag-abot, ingon usab niana ang iyang pagbiya; ug unsay makuha sa usa nga naghago pag-ayo alang sa hangin?+
17 Dugang pa, adlaw-adlaw siyang nagkaon diha sa kangitngit, nga may grabeng kapakyasan ug sakit ug kasuko.+
18 Kini ang akong nakita nga maayo ug husto: nga ang usa mokaon ug moinom ug malipay sa tanan niyang paghago+ ilalom sa adlaw panahon sa mubong kinabuhi nga gihatag sa matuod nga Diyos kaniya, kay kana ang iyang ganti.*+
19 Dugang pa, dihang hatagan sa matuod nga Diyos ang tawo ug bahandi ug kabtangan+ uban ang katakos nga malipay niini, angay niyang dawaton ang iyang ganti* ug malipay sa iyang paghago. Kini mao ang gasa sa Diyos.+
20 Dili niya kaayo mamatikdan* ang paglabay sa mga adlaw sa iyang kinabuhi, kay gipuno sa matuod nga Diyos ang iyang kasingkasing ug kalipay.+
Mga Footnote
^ O “gikabalak-an.”
^ Literal, “ang imong unod.”
^ O “mensahero.”
^ O “buluhaton.”
^ O “bahin.”
^ O “bahin.”
^ O “mahinumdoman.”
