Ecclesiastes 6:1-12
6 Dunay laing katalagman nga akong nakita ilalom sa adlaw, ug kini sagad nga mahitabo sa mga tawo:
2 Gihatagan sa matuod nga Diyos ang tawo ug mga bahandi ug kabtangan ug himaya, aron iyang mabatonan ang tanan niyang gitinguha; apan wala motugot ang matuod nga Diyos nga makapahimulos siya niana, hinuon iyang gitugotan ang estranyo nga makapahimulos niana. Kini kawang ug makapasubo kaayo.
3 Kon ang usa ka tawo makabaton ug 100 ka anak ug mabuhi sa daghang katuigan ug matigulang, apan wala niya mapahimusli ang iyang maayong mga butang una pa siya makaabot sa lubnganan,* makaingon ko nga ang bata nga nakuha sa pagsabak mas maayo pa kay kaniya.+
4 Kay kawang ang iyang paggawas sa tagoangkan ug siya mibiya sa kangitngit, ug ang iyang ngalan natabonan sa kangitngit.
5 Bisag wala gyod niya makita ang adlaw o wala siyay nahibaloan, mas maayo* pa siya kay niadtong tawo nga taas ug kinabuhi.+
6 Unsay pulos nga mabuhi sulod sa 2,000 ka tuig apan wala makasinatig kalipay? Dili ba usa ray padulngan sa tanan?+
7 Ang tanang paghago sa tawo maoy aron pun-on ang iyang baba;+ apan siya dili matagbaw.
8 Kay unsay bentaha sa maalamon kon itandi sa hungog,+ o unsay kaayohan kon ang kabos nahibalo kon unsaon pagsagubang sa kinabuhi?*
9 Mas maayong malipay sa kon unsay makita sa mata kay sa magtinguhag mga butang nga dili mabatonan. Kini usab kawang, samag paggukod sa hangin.
10 Ang tanan nga naglungtad nailhan na kaniadto, ug nahibaloan na kon unsa gyod ang tawo; ug dili siya makapangatarongan* sa usa nga mas gamhanan kay kaniya.
11 Kon mas daghag pulong,* mas kawang; ug unsang kaayohan ang ikahatag niini sa tawo?
12 Kinsa bay nahibalo kon unsay labing maayong himoon sa tawo sa iyang mubo ug kawang nga kinabuhi, nga molabay lang samag anino?+ Kay kinsay makasulti sa tawo kon unsay mahitabo ilalom sa adlaw dihang wala na siya?
Mga Footnote
^ O “ug bisan ang lubnganan wala maiya.”
^ Literal, “daghag pahulay.”
^ Literal, “paglakaw atubangan sa mga buhi?”
^ O “makahimo sa paglaban sa iyang kawsa.”
^ O posible, “butang.”
