Ezequiel 15:1-8
-
Jerusalem, walay pulos nga punoan sa ubas (1-8)
15 Nakadawat na usab kog mensahe gikan kang Jehova, nga nag-ingon:
2 “Anak sa tawo, unsay kalainan tali sa kahoy sa ubas ug nianang sa ubang kahoy o sanga sa mga kahoy sa lasang?
3 Ang tukon ba nga gikan niana magamit sa bisan unsang buluhaton? O magamit ba kini sa mga tawo aron kasab-ongan ug mga galamiton?
4 Tan-awa! Kini isugnod sa kalayo, ug maut-ot ang isigkatumoy niini ug ang tunga mapagtong. Magamit na ba kini karon sa bisan unsang buluhaton?
5 Bisag sa dihang tibuok pa kini, dili kini magamit sa bisan unsang buluhaton. Labi na gyod kining dili magamit dihang kini nasunog sa kalayo ug napagtong!”
6 “Busa kini ang giingon sa Soberanong Ginoong Jehova: ‘Sama gayod sa kahoy sa ubas taliwala sa kakahoyan sa lasang, nga akong gihatag ingong sugnod sa kalayo, makiglabot usab ko sa mga molupyo sa Jerusalem sa ingon niana nga paagi.+
7 Gipatumong nako ang akong nawong batok kanila. Sila nakaikyas sa kalayo, apan ut-oton silag kalayo. Ug kamo makaila gayod nga ako si Jehova dihang ipatumong nako ang akong nawong batok kanila.’”+
8 “‘Ug ang yuta himoon nakong awaaw+ kay sila milihok nga dili matinumanon,’+ miingon ang Soberanong Ginoong Jehova.”
