Ezequiel 2:1-10
2 Unya siya miingon kanako: “Anak sa tawo,* tindog kay makigsulti ko nimo.”+
2 Dihang misulti siya kanako, ang espiritu midangat kanako ug gipatindog ko niini+ aron akong madungog ang Usa nga nakigsulti kanako.
3 Siya mipadayon: “Anak sa tawo, ipadala ka nako ngadto sa katawhan sa Israel,+ ngadto sa rebelyosong mga nasod nga mirebelde kanako.+ Sila ug ang ilang mga katigulangan milapas kanako hangtod gayod niining adlawa.+
4 Ipadala ka nako ngadto sa mga anak nga masukihon* ug tig-ag kasingkasing,+ ug ingna sila, ‘Kini ang giingon sa Soberanong Ginoong Jehova.’
5 Kon bahin kanila, mamati man sila o dili—kay rebelyoso sila nga panimalay+—sila mahibalo gayod nga may propeta* sa ilang taliwala.+
6 “Apan ikaw, anak sa tawo, ayawg kahadlok kanila,+ ug ayawg kahadlok sa ilang mga pulong, bisag gipalibotan kag tunokong mga tanom ug mga sampinit*+ ug bisag nagpuyo ka taliwala sa mga tanga. Ayawg kahadlok sa ilang mga pulong,+ ug ayawg kalisang sa ilang mga nawong,+ kay rebelyoso sila nga panimalay.
7 Kinahanglang isulti nimo kanila ang akong mga pulong, mamati man sila o dili, kay rebelyoso sila nga katawhan.+
8 “Apan ikaw, anak sa tawo, pamati sa akong isulti kanimo. Ayaw pagrebelde sama niining rebelyosong panimalay. Nganga ug kan-a ang akong ihatag kanimo.”+
9 Pagtan-aw nako, nakakita kog kamot nga gituy-od kanako,+ ug nakita nako niini ang usa ka linukot nga basahon.*+
10 Dihang iya kining gibuklad sa akong atubangan, duna kiniy sinulat sa atubangan ug sa luyo.+ Nasulat niini ang mga awit sa pagbangotan ug mga kagul-anan ug mga pagminatay.+
Mga Footnote
^ “Anak sa tawo”; ang una sa 93 ka higayon nga gigamit kini nga ekspresyon sa Ezequiel.
^ O “gahig nawong.”
^ O “manalagna.”
^ O posible, “bisag ang katawhan gahian ug nahisamag mga butang nga nagatusok kanimo.”
^ O “linukot sa usa ka basahon.”
