Joel 1:1-20
1 Kini ang mensahe ni Jehova nga nadawat ni Joel* nga anak ni Petuel:
2 “Pamati niini, kamong mga ansiyano,Ug paminaw, kamong tanang molupyo sa yuta.
May nahitabo na ba nga sama niini sa inyong panahon,O sa panahon sa inyong mga katigulangan?+
3 Isulti kini ngadto sa inyong mga anak,Ug ipasulti kini sa inyong mga anak ngadto sa ilang mga anak,Ug ang ilang mga anak ngadto sa mosunod nga henerasyon.
4 Ang salin sa nagapangutkot nga mga dulon, gikaon sa nagpanon nga mga dulon;+Ang salin sa nagpanon nga mga dulon, gikaon sa walay pako nga mga dulon;Ug ang salin sa walay pako nga mga dulon, gikaon sa kusog mokaon nga mga dulon.+
5 Pangmata mong mga palahubog,+ ug panghilak!
Paniyabaw mong tanang palainom ug bino,Kay ang tam-is nga bino gikuha gikan sa inyong baba.+
6 Kay may dakong panon sa mga dulon nga samag nasod nga miatake sa akong yuta, gamhanan ug dili maihap.+
Ang ilang mga ngipon ug apapangig sama nianang sa leyon.+
7 Ilang gidaot ang akong punoan sa ubas ug gihimong tuod ang akong kahoyng igos,Ila kining gipanitan ug gisalibay,Hangtod nga miputi ang mga sanga niini.
8 Tiyabaw sama sa dalaga* nga nagsul-ob ug sakong panaptonKay namatay ang iyang pamanhonon.*
9 Wala nay halad nga lugas+ ug halad nga ilimnon+ sa balay ni Jehova;Nagbangotan ang mga saserdote, ang mga alagad ni Jehova.
10 Ang mga uma nadaot, ang yuta nagbangotan;+Kay nadaot ang mga lugas ug nahubas ang bag-ong bino ug ang lana.+
11 Ang mga mag-uuma nadismaya, ang mga tig-atiman sa ubasan naniyabaw,Tungod sa trigo ug sebada;Kay wala nay alanihon sa uma.
12 Nalaya ang punoan sa ubas,Nalawos ang kahoyng igos.
Ang kahoyng granada, palma, ug mansanas,Ang tanang kahoy sa kapatagan nangalaya;+Kay ang kasadya nahimong kaulawan sa katawhan.
13 Pagsul-ob ug sakong panapton* ug pagbangotan,* kamong mga saserdote;Tiyabaw, kamong mga alagad sa halaran.+
Sulod mo ug palabay sa kagabhion nga magsul-ob ug sakong panapton, kamong mga alagad sa akong Diyos;Kay wala nay halad nga lugas+ ug halad nga ilimnon+ sa balay sa inyong Diyos.
14 Pagpatuman* ug usa ka pagpuasa; paghimog solemneng panagkatigom.+
Tigoma ang mga ansiyano, apil ang tanang molupyo sa yuta,Ngadto sa balay ni Jehova nga inyong Diyos,+ ug pagpakitabang kamo kang Jehova.
15 Alaot mo tungod sa maong adlaw!
Kay duol na ang adlaw ni Jehova,+Ug kini moabot uban ang pagpanglaglag sa Labing Gamhanan!
16 Dili ba nakita nato nga wala nay pagkaonUg pagsadya ug kalipay sa balay sa atong Diyos?
17 Ang mga liso* nanguyos ilalom sa ilang mga pala.
Ang mga balay-tipiganan nahimong biniyaan.
Ang mga kamalig nangalumpag, kay mikaging ang mga lugas.
18 Bisan ang mga hayop nag-agulo!
Ang mga panon sa baka nagkaguliyang, kay wala silay kasibsiban!
Ang mga panon sa karnero nag-antos sa silot.
19 Ako motawag kanimo, Oh Jehova;+Kay gilamoy sa kalayo ang mga sibsibanan sa kamingawan,Ug giut-ot sa kalayo ang tanang kahoy sa kapatagan.
20 Bisan ang ihalas nga mga mananap nangandoy nimo,Kay nahubas ang mga sapaUg gilamoy sa kalayo ang mga sibsibanan sa kamingawan.”
Mga Footnote
^ Kahulogan, “Diyos si Jehova.”
^ O “sa batan-ong babaye; ulay.”
^ O “bana.”
^ Literal, “Baksi ang inyong kaugalingon.”
^ O “pukpoka ang inyong dughan.”
^ Literal, “Pagbalaan.”
^ O posible, “uga nga igos.”
