Nehemias 4:1-23
4 Pagkadungog ni Sanbalat+ nga among gitukod pag-usab ang paril, siya nasuko pag-ayo ug nagsigeg bugalbugal sa mga Hudiyo.
2 Ug giingnan niya ang iyang mga igsoon ug ang kasundalohan sa Samaria: “Unsay ginabuhat niining huyang nga mga Hudiyo? Mahimo ba ni nila nga silasila ra? Maghalad ba sila? Mahuman ba ni nilag usa ka adlaw? Magamit pa ba nila ang nasunog ug nadugmok nga mga bato diha sa mga gun-ob?”+
3 Si Tobias+ nga Ammonhanon+ nga tapad niya miingon: “Bisag irong ihalas lang ang motungtong, malumpag na ang ilang paril nga bato.”
4 Ug ako miampo: “Pamati, Oh among Diyos, kay gitamay mi.+ Ibalik unta nimo kanila ang ilang pagpakaulaw kanamo,+ ug itugyan sila ingong mga binihag sa laing dapit.
5 Ayaw palabya o papasa ang ilang sala+ kay giinsulto nila ang mga magtutukod.”
6 Busa nagpadayon mi sa pagtukod hangtod nasumpay ang tibuok paril ug katunga na ang gihabogon niini, ug ang katawhan padayong nagkugi sa pagtrabaho.
7 Pagkadungog ni Sanbalat ug Tobias+ ug sa mga Arabiano,+ Ammonhanon, ug mga Asdodnon+ nga padayong giayo ang paril sa Jerusalem ug nasumpay na ang mga kal-ang, sila nasuko pag-ayo.
8 Sila nagkunsabo aron makig-away ug magpahinabog kagubot sa Jerusalem.
9 Busa kami nag-ampo sa among Diyos ug nagbutang ug guwardiya adlaw ug gabii.
10 Apan ang mga taga-Juda miingon: “Gikapoy na ang mga tigpas-an, ug daghan pa kaayog hakotonon. Dili na namo mahuman ang paril.”
11 Ug ang among mga kaaway nagsigeg ingon: “Makurat na lang sila nga naa na ta sa ilang taliwala, dayon pamatyon nato sila aron mahunong ang trabaho.”
12 Dihang mangabot ang mga Hudiyo nga nagpuyo duol kanila, sila balikbalik* nga moingon: “Sulongon ta nila gikan sa lainlaing direksiyon.”
13 Busa nagbutang kog mga guwardiya sa likod sa paril, sa kinaubsan ug daling sudlon nga mga dapit. Ang ilang puwesto duol ra sa ilang pamilya ug sila may mga espada, bangkaw, ug pana.
14 Pagkakita nako nga nangahadlok sila, giingnan dayon nako ang mga halangdon,+ mga opisyal, ug ang tanang Hudiyo: “Ayaw mog kahadlok nila.+ Hinumdomi ninyo si Jehova, ang Usa nga gamhanan ug kahibulongan.+ Pakig-away mo para sa inyong mga igsoon, anak, asawa, ug panimalay.”
15 Pagkadungog sa among mga kaaway nga nasayran namo ang ilang plano ug nga gipakyas kana sa matuod nga Diyos, kaming tanan namalik sa pagtukod sa paril.
16 Sukad niadto, katunga sa mga lalaki ang magtrabaho+ ug ang katunga magkupot ug mga bangkaw, taming, ug pana, ug magsul-ob ug panagang sa lawas. Ug ang mga prinsipe+ anaa sa luyo ug mitabang sa tibuok banay ni Juda
17 nga nagtukod sa paril. Ang mga tigpas-an nagtrabaho samtang ang ilang pikas kamot nagkupot ug hinagiban.*
18 Ug ang matag magtutukod nagtakin ug espada samtang nagtrabaho, ug ang tighuyop sa budyong+ diha sa akong tapad.
19 Dayon ako miingon sa mga halangdon, mga opisyal, ug sa tanang Hudiyo: “Dako kaayo ang trabaho, ug nag-ayo ta sa paril nga lagyo sa usag usa.
20 Kon madungog ninyo ang tingog sa budyong, pagtapok mo kon asa mi. Ang atong Diyos makig-away alang nato.”+
21 Busa kami padayong nagtrabaho samtang ang katunga nagkupot ug mga bangkaw, gikan sa pagbanagbanag hangtod sa gabii.
22 Ug ako miingon sa katawhan: “Ang matag lalaki uban sa iyang tig-alagad magpabilin sa Jerusalem kada gabii. Sila magguwardiya kanato magabii ug magtrabaho maadlaw.”
23 Busa ako, ang akong mga igsoon, mga tig-alagad,+ ug ang mga guwardiya nga misunod kanako wala maghukas sa among mga besti,* ug kami nagkupot kanunay sa among hinagiban sa tuong kamot.
