Numeros 23:1-30
23 Unya giingnan ni Balaam si Balak: “Paghimo dinhig pito ka halaran,+ ug andami kog pito ka torong baka ug pito ka laking karnero.”
2 Gihimo dayon ni Balak ang giingon ni Balaam. Si Balak ug Balaam naghalad ug usa ka torong baka ug usa ka laking karnero sa matag halaran.+
3 Unya si Balaam miingon kang Balak: “Dinhi lang ka duol sa imong halad nga sinunog kay molakaw ko. Basig makigsulti si Jehova nako. Kon unsay iyang isulti, akong isulti nimo.” Busa miadto siya sa usa ka hawan nga bungtod.
4 Unya ang Diyos nakigsulti niya,+ ug si Balaam miingon: “Akong gilaray ang pito ka halaran, ug naghalad kog usa ka torong baka ug usa ka laking karnero sa matag halaran.”
5 Giingnan ni Jehova si* Balaam kon unsay iyang isulti:+ “Balik kang Balak, ug isulti kini kaniya.”
6 Busa mibalik siya ug nakita niya si Balak ug ang tanang prinsipe sa Moab nga nagtindog duol sa iyang halad nga sinunog.
7 Unya iyang gisulti kini nga panultihon:+
“Gipatawag ko ni Balak nga hari sa Moab gikan sa Aram,+Gikan sa kabukiran sa sidlakan:
‘Anhi dinhi, tungloha si Jacob para kanako.
Anhi dinhi, panghimaraota ang Israel.’+
8 Dili ko makahimo sa pagtunglo niadtong wala tungloha sa Diyos,
Ug dili ko makahimo sa pagpanghimaraot niadtong wala panghimaraota ni Jehova.+
9 Gikan sa ibabaw sa dagkong bato nakita nako sila,Ug gikan sa bungtod nakita nako sila.
Nagpuyo sila didto nga sila ra ingong usa ka katawhan;+Giisip nila ang ilang kaugalingon nga lahi sa ubang nasod.+
10 Kinsay makaihap sa mga abog ni Jacob+O makaihap bisan sa ikaupat nga bahin sa Israel?
Tugoti kong* mamatay sama sa mga matarong,Ug ang kataposan sa akong kinabuhi mahisama sa ilaha.”
11 Unya si Balak miingon kang Balaam: “Unsa man ning imong gibuhat? Gidala ti ka dinhi aron tunglohon ang akong mga kaaway. Imo man hinuon silang gipanalanginan.”+
12 Siya mitubag: “Dili ba diay nako isulti ang ipasulti ni Jehova?”+
13 Si Balak miingon niya: “Palihog, kuyog nako sa laing dapit diin imo silang malantaw. Pipila ra nila ang imong makita, dili tanan. Gikan didto, tungloha sila para kanako.”+
14 Busa iyang gidala siya sa patag sa Zopim, sa ibabaw sa Pisga,+ ug naghimo siyag pito ka halaran ug naghalad ug usa ka torong baka ug usa ka laking karnero sa matag halaran.+
15 Ug giingnan ni Balaam si Balak: “Pabilin dinhi duol sa imong halad nga sinunog samtang makigsulti ko Niya didto.”
16 Ug si Jehova nakigsulti kang Balaam, ug kini ang iyang giingon:+ “Balik kang Balak, ug isulti kini kaniya.”
17 Busa mibalik siya kang Balak ug nakita niya nga nagtindog siya duol sa iyang halad nga sinunog kauban ang mga prinsipe sa Moab. Si Balak nangutana: “Unsay gisulti ni Jehova?”
18 Dayon iyang gisulti kini nga panultihon:+
“Tindog, Balak, ug pamati.
Paminawa ko, Oh anak ni Zipor.
19 Ang Diyos dili sama sa tawo nga mamakak+O sa tawo nga mag-usab-usab ang hunahuna.*+
Kon naa siyay isulti, dili ba niya kini buhaton?
Kon mosulti siya, dili ba niya kini tumanon?+
20 Gidala ko dinhi aron magpanalangin;Karon Siya nagpanalangin,+ ug dili nako kini mabakwi.+
21 Dili niya itugot nga gamiton ang espiritismo batok kang Jacob,Ug dili niya itugot nga may daotang mahitabo sa Israel.
Si Jehova nga iyang Diyos nagauban kanila,+Ug ilang ginadayeg siya ingong ilang hari.
22 Ang Diyos nagpagawas nila sa Ehipto.+
Sama siyag sungay sa ihalas nga torong baka para kanila.+
23 Kay walay daotang mga tilimad-on batok kang Jacob+O bisan unsang pagpanunglo batok sa Israel.+
Karon kini ang ikasulti bahin kang Jacob ug Israel:
‘Tan-awa ang nahimo sa Diyos!’
24 Ania ang katawhan nga motindog samag leyon,Ug sama sa leyon kini mobarog.+
Dili kini molubog hangtod nga makaon niya ang iyang tukbononUg mainom ang dugo sa mga pinatay.”
25 Unya si Balak miingon kang Balaam: “Kon dili ka makatunglo nila, ayaw silag panalangini.”
26 Si Balaam mitubag kang Balak: “Di ba giingnan ti ka, ‘Himoon nako ang tanang isulti ni Jehova’?”+
27 Si Balak miingon kang Balaam: “Palihog uban nako, dad-on ti ka sa usa pa ka lugar. Basin maayo sa panan-aw sa matuod nga Diyos nga tunglohon nimo sila didto para kanako.”+
28 Busa gidala ni Balak si Balaam sa ibabaw sa Peor, nga nag-umbaw sa Jesimon.*+
29 Unya si Balaam miingon kang Balak: “Paghimog pito ka halaran dinhi, ug andami kog pito ka torong baka ug pito ka laking karnero.”+
30 Busa gihimo ni Balak ang gisulti ni Balaam, ug naghalad siyag usa ka torong baka ug usa ka laking karnero sa matag halaran.
Mga Footnote
^ Literal, “Gibutang ni Jehova sa baba ni.”
^ O “ang akong kalag nga.”
^ O “nga magbasol.”
^ O posible, “desyerto; kamingawan.”
