Oseas 10:1-15
10 “Ang Israel maoy nagakadaot* nga punoan sa ubas nga nagapamunga;+Samtang nagkadaghan ang iyang bunga, gipadaghan usab niya ang iyang mga halaran;+Samtang nagkadaghan ang abot sa iyang yuta, gipanindot usab niya ang iyang sagradong mga haligi.+
2 Salingkapaw* ang ilang kasingkasing;Mapamatud-an karon nga sad-an sila.
Dunay usa nga molumpag sa ilang mga halaran ug haligi.
3 Karon sila moingon, ‘Kami walay hari,+ kay wala mi mahadlok kang Jehova.
Unsay mahimo sa hari kanamo?’
4 Walay pulos ang ilang gipanulti, ug naghimo silag bakak nga mga panumpa+ ug mga pakigsaad;Busa ang inhustisya mikaylap samag makahilo nga sagbot diha sa uma.+
5 Ang mga molupyo sa Samaria mahadlok nga mawala ang nating baka nga idolo sa Bet-aven.+
Hilakan kini sa iyang katawhan,Ug sa mga saserdote sa langyaw nga diyos nga nalipay niini ug sa himaya niini,Kay kini pagakuhaon kanila.
6 Dalhon kini sa Asirya ingong regalo alang sa usa ka gamhanang hari.+
Ang Epraim pakaulawan,Ug ang Israel maulawan tungod sa tambag nga iyang gisunod.+
7 Ang Samaria ug ang hari niini pagawagtangon gayod,*+Sama sa gamayng sanga nga gianod sa katubigan.
8 Gun-obon ang tag-as nga dapit sa Bet-aven+—ang sala sa Israel.+
Ang ilang mga halaran tuboan ug mga sampinit ug kudyapa.+
Ang katawhan moingon sa kabukiran, ‘Taboni kami!’
Ug sa mga bungtod, ‘Tumpagi kami!’+
9 Sukad sa mga adlaw sa Gibea nakasala ka,+ Oh Israel.
Wala sila magbag-o didto.
Ang mga tawong dili matarong sa Gibea wala mahurot sa gubat.
10 Disiplinahon sab nako sila kon gusto nako.
Ug ang kanasoran magtigom batok kanila,Dihang gisangon* kanila ang ilang duha ka kasaypanan.
11 Ang Epraim kaniadto samag nabansay nga dumagang baka nga ganahang mogiok,Busa akong giampingan ang iyang matahom nga liog.
Karon duna koy pasakyon sa* Epraim.+
Ang Juda magdaro; ang Jacob magkaras alang kaniya.
12 Pagpugas mog binhi sa pagkamatarong ug moani mog maunongong gugma.
Pagdaro mo sa inyong kaumahan+Samtang duna pay panahon sa pagpangita kang Jehova,+Hangtod nga siya moabot ug magtudlo kaninyo sa pagkamatarong.+
13 Apan kamo nagpugas ug pagkadaotan,Giani ninyo ang pagkadili-matarong,+Ug gikaon ninyo ang bunga sa pagpanglimbong;Kay kamo misalig sa inyong kaugalingon,Sa inyong daghang kasundalohan.
14 May mosulong sa imong katawhan,Ug ang imong pinarilang mga siyudad mangalumpag,+Sama sa paglumpag ni Salman sa balay ni Arbel,Sa adlaw sa gubat dihang ang mga inahan gidugmok uban sa ilang mga anak.
15 Kini ang mahitabo kanimo, Oh Bethel,+ tungod sa imong grabeng pagkadaotan.
Pagbanagbanag ang hari sa Israel patyon* gayod.”+
Mga Footnote
^ O posible, “nanalingsing.”
^ O “Dangog.”
^ Literal, “pahilomon.”
^ Sa ato pa, gipapas-an kanila ang ilang silot samag yugo.
^ O “akong butangag yugo ang.”
^ Literal, “pahilomon.”
