Pinadayag Ngadto Kang Juan 2:1-29
2 “Isulat kini ngadto sa anghel+ sa kongregasyon sa Efeso:+ Kini ang mga butang nga ginaingon sa usa nga nagkupot sa pito ka bituon diha sa iyang tuong kamot ug nagalakaw taliwala sa pito ka tangkawan* nga bulawan:+
2 ‘Nahibalo ko sa imong mga buhat, ug sa imong paghago ug paglahutay, ug nga dili nimo konsentihon ang daotang mga tawo, ug nga gisulayan nimo kadtong mga nag-ingon nga sila mga apostoles,+ apan dili diay, ug nahibaloan nimo nga sila bakakon.
3 Nagpakita usab kag paglahutay, ug nagmainantoson ka alang sa akong ngalan+ ug wala maluya.+
4 Bisan pa niana, duna koy butang nga batok kanimo, nga imong gibiyaan ang gugma nga imong nabatonan sa sinugdan.
5 “‘Busa hinumdomi kon gikan sa unsa ka nahulog, ug paghinulsol+ ug himoa ang mga buhat nga imong gihimo sa sinugdan. Kay kon dili, moanha ko kanimo, ug kuhaon nako ang imong tangkawan+ gikan sa nahimutangan niini, gawas kon maghinulsol ka.+
6 Hinuon, dunay maayong butang nga imong gihimo: nga gidumtan nimo ang binuhatan sa sekta ni Nicolas,+ nga gidumtan usab nako.
7 Kadtong makadungog, paminaw pag-ayo sa ginaingon sa espiritu ngadto sa mga kongregasyon:+ Ang usa nga magmadaogon+ tugotan nakong mokaon sa kahoy sa kinabuhi,+ nga anaa sa paraiso sa Diyos.’
8 “Ug isulat kini ngadto sa anghel sa kongregasyon sa Smirna: Kini ang mga butang nga iyang ginaingon, ‘ang Una ug ang Ulahi,’+ kinsa namatay ug nabuhi pag-usab:+
9 ‘Nahibalo ko sa imong kasakitan ug kakabos—apan dato ka+—ug sa pagpasipala niadtong mga nagtawag sa ilang kaugalingon nga mga Hudiyo, apan dili diay, hinunoa sinagoga sila ni Satanas.+
10 Ayawg kahadlok sa mga butang nga hapit na nimong antoson.+ Tan-awa! Ang Yawa padayong magbilanggo sa pipila kaninyo aron bug-os mong sulayan, ug makaagom mog kasakitan sulod sa 10 ka adlaw. Pamatud-i nga matinumanon ka bisan hangtod sa kamatayon, ug akong ihatag kanimo ang korona sa kinabuhi.+
11 Kadtong makadungog, paminaw pag-ayo+ sa ginaingon sa espiritu ngadto sa mga kongregasyon: Ang usa nga magmadaogon+ dili gayod makaagom sa ikaduhang kamatayon.’+
12 “Isulat kini ngadto sa anghel sa kongregasyon sa Pergamo: Kini ang mga butang nga ginaingon sa usa nga dunay espada nga hait, taas, ug duhay sulab:+
13 ‘Nahibalo ko nga nagpuyo ka sa dapit nga nahimutangan sa trono ni Satanas; apan padayon kang nangupot pag-ayo sa akong ngalan,+ ug wala nimo ilimod ang imong pagtuo kanako+ bisan sa mga adlaw ni Antipas, ang akong matinumanong saksi,+ kinsa gipatay+ sa inyong kiliran, diin nagpuyo si Satanas.
14 “‘Bisan pa niana, duna koy pipila ka butang nga batok kanimo, nga anaa diha kanimo kadtong mga nagsunod sa pagtulon-an ni Balaam,+ kinsa nagtudlo kang Balak+ sa pagbutang ug kapandolan atubangan sa mga anak ni Israel, sa pagkaon sa mga butang nga gihalad ngadto sa mga idolo ug paghimog seksuwal nga imoralidad.*+
15 Sa samang paagi, anaa usab kanimo kadtong mga nagsunod sa pagtulon-an sa sekta ni Nicolas.+
16 Busa paghinulsol. Kay kon dili, moanha dayon ko nimo, ug makiggubat ko kanila pinaagi sa taas nga espada sa akong baba.+
17 “‘Kadtong makadungog, paminaw pag-ayo sa ginaingon sa espiritu ngadto sa mga kongregasyon:+ Ang usa nga magmadaogon+ hatagan nako sa pipila sa tinagong mana,+ ug hatagan nako siya ug usa ka gamayng bato nga puti, ug sa maong gamayng bato nasulat ang bag-ong ngalan nga walay bisan kinsang mahibalo gawas lang sa makadawat niini.’
18 “Isulat kini ngadto sa anghel sa kongregasyon sa Tiatira:+ Kini ang mga butang nga ginaingon sa Anak sa Diyos, ang usa kansang mga mata samag nagdilaab nga kalayo+ ug kansang mga tiil samag purong tumbaga:+
19 ‘Nahibalo ko sa imong mga buhat, ug sa imong gugma ug pagtuo ug ministeryo ug paglahutay, ug nga ang imong ulahing mga buhat mas labaw pa kay sa imong gibuhat sa sinugdan.
20 “‘Bisan pa niana, duna koy butang nga batok kanimo, nga gikonsentir nimo kanang babaye nga si Jezebel,+ kinsa nagtawag sa iyang kaugalingon nga propeta,* ug iyang ginatudloan ug ginapahisalaag ang akong mga ulipon aron maghimog seksuwal nga imoralidad*+ ug mokaon sa mga butang nga gihalad ngadto sa mga idolo.
21 Ug gihatagan nako siyag panahon nga maghinulsol, apan dili siya gustong maghinulsol sa iyang paghimog seksuwal nga imoralidad.*
22 Tan-awa! Ipahinabo nako nga makaagom siyag grabeng sakit, ug kadtong mga nagapanapaw uban kaniya makaagom ug dakong kasakitan, gawas kon maghinulsol sila sa mga buhat nga sama sa iyang gihimo.
23 Ug pamatyon nako ang iyang mga anak pinaagig makamatayng hampak, aron ang tanang kongregasyon mahibalo nga ako ang usa nga nagasusi sa kinasulorang mga hunahuna* ug mga kasingkasing, ug balosan nako ang tagsatagsa kaninyo sumala sa inyong binuhatan.+
24 “‘Apan sultihan nako ang uban kaninyo nga anaa sa Tiatira, ang tanan nga wala magsunod niini nga pagtulon-an, nga wala mahibalo sa gitawag nga “lawom nga mga butang ni Satanas”:+ Dili ko magpapas-an kaninyo ug lain pang kabug-at.
25 Apan sa gihapon, pangupti pag-ayo ang inyong nabatonan hangtod sa akong pag-abot.+
26 Ug sa usa nga magmadaogon ug magtuman sa akong mga buhat hangtod sa kataposan, ihatag nako kaniya ang awtoridad ibabaw sa kanasoran,+
27 sama sa awtoridad nga akong nadawat gikan sa akong Amahan. Ug bantayan niya ang katawhan pinaagig bunal nga puthaw+ aron mangadugmok sila samag kulonon nga mga sudlanan.
28 Ug akong ihatag kaniya ang bituon sa kabuntagon.+
29 Kadtong makadungog, paminaw pag-ayo sa ginaingon sa espiritu ngadto sa mga kongregasyon.’
Mga Footnote
^ Iningles, lampstand.
^ O “manalagna.”
^ O “kinailadmang mga pagbati.” Literal, “mga rinyon.”
