Proverbio 9:1-18
9 Ang matuod nga kaalam nakatukod nag balay;Iya nang natabas ang iyang pito ka haligi.
2 Naandam na niya ang iyang karne;*Nahuman na niyag sagol ang iyang bino;Naandam na pod niya ang iyang lamesa.
3 Napadala na niya ang iyang mga tig-alagad nga babayeAron manawag diha sa habog nga mga dapit sa siyudad:+
4 “Bisan kinsa nga walay kasinatian, paanhia siya.”
Giingnan niya kadtong dili maayog panghunahuna:*
5 “Dali, kaon mo sa akong tinapayUg inom sa bino nga akong gisagol.
6 Biyai ang imong pagkawalay-kasinatian* aron mabuhi ka;+Subaya ang dalan sa pagsabot.”+
7 Kadtong magtul-id sa mabiaybiayon maulawan,+Ug kadtong magbadlong sa tawong daotan masakitan.
8 Ayawg badlonga ang mabiaybiayon, kay dumtan ka niya.+
Badlonga ang tawong maalamon, ug higugmaon ka niya.+
9 Hatagig kahibalo ang tawong maalamon, ug siya mahimong mas maalamon.+
Tudloi ang matarong, ug mouswag ang iyang kahibalo.
10 Ang pagkahadlok kang Jehova mao ang sinugdan sa kaalam,+Ug ang kahibalo bahin sa Usa nga Labing Balaan+ mao ang pagsabot.
11 Kay pinaagi nako modaghan ang imong mga adlaw,+Ug madugangan ang mga tuig sa imong kinabuhi.
12 Kon mahimo kang maalamon, para na sa imong kaayohan,Apan kon mabiaybiayon ka, ikaw ray mag-antos.
13 Ang babayeng buangbuang sabaan.+
Wala siyay buot ug wala gyoy nahibaloan.
14 Siya naglingkod sa entrada sa iyang balaySa lingkoranan sa tag-as nga dapit sa siyudad,+
15 Nga nanawag sa mga nangagi,Niadtong mga nagsubay sa ilang agianan:
16 “Bisan kinsa nga walay kasinatian, paanhia siya.”
Giingnan niya kadtong dili maayog panghunahuna:*+
17 “Tam-is ang kinawat nga tubig,Ug lami ang tinapay nga gikaon sa tago.”+
18 Apan wala sila mahibalo nga ang iyang balay punog mga patay,Nga ang iyang mga bisita naa sa kinailadman sa Lubnganan.*+
Mga Footnote
^ Literal, “Naihaw na niya ang iyang ihawonon.”
^ Literal, “nakulangan ang kasingkasing.”
^ O “ang mga walay kasinatian.”
^ Literal, “nakulangan ang kasingkasing.”
