Tuigtuig, daghang dili aktibong mga Kristohanon ang manambong sa Memoryal. Sila nagsugod sa pagdagan sa lumba sa kinabuhi apan nanghunong tungod sa nagkalainlaing hinungdan, ang uban niini gihisgotan diha sa brosyur nga Balik Kang Jehova. (Heb 12:1) Bisan pa niana, gimahal gihapon ni Jehova ang mga dili aktibo nga iyang gipalit sa dugo sa iyang Anak. (Buh 20:28; 1Pe 1:18, 19) Sa unsang paagi matabangan nato sila aron makabalik sa kongregasyon?

Pangitaon ug tabangan sa mga ansiyano sa kongregasyon ang dili aktibong mga Kristohanon sama sa usa ka magbalantay nga naningkamot sa pagpangita sa mga karnero nga nabulag gikan sa panon. (Luc 15:4-7) Kini nagpakita sa mahigugmaong pag-atiman ni Jehova. (Jer 23:3, 4) Kitang tanan, dili lang mga ansiyano, makadasig kanila. Ang atong pagpakitag kaayo ug simpatiya makapalipay kang Jehova ug kanato. (Pr 19:17; Buh 20:35) Busa hunahunaa kon kinsay imong madasig, ug lihok dayon!

TAN-AWA ANG VIDEO NGA DASIGA ANG MGA DILI AKTIBO, DAYON HISGOTI ANG MGA PANGUTANA SA UBOS:

• Unsay gihimo ni Abbey dihang may nahibalag siyang Saksi nga dili niya kaila?

• Nganong moduol tag mga ansiyano kon nagplano ta sa pagtabang ug usa ka dili aktibo?

• Unsang pagpangandam ang gihimo ni Abbey dihang miduaw kang Laura sa ikaduhang higayon?

• Giunsa pagpakita ni Abbey ang pasensiya, pailob, ug gugma samtang naningkamot sa pagdasig kang Laura?

• Unsay atong makat-onan sa ilustrasyon ni Jesus nga makita diha sa Lucas 15:8-10?

• Unsang mga panalangin ang miresulta tungod sa mga paningkamot sa pagtabang kang Laura?