Nganong angay tang makig-uban sa mga nahigugma kang Jehova? Kay ang atong mga kauban makaimpluwensiya nato sa paghimog maayo o daotan. (Pr 13:20) Pananglitan, si Haring Jehoas “nagbuhat kon unsay husto sa mga mata ni Jehova” dihang nakig-uban siya sa Hataas nga Saserdoteng si Jehoiada. (2Cr 24:2) Pagkamatay ni Jehoiada, gibiyaan ni Jehoas si Jehova tungod sa iyang pagpakig-uban sa dili maayong mga tawo.—2Cr 24:17-19.

Sa unang siglo C.E., gipakasama ni apostol Pablo ang Kristohanong kongregasyon sa “usa ka dakong balay” ug ang mga membro sa kongregasyon ingong “mga gamit” sa balay. Kita padayong gamiton ingong “instrumento para sa dungganong katuyoan” dihang dili ta makigsuod kang bisan kinsa nga nagabuhat sa mga butang nga gidumtan ni Jehova, bisan pag membro siya sa atong pamilya o sa kongregasyon. (2Ti 2:20, 21) Busa hinaot nga padayon tang makig-uban sa mga nahigugma kang Jehova ug niadtong nagdasig nato sa pag-alagad kaniya.

TAN-AWA ANG VIDEO NGA LIKAYI ANG DILI MAAYONG PAGPAKIG-UBAN, DAYON TUBAGA ANG MOSUNOD NGA MGA PANGUTANA:

• Unsang mga kahimtang nga nakig-uban na ta sa dili maayong mga tawo?

• Sa video, unsay nakatabang sa tulo ka Kristohanon sa paghunong sa dili maayong pagpakig-uban?

• Unsang mga prinsipyo sa Bibliya ang makatabang nimo nga magmaalamon sa pagpilig mga kauban?