Sukad niadtong 2018, ang atong pangpublikong mga magasin maghisgot lang ug usa ka topiko kada isyu. Kini nga mga magasin apil sa atong Teaching Toolbox. Busa puwede nato ning gamiton sa ministeryo. Makadala sab tag pipila ka magasin samtang magbiyahe o mamalit. Ang mga magasin wala gidisenyo para sa pagdumalag pagtuon sa Bibliya, pero makapukaw ni sa interes sa uban nga magtuon bahin sa Diyos.

Dihang makasugod ug panag-estorya, ipaambit ang usa ka teksto sa Bibliya ug paghisgot ug topiko sa magasin nga makapainteres sa imong kaestorya. Pananglitan, kon siya pamilyado o namatyag minahal o na-stress, puwede kang moingon: “Bag-o lang ko nakabasag nindot nga artikulo bahin anâ nga topiko. Puwede ba nakong ipakita nimo?” Kon interesado siya, puwede nimo siyang hatagan ug inimprenta o elektronikong kopya sa magasin, bisan sa una pa lang ninyo nga panag-estorya. Bisag ang pagtanyag ug literatura dili mao ang atong pangunang tuyo, ang mga magasin makatabang nato nga makaplagan kadtong andam mopadapat sa ilang nakat-onan.​—Buh 13:48.