Sa Septiyembre, maningkamot ta pag-ayo sa pag-offer ug pagtuon sa Bibliya sa matag pamilya, gamit ang brosyur nga Mabuhi Ka Hangtod sa Hangtod! Ang mga magmamantala nga mag-oksilyare payunir makapili nga mokab-ot ug 30 ka oras. Unsaon nato paghimo kining espesyal nga kampanya?

• Sa Unang Pakig-estorya: Gamita ang likod sa brosyur aron mainteres ang imong kaestorya, ug paningkamoti nga makasugod kag pagtuon sa Bibliya. Hinumdomi kon kinsa tong nagpakitag interes sa miagi, apil ang mga gibalikduaw nimo. Bisag mibalibad sila nga mag-Bible study kaniadto, basig mainteres sila sa atong bag-ong brosyur ug bag-ong paagi sa pagtuon. Ang mga brosyur dili angayng ibilin sa mga balay nga walay tawo. Dili sab ni ipasukip sa mga sulat ngadto sa mga wala magpakitag interes. Ang Komite sa Pag-alagad sa Kongregasyon puwedeng maghimog dugang nga mga tigom para sa pagsangyaw nianang bulana.

• Sa Ubang Kahimtang: Kon ang inyong kongregasyon naggamit ug mga literature cart, idispley ang brosyur nga Mabuhi Ka Hangtod sa Hangtod! Sultihi kadtong nagpakitag interes nga naay libreng pagtuon sa Bibliya gamit ni nga brosyur. Ipakita kadiyot kon sa unsang paagi ginahimo ang pagtuon, o pakigsabot nga himoon kana sa laing panahon. Ang tigdumala sa pag-alagad puwedeng mag-asayn ug kuwalipikadong mga magmamantala nga moadto sa mga negosyohanan diha sa teritoryo aron mag-offer ug pagtuon sa Bibliya. Puwede sab kang mag-offer ug pagtuon sa Bibliya sa imong mga kauban sa trabaho o sa masangyawan nimo sa impormal nga paagi.

Gisugo ta ni Jesus sa ‘paghimog mga tinun-an’ ug sa ‘pagtudlo kanila.’ (Mat 28:19, 20) Hinaot kining espesyal nga kampanya makatabang nato sa pagtuman niana nga sugo, gamit ang Mabuhi Ka Hangtod sa Hangtod!