KON NGANONG IMPORTANTE: Ang personal nga pagtuon sa Pulong sa Diyos makatabang nato nga ‘bug-os masabtan kon unsa ang gilapdon ug gitas-on ug gihabogon ug giladmon sa kamatuoran.’ (Efe 3:18) Makatabang pod ni nato nga magpabiling walay ikasaway ug walay lama niining daotang kalibotan ug padayong ‘mangupot pag-ayo sa pulong sa kinabuhi.’ (Flp 2:15, 16) Makapili ta kon unsay atong gamiton sa atong personal nga pagtuon sa Pulong sa Diyos. Sa unsang paagi mas makabenepisyo ta sa panahon nga atong gigahin sa pagbasa ug pagtuon sa Bibliya?

KON UNSAON PAGHIMO:

• Markahi ang mga bersikulo ug paghimog nota sa Bibliya nga imong gigamit sa pagtuon, sa papel man o sa electronic nga format

• Pangutan-a ang kaugalingon dihang magbasa ka sa Bibliya: ‘Kinsa? Unsa? Kanus-a? Asa? Ngano? Sa unsang paagi?’

• Pag-research base sa topiko o teksto sa Bibliya gamit ang mga tool nga mabatonan

• Palandonga ang imong gibasa aron masabtan nimo kon unsaon pagpadapat ang maong impormasyon

• Ipadapat ang imong nakat-onan sa adlaw-adlawng pagkinabuhi.​—Luc 6:47, 48

TAN-AWA ANG VIDEO NGA PADAYON SA “PAGPANGUPOT NGA HUGOT”​—PINAAGI SA EPEKTIBONG PERSONAL NGA PAGTUON, DAYON TUBAGA ANG MOSUNOD NGA MGA PANGUTANA:

• Unsay giingon sa uban bahin sa personal nga pagtuon?

• Nganong angay tang mag-ampo sa dili pa magtuon?

• Unsay makatabang nato nga mas masabtan ang usa ka teksto sa Bibliya?

• Unsang mga marka ang puwede natong ibutang sa Bibliya nga atong gigamit sa pagtuon?

• Nganong importante kaayo ang pagpamalandong dihang magtuon sa Pulong sa Diyos?

• Unsay atong himoon sa atong nakat-onan?