Ang gugma samag glue nga makapahiusa sa pamilya. Kon walay gugma, ang pamilya malisdan sa pagmentinar sa panaghiusa ug kooperasyon sa usag usa. Unsaon pagpakita sa bana, asawa, ug ginikanan ang gugma diha sa pamilya?

Konsiderahon sa mahigugmaong bana ang panginahanglan, opinyon, ug pagbati sa iyang asawa. (Efe 5:28, 29) Iyang itagana ang pisikal ug espirituwal nga panginahanglan sa iyang pamilya, apil na ang regular nga pamilyahanong pagsimba. (1Ti 5:8) Ang mahigugmaong asawa magpasakop ug magpakitag “dakong pagtahod” sa iyang bana. (Efe 5:22, 33; 1Pe 3:1-6) Silang duha angayng andam ug kinasingkasing nga magpasaylo sa usag usa. (Efe 4:32) Ang mahigugmaong ginikanan magpakitag personal nga interes sa matag usa sa ilang mga anak ug tudloan silang higugmaon si Jehova. (Deu 6:6, 7; Efe 6:4) Unsang mga pagsulay ang giatubang sa ilang mga anak diha sa eskuwelahan? Giunsa nila pag-atubang ang presyur gikan sa ubang batan-on? Kon lig-on ang gugma sulod sa pamilya, ang tanang membro mobating luwas ug may kasegurohan.

TAN-AWA ANG VIDEO NGA IPAKITA ANG WALAY PAGLUBAD NGA GUGMA DIHA SA PAMILYA, DAYON TUBAGA ANG MOSUNOD NGA MGA PANGUTANA:

• Sa unsang paagi mapakita sa mahigugmaong bana nga iyang gimahal ang iyang asawa?

• Unsaon pagpakita sa mahigugmaong asawa ang dakong pagtahod ngadto sa iyang bana?

• Unsay himoon sa mahigugmaong ginikanan aron masilsil ang Pulong sa Diyos diha sa ilang mga anak?