Dihang dinhi si Jesus sa yuta, iyang gipasiugda kini nga sugo: “Pasidunggi ang imong amahan ug ang imong inahan.” (Ex 20:12; Mat 15:4) Ingong batan-on, gituman gyod ni Jesus kini nga sugo kay siya “nagpadayon sa pagpasakop” sa iyang mga ginikanan. (Luc 2:51) Ingong hamtong, giseguro niya nga human sa iyang kamatayon, maatiman ang iyang inahan.​—Ju 19:26, 27.

Ang Kristohanong mga batan-on sab karon nagpasidungog sa ilang mga ginikanan pinaagi sa pagsunod ug pagtahod kanila. Sa pagkatinuod, kinahanglang padayon natong tumanon ang sugo nga pasidunggan ang atong mga ginikanan. Bisag matigulang na ang atong mga ginikanan, angay gihapon nato silang pasidunggan pinaagi sa pagpamati sa ilang maalamong mga tambag. (Pr 23:22) Mapasidunggan sab nato ang atong tigulang na nga mga ginikanan kon itagana nato kanila ang emosyonal ug pinansiyal nga tabang sa panahon nga ila kanang gikinahanglan. (1Ti 5:8) Batan-on man ta o edaran, ang padayong pagpakigkomunikar sa atong mga ginikanan maoy importanteng paagi aron ato silang mapasidunggan.

TAN-AWA ANG WHITEBOARD ANIMATION NGA UNSAON NAKO PAGPAKIG-ESTORYA SA AKONG MGA GINIKANAN? UG DAYON TUBAGA ANG MOSUNOD NGA MGA PANGUTANA:

• Nganong malisdan tingali ka sa pagpakig-estorya sa imong mga ginikanan?

• Sa unsang paagi mapasidunggan nimo ang imong mga ginikanan dihang makig-estorya ka nila?

• Nganong maayo nga maningkamot kang makig-estorya sa imong mga ginikanan? (Pr 15:22)