Impormal nga nakasangyaw si Jesus sa babayeng Samarianhon pinaagi sa pagpakig-estorya kaniya. Unsaon nato pagpauswag sa atong kahanas nga makasugod ug panag-estorya sa mga dili kaila?

• Magmahigalaon ug pakig-estorya sa mga tawo. Bisag gikapoy, si Jesus nakasugod ug panag-estorya pinaagi lang sa pagpangayog tubig nga mainom. Busa makasugod ka sa pagpakig-estorya pinaagi sa pagtimbaya, ug dayon makahisgot ka bahin sa klima o sa di pa dugayng hitabo. Hinumdomi nga ang pangunang tumong mao ang pagsugod ug panag-estorya, busa paghisgot ug topiko nga tingali interesado ang maong tawo. Kon wala siyay reaksiyon, walay mawala kanimo. Sulayi sab na sa laing tawo. Pag-ampo kang Jehova alang sa kaisog.​—Neh 2:4; Buh 4:29.

• Magmaalerto sa kahigayonan nga makasangyaw sa maayong balita, pero ayaw pagdalidali. Himoang natural ang inyong panag-estorya. Kon imong dalidalion, basin mawala ang iyang interes ug dili na makig-estorya. Ayawg kaluya bisag natapos dayon ang inyong panag-estorya ug wala ka makasangyaw niya. Kon maglisod ka sa pagsangyaw sa maayong balita, pagpraktis nga makasugod ug panag-estorya nga dili usa mosangyaw. [I-play ug hisgoti ang video 1.]

• Pangitag kahigayonan sa pagsangyaw pinaagi sa paghisgot bahin sa imong gituohan, magpalihok ni sa imong kaestorya sa pagpangutana. Si Jesus naghisgot ug makapainteres nga mga butang nga nagpalihok sa babaye sa pagpangutana. Dihang si Jesus anam-anam nga nagpaambit sa maayong balita, natubag ang iyang mga pangutana. [I-play ug hisgoti ang video 2, ug dayon i-play ug hisgoti ang video 3.]