Ang Labing Makaiikag nga Bahin sa Miaging Tuig

ANG organisasyon ni Jehova sa yuta nagpadayon sa pag-uswag sa miaging tuig sa pag-alagad. Ang panalangin sa Diyos dayag kaayo tungod kay diha sa 235 ka kayutaan, gipasundayag sa kapin sa sayis milyones ka mga Saksi ni Jehova ang ilang pagkamaunongon ngadto kaniya ug ang ilang pagtuo sa iyang saad nga magpatungha ug usa ka bag-ong kalibotan sa pagkamatarong. Kini nga minilyon maoy, dili mga tawo nga nag-angkon lamang nga mga alagad sa Diyos, kondili mga tawo nga aktibong nagwali sa maayong balita sa Gingharian sa Diyos, sumala sa gitagna ni Jesus ug natala diha sa Mateo 24:14. Nahiuyon sa 2001 nga tinuig nga teksto, sila nagpadayon sa ‘pagbarog nga bug-os ug may hugot nga pagtuo sa bug-os nga kabubut-on sa Diyos.’​—Col. 4:12.

Dihay daghang makaikag nga mga hitabo sa katawhan sa Diyos nianang tuiga. Atong hisgotan karon ang pipila sa labing makaiikag nga bahin niini.

 Mga Kombensiyon sa Pagtudlo sa mga Magtutudlo sa Pulong sa Diyos

Ang usa sa halandomong mga bahin sa tuig mao ang “Mga Magtutudlo sa Pulong sa Diyos” nga Distritong Kombensiyon sa mga Saksi ni Jehova, nga gihimo sa daghang lugar sa tibuok kalibotan gikan sa tungatunga sa 2001 ngadto sa unang bahin sa 2002. Milyonmilyon ang mitambong. Ang tema sa kombensiyon gisaysay sa usa ka mamumulong sa unang adlaw sa tulo-ka-adlaw nga kombensiyon. Siya miingon: “Si Jesus dili interesado sa paghatag sa yawi sa kahibalo ngadto sa hamiling pundok sa mga eskolar sa Kasulatan. Iyang gisultihan ang iyang mga tinun-an: ‘Ang isulti ko kaninyo diha sa kangitngit, isulti diha sa kahayag; ug ang madungog ninyo nga hinagawhaw, iwali gikan sa mga atop.’ Buot gayod ni Jesus nga mapaambit ang kahibalo sa Diyos ngadto sa daghang tawo kutob sa mahimo. Alang kaniya, ang kahibalo sa Kasulatan kinahanglang ipaambit, dili tagoan.”

May mga pakigpulong sa programa sa kombensiyon nga naghisgot sa kahulogan sa tagna sa Bibliya ug kon unsaon sa pagpadapat sa mga Kristohanon ang mga prinsipyo sa Kasulatan diha sa ilang mga kinabuhi. Sa Dominggo dihay drama nga ang mga entrante nagsul-ob ug mga besti nga iya sa partikular nga yugto sa estorya nga nag-ulohang Tahora ang Awtoridad ni Jehova. Gipasiugda sa drama ang asoy sa Bibliya bahin sa pagrebelde ni Kore diha sa kamingawan nga sukwahi sa matinumanong dalan sa iyang mga anak.

Duha ka publikasyon ang giluwatan diha sa kombensiyon. Ang una mao ang librong Tagna ni Isaias​—Kahayag Alang sa Tibuok Katawhan, Tomo Dos. Ang ikaduha mao ang brosyur nga nag-ulohang Makapatagbawng Kinabuhi​—Kon Unsaon Pag-angkon Niini. Dugang pa, dihay usa ka bag-ong tract​—Ikaw ba Adunay Espiritu nga Dili-Mamatay?

Sa bulan sa Agosto, dihay gihimong espesyal nga mga kombensiyon sa Pransiya ug Italya. Sa Pransiya kining espesyal nga mga kombensiyon gihimo sa Paris, Lyons, ug Bordeaux, nga sa tingob nakaabot sa kinatas-ang tumatambong nga 160,045. Kining mga  kombensiyona nakadasig pag-ayo sa mga igsoon sa Pransiya, nga maoy gihisgotan sa mapihigon nga pagbalita. Usa ka igsoon miingon: “May mga panahon nga mobati kami nga nag-inusara pag-ayo sa among kahimtang, apan karon human nga kami gibisitahan sa libolibo namong Kristohanong mga igsoon, kami nadasig sa pagpadayon.”

Sa Italya dihay espesyal nga mga kombensiyon nga gihimo didto sa Roma, Milan, Turin, ug Bari. Ang laing lima ka siyudad nga gihimoan sa kombensiyon gikonektar pinaagi sa linya sa telepono alang sa pipila ka bahin sa programa. Ang total nga mitambong niining siyam ka kombensiyon maoy 289,133. Diha sa matag usa niining maong mga kombensiyon sa Pransiya ug Italya, dihay makapukaw nga resolusyon nga gipadayag ngadto sa tumatambong. Ang mga delegado, nga gikan sa nagkalainlaing mga nasod, nagpaila sa ilang tubag pinaagi sa kusog nga pagtubag ug oo! Kining maong deklarasyon gisundan sa dugayng nahuman nga pagpamakpak.

Tibuok-Yutang Pagsangyaw Uban sa Kingdom News Num. 36

Sa mga bulan sa Oktubre ug Nobyembre 2000, halos tunga sa bilyong kopya sa Kingdom News Num. 36 sa 189 ka pinulongan ang gipanagtag sa tibuok-kalibotan. Ang Kasulatanhong mensahe bahin sa Pagmando ni Kristo Jesus Panahon sa Milenyo, duyog sa dekolor nga mga ilustrasyon, naghimo niining maong Kingdom News nga makapaikag sa daghang tawo. Kon ikaw usa sa mga Saksi ni Jehova, tingali nakabahin ka sa pagpanagtag niini. Ang mosunod maoy mga report bahin sa kampanya gikan sa nagkalainlaing bahin sa kalibotan.

Bisan pa sa ubos sa sero nga mga temperatura sa Alaska, ang mga Saksi didto wala magpababag sa pagsangyaw. Ang nagadumalang magtatan-aw sa North Pole Congregation miingon: “Bisag tingtugnaw, ang ubang mga tagbalay nagtindog diha mismo sa ilang lagwerta ug nagbasa sa Kingdom News Num. 36. Ang yanong mensahe nga nagtandi sa kahimtang sa mga butang karon uban sa mga panalangin nga modangat sa katawhan makaikag kaayo.”

 Sa Albania 15 ka kongregasyon sa pipila ka dagkong mga siyudad gidapit sa pagduaw sa lagyong mga baryo. Maikagon ug malipayon kaayong gidawat sa mga igsoong lalaki ug babaye kining imbitasyona. Singkuwentay-sayis ka baryo nga may gibanabanang populasyon nga 50,000 ang naduaw sa unang higayon.

Ang sanga sa Angola nagtaho: “Tungod sa kasibot ug kadasig sa mga magmamantala, ang kampanya sa Kingdom News Num. 36 sa among teritoryo malamposon kaayo. Nahimo kini bisan pa sa lisod nga mga problema sa panalapi ug gubat nga padayon nga nakaapektar sa mga kongregasyon sa tibuok nasod. Sa dihang gipanagtag ang Kingdom News, daghang tawo ang midawat niini nga maikagon. Tungod niini, sa bulan sa Nobyembre, ang Angola nagtaho ug bag-ong kinatas-ang ihap nga 94,026 ka pagtuon sa Bibliya sa balay, usa ka pag-uswag nga halos 10,000 kay sa miaging bulan.”

Sa Cameroon, samtang nagbiyahe paingon sa usa ka baryo, usa ka grupo sa mga Saksi wala tuyoang nakahulog ug usa ka pakete sa Kingdom News Num. 36. Usa ka tawo nga nakamatikod sa mga Saksi nga nanagtag sa Kingdom News nagpaingon sa iyang uma sa dihang iyang nakita ang pakete diha sa daplin sa dalan. Iyang gipunit kini ug siya mismo ang nanagtag sa Kingdom News Num. 36! Sa ngadtongadto, napanagtag niya ang tanan gawas sa upat ka kopya. Sa dihang gipangayo sa mga tagbalay kining upat ka kopya, wala siya mosugot ug miingon: “Dili ako maghagohago nga walay suhol; akoa kini alang sa akong pamilya. Inig-abot sa mga Saksi, silay mohatag ninyo sa inyong mga kopya.”

Sa Colombia ang mga Saksi naghimog pagbalikduaw sa usa ka babaye nga midawat sa kopya sa Kingdom News Num. 36. Ang babaye miingon nga kanunay gayod siyang mobalibad sa pagpakigsulti sa mga Saksi ni Jehova. Apan, human makabasa sa Kingdom News Num. 36, iyang nakita nga giusikan niya ang higayon nga makabaton ug usa ka butang nga maayo kaayo. Dayon miluhod siya ug nangayog pasaylo sa Diyos. Human niana, iyang gikontak ang mga Saksi, ug sa pagkakaron, siya nagtuon sa Bibliya.

Sa usa ka baryo sa Congo (Kinshasa), usa ka polis nga nag-uniporme nagbasa sa Kingdom News Num. 36 nga maikagon kaayo.  Sa ulahi iyang nahibalag ang mga Saksi ug gisultihan sila nga ang mensahe gamhanan ug makapahupay. Dayon milakaw siya makadiyot apan mibalik nga nagsul-ob ug sibilyan nga besti ug nagkupot ug Bibliya. Siya miingon: “Gusto kong mokuyog ninyo sa pagpanagtag niini nga mensahe tungod kay hinungdanon ug dinalian kaayo kini!” Malulotong gipatin-aw sa mga Saksi nga kinahanglang magtuon una siya sa Bibliya. Ang tawo midawat, ug ang iyang pagtuon mauswagon kaayo.

Usa ka batan-ong babaye nga ginganlag Joy nakakita ug usa ka kopya sa Kingdom News Num. 36 ilalom sa pultahan sa iyang balay sa Gresya. Human mabasa kini, iyang giteleponohan dayon ang iyang iyaan nga usa sa mga Saksi ni Jehova. Iyang gisultihan ang iyang iyaan nga natandog gayod siya sa mensahe ug nga gusto siyang makigsulti sa mga Saksi ni Jehova. Gikontak sa iyang iyaan ang usa ka sister nga nag-alagad ingong usa ka espesyal payunir sa maong lugar, ug nakigkita kining maong payunir sa batan-ong babaye. Sa ilang dakong katingala, ilang nadiskobrehan nga magkaila diay sila. Gisultihan ni Joy ang payunir nga bisag duna siyay Bibliya, dili siya mahibalong mangita sa mga Kasulatan nga ikapadapat sa mga problema nga iyang giatubang. Misugot dayon siya nga magpatuon sa Bibliya diha sa balay.

Nagtanyag ang usa ka Saksi sa Korea ug Kingdom News Num. 36 ngadto sa usa ka babaye nga nasuko sa iyang anak nga lalaki tungod kay usa siya sa mga Saksi ni Jehova. Sa milabay ang tulo ka adlaw gibisitahan siya pag-usab sa Saksi ug gisaysay ang giingon sa Bibliya bahin sa Paraiso. Maayo ang reaksiyon sa babaye, ug usa ka pagtuon sa Bibliya ang nasugdan. Ang iyang anak, nga nagluha ang mga mata, miingon: “Dili ako makatuo nga nagsugod ang akong inahan sa pagtuon sa Bibliya.” Maayo kaayo ang iyang pag-uswag.

Sa interyor sa Liberia, dihay pipila ka mga Saksi nga naglakaw gikan sa usa ka baryo ngadto sa laing baryo aron sa pagpanagtag sa Kingdom News sa dihang nasaag sila gikan sa dakong dalan ug nakadangat sa usa ka hilit nga uma sa kinapusoran sa kakahoyan. Sa dihang gisultihan sa mga Saksi ang mga mag-uuma nga nasaag sila, ang usa ka batan-ong lalaki miingon: “Gitultolan kamo sa espiritu  sa Diyos dinhi aron madawat namo ang among mga kopya.”

Ang mga tawo sa Netherlands maikagong midawat sa Kingdom News Num. 36. Kapin sa duha ka milyong kopya ang napanagtag dihadiha. Ang sanga sa Selters, Alemanya, nagpatik ug dugang 100,000 ka kopya, apan naghangyo ug dugang pa ang mga kongregasyon. Sa siyudad sa Helmond, gisultihan sa usa ka Saksi ang tagbalay nga ang maong tract gipanagtag sa tibuok kalibotan. Ang lalaki miingon: “Palihog hulat una.” Misulod siya sa balay ug mitawag sa telepono sa usa ka higala didto sa Pransiya aron sa pagtino sa gisulti sa magmamantala. Siya miingon sa iyang higala: “Dunay usa sa mga Saksi ni Jehova sa akong pultahan nga nagdalag tract nga matod pa niya gipanagtag sa tibuok-kalibotan. Nakadawat ka ba ug usa ka kopya?” Ang iyang higala mitubag: “Oo, sa miaging diyes minutos lamang.” Gibutang sa tawo ang telepono, mibalik sa pultahan, ug gidawat ang usa ka kopya para sa iyang kaugalingon.

Ang sanga sa Rusya nakadawat ug makaikag nga sulat gikan sa usa ka batan-on nga anaa sa septimo grado. Siya nagsulat: “Hello. Nalipay kaayo ko nga nakakita ug usa ka tract diha sa among buson nga naghisgot bahin sa bag-ong milenyo! Ang among labing malipayong yugto sa tibuok tuig mao kining tract  nga inyong gihatag kanamo! Palihog padad-i kami ug dugang impormasyon.”

Gawas nga nagtabang sa katilingban, ang kampanya sa pagpanagtag sa Kingdom News Num. 36 nakabenepisyo sa mga Saksi. Usa ka Saksi sa Saipan mikomento: “Nalipay kaayo ko nga nanagtag sa Kingdom News. Ako nabawtismohan sa 1998, busa kini ang akong unang higayon nga nakaduyog niining bahina sa ministeryo. Kini nakadasig kaayo kanako sa pagsulay sa pagsangyaw magabii, nga nakatabang kanako sa pagsulti ngadto sa mas daghan pang mga tawo. Tungod niining buluhatona, ang akong pagtuo mas milig-on, ug mibati ako nga mas suod kang Jehova.”

Ang mga Saksi miadto sa halayong bahin sa Malaita, Solomon Islands, aron sa pagpanagtag sa Kingdom News Num. 36. Human sa pagbaktas ug kapin sa lima ka oras, nakaabot sila sa usa ka baryo diin giabiabi sila sa lokal nga pastor ug nagpakitag dakong interes. Siya miingon nga kapin sa siyam ka tuig, walay laing hawas sa iyang iglesya ang nakaduaw o nagpakitag kaikag kanila. Apan, aniay usa ka grupo sa mga estranghero nga naghago sa pagtabok sa mga bukid aron sa pagtabang kanila nga makasabot sa mensahe sa Bibliya. Nasugdan ang mga pagtuon sa Bibliya uban sa tanang pamilya sa baryo. Ang mga igsoon mibalik matag duha ka semana, ug wala magdugay napulo ka pagtuon ang nagmauswagon. Ang pastor miingon nga kon dunay usa nga moestar uban kanila aron makasugod ug usa ka grupo, ang simbahan sa baryo mahimong gamiton sa mga tigom. Usa ka espesyal payunir karon ang regular nga nagaduaw sa grupo. Sa kinaulahiang report, usa ka hawas gikan sa iglesya miduaw ug nagtanyag ug pagkaon sa mga taga-baryo kon sila mohunong sa pagtuon uban sa mga Saksi ni Jehova. Apan, ang tanan miingon nga mopadayon sila sa ilang pagtuon sa Bibliya.

Samtang nagbakasyon sa usa ka halayong lugar sa Venezuela, nakahatag ang pipila ka Saksi ug kopya sa Kingdom News Num. 36 sa ilang tiggiya, nga usa ka Pemón nga Indian. Nalipay sa iyang kopya, iyang gibalikbalik kinig basa. Sa dihang kini nabasa sa ulan, mainampingong gihayhay niya kini aron mouga. Nangayo siya ug dugang mga kopya aron madala niya ngadto sa iyang tribo.

 Legal nga mga Hitabo Sulod sa Tuig sa Pag-alagad

Tungod sa konsensiya, si Ivailo Stefanov midumili sa pagsulod sa pagkasundalo sa Bulgaria. Busa, gisentensiyahan siya ug usag tunga ka tuig nga pagkapriso. Gipasaka ni Brader Stefanov ang iyang kaso ngadto sa European Court of Human Rights sa katarongan nga ang iyang relihiyosong kagawasan gilapas. Sa dihang gipahibalo sa korte nga husayon niini ang kaso, ang mga awtoridad sa Bulgaria mahigalaong nakig-areglo nga bug-os nga nag-absuwelto kang Brader Stefanov ug sa ubang mga Saksi nga gipasakaan ug samang sumbong. Sa Mayo 3, 2001, gidawat sa korte ang mahigalaong areglo. Ingong bahin sa areglo, ang mga awtoridad sa Bulgaria misugot usab sa pagkunhod sa gidugayon sa kapilian nga serbisyo sibil, nga kaniadto maoy duha ka pilo sa gidugayon sa pinugos nga pagserbisyo sa militar.

Sa Quebec, Canada, ang siyudad sa Blainville nagpakanaog ug reglamento nga nag-ingon nga ang mga tawo nga moadto sa pultahan ug pultahan tungod sa relihiyosong katuyoan kinahanglang mopalit una ug permiso. Ang permiso nagtugot sa pultahan-ug-pultahan nga mga pagduaw gikan lamang sa Lunes ngadto sa Biyernes, nga balido sa duha lamang ka bulan, ug dili mahimong mangayog bag-ong permiso hangtod molabay ang 12 ka bulan. Sa Abril  17, 2001, usa ka hataas nga huwes sa korte sa Quebec nagbaod nga ang reglamento dili ikapadapat sa publikong ministeryo sa mga Saksi ni Jehova. Ang huwes miingon nga nahigawas ang mga Saksi ni Jehova sa pagkuhag permiso ug wala kutohi sa mga oras, adlaw, bulan, o tuig diha sa ilang pultahan-ug-pultahan nga relihiyosong mga kalihokan. Iyang gihisgotan ang ministeryo sa mga Saksi ni Jehova ingong “usa ka Kristohanong pag-alagad sa komunidad” ug nakakita nga ang ilang mga publikasyon maoy “hinungdanon kaayong literatura, nga naghisgot sa mga ulohan sama sa relihiyon, Bibliya, mga droga, alkoholismo, edukasyon sa kabataan, mga problema sa kaminyoon ug diborsiyo.” Ang pagtandi sa mga Saksi sa mga manunuroyg mga baligya, ang huwes miingon, maoy “mainsultohon, makapaubos, masakit, ug makadaot sa dungog.”

Sa Pebrero 22, 2001, ang Korte Suprema sa Tbilisi, Georgia, mipakanaog ug desisyon sa pag-anular sa mga rehistrasyon sa duha ka korporasyon nga gigamit sa mga Saksi ni Jehova didto: ang Union of Jehovah’s Witnesses of Georgia ug ang Representation of the Watch Tower Society sa Georgia. Giklarog maayo sa korte nga kining maong desisyon wala magdili sa mga Saksi ni Jehova. Sa kasukwahi, ang korte nag-ingon nga ang mga Saksi ni Jehova makapadayon sa ilang relihiyosong mga kalihokan, lakip sa pagtigom, pagpasulod gikan sa gawas ug literatura, ug pag-abang o pagpanag-iyag propiedad. Apan, wala tahora sa relihiyosong mga ekstremista ang korte ug mihimog sunodsunod nga mapintas nga mga pag-atake nga gibatbat sa usa ka organisasyon sa tawhanong mga katungod ingong “pagmando sa kalisang.” Sa Hunyo 29, 2001, nagpadala ug aplikasyon ang mga Saksi ni Jehova sa European Court of Human Rights nga nagprotesta sa pagkawalay aksiyon sa gobyerno may kalabotan sa grabeng kapintasan, ug sa Hulyo 2 ang korte mimando nga ang aplikasyon atimanon sumala sa kon unsay angay hatagag unang pagtagad. Kini miresulta ug maayo, tungod kay sa Mayo 30, 2001, gipagawas sa Departamento sa Aduwana sa Georgia ang duolan sa 20 ka tonelada sa atong literatura sa Bibliya, nga ilegal nga giembargo sa Marso 14, 2001. Ang literatura giapod-apod dayon ngadto sa mga kongregasyon sa tibuok Georgia.

 Sa 1997 ang Federal Administrative Court sa Berlin, Alemanya, midumili sa paghatag sa mga Saksi ni Jehova ug legal nga pag-ila nga usa ka publikong korporasyon nga nahiuyon sa balaod. Kini nga pagdumili gibase sa pangangkon nga ang mga Saksi ni Jehova dili maunongon sa Estado tungod sa ilang pagkaneyutral sa mga eleksiyon sa politika. Ang mga Saksi miapelar. Sa Disyembre 19, 2000, ang Federal Constitutional Court sa Alemanya mihukom nga wala kanang giingon nga dugang nga pagkamaunongon. Apan, ang kaso gipadalag balik ngadto sa administratibong mga korte aron masubli pag-usab ang apelasyon aron ilhon nga legal, niining higayona sa katarongan kon kaha gilapas sa mga Saksi ni Jehova ang tawhanong mga katungod. Ang mga pagtuo ug mga batasan may kalabotan sa dugo, pagmatuto ug bata, pagpalagpot, ug mga relasyon sa pamilya nahimong bag-ong isyu sa kaso.

Di pa dugay, kapin sa 3,500 ka Saksi sa Gresya dunay kriminal nga mga rekord tungod kay sila gipriso gumikan sa ilang pagpabiling neyutral. Ang pagkaadunay kriminal nga rekord nagpasabot nga kining maong mga Saksi dili makasulod ug trabaho diha sa gobyerno, mga organisasyon nga manghatag ug hinabang, ug sa mga bangko. Ang uban wala hatagig lisensiya aron makatrabaho sa pipila ka propesyon. Karon usa ka balaod ang gipakanaog sa Gresya nga nag-ingon nga kining maong mga Saksi dili na isipon ingong mga kriminal kaniadto. Sa walay duhaduha, ang paborableng desisyon nga gipakanaog sa European Court of Human Rights nga nalangkit kang Thlimmenos v. Greece labot sa isyu sa katungod sa tawo nga tungod sa konsensiya motutol sa pinugos nga pagserbisyo sa militar maoy nakapukaw sa pagpakanaog ug bag-ong balaod.

Ang Kobe District Court sa Hapon nagpakanaog ug paborableng desisyon sa Marso 30, 2001, bahin sa usa ka kaso nga nalangkit ang usa sa mga Saksi ni Jehova. Usa ka sister gikidnap ug gikulong nga kontra sa buot sulod sa 17 ka adlaw aron mapanas sa iyang hunahuna ang iyang relihiyosong pagtuo. Ang korte miingon nga ang akusado​—usa ka ministro sa Baptist​—nakigkunsabo sa bana kaniadto sa sister ug sa mga membro sa pamilya sa bana sa pagkulong kaniya nga supak sa iyang kabubut-on. Ang akusado gimandoan sa pagbayad ug 400,000 yen ($3,300, T.B.) nga danyos.

 Ang Korte Suprema sa Romania klaro kaayong nag-ingon diha sa duha ka desisyon nga ang Relihiyosong Organisasyon sa mga Saksi ni Jehova legal nga giilang relihiyon ug angay makapahimulos sa tanang katungod nga gihatag sa balaod diha sa mga relihiyon. Ang State Secretariat for Religions misulay sa pagbalit-ad niining mga desisyona apan napakyas. Sa Abril 2, 2001, gibarogan sa Korte Suprema ang gipakanaog nga mga desisyon niini sa miagi. Sa pagkakaron, ang State Secretariat for Religions wala pa modawat nga legal na gayod ang mga Saksi ni Jehova, bisan pa sa mga mando sa Korte Suprema nga ilhon kini nga legal.

Sa Pebrero 23, 2001, gidismis sa kataposan sa usa ka huwes ang kaso sa pagdili sa mga Saksi ni Jehova sa Moscow, Rusya, human sa halos unom-ka-tuig nga legal nga proseso ug tulo-ka-tuig nga kaso sa korte. Apan, wala magdugay ang kahupayan sa mga igsoon, tungod kay sa Mayo 30, 2001, ginulo sa Korte sa Siyudad sa Moscow ang desisyon sa ubos nga korte ug nagsugo ug bug-os nga paghusay pag-usab sa kaso. Ikaunom ka higayon na kini sukad sa 1996 nga kinahanglang depensahan sa mga Saksi ni Jehova ang ilang kaugalingon batok sa mao ra gihapong walay basehanang mga akusasyon.

Ang usa ka desisyon sa Pebrero 21, 2001, sa Hataas nga Korte sa Pennsylvania, Tinipong Bansa, maoy malanog nga paglaban sa katungod sa pasyente maylabot sa pagbuot sa kaugalingong lawas ug pagkabalido sa kalig-on sa power of attorney alang sa pag-atiman sa panglawas. Ang maong desisyon nalangkit kang Maria Duran, kinsa dugay nang nagpahibalo sa iyang malig-ong pagdumili sa pagdawat ug mga pag-abonog dugo. Bisan pa sa mga pasidaan ni Maria, ang iyang dili-Saksing bana, uban sa tabang sa mga doktor ni Maria ug sa ospital, nakakuhag usa ka mando sa korte nga nagtudlo sa iyang bana ingong iyang sinaligan panahon sa emerhensiya, bisan pag duna nay gitudlo si Maria nga usa ka kaubang magtutuo ingong iyang tinugyanan nga tig-atiman sa panglawas. Gibali sa hataas nga korte ang mando sa emerhensiya ug nag-ingon nga bisan sa pagsupak sa bana, mga paryente, ug mga doktor sa iyang asawa, ang iyang espesipiko nga mga instruksiyon labot sa pag-atiman sa panglawas ug personal nga pagtudlog usa ka tinugyanan angay nga mao untay sundon.

 Gikinahanglan​—Dugang mga Kingdom Hall

Diha sa daghang nasod, ang pagpanukod ug mga Kingdom Hall malisod kaayo ug nagkinahanglag taas nga panahon. Ang ubang mga kongregasyon nagtigom diha sa inabangan nga mga pasilidad sa daghang bulan​—o mga tuig pa—​samtang nagkamulo pa pagtukod. Sa usa ka wala pa matiwas nga Kingdom Hall sa nasod sa Aprika, usa ka ihalas nga periko nagsalag diha sa katsaw sa kisame. Wala madugay ang periko nagtaghoytaghoy na sa mga alawiton sa Gingharian, nga walay nagtagad. Hinay kaayo ang dagan sa trabaho nga ang periko nakakat-on sa pagsundog sa konduktor sa Pagtuon sa Bantayanang Torre, manawag pa gani sa mga ngalan sa mga igsoong lalaki ug babaye! Sa ngadtongadto, ang Kingdom Hall natapos, ug ang periko mibalhin ug laing pinuy-anan.

Karon, tungod sa makapalipay nga bag-ong programa sa pagpanukod, ang pagpanukod ug mga Kingdom Hall dali kaayong matapos. Gani, diha sa kadaghanang nagakaugmad nga mga nasod, ang mga Kingdom Hall ginatukod karon ug gipahinungod sa tulo o upat ka semana lamang! Sa Aprika lang, 1,074 ka bag-ong mga Kingdom Hall ang natukod sulod sa miaging tuig sa pag-alagad​—sa gikusgon nga halos 4 matag adlaw sa pagtrabaho!

Dunay duha ka katuyoan ang programa sa pagpanukod ug bag-ong Kingdom Hall. Una, aron makatagana sa panginahanglan ug mga Kingdom Hall. Ang sanga sa Habagatang Aprika nagsulat: “Makapalipay kaayo kini nga kaugmaran nga nakaseguro kami nga daghang Kingdom Hall ang matukod diha sa mga nasod diin kini gikinahanglan pag-ayo.” Ikaduha, sa pagtino nga makatagana sa panginahanglan ug mga Kingdom Hall pinaagi sa pag-organisar sa buluhaton sa pagpanukod nga patrabahoon ang hanas nga lokal nga mga Saksi. Sa Benin, pananglitan, ang programa sa pagpanukod karon bug-os nga gidumala sa nasod mismo ug makahimo sa pagtagana sa umaabot nga mga panginahanglan ug mga Kingdom Hall.

Duyog sa Design/Build Office sa Brooklyn, lima ka Rehiyonal nga mga Opisina sa Kingdom Hall ang nagtagana ug organisasyonal nga tabang ngadto sa mga sanga sa Sidlakang Uropa, Aprika, Asia, Oceania, Sentral ug Amerika del Sur, ug sa kaislahan sa  Caribbeano. Kining maong mga opisinaha nakigtambayayong gayod sa mga Komite sa Sanga sa pagtabang kanila aron bug-os nga makapahimulos sa mga giya ug mga tabang nga mabatonan karon. Pananglitan, usa ka Departamento sa Pagtukod ug Kingdom Hall ang gitukod diha sa matag sanga aron maoy mohikay sa buluhaton sa pagpanukod diha sa kanataran. Kining maong departamento motabang usab sa mga kongregasyon panahon sa pagpilig yuta ug nakaugmad ug mga plano subay sa sukdanang espesipikasyon sa pagtukod base sa makuhang materyales ug magamit nga mga paagi sa pagtukod sa maong lugar.

Diha sa 92 ka kayutaan diin nihit kaayo ang panalapi ug walay hanas nga mga trabahante nga maoy nakalangan kaniadto sa mga trabaho sa pagtukod, kapin sa 4,000 ka taas-ug-tagal ug mubog-tagal nga mga boluntaryo maoy bahin karon sa 352 ka bug-os-panahong mga Grupo sa Pagpanukod ug mga Kingdom Hall. Hinungdanon sa kalamposan niini nga mga grupo mao ang pagpormag mga alagad sa pagpanukod ug mga Kingdom Hall, usa ka bag-ong kategoriya sa espesyal nga bug-os-panahong pag-alagad alang sa kuwalipikadong lokal nga mga igsoon sa piniling mga nasod. Dugang pa, 152 ka internasyonal nga mga alagad ang magbansay sa lokal nga mga igsoon aron maoy modumala sa programa sa pagpanukod. Siyempre, kay proyekto man sa kongregasyon ang pagtukod sa Kingdom Hall, ang mga sakop sa kongregasyon andam nga mangabaga sa gikinahanglang gidaghanon sa boluntaryo nga pagtrabaho.

Unsay reaksiyon sa mga tawo niining bag-ong programa sa pagpanukod? Sa Trujillo, Venezuela, ang unang Kingdom Hall bag-o pang nahuman diha sa Sara Linda. Naghilak sa kalipay, usa ka magmamantala miingon: “Makapatandog gayod nga nahinumdom si Jehova kanamo. Ang among lungsod dili gani makita diha sa mapa!”

Usa ka sister sa Rio de Janeiro, Brazil, napukaw sa pagsulat: “Napulo ka tuig nga gibaktas ko ang upat ka kilometros paingon sa mga tigom, nga motabok sa gamayng taytayan bisag mabdos ako. Sa kataposan, ang akong damgo natuman. Usa ka Kingdom Hall ang natukod sa among dapit! Daghang estudyante sa Bibliya nagsugod  na sa pagtambong sa mga tigom. Ang akong amahan, nga nagtuon sa miagi apan sa ulahi misupak nako, wala na gayod makapalta ug tigom sukad sa pagpahinungod. Niining semanaha nagsugod na usab siya sa pagtuon.” Usa ka dili-Saksi nga naniid miadmitir: “Ako 60 anyos ug wala pa gayod makakita ug sama niini sukad! Ang mga Saksi paspas kaayong motrabaho ug malipayong nagtambayayong sa pagtrabaho. Tighan-ay ako ug tisa sa konseho sa lungsod, ug kon dugay kaayong mahuman ang trabaho, dunay moingon: ‘Maayo segurong manguha kita ug mga Saksi ni Jehova sa pagtabang kanato!’”

Usa ka ansiyano sa Ukraine mikomento: “Nakatukod kami ug Kingdom Hall subay sa sukdanang espesipikasyon sa pagtukod sulod sa usa lamang ka bulan, busa wala kami mabalda sa mga responsibilidad sa among mga pamilya ug kongregasyon sa taastaas nga panahon.” Usa ka sister didto midugang: “Nalipay kaayo kami. Nakita namo sa among kaugalingong mga mata nga gitabangan ni Jehova ang iyang katawhan. Kaniadto, tungod sa among kahimtang sa panalapi, kami wala gayoy paglaom nga makabaton ug among kaugalingong Kingdom Hall.”

Ang mga interesado sa Malawi maikagon kaayo sa pagpakig-uban kanamo kon duna pay maayong tigomanan. Ang Nafisi Congregation nagtaho: “Karon kami duna nay maanindot nga Kingdom Hall nga nakahatag ug maayong pamatuod. Tungod niini, sayon na ang pagsugod ug mga pagtuon sa Bibliya sa dihang mosangyaw. Ang mga tawo bisan asa natingala. Sa eskuylahan man, trabahoan, o sa ilang mga balay, ang among Kingdom Hall mao ang ginaestoryahan.”

Ang mga lider sa komunidad sa Mozambique nakadayeg gayod usab sa programa sa pagpanukod ug Kingdom Hall. Usa ka tradisyonal nga hepe gihangyo labot sa yuta nga tukoran ug Kingdom Hall. Sa naghatag sa permiso, siya mitubag: “Nakadungog ako bahin sa pagpanukod ug mga Kingdom Hall sa ubang mga lugar ug nabalaka, kay walay usa dinhi sa akong lugar. Salamat kaayo kaninyo, mga Saksi ni Jehova, sa pagplano sa pagtukod ug among Kingdom Hall!”

 Unsay epekto sa maayong-pagkaorganisar nga mga proyekto diha sa espiritu sa pagboluntaryo sa kongregasyon? Ang membro sa usa ka grupo sa pagpanukod sa Zimbabwe miasoy: “Human sa pagbiyahe ug daghang oras nga nag-ulan, nakadangat kami sa lugar nga tukoran sa Kingdom Hall sa banika. Ang among naghulat nga mga igsoong lalaki ug babaye nagtapok ilalom sa usa ka kahoy nga dunay daob sa ilang tiilan. Bisan pag nag-ulan, gisugat nila kami ug maabiabihong mga pahiyom. Agig pagpangandam sa among pag-abot, 60 sa kongregasyon nagkalot ug mga lungag alang sa pundasyon. Nagsugod sila sa alas kuwatro sa miagi pang buntag ug natapos sa alas sayis nianang gabhiona.”

Sa mao gihapong nasod, ang Zongoro Congregation walay Kingdom Hall. Si Nathan Muchinguri nag-alagad didto sukad nga siya gibawtismohan sa 1924. Sa daghang tuig, iyang gihubad ang mga publikasyon sa Bibliya sa Shona nga pinulongan. Kay nagpuyo man siya gawas sa Bethel, ang sangang buhatan mitanyag sa pagtabang sa iyang panggasto, apan mibalibad siya sa tanyag. Apan, siya nakapahayag nga buot niya nga makatigom diha sa usa ka Kingdom Hall una pa matapos ang iyang yutan-ong kurso. Sa Abril 8, 2001, ang pangandoy sa 93-anyos nga Brader Muchinguri natuman. Ang Zongoro Congregation nagtigom sa unang higayon sa ilang bag-ong Kingdom Hall. Ang okasyon mao ang pagsaulog sa Panihapon sa Ginoo.

Sukad nga gisugdan kini nga programa sa pagpanukod sa Nobyembre 1999, 2,097 ka bag-ong Kingdom Hall ang natukod sa 92 ka kayutaan​—may aberids nga 22 matag semana! Ang mahigugmaong kontribusyon sa atong tibuok-kalibotan nga panag-igsoonay maoy nagpaposible niining “pag-angay-angay,” aron ‘ang kongregasyon nga adunay daghan dili makabaton ug sobra ka daghan, ug ang kongregasyon nga dunay diyutay dili makabaton ug labihan ka diyutay.’ (2 Cor. 8:​14, 15) Gipanalanginan ba ni Jehova kining tibuok-kalibotan nga paningkamot? Tagda: Sulod sa usa ka bulan nga pagtukod ug usa ka maayong Kingdom Hall diha sa daghang lugar, ang nanambong sa mga tigom doble kanunay.

 Walay-Dugo nga Pagpanambal ug Pag-opera​—Tulo ka “Video”

Ang seryal nga tulo ka video gigama sa Audio/Video Services, duyog sa mga igsoon sa Alemanya ug sa ubang mga nasod, nga nagpadayag sa pagkamakataronganon ug pagkaepektibo sa walay-dugo nga pagpanambal ug pag-opera. Niining tulo ka video, gitandi sa iladong mga siruhano ang pagkaepektibo sa mga pamaagi sa kapilian sa pag-abonog dugo uban sa mga pamaagi nga nagagamit ug dugo. Ang unang video sa seryal nag-ulohang Transfusion-Alternative Strategies​—Simple, Safe, Effective. Kadto gihimo para gayod sa mga doktor ug sa mga estudyante sa medisina. Gigamit ang computer animation aron mahulagway ang obra sa mga sangkap sa dugo.

Kanang unang video natapos igo ra gayod sa panahon nga masalmot diha sa ika-34 nga tinuig nga U.S. International Film and Video Festival. Tanantanan, dihay 1,500 ka video ang gisalmot gikan sa 33 ka nasod. Ang video nga Transfusion Alternatives  gihukman sumala sa tulo ka kategoriya. Diha sa duha ka kategoriya​—Research Documentation and Professional-Educational—​naangkon sa video ang ikaduhang dapit ug nakadawat ug Silver Screen Award. Diha sa ikatulo nga kategoriya, nga Current Issues, nadaog sa video ang unang ganti ug nakadawat ug Gold Camera Award. Ang mga ganti nagpakita nga ang mga eksperto sulod sa industriya sa pelikula nakakita sa kalidad, katukma, ug sa propesyonalismo sa video, busa nakadugang sa pagkakatuohan sa mensahe niini.

Ang ikaduhang video may ulohang Transfusion-Alternative Health Care​—Meeting Patient Needs and Rights. Kini gihimo para gayod sa mga magsusulat bahin sa medisina, mga opisyales sa panglawas, mga social worker, ug sa mga maghuhukom. Sumala sa gipadayag sa ulohan, gitagad niini nga programa kon unsaon pagtagana sa medikal nga mga panginahanglan sa mga pasyente nga sa samang paagi nagtagad sa ilang legal nga mga katungod. Dugang pa, ang walay-dugo nga mga pamaagi sa pag-opera gipakita nga menos ug gasto.

 Ang ikatulong video sa seryal may ulohang No Blood​—Medicine Meets the Challenge. Gihimo para sa tanang tawo, kining maong video gipasalida na diha sa daghang estasyon sa telebisyon sa Tinipong Bansa. Sa walay duhaduha, ang positibong mga komento gikan sa dili-Saksi nga mga propesyonal nga giinterbiyo diha sa video dakog mahimo sa pag-edukar sa mga tawo bahin sa pagkahinungdanon sa walay-dugo nga pag-opera ug sa pagpanas sa mapihigong kaisipan sa mga walay alamag.

Bag-ong mga Pasilidad sa Sanga Nakahatag ug Kadayeganan sa Diyos

Ang mosunod mao ang mga taho gikan sa lima ka dedikasyon sa mga sanga sulod sa miaging tuig sa pag-alagad. Mobiyahe kita diha sa atong handurawan, una ngadto sa Amerika del Sur, diin bag-ong mga pasilidad sa sanga ang gipahinungod diha sa Venezuela ug Uruguay. Dayon moadto kita sa Ukraine, sa Sidlakang Uropa, diin ang buluhaton sa mga Saksi ni Jehova gidili kapin sa 50 ka tuig. Sunod, moadto kita sa Malawi, sa habagatang Aprika, diin ang mga Saksi nag-antos sa daghang tuig sa pagdili ug paglutos. Sa kataposan, motan-aw kita sa Barbados, usa ka matahom nga isla sa Caribbeano.

VENEZUELA: Sa Marso 3, 2001, duolan sa 1,600 ka bisita gikan sa 22 ka nasod nag-abot diha sa maanindot kaayong pagkaareglar nga hardin sa propiedad 80 kilometros kasadpan sa kaulohan, sa Caracas, alang sa dedikasyon sa bag-ong mga bilding diha sa sanga. Ting-init ang Marso, ug ang Aragua Mountains nag-uga ug nangamatay ang katanoman, apan tungod sa irigasyon gikan sa mga tabay diha sa propiedad, ang mga lagwerta ug mga kahoyng palma palibot sa mga bilding sa sanga labong ug lunhaw. Ang mga delegado​—maayog pamesti ug nagdalag mga kamera—​naglakawlakaw sa solar nga pagawas ug pasulod sa mga bilding, nga ginindotan ug malipayon.

Ang unang sangang buhatan sa Venezuela gibuksan sa Septiyembre 1946, sa dihang 19 ka magmamantala lang ang nagsangyaw sa maayong balita diha sa nasod. Sa milabay ang sunod nga  katunga sa siglo, daghang nagkalainlaing mga bilding sa sanga puno na tungod kay nagkadako ang mga panginahanglan. Ang bag-ong sanga karon nag-atiman sa 88,541 ka magmamantala sa maayong balita sa Venezuela.

Daghan niadtong mitambong sa dedikasyon nakatabang sulod sa unom-ka-tuig nga pagtukod sa mga pasilidad. Usa ka internasyonal nga alagad miingon: “Makapadasig kaayong makita nga andam ang mga igsoon sa pagbiyahe ug daghang oras aron makatabang sa proyekto sa pagtukod. Pananglitan, usa ka grupo gikan sa usa ka kongregasyon nag-abang ug bus, migikan sa alas 11:00 s.h., mibiyahe sa tibuok gabii ug miabot sa pagkaalas 6:00 s.b., namahaw, ug nagtrabaho uban namo sa tibuok adlaw, ug dayon misakay ug balik sa bus alang sa pito ka oras nga biyahe pauli.” Ang panag-ubanay panahon sa pagtukod makapalipay, kay ang mga igsoon nagtrabaho nga may panaghiusa.​—Sal. 133:1.

Si Gerrit Lösch sa Nagamandong Lawas ang mihatag sa pakigpulong sa dedikasyon nga “Pagpadako Mohatag ug Kadayeganan Kang Jehova.” Pagkasunod adlaw ang kinadaghanang tumatambong nga 113,260 ka Saksi ug mga interesado gikan sa tanang bahin sa nasod nag-abot diha sa siyudad sa Valencia aron sa pagpamati sa laing makaikag nga programa, apil ang sumaryo sa programa sa dedikasyon. a

URUGUAY: “Pagkatalagsaon niining mga tawhana! Nindot gayod tan-awon ang daghan kaayong mga tawo, mga lalaki ug babaye, nga nagtrabahog maayo ug malipayon kaayo. Mahimo lamang kini kon maayo ang imong motibo ug wala mangitag materyal nga bentaha. Pahalipay, ipadayon ang maayong buhat!” Usa lamang kini sa daghang komento sa mga naniid nga mibisita sa proyekto sa pagtukod sa sanga sa Uruguay.

Ang espiritu sa kadasig ug kooperasyon nga gipasundayag sa mga Saksi ni Jehova panahon sa pagtukod sa proyekto napasundayag usab sa daghang katuigan sa katawhan ni Jehova sa pagtuman  sa ilang edukasyonal nga buluhaton. Kan-uman ka tuig kanhi, diyutay lamang ang mga Saksi sa Uruguay, apil sa unom ka Aleman nga mga payunir, nga nagsangyaw sa tibuok nasod pinaagig bisikleta. Karon ang mga Saksi ni Jehova sa Uruguay maoy naglangkob sa malig-on, ilado, tinahod nga organisasyon nga may proporsiyon nga 1 ka magmamantala sa 287 ka molupyo ug sa aberids nga lima ka ansiyano sa matag kongregasyon. Siyempre, kining maong pag-uswag nagkinahanglan ug mas dako nga mga pasilidad sa sanga.

Sa panahon sa programa sa dedikasyon sa Marso 31, 2001, gipasalamatan ang daghang mga Saksi nga mitanyag sa ilang mga abilidad ug kahanas niining maong proyekto. Ang programa gilakipan ug mga interbiyo sa daghang misyonaryo kanhi nga nakaalagad sa Uruguay. Sila mibiyahe gikan sa lagyong mga kayutaan aron motambong sa dedikasyon. Si Brader Lösch ang mihatag sa pakigpulong sa dedikasyon. Iyang gipasiugda nga ang pangunang katarongan sa buluhatong pagsangyaw mao ang paghatag ug kadayeganan ug kahimayaan kang Jehova. b

UKRAINE: Sa kapin sa 110 ka tuig, dihay mga magwawali sa maayong balita sa Ukraine. Apan, ang miaging dekada nakasinati ug kusog nga pag-uswag. Ang 530-porsiyento nga gidaghanon sa mga magmamantala sa mga tuig sa 1990 miresulta ug dinaliang panginahanglan ug mga pasilidad sa sanga. Aron matagan-an kining maong panginahanglan, usa ka matahom nga propiedad sa banika nga mga lima kilometros sa amihanan sa Lvov ang napili nga lugar nga tukoran sa sanga. Ang mga bilding dunay 104-ka-kuwarto nga puloy-anan, modernong mga opisina, kosina, labhanan, garahe, ug bodega sa literatura.

Duha ka tuig ug tulo ka bulan human madawat ang permit sa pagtukod, ang dapit nga kaniadto maoy usa ka kampo para sa mga batan-on gihimo sa mga igsoon nga maanindot nga mga bilding nga naglangkob sa sanga. Kini nahimutang diha sa lasang nga kaniadto gitigoman sa mga igsoon panahon nga gidili ang buluhaton.

 Ang lokal nga mga awtoridad nagsugo nga ang dalan paingon sa sanga sementohon. Nagsuhol ang mga igsoon ug lokal nga kompaniya sa pagtukod nga maoy mosemento, nga nag-ingon nga ang dalan, nga 1,200 ka metros ang gitas-on, kinahanglang taposon sa kataposan sa Oktubre 2000. Tungod kini kay ang niyebe kasagaran magsugod sa pagpangatagak sa Nobyembre. Ang kompaniya wala makatapos sa gikasabotang petsa. Apan, kay maayo pa man ang klima aron sa pagtrabaho sa dalan, ang mga igsoon midesidir sa pagtabang sa pagtapos sa proyekto. Ang tanan nagtrabahog maayo, ug sa kataposan, sa Sabado, Disyembre 16, 2000, ang dalan natapos. Nianang gabhiona ang palibot naputos sa niyebe. Kon mangutana ka sa mga molupyo sa lugar kon nganong ang tinghunlak sa tuig 2000 sa pagkatalagsaon mainit ug dugayng natapos, sila motubag: “Tungod kay kinahanglang matapos sa mga Saksi ni Jehova ang dalan.”

Ang programa sa dedikasyon gihimo sa Mayo 19, 2001. Ang mga brader ug sister nga gikan sa 35 ka kayutaan mitambong sa programa, nga dihay mga pakigpulong ni Theodore Jaracz ug Gerrit Lösch sa Nagamandong Lawas. Pagkasunod adlaw ang mga tawo nga may gidaghanong 72,023 nagtigom alang sa linain nga programa nga gihimo diha sa kinadak-ang mga estadyum sa Lvov ug Kiev. Daghan niadtong nag-alagad sa daghang tuig sa pagdili ang mitambong. Sila nalipay kaayong nakakita ug maanindot kaayo nga sanga, nga mohatag ug dakong kadungganan ug kadayeganan kang Jehova. c

MALAWI: Sa dihang mikilumkilom na sa Sabado, Mayo 19, 2001, kapin sa 2,200 ka mga Saksi nga taga-Malawi ang nagtigom uban sa 200 ka bisita gikan sa 21 ka nasod ilalom sa atop-atop nga ginama sa tag-as nga mga tukon sa kahoyng yukaliptos, kawayan, ug ugang mga sagbot. Kay nagkawala na ang kahayag, ang mga pulong sa songbok dili na maklaro alang sa panapos nga awit. Gikan sa maanindot nga entablado, gidumala sa konduktor sa alawiton ang tumatambong sa pag-awit sa Alawiton 56 sa naandang Aprikanhong  paagi​—walay duyog sa musikal nga mga instrumento ug giawit sa upat ka tono sa tingog. Wala magkinahanglan ug mga songbok ang tumatambong; nasag-ulo nila ang mga pulong. Natandog ang pagbati sa mga bisita sa ubang kayutaan samtang namati sila niining matinumanong mga alagad ni Jehova, nga ang kadaghanan nabawtismohan sulod sa 40 ka tuig ug kapin pa ug nakaagom ug grabeng kasakit tungod sa ilang pagtuo.

Niadtong buntaga sa dihang ang mga brader ug sister nakatapos paglibot aron sa pagtan-aw sa bag-ong mga bilding, sila nanganta ug mga alawiton sa Gingharian ug nagkawaykaway sa tanan nga ilang masugatan sa ilang paglibot. Una pa niining okasyona, ang mga opisyales sa erport misugot nga ipatokar ang mga Kingdom Melodies Tomo 1 diha sa sound system sa erport agig pag-abiabi sa mga bisita nga nangabot gikan sa nagkalainlaing mga nasod. Pagkamainiton ug pagkateokratikanhon nga pag-abiabi kadto! Ang musika gipatokar gihapon diha sa erport.

“Ikaw ba Nagpasundayag sa Imong Kaugalingon nga Mapasalamaton sa Pag-alagad Kang Jehova?” mao ang pangutana nga gipatugbaw ni Sébastien Johnson, nga nag-alagad sa Malawi ingong magtatan-aw sa sona. Samtang gipatin-aw niya ang Miqueas 6:​6-8, si Brader Johnson nagpakita nga si Jehova dili mangayo ug sobra sa atong maarangan. Nagdasig ang mamumulong nga basahon ang Bibliya adlaw-adlaw ug ipadapat ang maayong mga prinsipyo niini. Ang gipasiugda ni Guy Pierce, sa Nagamandong Lawas, sa iyang diskurso sa dedikasyon mao ang temang “Magmangayaon ug Magmalipayon sa Gilalang ni Jehova.” Si Brader Pierce miingon: “Ang inyong kalihokan ug ang hataas nga kasinatian sa matinumanong pag-alagad maoy nakatukod sa pundasyon sa kauswagan nga nagakahitabo karon. Padayon sa pagbuhat kutob sa inyong maarangan sa inyong balaang pag-alagad sa Labing Hataas nga Diyos, si Jehova.”

Sa Dominggo, Mayo 20, sa estadyum sa Lilongwe, gipahinumdoman ang 17,378 ka tawo nga mitambong nga ang gidaghanon sa magmamantala sa Malawi maoy duolan sa 30,000 sa dihang gikuha ang pagdili sa 1993. Karon, aduna nay halos 50,000 ka mga  Saksi sa Malawi! Oo, ang pagpahinungod sa bag-ong natukod nga mga bilding sa Bethel maoy usa gayod ka hinungdanong panahon nga pagahinumdoman, ang adlaw sa kadaogan ni Jehova! d

BARBADOS: Ang bag-ong sanga sa Barbados ug ang tapad nga Kingdom Hall natukod diha sa lagwerta nga gitamnan ug balili ug mamulak nga mga masitas diha sa bungtod, sa usa ka ektaryang yuta nga adunay matahom kaayo nga talan-awon sa Dagat Caribbeano diha sa duol. Kining maanindot nga mga pasilidad,  nga gitukod sulod sa 18 ka bulan, nahimutang diha sa walay-kisaw nga distrito sa Prospect, St. James, mga upat ka kilometros gikan sa Bridgetown, nga kaulohan sa Barbados.

Ang bag-ong bilding sa sanga gipuy-an sa napulo ka sakop sa pamilyang Bethel. Kini adunay walo ka kuwarto nga puy-anan, mga opisina, ug usa ka komedor. Kini adunay Kingdom Hall usab nga makapalingkod ug 275. Kining maong mga pasilidad mao nay gigamit puli sa mga bilding sa sanga kaniadto nga biyaheon ug mga diyes minutos diha sa sentro sa Bridgetown. Sa dihang kining unang mga pasilidad​—nga nahimutang sa malinawon nga lugar sa kaulohan sa Barbados—​gisugdan paggamit sa 1969, ang total nga gidaghanon sa mga magmamantala sa sanga diha sa unom ka dagko ug daghang gagmayng mga isla maoy mga 1,200. Sa miabot ang tuig 2000, kanang gidaghanona mitubo ngadto sa 2,390 ka magmamantala diha sa 25 ka kongregasyon ug usa ka nahilit nga grupo. Nianang higayona ang pasilidad sa sanga gamay na kaayo aron maatiman ang nag-uswag nga gidaghanon sa mga kongregasyon, ug ang kanhi walay-kisaw nga lugar kaniadto nahimo nang banha nga dapit sa negosyo.

Sa Sabado, Hunyo 2, 2001, ang 676 ka dinapit nga mga bisita gikan sa mga isla sa sanga sa Barbados ug 15 pang ubang mga nasod nadasig sa programa sa dedikasyon, nga nag-apil sa kasaysayan sa buluhaton sa Barbados. Ang labing hinungdanong bahin sa programa mao ang pakigpulong nga “Himoang Malipayon ang Kasingkasing ni Jehova,” nga gipahayag uban sa makatakod nga pagkamainiton ni John E. Barr sa Nagamandong Lawas. Aron makapahimulos kadtong wala makatambong sa programa sa dedikasyon mismo, usa ka linain nga tigom ang gihimo pagkasunod adlaw. Kini may tumatambong nga 3,332. e

Ang nag-alagad sa ingon niini nga mga pasilidad sa sanga sa tibuok kalibotan dunay total nga gidaghanong 20,133 ka ordinadong mga ministro. Ang tanan membro sa Orden sa Linain nga Bug-os-Panahong mga Alagad.

[Mga footnote]

[Mga hulagway sa panid 6]

Ang “Mga Magtutudlo sa Pulong sa Diyos” Distritong mga Kombensiyon may giluwatan nga “Bag-ong Kalibotan nga Hubad” sa naandan ug pinayanong Ininsek, sa Hong Kong

[Mga hulagway sa panid 11]

Hapit tunga ka bilyong kopya sa “Kingdom News” Num. 36 ang napanagtag sa tibuok kalibotan

[Hulagway sa panid 13]

Ang European Court of Human Rights, Strasbourg, Pransiya

[Hulagway sa panid 21]

Si Brader ug Sister Muchinguri atubangan sa bag-ong

[Hulagway sa panid 22]

Ang tulo ka ganti nga nadawat alang sa video nga “Transfusion-Alternative Strategies​—Simple, Safe, Effective”

 [Mga hulagway sa panid 28, 29]

Bag-ong gipahinungod nga mga pasilidad sa sanga

(1) Malawi

(2) Barbados

(3) Uruguay

(4) Venezuela

(5) Ukraine