Aprika

Sa Côte d’Ivoire nahibaloan sa usa ka batan-ong estudyante nga ginganlag Edith nga ang iyang bawtismo ug ang eksamin sa eskuylahan gieskedyul sa samang adlaw. Siya sa maisogon mihangyo sa iyang maestro nga dili una mokuhag eksamin, ug ang maestro misugot. Giyagayagaan siya sa iyang mga klasmet, gianggaan siyag Maria, nga inahan ni Jesus. Ang usa ka bayong nagpakatawa sa mga kauban sa eskuylahan pinaagi sa pag-ingon nga si Edith miadto, dili sa iyang bawtismo, kondili sa bangga sa paglangoy. Si Edith misanong pinaagi sa paghatag sa bayong ug tract bahin sa mga pagtulon-an sa mga Saksi ni Jehova.

Human mabasa kini, ang bayong mihunong sa pagbiaybiay kaniya ug miingon nga gusto usab niya nga mahimong Saksi. Iyang gitun-an ang librong Kahibalo nga Motultol sa Kinabuhing Walay Kataposan, ug bisan pag misupak ang iyang pamilya, siya gibawtismohan. Nalipay si Edith nga iyang giuna diha sa iyang kinabuhi ang iyang pagpahinungod kang Jehova ug nga kini, sa baylo, nakatabang ug laing tawo sa pagpahinungod usab.

Usa ka misyonaryo sa Kasadpang Aprika nagtaho: “Ang usa sa mga panalangin ni Jehova mao ang pagkahimong bahin sa usa ka organisasyon nga may maayong dungog, bisan diha sa kinagamyang mga baryo sa yuta. Nakita nako kini nga maayong  pagkapasundayag dinhi sa Ghana, diin ilado ug tinahod ang mga Saksi ni Jehova. Naghatod kami ug binulan nga literatura ngadto sa pipila ka kongregasyon sa kabaryohan. Diha sa usa ka gamayng lungsod, dili namo makita ang tawo nga sagad maoy mokuha sa karton sa literatura. Akong gipangutana ang drayber kon unsay among himoon. Mitan-aw siya nako, mipahiyom, ug miingon: ‘Way problema.’ Iya dayong gihunong ang trak diha sa daghag-tawo nga tiyanggihan, milili sa bentana, ug gitawag ang usa sa dalagita nga nanindag isda diha sa daplin sa dalan. Iyang gihatag ang kahon sa literatura ngadto sa dalagita ug miingon: ‘Palihog ihatag kini ngadto sa mga Saksi ni Jehova.’ Walay sultisulti, iyang gilukdo ang karton, mitalikod, ug nawagtang diha sa daghang tawo. Samtang nagmaneho kami paingon sa sunod nga lungsod, nangutana ako sa drayber kon nakaila ba siya sa dalagita. Siya mipahiyom ug miingon: ‘Wala, apan siya nakaila nato.’ Nahibulong ako kon madawat ba kaha sa mga igsoon ang literatura. Wala diay akoy angayng kabalak-an. Ilang nadawat kana niana mismong adlawa.”

Diha sa baryo sa Gbolobo, Liberia, ang mga igsoon nagpadalag sulat ngadto sa hepe sa lungsod, nga nagpahibalo kaniya sa ilang tuyo nga maghimog labing importanteng relihiyosong tigom sa tuig diha sa iyang lungsod. Misugot siya nga gamiton sa mga igsoon ang lokal nga dulaanag potbol alang sa maong okasyon ug giabisohan na niya ang tanang iglesya sa pito ka lungsod nga sakop niya. Ang abiso nagdapit sa mga tawo sa pagtambong sa Memoryal. Usa ka dakong grupo sa mga Saksi miabot sa baryo aron sa pagtukod ug entablado alang sa Memoryal diha sa tunga sa dulaanag potbol. Nagtinabangay sila sa pagtrabaho nga may espiritu sa gugma ug kalipay. Nakadayeg ang mga taga-baryo. Bisag duna lamay lima ka magmamantala ang Gbolobo, ang mitambong sa Memoryal maoy 636!

Usa ka diyes-anyos nga bayong sa amihanang Rwanda nagbuhi ug gamayng kanding hangtod nanganak kini ug tulo ka nati. Di pa dugay nga nagpadala siya ug iyang letrato ug sa baye nga kanding ngadto sa sangang buhatan. Diha sa nag-uban nga sulat, siya nagsulat:  “Dagayang gipanalanginan ako ni Jehova, ug maoy hinungdan nga akong iamot kining baye nga kanding alang sa tibuok-kalibotan nga buluhatong pagsangyaw sumala sa gihisgotan sa Mateo 24:14.” Iyang gihatag ang kanding ngadto sa mga ansiyano sa kongregasyon nga naghangyo nga ibaligya kini. Ilang gibaligya kini ug gipadala ang salapi ngadto sa sanga.

Usa ka espesyal payunir sa Nigeria misakay sa awto sa dihang mitanyag ang drayber sa pagpasakay kaniya. Samtang miirog ang laing pasahero aron siya makalingkod, nakita sa drayber Ang Bantayanang Torre diha sa kamot sa brader. Iyang gipakanaog ang brader sa awto. Ang drayber walay gisulti apan giingnan lang siya sa pagkanaog. Sa dihang nakita sa pipila ka tumatan-aw nga milarga ang awto nga wala ang brader, ilang giingnan siya nga giluwas siya sa iyang Diyos. “Kadtong maong awto iya sa mga kidnaper!” sila miingon. Ang gidaladala sa brader nga magasin nakahatag kaniya ug panalipod gikan kang Jehova.

Si Grant maoy usa ka otso-anyos nga magmamantala sa Probinsiya sa Copperbelt sa Zambia. Sa bata pa, makaasoy siya ug simpleng mga estorya bahin sa mga hulagway diha sa librong Ang Labing Bantogang Tawo nga Nabuhi Sukad. Ang mga ginikanan ni Grant nagdasig kaniya sa pagsag-ulo sa mga bahin sa Bibliya una pa siya makabasa. Siya karon nag-alagad ingong dili-bawtismadong magmamantala. Si Grant nagdumala ug daghang pagtuon sa Bibliya, ang uban pinaagi sa tabang sa publikasyong Akong Basahon sa mga Estorya sa Bibliya ug ang uban pinaagi sa brosyur nga Unsay Gikinahanglan sa Diyos Kanato? Tungod sa iyang masibotong kalihokan, gianggaan siya sa lokal nga mga bata nga Grant shimapepo mukalamba, nga nagpasabot sa Cibemba nga pinulongan “ang hataas nga saserdote.”

 Usa ka tawo nga nagsugod pagtuon sa Bibliya sa Senegal nakabasa sa asoy sa Septiyembre 22, 1999, nga Pagmata! bahin sa Saksi ug sa iyang anak nga babaye sa Canada nga nag-uli sa $1,000 nga ilang nakit-an sa segunda-mano nga pitaka nga ilang gipalit nga gibaratilyo diha sa lagwerta sa balay. Wala magdugay human makabasa sa artikulo, kining tawhana nakakita ug pitaka sa karsada nga dunay sulod nga mga kard nga nagpaila sa tag-iya ug kuwarta nga balor ug kapin sa $500 (T.B.). Iyang gipamalandog maayo ang artikulo nga iyang nabasa ug wala kaayo makatulog nianang gabhiona.

Pagkasunod buntag sa pagkaalas-otso, giteleponohan sa tawo ang tag-iya sa pitaka ug nakigsabot nga makigkita kaniya dihadiha dayon aron iuli ang pitaka ug ang tanang kuwarta nga sulod niana. Nakadayeg kaayo ang tag-iya sa pagkamatinud-anon niining maong estudyante sa Bibliya nga iyang gihatag kaniya ang katunga sa kuwarta diha sa pitaka​—$250! “Tungod nianang usa ka magasing Pagmata!,” miingon ang estudyante sa Bibliya, “nakapasundayag ako ug panggawi sa paagi nga akong ikapasigarbo sa tibuok nakong kinabuhi!” Sukad niadto, gitininuod na niya ang iyang pagtuon sa Bibliya.

Sa nasod sa Sidlakang Aprika nga Uganda, ang 12-anyos nga Kandole hilom nga maglingkod ug mamati pag-ayo samtang magtuon ang iyang inahan sa Bibliya uban sa mga Saksi ni Jehova. Sa kadugayan, ang inahan nawad-an ug interes sa pagtuon, apan gihidlaw ang bayong sa pagpamati sa Pulong sa Diyos ug nangutana kon asa himoon sa mga Saksi ang ilang mga tigom. Pagkasunod Dominggo, onse ka kilometros ang iyang gibaktas paingon sa Kingdom Hall ug human niadto kanunay na siyang motambong. Gisugdan sa usa ka payunir nga brader pagtuon sa Bibliya si Kandole, nga miuswag ug maayo ug gibawtismohan sa edad nga 14. Siya 17 na ug dili pa dugay nga nahimong regular payunir. Nagtinguha siya nga mahimong espesyal payunir. Ang iyang inahan sa ngadtongadto mibalik sa iyang pagtuon ug karon usa na siya ka bawtismadong sister. Si Kandole dili na mobaktas paingon sa mga tigom. Siya karon duna nay bisikleta, nga diha niini iyang paangkason ang iyang inahan paingon sa Kingdom Hall.

 Ang Mga Nasod sa Amerika

Si Márcio gidapit sa pag-alagad sa Bethel didto sa Brazil. Gikan siya sa pobreng bahin sa nasod, ug walay mga Saksi sa iyang pamilya. Aron makakuwarta para iplete sa bus paingon sa Bethel, gipamaligya niya ang iyang personal nga mga butang, nga uban sa kuwarta nga gihatag kaniya sa lokal nga mga Saksi siya nakalarga. Human sa tulo ka adlaw nga biyahe, ang bus gipugos sa pagpahunong sa armadong mga kawatan. Girekisa sa mga kawatan ang mga butang sa matag tawo ug gikuha ang tanan nga ilang nagustohan. Sa dihang ilang gibuksan ang bag ni Márcio, nakita nila ang iyang Bibliya ug gisiradoan ang bag nga walay gikuhang bisan unsa. Sa dihang miabot ang bus sa sunod nga lungsod, ang mga pasahero gigutom, apan ang kadaghanan wala nay kuwarta nga ipalit ug pagkaon. Kay wala man kuhaa ang pitaka ni Márcio sa mga kawatan, mipalit siya ug pagkaon alang sa ubang mga pasahero, ug nakahatag kini ug dakong pamatuod.

Si Osvaldo, nga nagtuon uban sa mga Saksi ni Jehova sa Chile, nakadawat ug notisya sa iyang trabahoan nga siya kinahanglang magsugod pagtrabaho sa mga adlawng Dominggo. Gisultihan niya ang iyang superbisor nga ang adlaw sa pagtrabaho sa iyang kontrata maoy gikan sa Lunes ngadto sa Biyernes. Si Osvaldo midugang: “Bag-o pa akong minyo, ug kinahanglang may  panahon ako para sa akong asawa. Ug lain pa, gieskedyul ko na ang mga Dominggo aron may ikahatag ngadto sa Diyos.” Ang iyang superbisor miingon nga hangtod sa kataposang bulan na lang ang pagtrabaho ni Osvaldo. Si Osvaldo lamang sa duolan sa 3,000 ka empleyado ang dili motrabaho sa mga adlawng Dominggo. Hinunoa, nagpadayon siya sa pagtambong sa mga tigom, ug misalig kang Jehova.

Wala magdugay ang kompaniya giduaw sa dakog-ranggo nga manedyer gikan sa Pransiya. Giduol niya ang lamesa ni Osvaldo aron sa pagpahalipay kaniya sa iyang pagkakugihan. Ang manedyer miingon: “Ikaw lang ang walay mga dula diha sa imong kompiyuter, ug hapsay ka nga motrabaho.” Gipasalamatan siya ni Osvaldo sa komendasyon, nga midugang nga hapit na siyang mohawa sa kompaniya. Ang manedyer nangutana: “Aduna bay mitanyag kanimog trabaho nga mas dako ug suweldo?” Mitubag si Osvaldo nga wala ug gisaysay ang kahimtang.

Sa milabay ang mga adlaw nakadawat siya ug imbitasyon sa pagtambong sa usa ka miting uban sa superbisor ug sa manedyer. Kulba kaayo ang situwasyon. Ang manedyer miingon: “Osvaldo, dili ka na patrabahoon sa mga adlawng Dominggo, ug panagsa ka lang patrabahoon sa mga adlawng Sabado. Hatagan ka usab ug dugang katungdanan sa kompaniya.” Nianang semanaha gibawtismohan si Osvaldo. Siya karon nag-alagad ingong oksilyare payunir uban sa iyang asawa.

Sa Ecuador usa ka batan-ong lalaki, nga gibawtismohan niining tuiga lang, nakadawat sa iyang unang asaynment sa pakigpulong sa estudyante diha mismo sa pangunang tigomanan sa Kingdom Hall. Gihunahuna niya nga ang paghatag ug pakigpulong maoy usa ka dakong pribilehiyo nga tungod niini nagtigom siya ug kuwarta aron makapalit ug bag-ong amerkana. Sa nakatigom na siya ug $30, iyang nahibaloan nga usa ka sister sa kongregasyon walay kuwarta aron ipalit ug tambal. Iyang gihatag sa sister ang tibuok nga $30 nga iyang natigom, nga nag-ingon: “Higugmaon ra gihapon ako ni Jehova bisag daang amerkana lang ang akong isul-ob panahon sa akong pakigpulong!”

 Usa ka sister sa Guatemala nagsangyaw diha sa karsada. Nakakita siya ug usa ka tawo nga naglingkod sa ang-ang sa pultahan sa usa ka balay, apan siya naghunahuna nga dili mahimong iyang sangyawan siya tungod kay ang balay teritoryo man sa laing kongregasyon. Miagi siya apan naaghat sa pagpakigsulti kaniya. Busa mibalik siya ug gisaysayan siya bahin sa Gingharian ni Jehova. Namati pag-ayo ang tawo. Dayon siya miingon: “Salamat nga nakig-estorya ka kanako, Mam, tungod kay ania ako sa pagpatay sa tawo nga moabot sa alas 7:45 s.b. Siya taliadto sa iyang lubnganan, ug ako taliadto sa prisohan! Nahibalo ko nga wala ka moanhi dinhi sa imong kaugalingong pagbuot; ang Diyos mao ang nagpadala kanimo nganhi kanako aron mahibalo ako sa iyang gugma. Mopauli ako sa akong balay karon dayon aron dili ako makapatay. Hinaot panalanginan ka sa Diyos!”

Sa Disyembre 2000 ug Enero 2001, ang sangang buhatan sa Colombia naghikay ug kampanya sa pagsangyaw ngadto sa lagyong mga teritoryo. Ang mga Saksi nianang nasora gidasig sa pag-estar diha niining mga teritoryoha sulod sa usa ka semana ngadto sa duha ka bulan, depende sa ilang mga kahimtang, aron sa pagsangyaw ug sa pagpukaw sa interes.

Kay gustong makasangyaw, usa ka batan-ong sister gikan sa Bogotá miadto sa lungsod sa Guasca. Nalipay kaayo siya sa iyang duha ka bulan nga pag-estar didto nga tungod niana mihangyo siya kang Jehova nga tabangan siya nga makakita ug trabaho aron siya makapabilin sa maong lugar. Namalit siya ug mga lubi, naghimog mga sopas nga gama sa lubi, ug gibaligya kini diha sa mga karsada ug sa mga tindahan. Dugang pa, midawat siya ug labada ug namlansag mga sinina ug nakakat-on pa gani kon unsaon pagkuhag gatas gikan sa baka. Siya nakakita ug kapangabuhian nianang paagiha ug nagpadayon sa pag-alagad ingong regular payunir sa Guasca. Siya nagdumala ug 25 ka pagtuon sa Bibliya.

Usa ka sister sa Jamaica gisultihan sa usa ka tagbalay nga wala gayoy makakombinsir kaniya nga mahimong Saksi. Ang sister miingon nga ang iyang katarongan sa pagduaw mao ang pagpahayag  sa mensahe sa Bibliya, ug sa pagpahayag sa paglaom sa kinabuhing walay kataposan. Samtang nag-estoryahay sila, ang sister nakamatikod nga ang babaye dako kaayog pagtahod sa Bibliya. Siya nakamatikod usab nga ang hugot nga pagsupak sa babaye sa pipila ka punto mabuntog pinaagi sa pagbasag mga teksto gikan sa Bibliya agig pamatuod. Kini ang nakapukaw sa sister sa paggamit kanunay sa Bibliya inigduaw ngadto niining babayhana ug usab sa ulahi sa dihang nasugdan ang pagtuon sa Bibliya. Dayon, ang estudyante sa Bibliya nagsugod sa pagtambong sa mga tigom ug nahimo nianang iyang giingon sa primero nga siya dili gayod mahitabo nga mahimo​—usa ka dedikado ug bawtismadong Saksi ni Jehova.

Gitun-an ni Carol, nga sister sa Bolivia, ang usa ka lalaki ug ang iyang asawa. Sila nagpuyo sa balay sa inahan sa lalaki, nga usa ka debotadong Katoliko nga dili gayod mopalta sa pagtambong sa Misa o sa pag-uban sa relihiyosong mga prosesyon. Ang balay dunay mga rebulto, nga ang matag usa dunay kandila nga dinagkotan atubangan niana. Usa ka adlaw panahon sa pagtuon, ang inahan mikalit pagsulod sa lawak, nga nagkapot ug Katolikong Bibliya, ug gihagit direkta si Carol: “Asa man makita dinhi bi nga si Maria dunay laing mga anak?” Gipakitaan siya ni Carol sa Mateo 12:46-​50 ug 13:55. Nalukmoy, ang inahan migawas sa lawak. Sa milabay ang pipila ka minutos siya mibalik, nga magarbohong nagdalag laing Bibliya, usa ka dakong Bibliya nga gidorar sa bulawan nga may mga hulagway. Siya migawas na usab, human nga gipakitaan sa mao gihapong mga teksto. Wala magdugay misulod na usab siya nga nagdalag laing Bibliya, apan ang teksto mabasa nga mao ra gihapon. Siya wala makatingog.

Sa misunod nga mga semana, ang pagtuon kanunayng mabalda. May mga pangutana siya apan anam-anam nga nalukmay. Siya naikag sa mga tubag. Wala madugay midawat siya sa pagtuon sa Bibliya. Ang iyang kasibot kaniadto sa Katolisismo nahimong kasibot alang sa matuod nga pagsimba. Siya nagsugod sa pagdala sa iyang mga higala ngadto sa Kingdom Hall ug, sa ulahi, gibawtismohan.

 Asia ug ang Tungang Sidlakan

Si Gary, nga nagpuyo sa Sri Lanka, nagtanyag ug brosyur nga Ikaw Mahimong Higala sa Diyos! ngadto sa lalaki nga Katoliko ug sa iyang asawa nga Budhista. Ang asawa miinsistir nga ang iyang bana lang ang gustong masayod ug dugang pa bahin sa Bibliya. Apan, sa mibalik pagduaw si Gary, siya miingon nga interesado na usab siyang masayod kon unsaon sa pagkahimong higala sa Diyos. Pagkasunod semana nasugdan ang pagtuon sa brosyur, ug ang magtiayon mihangyo ug Bibliya. Ang asawa miingon: “Nagtuo ako nga nagkinahanglan kami ug Bibliya kon buot kami nga mahimong mga higala sa Diyos.”

Sa nakaabot na sila sa pagtuon sa leksiyon 3 sa brosyur nga Higala sa Diyos, ang asawa naikag kaayo sa pagtuon. Nianang gabhiona dunay miuban kanila sa pagtuon​—usa ka batan-ong lalaki nga nagkasera sa ilang balay. Pipila ka adlaw una pa sa ilang ikaupat nga pagtuon, gidad-an sila ni Gary ug usa ka Bibliya. Gidispley dayon kini uban sa ilang mga brosyur, nga gipahimutang diha sa lamesa. Sa gabii sa ilang ikaupat nga pagtuon, magarbohon nilang gikab-ot ang Bibliya, nga diha niana dunay daghang asul nga mga hilo nga gibutang. Ang bana miingon: “Naandam na namo ang tanang leksiyon.” Nakita na nila ang tanang teksto nga gihisgotan sa leksiyon ug nagbutang ug asul nga hilo niini aron matiman-an ang matag bersikulo.

 Si Rowena, nga usa ka nag-inusarang inahan nga mga 20 pa ang edad nga nagpuyo sa Pilipinas, nainteres sa kamatuoran. Nasugdan siya sa pagtuon sa Bibliya, ug wala magdugay nagsugod siya sa pagtambong sa mga tigom. Apan, tungod sa problema sa panalapi, napugos siya sa pagbiya sa iyang lungsod aron mangitag trabaho sa layong siyudad. Didto nakatrabaho siya ingong binatonan sa usa ka debotado Katolikong pamilya. Nangutana siya sa direksiyon sa kinaduolang Kingdom Hall sa siyudad, apan wala siya tabangi sa pamilya sa pagpangitag mga Saksi.

Milabay ang mga bulan, ug si Rowena kinasingkasing nga nag-ampo kang Jehova nga iyang tugotan siya nga makakitag mga Saksi ug makapadayon sa iyang pagtuon sa Bibliya. Usa ka buntag ang telepono mibagting, ug kini iyang gitubag. Ang mitawag miingon: “Hello, Kingdom Hall ba ni?”

Dalidaling mitubag si Rowena: “Nangita ako ug Kingdom Hall. Mahimo bang imo akong tabangan aron makatultol niini?” Dihay kahikayang gihimo. Si Rowena mibalik sa iyang pagtuon sa Bibliya ug karon bawtismado na.

Usa ka 12-anyos nga dalagita nagpadalag sulat sa sangang buhatan sa Rusya. Siya nagsulat: “Simple lang ako. Nagpuyo ako sa Tyumen sa rehiyon sa Siberia. Di pa dugay, sa unang higayon sa akong kinabuhi diha sa among gamayng baryo nga layo sa buhilaman, nakadawat kami ug magasing Bantayanang Torre. Nakita nako kini diha sa among librarya sa tunghaan. Mihukom ako sa pagdala niini sa balay aron mabasa. Pinaagi niining mga magasina, daghan akog nakat-onang bag-o ug makaikag nga mga butang. Ang pagtan-aw lang sa mga hulagway nakapalipay kaayo nakog dako. Gusto kong makadawat ug dugang impormasyon. Gusto kong magtuon sa basahon sa Pinadayag ug sa Bibliya, ug gusto kong makakat-on pag dugang bahin sa inyong organisasyon.” Dihay gihimong kahikayan sa pagtabang kaniya.

Samtang nagsangyaw gikan sa balay ug balay sa Lebanon, giduaw sa duha ka Saksi ang usa ka balay. Human manuktok, sila nakamatikod ug usa ka estiker nga nag-ingon nga ang mga Saksi ni Jehova gidid-an sa pagsulod. Usa ka lalaki migawas sa pultahan. Gipakig-estoryahan siya sa mga sister, ug iyang gidapit sila sa pagsulod. Sa dihang  nahibaloan niya nga sila mga Saksi, siya nangutana kon nabasa ba nila ang estiker sa pultahan. “Oo,” sila mitubag, “apan nabasa namo kini human nga nakapanuktok na kami.” Dayon siya miingon nga ang balay iya sa iyang mga ginikanan, nga dili gustog mga Saksi ni Jehova. Apan, siya gustong makakat-on ug dugang pa ug ilabinang naikag tungod sa mga estiker sa balay, nga daghan sa ilang lugar.

Ang mga sister naghikay nga duawon ang tawo diha sa iyang balay. Siya ug ang iyang asawa gisugdan sa pagtuon sa Bibliya, ug wala magdugay nagsugod sila sa pagtambong sa mga tigom ug nagpadapat sa mga prinsipyo sa Bibliya. Ang bana miingon nga wala pa gayod siya makabukas sukad ug Bibliya, apan gitabangan siya sa mga Saksi sa pagbasa ug sa pagsabot niana.

Usa ka sister nga dunay beauty parlor sa Korea nagdispley ug Bibliya duyog sa uban pang mga publikasyon nga hinimo sa mga Saksi ni Jehova. Magpatokar usab siya kanunay sa audiocassette sa librong Ang Labing Bantogang Tawo nga Nabuhi Sukad. Sa dihang nakadungog sa rekording, usa ka babaye mihangyo ug usa ka kopya, ug nasugdan siya sa pagtuon sa Bibliya. Ang asawa sa pastor nangutana bahin sa rekording, nga nag-ingon nga wala pa siya makadungog sukad ug makatukbil-sa-hunahuna nga mga butang diha sa iyang simbahan. Siya usab mihangyog mga cassette ug nagsugod sa pagtuon uban sa mga Saksi. Tungod sa pagdispley sa literatura, nainteres usab ang usa ka Budhista ug karon nagtuon na sa Bibliya. Aron maatiman ang espirituwal nga mga panginahanglan niadtong iyang nakontak pinaagi sa dili-pormal nga pagsangyaw, ang sister nahimong regular payunir.

Usa ka espesyal payunir nga magtiayon sa Malaysia nagsangyaw sa usa ka tawo nga naglakaw sa dalan. Daghag pangutana ang tawo, busa iyang gidapit ang magtiayon ngadto sa iyang balay. Ilang gisundan siya didto ug makaiikag ang ilang panagsultihay. Sa dihang molakaw aron motambong sa Pagtuon sa Libro sa Kongregasyon, ilang gidapit siya sa pag-uban kanila, ug siya miuban. Naikag siya sa tigom. Human sa tigom, ilang gihatagan siya ug brosyur nga Gikinahanglan ug nagsabot nga duawon siya sunod adlaw. Sa dihang miabot sila, iyang gisultihan sila nga pagkahuman sa tigom sa miaging  gabii, mipauli siya apan nagpulaw hangtod sa alas 4:00 s.b. nga nagbasa ug nag-ampo.

Kining tawhana maoy usa ka ministro sa relihiyon sa Kakristiyanohan. Bisag nakatungha siya ug daghang tuig sa mga tunghaan sa teolohiya, siya wala gayod makasabot sa Trinidad. Ang brosyur nga Gikinahanglan nagtudlo kaniya direkta sa mga bersikulo sa Bibliya nga nagpadayag sa kamatuoran bahin niining dili-kasulatanhong doktrina. Nalipay nga nahibalo kon kinsa gayod ang Diyos, iyang giingnan ang magtiayon: “Dili na ako motuo sa Trinidad.” Sukad niadto, mihunong na siya sa pagwali sa iyang simbahan. Hinunoa, siya mitambong sa mga tigom sa mga Saksi ni Jehova.

Gitun-an sa tawo ang literatura sa Bibliya nga nakuha gikan sa mga Saksi ug gitandi kini sa iyang nakat-onan gikan sa iyang mga nota nga nakuha diha sa mga klase sa teolohiya. Sa kataposan sa duha ka semana, siya mihukom sa pagbag-o sa iyang tibuok dalan sa kinabuhi. Gikan pa siya sa India aron ipadayon ang mga pagtuon maylabot sa teolohiya diha sa Trinity College sa Singapore. Apan, siya miingon: “Makatungha pa ba ako niana nga kolehiyo? Sa ngalan na lang Trinidad na!” Mipauli siya sa iyang kaugalingong nasod, nga naghinamhinam nga makakontak ug mga Saksi didto. Uban sa mapasalamatong kasingkasing, siya miingon: “Nakaplagan na nako ang kamatuoran!”

Usa ka sister, nga lumad sa Kazakhstan, mahadlok kaayong mosangyaw ngadto sa ubang mga Kazakh. Sa nagsugod siya sa pagpayunir, siya nag-alagad sa teritoryo nga gipuy-an sa ubang minoriyang mga grupo. Apan, usa ka adlaw samtang didto sa iyang teritoryo, nakasugat siya ug usa ka babayeng Kazakh. Iyang gitanyagan siya ug usa ka kopya sa Pagmata!, nga gidawat sa babaye. Mikabat ug duha ka semana nga nakabaton ug kaisog ang sister sa paghimog pagbalikduaw. Sa iyang katingala, iyang nadiskobrehan nga ang babaye nasuko nga wala dayon siya mobalik. Literal nga gibira sa babaye ang sister ngadto sa iyang apartment, gipakitaan siya ug kopya sa librong Kahibalo, ug miingon: “Magtuon ta sa Bibliya!” Wala magdugay, ang babaye ug ang iyang kamagulangang anak nga lalaki gibawtismohan diha sa sirkitong asembliya. Karon ang iyang manghod nga anak nga lalaki usab nag-alagad ingong dili-bawtismadong  magmamantala, ug ang iyang anak nga babaye, ig-agaw, ug pag-umangkong lalaki pulos nagtuon sa Bibliya.

Sa usa ka nasod sa Tungang Sidlakan, nakontak sa usa ka espesyal payunir ang usa ka tawo nga ginganlag G. John nga buot nga mosuskriber pag-usab sa Ang Bantayanang Torre ug Pagmata! Si G. John miingon nga ang iyang apohang lalaki, nga nagpuyo sa India, dugay nang nahimong Saksi. Si G. John nakatambong ug Kristohanong mga tigom sa India apan wala na magpuyo didto sulod sa 19 ka tuig. Wala siya mahibalo kon unsaon pagkontak sa lokal nga mga Saksi.

Sa dihang gidasig siya sa payunir sa pagtambong sa tigom, si G. John mitubag nga naghimo siya ug tigom diha sa iyang kaugalingong balay sa samang panahon, nga nag-ingon nga ang tigom maoy “sa pagtuon sa Bibliya ug sa pag-ampo.” Migamit ug mga gula sa Ang Bantayanang Torre ug sa librong Kahibalo, si G. John nagtuon sa Bibliya uban sa 25 ka kaubang mga taga-India. Sila naghimo sa ilang senemanang mga tigom sa daghang tuig na. Kasamtangan, ang Ingles nga grupo didto aduna lamay 12 ka magmamantala. Ang taga-India nga grupo giduaw, ug may gihimong kahikayan aron maatiman ang maong mga interesado sa espirituwal nga paagi.

Sa Nepal usa ka dalagita nagpuyo sa asilo nga gidumala sa boluntaryo nga mga Koreano. Sa nagtungha pa siya diha sa tunghaan sa sagopanan, usa sa iyang mga magtutudlo nangangkon nga nakakaplag sa “tinuod nga mga Kristohanon.” Kining walay amahan nga dalagita nagtuo man gayod nga usa siya ka tinuod nga Kristohanon. Sanglit ang mga tawo nga nagpalakaw sa sagopanan nag-angkon man usab nga Kristohanon, naglibog siya bahin sa komento. Aron siya matin-awan, gusto niya nga makigkita niining “tinuod nga mga Kristohanon.” Nagkaatol nga ang iyang magtutudlo nagtuon uban sa mga Saksi ni Jehova ug regular nga nagtambongan sa mga tigom. Gikontak sa dalagita ang iyang magtutudlo ug miuban kaniya sa pagtambong sa tigom. Ang dalagita nakadayeg kaayo sa iyang nakita nga midawat dayon siya ug pagtuon sa Bibliya. Kusog ang iyang pag-uswag ug nabawtismohan sulod sa upat ka bulan. Human sa iyang bawtismo, siya nagsugod sa pag-oksilyare payunir.

 Uropa

Kada tuig sa London, Inglaterra, usa ka eksibit ang gihikay aron ang mga bungol makabaton ug impormasyon. Ang mga Saksi ni Jehova nagbutang ug lamesa nga dunay mga Bibliya ug mga literatura, lakip sa salida sa video nga What Does God Require of Us? sa Britanikong Sign Language. Nalipay nga nakakita sa lamesa, usa ka babayeng bungol miduol nga nag-ingon nga nagsirilsiril na siyag pangita ug bungol nga mga Saksi. Siya miingon nga dihay nakigsulti kaniya nga bungol nga Saksi sa nagpuyo pa siya sa Mongolia. Apan, sa namatay ang iyang amahan, diha pa lang siya miapresyar sa paglaom sa pagkabanhaw ug nagsugod pagtuon sa Bibliya. Unom ka bulan sa ulahi siya mibalhin sa Inglaterra, ug bisag nakakita siya ug Kingdom Hall, siya wala makasabot sa tigom ug wala siya magpahibalo nga bungol siya. Nag-ampo siya kang Jehova nga makakita ug bungol nga mga Saksi ni Jehova, ug tuod man may nakita siya. Karon siya ug ang iyang anak nga babaye nagtuon na sa Bibliya ug nagtambong sa mga tigom nga senyas sa kamot ang gigamit sa pagsulti.

Si Andreia, usa ka otso-anyos nga Saksi sa Portugal, nakamatikod sa kauban sa tunghaan nga naguol kaayo tungod kay nagbulag ang iyang mga ginikanan. Pipila ka adlaw sa ulahi, si Andreia nakadawat ug gula sa Enero 8, 2001, nga Pagmata!,  nga naghisgot bahin sa seryal sa hapin nga “Maluwas ba Namo ang Among Kaminyoon?” Sa mahinamon, iyang gisultihan ang iyang inahan nga ang mga artikulo makatabang sa mga ginikanan sa iyang kauban sa tunghaan. Dayon si Andreia naghikay sa pagpadala ug usa ka kopya sa magasin ngadto sa amahan sa iyang kauban sa tunghaan ug laing kopya ngadto sa inahan.

Wala magdugay human niadto, si Andreia giingnan sa iyang kauban sa tunghaan: “Nagbalik na ang akong mga ginikanan, ug gisugo ako sa akong amahan sa pagsulti kanimo nga ang among pamilya nagkausa na usab tungod sa magasin nga imong gihatag kanamo!” Dayon, gihatagan ni Andreia ang pamilya ug librong Ang Sekreto sa Kalipay sa Pamilya. Ang inahan ni Andreia nagdumala na karon ug pagtuon sa Bibliya sa inahan sa iyang kauban sa tunghaan.

Samtang nag-alagad sa kanataran sa Italya, nakahibalag ang duha ka Saksi ug tigulang nga lalaki ug gitanyagan siya ug mga magasing Bantayanang Torre ug Pagmata! Ang tawo miingon nga dili siya makabasa. Siya miingon nga siyete anyos pa siya nga nahimong magbalantay sa mga karnero. Human niana, sa bukid na siya nagpuyo sulod sa 15 ka tuig ug mga karnero lamang ang iyang kauban. Wala gayod siya makaeskuyla. Samtang magbantay siya sa iyang mga karnero, tim-os nga mag-ampo siya nga hatagan siya ug higayon nga makaila pa ug dugang bahin sa Diyos. Iyang giingnan ang mga igsoon nga miduaw: “Kon makabasa pa lang unta ako sa inyong mga magasin, matuman gayod ang akong damgo.”

Usa sa mga igsoon miingon: “Dili pa ulahi kaayo aron ikaw makakat-on sa pagbasa.” Pagkasunod adlaw, ang magbalantay sa karnero miadto sa Kingdom Hall. Pinaagi sa tabang sa mga Saksi,  siya nakakat-on sa pagbasa ug pagsulat. Karon, kining tigulang nga lalaki maoy usa ka regular nga magbabasa sa Bibliya ug kugihang magmamantala sa maayong balita.

Ang Greenland, nga gihisgotan dinhi uban sa Uropa, mao ang kinadak-ang isla sa kalibotan, apan ang tibuok nga populasyon niini maoy duolan lamang sa 56,000. Adunay pito ka kongregasyon ang nasod, ang uban niini gamay kaayo.

Si Harald, nga 15-anyos nga dili-bawtismadong magmamantala sakop sa usa niining mga kongregasyona. Sa dihang nag-field trip ang iyang klase sa eskuylahan, si Harald wala mouban. Apan, siya mitambong ug laing klase, diin ang mga estudyante gihatagan ug asaynment nga magpahayag bahin sa ilang relihiyon. Bisag gihatagan sila ug duha ka bulan sa pagpangandam, pipila lang ka estudyante ang may ikasulti, ug kadtong may gisulti misulti lamang sa pipila ka minutos. Kay dili man mahimong buhian ang klase sa laing tunga sa oras, ang magtutudlo miingon: “Mag-unsa man kita sa nahibiling oras sa klase?” Si Harald​—ang bisita—​nagpataas sa iyang kamot ug miingon nga malipay siya pagsulti kanila bahin sa iyang relihiyon.

Ang magtutudlo miingon: “Segurado ka ba? Wala ka makapangandam.” Si Harald miingon nga siya andam, ug mihatag ug maayong pagpamatuod ngadto sa klase. Sa dihang nahibaloan sa magtutudlo sa kaugalingong klase ni Harald ang iyang gihimo, iyang gihangyo si Harald sa pagpahayag diha sa iyang kaugalingong klase. Niining higayona gihatagan siya ug usa ka semana sa pagpangandam. Nagdala siya ug pipila ka publikasyon sa Bibliya nga ikapakita ngadto sa iyang mga klasmet ug sa iyang magtutudlo.

Si Pia, nga nagpuyo sa Denmark, buot magpabunyag sa iyang bag-ong masuso diha sa simbahan. Ang iyang bana dili motuo sa bawtismo sa masuso, busa ila kining gidebatehan. Sa kataposan, sila nakahukom sa paghisgot niining butanga uban sa ilang ministro. Giingnan sila sa ministro nga dili Kasulatanhon ang bawtismo sa masuso. Si Pia nasuko pag-ayo sa simbahan ug sa mga ministro niini tungod kay 32 ka tuig siyang gipatuo sa usa ka sayop nga butang.  Wala na siya maghunahuna sa pagpabunyag sa masuso ug mihukom sa pagbasa sa Bibliya mismo aron makita kon unsa ang husto ug sayop.

Sa Mayo 2000 usa ka Saksi miduaw kang Pia, ug midawat siya sa pagtuon sa Bibliya. Human makatambong sa distritong kombensiyon, siya miingon: “Wala pa ako makasabot sa tanan, apan karon nahibalo na ako nga ang Relihiyon sa Nasod wala makabaton sa kamatuoran.” Siya karon maoy usa na ka dili-bawtismadong magmamantala ug kusog nga nag-uswag paingon sa bawtismo.

Usa ka brader sa Slovenia nagpahayahay sa parke uban sa iyang anak nga lalaki ug nakamatikod nga ang usa ka babaye nga estudyante mibulag sa grupo sa mga estudyante. Nakig-estorya ang brader kaniya bahin sa espirituwal nga mga butang. Sa ulahi, ang brader ug ang iyang asawa nagsugod sa pagtuon sa Bibliya uban sa estudyante, kansang ngalan mao si Silvia. Iyang gidala ang iyang trato sa pagtuon sa Bibliya, ug karon siya nagtuon na usab sa Bibliya. Gipadayag ni Silvia ang kamatuoran ngadto sa iyang inahan, ug siya usab nagsugod sa pagtuon. Karon silang tulo regular nang nagtambongan sa mga tigom sa Kingdom Hall. Si Silvia maoy usa na ka dili-bawtismadong magmamantala. Makaiikag, si Silvia nahinumdom nga sa adlaw nga nahimamat niya ang brader sa parke, siya nag-ampo sa Diyos nga tabangan siya nga makasabot kon nganong ang kalibotan wala gayoy kahulogan.

Sa mga katuigang dili pa dugay, ang mga lalin nga gikan sa Sur ug Sentral Amerika nagpanon ngadto sa Espanya. Usa ka payunir nga sister nga nagsangyaw gikan sa balay ug balay nagpamatuod ngadto sa usa ka babaye nga gikan sa Colombia. Ang babaye namati pag-ayo ug midawat sa pagtuon sa Bibliya. Sa sunod nga duaw, ang payunir nga sister nagtanyag sa pagtuon sa Bibliya ngadto sa uban nga nagpuyo sa mao gihapong apartment. Daghan kanila midawat sa tanyag. Kay kanunay man magbalhinbalhin ang mga namuyo sa apartment, sangyawan sa sister ang bisan kinsa nga iyang mahibalag didto. Sa pagkakaron, siya nakasugod ug 20 ka pagtuon sa Bibliya. Ang uban kanila mibalhin, ug wala pay balita kon sila nagpadayon ba sa pagtuon. Apan, napulo ka pagtuon ang  regular nga gidumala karon, ug ang ubang mga estudyante nagtambongan na sa mga tigom.

Bisan pag tigpamati siya sa mensahe sa 40 ka tuig na, ang usa ka 82-anyos nga babaye sa Crete bag-o pang nahimong dili-bawtismadong magmamantala. Ang personal nga kaikag nga gipakita kaniya sa usa ka espesyal payunir nakaaghat kaniya sa pagsugod sa pag-uswag, ug siya nabawtismohan.

Ang ubang sakop sa iyang pamilya misunod. Ang 86-anyos nga bana niining tigulang nga babaye, nga nagtabako sulod sa 60 ka tuig, nagsugod sa pagtuon sa Bibliya, mihunong sa pagtabako, ug nahimong dili-bawtismadong magmamantala. Ang 55-anyos nga anak nga babaye sa magtiayon maayo usab ug pag-uswag sa iyang pagtuon. Siya nagtambongan sa mga tigom ug mihunong sa pagtabako. Sa kataposan, ang usa sa mga apo sa tuhod sa magtiayon nagsugod sa pagtuon sa Bibliya ug nagpahayag nga gustong magpalista sa Teokratikanhong Tunghaan sa Ministeryo.

Samtang nagsangyaw diha sa usa ka bilding sa apartment tapad sa bilding nga iyang gipuy-an, usa ka misyonaryong sister sa Estonia nakahibalag ug babaye nga nangutana kaniya kon buotan ba ang iyang bana. Ang sister mitubag nga buotan ang iyang bana. Dayon ang babaye nangutana kaniya kon diin siya nagpuyo. Ang sister miingon nga nagpuyo siya sa tapad nga bilding. Sa pagkadungog niana ang babaye naikag ug miingon: “Ah, ikaw diay​—ikaw diay to. Ikaw diay tong tigkaon diha sa imong balkon, di ba?”

Ang sister mitubag: “Oo, uban sa akong bana.”

Ang babaye miingon: “Kuan man god, gipanid-an ko kamo. Ang imong bana nagsul-ob ug epron, ug siya kanunay ang maghukad sa pagkaon. Bitaw, nakita ko nga malipayon ang inyong kaminyoon! Dili nako kamo makita gikan sa akong apartment, apan moadto ako kanunay sa balkon sa akong higala aron motan-aw ninyo. Among namatikdan nga kanunay mo nga mag-ampo sa di pa mokaon. Dalayegon kaayo kini. Palihog, mahimo bang mosulod ka?” Sukad niadto, ang babaye nahimong regular nga balikduaw.

 Oceania

Kining maong rehiyon sa yuta naglangkob sa mga isla sa habagatan, kasadpan, ug sentral nga Dagat Pasipiko, apil ang Melanesia, Micronesia, ug Polynesia. Ang Australia, New Zealand, ang Malay Archipelago, ug ang mga Isla sa Hawaii apil usab niini.

Usa ka adlaw duha ka sister sa New Zealand nakakita ug babaye nga nag-areglar sa iyang hardin. Sila mihunong aron sa pagtabang kaniya sa pag-ibot sa mga kawayan. Natingala sa ilang pagkabuotan, iyang gihatagan sila ug kape, ug ilang gisangyawan siya. Siya nagsulat ngadto sa lokal nga mantalaan nga nag-asoy sa nahitabo. Gikontak sa mantalaan ang kongregasyon sa pagsulti kanila nga sila nakadaog ug matahom nga pungpong sa mga bulak tungod sa ilang pagkabuotan.

Ang artikulo nag-ingon: “Sa dihang gikalot sa mga Saksi ni Jehova ang makasabal nga kawayan duol sa bentana sa usa ka balo, ila lamang gihimo ang naandan na nila​—sila nagtabang sa usa ka tawo nga nagkinahanglan. Ang ilang pagkabuotan mao ang halandomong hitabo sa iyang adlaw. Kining maong babaye mapasalamaton kaayo nga gumikan niana iyang gisugilon kanamo ang tanang nahitabo. Kini nga sugilanon ang napili nga maoy nakadaog sa pungpong sa bulak alang sa Agosto. Kami nanghinaot nga kining pungpong sa bulak makahatag kanila ug  kalipay sama sa nahatag nila nga kalipay tungod sa ilang pagkabuotan.”

Sa usa sa mga isla sa Vanuatu, duha ka payunir nagsangyaw sa usa dalagita nga nagtrabaho sa tindahan. Iyang gidawat ang brosyur nga Gikinahanglan ug ang pagtuon sa Bibliya. Ang iyang papa misupak pag-ayo ug dili niya gusto nga ang iyang anak magtuon uban sa mga Saksi. Gidespatsar niya ang iyang literatura sa Bibliya, gibunalan siyag maayo, ug sa kataposan iyang gipalayas siya sa iyang balay. Kasamtangan, ang dalagita miuswag sa kahibalo, mitambong sa mga tigom, ug nag-ugmad sa mga bunga sa espiritu. (Gal. 5:​22, 23) Ang iyang matinahorong tinamdan sa ngadtongadto nakapadayeg sa iyang amahan, nga nalukmay ug nagdapit kaniya sa pagpauli sa iyang balay. Siya nagpalista sa Teokratikanhong Tunghaan sa Ministeryo ug mitambong sa iyang unang sirkitong asembliya, sa duol nga isla sa Santo. Sa dihang gipangutana siya kon sa unsang paagi nakaabot siya sa galastohan sa pagbiyahe, siya mitubag nga mapahiyomon: “Ang akong papa maoy mibayad sa tiket.”

Si Clarence maoy usa ka tawong mahigalaon nga kanunayng mokuha ug mga magasin kada duaw sa mga magmamantala diha sa iyang balay sa Hawaii. Usa ka payunir nga nahibalag niya usa ka adlaw nakamatikod nga si Clarence dunay kopya sa librong Ikaw Mabuhing Walay Kataposan sa Paraiso sa Yuta ug gitanyagan siya ug pagtuon sa Bibliya. Gidawat dayon ni Clarence ang tanyag, nga nag-ingon nga dugay na siyang gustong mahibalo bahin sa Bibliya. Nangandam pag-ayo si Clarence sa iyang pagtuon sa Bibliya ug wala magdugay nagsugod sa pagtambong sa mga tigom sa kongregasyon.

Apan si Clarence kinahanglang magbag-o. Kay usa man ka beterano sa Gubat sa Kalibotan II, siya magarbohong momartsa duyog sa ubang mga beterano sa mga parada panahon sa mga pista opisyal. Dayon, panahon sa Pasko, moboluntaryo siya sa pagbagting sa kampanilya nga bitbit ang sudlanag donasyon alang sa Salbasyon Armi. Dugaydugay niyang nasabtan kon unsay kahulogan sa pagkahimong dili bahin sa kalibotan ni Satanas. Apan, sa ulahi, siya nahimong kuwalipikado sa pagpakigbahin sa ministeryo.

 Si Clarence nabawtismohan sa edad 85 ug nagpadayon sa aktibong pagpakigbahin sa ministeryo. Siya mohatag ug mga pakigpulong ingong estudyante diha sa Teokratikanhong Tunghaan sa Ministeryo. Dili pa dugay, nakakat-on siya sa paggamit sa Watchtower Library diha sa CD-ROM. Uban sa hugot nga pagtuo, si Clarence miingon: “Walay makapabulag kanako gikan sa pag-alagad kang Jehova karon nga nakaplagan ko na ang kamatuoran.”

Samtang nagsangyaw pinaagig telepono sa Australia, usa ka sister mihangyo sa usa ka lalaki kon makagahin ba siya ug 15 minutos kada semana aron maghisgot bahin sa Bibliya. Siya miingon nga walay siyay panahon niana. Ang sister nangutana: “Makagahin ka ba ug singko minutos?” Siya nagpanuko nga misugot. Pagkasunod semana, sila nagsugod sa ilang lima ka minutos nga mga pagtuon. Wala magdugay nagsugod siya sa pagpangutana ug matugkarong mga pangutana. Sanglit gipaigo sa sister nga kutob ra sa singko minutos ang pagtuon, siya moingon: “Aw, maayo kana nga pangutana, apan milapas na kita sa singko minutos, busa atong hisgotan kana sa sunod natong pagtuon. Babay.”

Sa dihang nangutana ang lalaki kon unsaon niya pagkasayod kon hain ang tinuod nga relihiyon, kana ang gihimong ulohan sa sunod nga pagtuon. Human sa maong pagtuon, siya miingon: “Ang mga Saksi ni Jehova mao gayod ang nakabaton sa tinuod nga relihiyon, apan dili ako motuo dayon ug magpakombertir. Sa akong pagtuo kinahanglang mokuha pa ako ug dugang kahibalo.” Sa nagkadako ang iyang interes, ang gitas-on sa mga pagtuon anam-anam nga gipatas-an gikan sa 5 ka minutos ngadto sa 30 minutos.

Sa natapos nila ang brosyur nga Gikinahanglan, ang sister mihangyo sa tawo kon siya ug ang iyang bana mahimong makigkita kaniya diha sa iyang balay aron hisgotan ang iya nang nakat-onan. Siya misugot. Ilang giduaw siya, nga nagpahayag ug kalipay sa pribilehiyo nga nakatabang kaniya sa nangaging unom ka bulan ug nagdasig kaniya sa pagpadayon. Karon ang bana sa sister moadto sa balay sa estudyante kada semana aron sa pagdumala sa pagtuon.

Daghan gihapong bahin sa Papua New Guinea diin ang maayong balita wala pa ikamantala tungod kay ang mga baryo lisod abton. Kasagaran, ang paagi lamang aron makontak ang mga tawo gikan  niining maong mga baryo mao ang pagpakigkita kanila inig-adto nila sa lungsod aron sa pagpamalit ug mga kinahanglanon. Niining paagiha nakabaton ug kopya sa Ang Bantayanang Torre ang usa ka lalaki gikan sa layong baryo. Human mabasa kini, siya misulat ngadto sa sangang buhatan nga nangayog dugang impormasyon. Usa ka misyonaryo ang gihangyo sa pagkontak kaniya. Ang paagi lamang nga mahimo kini maoy pinaagig sulat, ug tungod niini, daghang pagtuon ang nadumala uban sa mga tawong interesado pinaagig sulat.

Kay porsigido nga maduaw ang lugar, ang ubang mga misyonaryo milarga sakay sa sakyanan nga four-wheel-drive. Unom ka oras nga biyahe kadto, kasagaran diha sa peligrosong dalandalan sa kabagnotan nga naglikoliko diha sa hiktin nga mga dalan sa bukid ug tabok sa mga suba. Sa usa ka lugar, ang “dalan” maoy salogsalog sa suba. Sa dihang nakaabot sila sa ilang destinasyon, ilang nakita ang matahom nga patag nga 10 ngadto sa 12 kuwadrado kilometros nga gilibotan sa labong, naputos sa lasang nga mga bukid nga ang mga taluktok niini anaa na sa panganod. Daw sama kinig nagpuyo sa karaang panahon. Ang mga balay gama sa kawayan, nga sama sa naandan sulod sa daghang kasiglohan. Sa dihang nakadungog ang mga tawo nga miabot na ang mga misyonaryo, sila maikagong midugok. Bisag ang kadaghanan wala pa makahibalag ug mga Saksi ni Jehova sukad, sila nagtuon na sa Ang Bantayanang Torre duha ka beses sa usa ka semana, ug halos ang tanan kanila mibiya na sa Lutheran Church.

Gipasundayag sa mga misyonaryo kon unsaon pagdumala sa mga tigom ug gipahibalo usab nga dunay pakigpulong publiko sunod adlaw sa alas 8:00 s.b. Pagkasunod adlaw, mimata ug sayo ang ubang mga lalaki sa alas 4:30 s.b. ug miadto sa duol nga mga baryo aron sa pagdapit sa mga tawo sa pakigpulong. Ang uban sa mga taga-baryo nagtukod ug tigomanan alang sa miting. Ang dagkong mga sanga nagsilbing mga bangko, ug ang daghag dahong mga sanga nakahatag ug landong. Ang plataporma hinimo gikan sa kawayan. Ang tanan naghinamhinam. Dihay 44 nga mitambong sa miting, ug 11 ka bag-ohan naghatag sa ilang mga ngalan aron matun-an pinaagig sulat. Namauli ang mga misyonaryo nga gikapoy apan nalipay sa ilang nahimo.

[Hulagway sa panid 45]

Ang otso-anyos nga Grant sa Zambia nagdumala ug daghang pagtuon sa Bibliya

[Hulagway sa panid 57]

Ang lamesa nga gigamit diha sa mga eksibit alang sa mga bungol sa Inglaterra