Sulat Gikan sa Nagamandong Lawas

SAMTANG kita mosugod sa unang mga tuig sa ika-21ng siglo, usa ka kalipay nga sulatan kamo, ang “tibuok kapunongan sa mga igsoon” sa tibuok kalibotan, ug dayegon kamo tungod sa inyong kakugi. (1 Ped. 2:17) Duolag 2000 ka tuig kanhi, si Jesus nangutana: “Inig-abot sa Anak sa tawo, makakaplag ba gayod siyag pagtuo dinhi sa yuta?” (Luc. 18:8) Ang inyong masibotong kalihokan sulod sa milabayng tuig sa pag-alagad nagtubag sa pangutana ni Jesus uban ang lanog nga oo! Ang uban kaninyo giyubit ug gibiaybiay tungod sa inyong pagtuo. Sa daghang dapit, kamo milahutay bisan pa sa mga gubat, katalagman, sakit, o gutom. (Luc. 21:​10, 11) Tungod sa inyong kasibot alang sa matarong nga mga buhat, si Jesus ‘makakaplag gihapon ug pagtuo dinhi sa yuta.’ Sa pagkatinuod, adunay kalipay sa langit tungod niana!

Kami nasayod nga ang paglahutay dili sayon. Tagda ang mga pagsulay sa atong mga igsoon diha sa usa ka nasod sa kasadpang Asia. Ang kapintasan batok sa mga Saksi ni Jehova halos ordinaryo na lang sa maong nasod. Di pa dugay, gibalda sa mga polis ang usa ka malinawong asembliya sa duolag 700. Ang mga ali sa kadalanan nagpugong sa dugang 1,300 nga makatambong. Usa ka magubtanong panon sa nagtakobang mga tawo, nga ang uban kanila mga polis, nangabot sa dapit sa asembliya, nga nagkulata sa daghang delegado, ug nagsunog sa tinukod nga gamiton alang sa asembliya. Sa ubang mga okasyon, ang relihiyosong mga ekstremista grabeng nagkulata sa atong mga igsoon ginamit ang mga puspos nga punog lansang.

Makalilisang ang maong mga pag-atake apan dili katingad-an. Si apostol Pablo gidasig sa pagsulat: “Ang tanan nga nagtinguha sa  pagkinabuhi uban ang diyosnong pagkamahinalaron kalangkit ni Kristo Jesus pagalutoson usab.” (2 Tim. 3:12) Sa unang siglo, ang mga Kristohanon nakaagom sa binaba ug pisikal nga paglutos, ug gani ang uban gipamatay. (Buh. 5:40; 12:2; 16:22-24; 19:9) Tinuod usab kana sa ika-20ng siglo, ug sa walay duhaduha magpadayon kini nga ingon sa ika-21ng siglo. Bisan pa niana, si Jehova nag-ingon kanato: ‘Bisan unsa nga hinagiban nga buhaton batok kaninyo dili magmalamposon.’ (Isa. 54:17) Pagkatalagsaong pasalig kana! Sa pagkatinuod, bililhon kaayo kita kang Jehova nga pinaagi sa iyang manalagnang si Zacarias, siya miingon: “Siya nga nagahilabot kaninyo nagahilabot sa kalimutaw sa akong mata.” (Zac. 2:8) Ang mga kaaway sa mga magsisimba ni Jehova wala gayoy purohan nga makadaog sa bug-os. Ang putling pagsimba magmadaogon!

Pananglitan, diha sa nasod nga gihisgotan ganina, gitagamtam sa mga Saksi ni Jehova ang duha ka bag-ong kinatas-ang gidaghanon sa mga magmamantala sulod sa 2001 nga tuig sa pag-alagad. Oo, ang atong mga igsoon milahutay didto bisan pa sa kalisdanan, sama sa ginahimo nila bisan diin. Sa tibuok kalibotan sulod sa miaging tuig sa pag-alagad, 5,066 ang nabawtismohan matag semana ingong simbolo sa ilang pagpahinungod ngadto kang Jehova. Karon kining mga bag-ohan determinado, duyog sa uban pa kanato, sa ‘pagbarog nga bug-os ug may hugot nga pagtuo sa bug-os nga kabubut-on sa Diyos.’​—Col. 4:12.

Dugang pa, tagda ang di pa dugayng mga kaugmaran sa Gresya. Bisan pa sa katuigan sa grabeng paglutos gikan sa Gregong Ortodoksong Iglesya, ang mga Saksi ni Jehova giila na karon sa gobyerno ingong usa ka “nailhang relihiyon.” Ang dokumento nga naghatag niini nga pag-ila padayong nag-ingon nga ang mga pasilidad sa Bethel sa Gresya maoy “usa ka sagrado ug gipahinungod nga dapit, gipahinungod alang sa pagsimba sa Diyos.” Kami usab malipay sa pagsulti kaninyo nga sulod sa miaging tuig sa pag-alagad, ang mga hukmanan nagpakanaog ug paborableng legal nga mga desisyon nga nakaapektar sa atong pagsimba didto sa Alemanya,  Bulgaria, Canada, Japan, Romania, Rusya, ug sa Tinipong Bansa. Pagkamapasalamaton nato kang Jehova tungod sa pagpabiling bukas sa pultahan sa kalihokan nianang mga nasora!

Samtang atong pamalandongon ang mga paagi nga si Jehova nagpaluyo sa iyang katawhan niining kataposang mga adlaw, atong makita nga siya mao ang labing maayong Higala nga atong mabatonan sukad. Kita malipayon sa atong relasyon uban kaniya, nga nahibalo nga siya nahigugma kanato, nagatudlo kanato, ug nagatul-id kanato. Oo, padayon natong masinati ang mga pagsulay sa pagtuo. Apan ang dili-matarog nga pagtuo kang Jehova magapalig-on kanato. Si Santiago misulat: “Mga igsoon ko, isipa nga maoy bug-os kalipay kon makasagubang kamo ug nagkadaiyang mga pagsulay, kay nahibalo kamo nga kining sinulayang kalidad sa inyong pagtuo mosangpot ug pagkamainantoson.” (Sant. 1:​2, 3) Dugang pa, ang atong pagkamainantoson magpasundayag sa atong gugma kang Jehova, ug mohatag kini kanato ug tumang kalipay! Mga igsoon, magmasaligon nga si Jehova motabang sa matag usa kanato. Kon magpabilin kitang matinumanon, siya motabang gayod kanato nga makasulod ngadto sa bag-ong kalibotan. Buot niya nga kita molampos.

Busa, kami nagaagda kaninyo mga igsoong lalaki ug babaye, bata ug tigulang, nga hunahunaon kanunay ang kahibulongang mga panalangin nga nagahulat sa unahan. Hinaot nga ang atong tinamdan susama nianang iya ni apostol Pablo, nga misulat: “Giisip ko nga ang mga pag-antos karong panahona walay bili kon itandi sa himaya nga igapadayag dinhi kanato.” (Roma 8:18) Salig kang Jehova sa dihang moatubang ug nagkadaiyang mga kalisdanan. Lahutay, ug ayaw paglunga. Dili, dili gayod nimo basolan kini. Ang Pulong sa Diyos nagpasalig kanato: “Kon bahin sa matarong, siya magpadayong buhi tungod sa iyang pagkamatinumanon.”​—Hab. 2:4.

Inyong mga igsoon,

Nagamandong Lawas sa mga Saksi ni Jehova