Ang Labing Makaiikag nga Bahin sa Miaging Tuig

“UMARI kamo kanako, . . . ug ako magapalagsik kaninyo.” Kining mga pulonga ni Jesu-Kristo, nga makita diha sa Mateo 11:​28, nagsilbing atong tinuig nga teksto sa 2002. Sa miaging tuig sa pag-alagad, daghan gayod ang miduol ug 265,469 ang midawat sa imbitasyon sa Diyos, nabawtismohan, ug nakakaplag ug kalagsik duyog sa kapin sa sayis milyones pang uban nga nag-alagad ilalom sa magaan nga yugo sa Kristohanong pagkatinun-an.

Sa mosunod nga mga panid, imong mabasa kon sa unsang paagi si Jehova padayong nagpanalangin sa iyang katawhan sa tibuok yuta. Atong hisgotan karon ang ubang dagkong teokratikanhong mga panghitabo sa 2002 nga tuig sa pag-alagad.

 Mga Distritong Kombensiyon Makapukaw ug Kasibot

Sama sa ila nang nabatasan, ang mga Saksi ni Jehova magtigom diha sa gatosang mga dapit sa tibuok kalibotan aron sa pagtambong sa ilang tinuig nga distritong kombensiyon. Ang 2002/03 nga tema sa kombensiyon maoy “Masibotong mga Magmamantala sa Gingharian.” Ang keynote address naghisgot nga ang katawhan sa Diyos karon nagsundog sa kasibot ug kaisog ni Jesu-Kristo sa pagtuman sa ilang ministeryo. Ang ubang mga pakigpulong nagpatin-aw nga ang kasibot maugmad pinaagi sa pagtuon sa Pulong sa Diyos ug mapasundayag pinaagi sa pagbuhat ug maayo ug ilabina sa madasigong pagsangyaw sa Gingharian sa Diyos.

Ang mga entrante nga nagsul-ob ug costume sa drama nga nag-ulohang “Barog nga Malig-on Diha sa Malisod nga Panahon” naghisgot bahin kang manalagnang Jeremias. Siya, sama kang Jesus, nagpasundayag ug talagsaong kasibot ug pagkamalahutayon bisan pa sa mga kalisdanan. Si Jeremias misalig kang Jehova ug maisogong miwali sa mensahe sa Diyos. Pagkamaayong panig-ingnan alang sa mga Kristohanon karon!

Duha ka libro ang giluwatan niining kombensiyona. Sa Biyernes ang mga delegado nakadawat sa Simbaha ang Bugtong Matuod nga Diyos. Kining 192-panid nga libro gamiton ingong ikaduhang giya sa pagtuon sa Bibliya aron mapasilsil ang kamatuoran sa Pulong sa Diyos diha sa mga kasingkasing sa mga estudyante sa Bibliya. Segurado kami nga kining publikasyona makatabang sa mga bag-ohan sa pagtubo sa espirituwal nga paagi ug sa paglakaw diha sa hiktin nga dalan paingon sa kinabuhi diha sa matarong nga bag-ong kalibotan sa Diyos.

Ang librong Pakigsuod Kang Jehova giluwatan sa Sabado. Kini gibahinbahin ngadto sa mga seksiyon nga naghisgot sa upat ka pangunang mga hiyas ni Jehova: gahom, hustisya, kaalam, ug gugma. Ang katuyoan niini gipadayag diha sa pasiunang pamulong sa libro: “Hinaot nga kining libroha motabang kanimo nga mas masuod pa kang Jehova nga Diyos, sa pagmugna ug suod nga bugkos uban kaniya hangtod sa hangtod, aron ikaw mabuhi sa pagdayeg  kaniya hangtod sa walay kataposan.” Ang programa sa kombensiyon, uban niining bag-ong mga publikasyon, motabang sa mga matinud-anon-ug-kasingkasing sa tanang dapit sa pagpalambo sa ilang gugma sa atong Maglalalang.

Pagsagubang sa ‘Makuyaw nga mga Panahon’

Si apostol Pablo nagsulat ngadto kang Timoteo nga pagatiman-an ang “kataposang mga adlaw” ug “makuyaw nga mga panahong lisod sagubangon.” (2 Tim. 3:1) Ang mga kalamidad, kinaiyanhon man ang hinungdan ug dili, nakahatag ug mga pagsulay ug mga problema. Bisan pa niana, kini usab maoy mga higayon sa mga Kristohanon sa pagpasundayag sa ilang gugma sa usag usa. Dihay daghang kalamidad sa miaging tuig sa pag-alagad. Dinhi atong hisgotan ang duha niini.

Ang Kalamidad sa World Trade Center: Ang graduwasyon sa ika-111ng klase sa Watchtower Bible School of Gilead gihimo sa Sabado, Septiyembre 8, 2001. Paglabay sa tulo ka adlaw, sa Septiyembre 11, ang mga migraduwar ug ang ilang mga pamilya mipaseyo sa New York City, sa Tinipong Bansa. Mainit ug matahom kadtong adlawa nga walay panganod ang asul nga kalangitan. Dayon, sa alas 8:46 s.b., usa ka komersiyal nga jet mibangga sa amihanang torre sa World Trade Center sa habagatang bahin sa Manhattan. Paglabay sa pipila ka minutos gibanggaan sa laing komersiyal nga jet ang habagatang torre.

Sa pagka-alas 9:59 s.b., ang habagatang torre nahugno, nga nagpaulbo sa bagang panganod sa abog ug mga tinumpag diha sa tibuok habagatang bahin sa Manhattan. Human niana ang amihanang torre nahugno. Halos tulo ka libong tawo ang nangamatay. Ang matag torre, nga natapos sa 1973, maoy 110 ka andana. Ang bagang abog gikan sa natumpag nga duha ka bilding gipadpad sa hangin ug nakaabot sa Brooklyn Bethel, nga walay tulo ka kilometros ang gilay-on.

Ang mga igsoon sa sangang buhatan sa Tinipong Bansa dihadiha nagsugod sa pagsusi kon kinsa ang naapektohang mga Saksi niining makalilisang nga trahedya ug kon unsang tabang ang gikinahanglan.  Sa pagka-Martes sa gabii, Septiyembre 11, ang mga membro sa pamilyang Bethel nga gikan sa tanang tulo ka lugar nga nahimutangan sa mga bilding sa Bethel​—Brooklyn, Patterson, ug Wallkill​—nasusi nga walay naapektohan. Sa pagka-Huwebes sa hapon gipahibalo sa tanang migraduwar sa Gilead ang Opisina sa Gilead nga sila ug ang ilang pamilya wala maapektohi. Kasamtangan, 37 ka magtatan-aw sa sirkito sa dapit sa New York giteleponohan. Ilang gikontak ang mga ansiyano sa kongregasyon, ug gisusi sa mga ansiyano ang matag usa ka magmamantala. Sa pagka-Biyernes sa buntag, Septiyembre 14, nahibaloan sa sanga nga 14 sa atong mga igsoong lalaki ug babaye ang namatay o nangawala. Kanang gidaghanona wala mausab.

Ang mga naluwas sa kalamidad nag-asoy sa ilang mga eksperyensiya. Si Cynthia Tucker, nga usa ka regular payunir, nagtrabaho sa World Financial Center tabok sa karsada sa World Trade Center. Didto siya sa ika-37ng andana sa dihang iyang nakita nga gibanggaan sa unang jet ang torre. Kay nagtuo nga usa kini ka makalilisang nga aksidente, siya migawas ug mihangad sa bilding nga gibanggaan sa ayroplano. Nagkatag ang kagun-oban. Dayon dihay laing ayroplano nga milupad sa ibabaw, nga ubos kaayo. Si Sister Tucker miingon: “Dako kaayo ang ayroplano. Akong naamgohan nga kini mabangga sa bilding. Gusto kong modagan, apan wala ako makalihok​—wala ako mahibalo kon unsay akong buhaton. Ang ayroplano morag milahos sa bilding. Ang makabungog nga kasaba daw nahisamag anaa ka sa ilalom sa tubig; ang kasaba akong nabatyagan. Ang hangin baga ug morag dunay balas. Lisod ang pagginhawa. Ang mga tawo nanagan sa tanang direksiyon. Midagan ako paingon sa usa ka bilding ug nagtan-aw samtang nahugno ang unang torre. Gihubo sa mga tawo ang ilang mga kamesadentro aron itabon sa ilang mga nawong tungod sa abog. Ang mga tawo uban ang mga bata ug mga binuhi nanggawas sa mga bilding. Ang tanan nangalisang. Bisan ang mga hayop lain ug linihokan. Dili nako ikahubit ang akong gibating kahadlok.” Si Sister Tucker mapasalamaton sa tabang sa mga ansiyano nga miabot ug gibasahan siya ug makapahupayng mga pulong sa Bibliya.

 Sa mga bulan nga misunod, ang mga tawo sa komunidad sa New York gidad-an sa mga igsoon ug mensahe sa Bibliya nga paghupay ug paglaom. Daghang igsoon gitugotan sa pag-alagad diha sa Ground Zero, ang lugar nga nahugnoan sa Twin Towers. Ang usa sa mga igsoon mao si Roy Klingsporn, usa ka payunir. Siya miingon: “Sa pagkamapasalamaton, usa ka sarhento sa sundalo sa kahanginan nga nalangkit sa buluhaton sa paghatag ug hinabang miingon: ‘Ang tanan nagdala kanamo ug pagkaon, init nga kape, ug uga nga mga besti, apan kamo ang una nga nagbasa ug kasulatan. Kita nagkinahanglag Diyos sa panahong sama niini.’”

Pagbuto sa Bolkan sa Sidlakang Aprika: Daghan sa atong mga igsoon sa sidlakang Congo (Kinshasa) nakaagom ug giyera sibil, sakit, kawalad-on, ug pagkawalay-trabaho. Ang uban mga lalin gihapon. Nakadugang sa mga problema mao ang kalit nga pagbuto sa Mount Nyiragongo, usa ka bolkan nga nahimutang duol sa lungsod sa Goma. Sa buntag sa Enero 17, 2002, ang bukid nagsugod sa pagbuga ug aso ug kalayo. Sa pagkagabii, ang gabaga nga lapok mibuhagay gikan sa bolkan paingon sa Goma. Libolibo sa nangalisang nga mga tawo mikalagiw paingon sa kasikbit nga lungsod sa Gisenyi, sa Rwanda. Ang mga dalan naghuot sa mga tawo nga nanagdalag bisan unsa nga ilang madala. Ang Gisenyi nameligro usab, apan giandam sa mga igsoon didto ang Kingdom Hall aron mahimong kampo sa mga lalin alang sa mga igsoon sa Congo. Ang ubang mga igsoon sa Gisenyi mitanyag dayon sa ilang mga balay alang niadtong mikalagiw gikan sa bolkan.

Usa ka lokal nga ansiyano miingon: “Sa dihang nakita namo kon unsay nahitabo, ang ubang mga igsoon ug ako miadto dayon sa kinadak-ang dalan nga nagsumpay sa Goma ug Gisenyi. Nagkapot kamig mga magasing Bantayanang Torre ug Pagmata! ug among giisa kini. Ngitngit ang palibot, apan miadto kami sa dapit nga kami makita. Sa dihang nakita sa among mga igsoon ang mga magasin, kami ilang nailhan ingong mga Saksi, ug among gihatod sila ngadto sa among Kingdom Hall, nga nagsilbing kampo sa mga lalin. Kami nagtindog daplin sa dalan hangtod sa buntag.  Among gihimo ang samang butang nga gihimo sa mga igsoon sa Goma alang kanamo sa mga katuigang milabay. Human sa gubat sa Rwanda, gatosan ka libo ang mikalagiw paingon sa Goma. Niadtong panahona ang mga Saksi sa Goma nagtindog sa tibuok adlaw ug gabii sa daplin sa mga dalan nga nagkapot ug mga  magasin nga nakatabang kanamo sa pag-ila sa mga igsoon. Kami ilang gihatod ngadto sa mga kampo sa lalin nga giorganisar sa mga Saksi.”

Ang kadaghanan niadtong mikalagiw sa bolkan nagpalabay sa gabii diha sa hawan. Kini naglakip sa mga igsoon nga tungod sa kaguliyang o sa kangitngit wala makakita niadtong nagkapot sa mga magasin. Usa ka ansiyano miingon: “Sayo sa pagkasunod buntag, ang mga igsoong lalaki ug babaye migawas na usab nga nagkapot ug mga magasin. Ilang gilibot ang Gisenyi aron sila makita sa tanan. Niining paagiha ilang nakit-an ang tanang igsoon nga gikan sa Goma nga wala makakita sa mga Saksi sa miaging gabii. Sa ngadtongadto ang among Kingdom Hall nameligro sa gabaga nga lapok, nga nagpadayon sa pagbuhagay. Naghikay dayon kami nga laing lima ka Kingdom Hall ang magsilbi usab nga mga kampo sa lalin.” Ang ubang mga igsoon nga gikan sa 24 ka kongregasyon sa Goma mikalagiw paingon sa interyor sa Congo, apan ang kadaghanan​—mga 2000​—mikalagiw paingon sa Rwanda.

Ang sangang buhatan sa Kigali, Rwanda, mipalit dayon ug pagkaon, medisina, mga habol, ug plastik nga mga sudlanag tubig. Kini gipadala dayon ngadto sa mga kampo. Nalipay kaayo ang mga igsoon sa Goma nga usa ka adlaw lamang human sa kalamidad, usa ka trak miabot nga nagdala ug mga hinabang! Daghang maayong komento ang nadungog gikan sa mga dili-Saksi. Usa ka igsoon nakadungog sa mga tawo nga miingon: “Maayo kining relihiyona. Sila tinuod nga nahigugma sa usag usa.”

Mga ikatulong bahin sa Goma ang nadaot. Daghang igsoong lalaki ug babaye nawad-an sa tanang butang. Apan, ang mga Saksi kansang mga balay wala madaot mitanyag sa pagpasaka sa mga pamilya sa mga igsoon kansang mga balay nangadaot. (Roma 12:​12, 13) Sa ngadtongadto, ang mga igsoon sa Rwanda naghikay aron luwas nga makapauli ang tanang lalin ngadto sa Goma. Ang mga Saksi sa Uropa mitabang usab pinaagi sa pagpadala ug duha ka ayroplanong kargado ug mga suplay nga gikan sa Belgium.

Ang pagbuto sa Mount Nyiragongo maoy usa ka kalamidad. Daghan ang napildihan ug kinabuhi ug nagub-an ug propiedad  gumikan niini, apan gipaila sa matuod nga mga Kristohanon ang ilang kaugalingon pinaagi sa gugma nga ilang gipakita sa usag usa.​—Juan 13:35.

Gipasiugda sa Kingdom Ministry School ang Espirituwalidad

Ang Kingdom Ministry School nagsugod sa 1959 ingong usa ka bulang kurso sa pagtungha. Kini gihimo diha sa South Lansing, sa amihanang bahin sa New York, T.B.A. Diha sa ubang mga nasod, gihimo kini sa mga lugar nga gihikay sa mga sangang buhatan. Sa sinugdan, ang nagtungha niini mao ang mga ansiyano sa kongregasyon (kaniadto gitawag ug mga alagad sa kongregasyon) ug mga espesyal payunir. Apan, sa 1966, ang kurso gibag-o; kini miabot ug duha lamang ka semana, ug mga ansiyano lamang ang makatungha. Sa 1977, may kahikayang gihimo aron ang tanang ansiyano makatambong sa 15 ka oras nga kurso. Sukad niadto, susamang mga sesyon nga lainlain ug gidugayon ang gihikay matag pipila ka tuig. Gikan sa 1984, ang ministeryal nga mga alagad nakadawat usab ug pagbansay sa Kingdom Ministry School.

Niining tuiga ang tunghaan gilangkoban ug tulo ka klase. Ang una, nga gihimo sa Martes ngadto sa Huwebes, maoy alang sa nagapanawng mga magtatan-aw; ang ikaduha, nga gihimo sa Biyernes ug Sabado, maoy alang sa mga ansiyano sa kongregasyon; ug ang ikatulo, nga gihimo sa Dominggo, maoy alang sa ministeryal nga mga alagad. Gipasiugda sa mga sesyon ang paglig-on sa espirituwalidad. Sa karaang panahon si Moises miampo kang Jehova: “Pahibaloa ako, palihog, sa imong mga dalan, aron ako makaila kanimo, aron ako makakaplag ug pabor sa imong mga mata.” (Ex. 33:13) Kining maong pag-ampo gibungat human nga nakita ni Moises ang Napulo ka Hampak, human nga nakaagi sa pagbulag sa Pulang Dagat, human nga nakapakigsulti kang Jehova sulod sa 40 ka adlaw diha sa Bukid sa Sinai, ug human nga nakadawat sa Napulo ka Sugo. Sa panuigong 80 ug human nga gigamit ni Jehova sa talagsaong paagi, nakita ni Moises ang iyang espirituwal nga panginahanglan. Kaharmonya niini nga pananglitan, ang mga  ansiyano ug ministeryal nga mga alagad gidasig sa pagpadayon sa pag-uswag ingong espirituwal nga mga lalaki, bisag unsa pa ka dugay sila nga nag-alagad kang Jehova.

Ang materyal nga pagatun-an gihubad ug gigamit sa mga sanga sa tibuok kalibotan. May mga sulat sa apresasyon nga nadawat gikan sa daghang nasod. Usa ka ansiyano sa Guinea nagsulat: “Wala ako magmahay sa mga pagsakripisyo ug sa pagbiyaheg 1,000 ka kilometros nga akong gihimo aron makatungha.” Duna pay lain nga nagsulat: “Dili nako matukib sa pulong ang akong pasalamat alang niini nga pagbansay. Salamat kaayo kaninyo!”

Gikan sa Korea, usa ka igsoon nagsulat: “Ang tunghaan nakatabang kanako sa pagpamalandong pag-ayo kon ako usa ba ka espirituwal nga tawo o dili.”

Ang sangang buhatan sa El Salvador nagsulat: “Dunay dakong interes nga gipakita diha sa bag-ong mga kahikayan alang sa Pagtuon sa Libro sa Kongregasyon. Nagtuo kami nga kini makatabang kanamo sa pagtagana ug mas maayo ug mas suod nga personal nga pagtagad sa sakop sa matag grupo.”

Gikan sa Alemanya, usa ka lawas sa mga ansiyano nagsulat: “Ang mga sugyot ug mga instruksiyon realistiko ug mahimong gamiton alang sa kaayohan niadtong gisalig kanato.”

Ang sangang buhatan sa Switzerland nag-ingon: “Ang tunghaan nakatabang sa pagtagana sa gikinahanglang pagdasig aron mabuntog ang pagkawalay-kaikag sa espirituwal nga mga butang.”

Mga Kausaban sa Balaod

ARMENIA: Ang kaso ni Lyova Margaryan nabaniog sa ubang kanasoran. Ang kriminal nga mga sumbong gipasaka batok kang Brader Margaryan tungod sa iyang kalihokan ingong usa sa mga Saksi ni Jehova. Ang mga sumbong naglakip sa “pagsangyaw bahin sa wala-marehistro nga relihiyon.” Sa Septiyembre 18, 2001, si Brader Margaryan giabsuwelto sa korte nga naghusay batok sa tanang sumbong. Ang kaso giapelar, ug gilabanan sa korte sa apelasyon ang hukom nga dili-sad-an, nga nag-ingon nga ang iyang relihiyosong  pagtulon-an ingong usa sa mga Saksi ni Jehova dili paglapas sa balaod ug protektado sa Konstitusyon sa Armenia. Dayon ang mga tigsumbong miapelar sa ilang kaso ngadto sa kinatas-ang korte sa apelasyon, ang Court of Cassation. Sa Abril 19, 2002, gilabanan sa unom ka membro sa hunta sa Korte ang mga hukom nga dili-sad-an. Bisan pag nalipay kami niini nga kadaogan, ang batan-ong mga brader nga anaa sa hustong edad sa pagsundalo padayon nga gipangdakop ug gipriso sa Armenia tungod sa pagdumili sa pagsundalo gumikan sa relihiyosong mga katarongan.

GEORGIA: Usa ka mapintas nga siklo sa wala-masiloti nga mga buhat sa kapintasan nagpadayon batok sa mga Saksi ni Jehova sa nasod sa Georgia. Sukad sa Oktubre 1999, dunay kapin sa 80 ka dokumentadong mapintas nga mga pag-atake diin nalangkit ang kapin sa 1,000 ka biktima​—mga lalaki, babaye, bata, tigulang, ug mga baldado. Ang mga balay sa ubang mga Saksi gipangawatan, gilungkab, ug gisunog. Kapin sa 700 ka kriminal nga sumbong ang gipasaka, apan walay usa ang nasentensiyahan nga sad-an sa mga pag-atake. Sa kataposan, sa Septiyembre 2001, gidemanda si Petre Ivanidze ug ang Ortodoksong pari nga gitangtangan sa posisyon nga si Vasili Mkalavishvili tungod sa pagkalangkit nila sa mga pag-atake. Apan, daghang higayon nga sugdan na unta ang husay ugaling wala mahinayon tungod sa mga kahimtang diha sa korte. Ang mga sumusunod sa mga gipasakaan ug sumbong gitugotan sa pagsulod sa korte nga nagwarawara sa dagkong mga krus, nga kaniadto gigamit ingong mga armas, ug mga bandera-bandera nga may mga eslogan sa pagpukaw ug kasuko batok sa mga Saksi ni Jehova. Sa Mayo 30, 2002, pito ka higayon nga gibalhin sa laing petsa ang husay. Ang mga Saksi ni Jehova nagpasaka ug duha ka sumbong sa European Court of Human Rights (ECHR), nga ang usa ka sumbong nagprotesta sa gobyerno tungod sa pagkawalay-aksiyon batok sa grabeng kapintasan ug ang lain nagkuwestiyon sa gipakanaog nga hukom sa Korte Suprema sa Georgia nga nagnulo sa pagkarehistro sa duha ka legal nga organisasyon nga gigamit sa mga Saksi ni Jehova. Sa pagka-Oktubre 2001, giusa sa ECHR ang duha ka sumbong aron kini mahusay dayon.

 Sa Hulyo 23, 2002, ang mga Saksi ni Jehova nagpasaka ug laing sumbong sa ECHR. Gidetalye niining maong sumbong ang 30 ka kaso diin ang mga Saksi sa Georgia giatake sa relihiyosong mga ekstremista, mga Ortodoksong pari, ug mga polis. May kalabotan sa usa sa mga kaso mao ang usa ka hinungdanon kaayong dokumento. Ang dokumento naglatid sa plano, nga gihimo sa duolan sa 100 ka polis, sa pagpahunong sa malinawong kombensiyon sa mga Saksi ni Jehova sa Septiyembre 2000. Kining dokumentoha giaprobahan ug gipirmahan sa tag-as nga mga opisyales sa Ministry of Interior sa kasadpang siyudad sa Zugdidi.

RUSYA: Ang husay sa pagdili sa mga Saksi ni Jehova sa Moscow gisugdan pag-usab sa Pebrero 12, 2002. Ikapitong higayon kini nga kinahanglang depensahan sa mga Saksi ni Jehova ang ilang kaugalingon batok sa mao gihapong walay basehanang mga sumbong. Sa Abril 4, 2002, human sa duha ka bulang pagsusi pag-usab sa sumbong diha sa opisina sa piskal, ang Korte nagpakanaog ug mando nga nagtudlo ug ekspertong mga pagtuon labot sa relihiyosong mga literatura sa mga Saksi ni Jehova ug sa ilang mga sulat sa opisina. Ang Korte nagpakanaog niining desisyona bisan pag ang piskal walay gipresentar nga espesipikong ebidensiya sa pagpamatuod nga nangaghat ang mga Saksi ni Jehova ug relihiyosong kagubot, nangaghat sa pagbungkag sa mga pamilya, o naglapas sa mga katungod ug mga kagawasan sa mga lungsoranon. Ang bista giundang nga naghulat pa sa mga resulta sa ekspertong pagtuon.

HABAGATANG KOREA: Sa kataposan sa Disyembre 2001, ang gidaghanon sa mga Saksi ni Jehova sa Habagatang Korea nga nagsilbi sa sentensiya sa pagkapriso tungod sa ilang pagdumili sa pagsundalo tungod sa konsensiya nakaabot ug 1,640. Ang gidaghanon anam-anam nga nagkataas matag tuig. Ang Military Service Law nagbaod nga kadtong modumili sa pagdalag armas mahimong sentensiyahan hangtod sa tulo ka tuig. Ang Habagatang Korea dili modawat ug mga eksemsiyon sa pagsundalo sa mga ministro sa relihiyon o niadtong modumili tungod sa konsensiya. Sukad  sa mga tuig sa 1950, kapin sa 7,000 ka Saksi sa Habagatang Korea ang nangapriso tungod sa pagdumili sa pagsundalo. Sa Enero 29, 2002, sa usa ka kaso nga wala pa mahitabo, gipadala sa Labaw-labawng Huwes nga si Si-hwan Park sa Seoul District Court ang kaso ni Kyung-soo Lee ngadto sa Korte sa Konstitusyon. Si Huwes Park nangayog opinyon bahin sa pangangkon ni Brader Lee nga ang dili-pag-ila sa katungod sa nagdumili sa pagsundalo tungod sa konsensiya naglapas sa iyang katungod sa kagawasan sa relihiyon ug konsensiya. Sa dihang gipasaka ang hangyo diha sa korte, gipaurong ni Huwes Park ang husay ug gibuhian si Brader Lee nga gipabayad ug piyansa. Sugdan pag-usab ang husay human lamang nga magpakanaog ang Korte sa Konstitusyon ug lagda bahin sa pagkalegal sa gilalisan nga mga pulong sa konstitusyon.

TINIPONG BANSA: Sa Hunyo 17, 2002, ang Korte Suprema sa Tinipong Bansa nagpakanaog ug makasaysayanhong desisyon sa kaso sa Watchtower Bible and Tract Society of New York, Inc. v. Village of Stratton. Kining kasoha mitungha tungod sa pag-insistir sa balangay nga ang mga Saksi ni Jehova magkuha ug lisensiya sa mayor sa dili pa sila magsugod sa pagsangyaw sa balay-balay. Ang Korte nag-ingon: “Gisaysay [sa mga Saksi ni Jehova] diha sa husay nga sila wala mangayog lisensiya tungod kay ang ilang awtoridad sa pagsangyaw naggikan sa Kasulatan. [Ang mga Saksi miingon:] ‘Kon kami mangayog lisensiya sa munisipyo aron makasangyaw, kini alang kanamo maoy halos usa ka insulto ngadto sa Diyos.’” Sa nagpakanaog ug desisyon batok sa ordinansa, ang Korte nagtuo nga ang ordinansa labot sa pagpangayog lisensiya “mapasipad-on​—dili lamang sa mga prinsipyo nga gipanalipdan sa First Amendment, kondili sa matag hunahuna sa usa ka katilingbang may kagawasan​—nga diha sa adlaw-adlawng pagpakigsulti ang usa ka lungsoranon kinahanglang magpahibalo una sa gobyerno sa iyang tinguhang makigsulti sa iyang mga silingan ug dayon mangayog lisensiya sa paghimo niini.” Ang Korte dugang miingon: “Bisan pag ang paghatag ug mga lisensiya sa opisina sa mayor maoy trabaho nga kinahanglang himoon dayon ug nga walay bayad, ang balaod labot sa pagpangayog lisensiya aron  makapakigsulti maoy dakong paglapas sa atong nasodnong panulondon ug balaodnong tradisyon.”

Ang Korte mihatag usab ug maayong komento bahin sa dakong epekto sa mga Saksi ni Jehova sa pagkatukod sa batakang balaod sa T.B. Ang Korte miingon: “Sa kapin sa 50 ka tuig, ang Korte nagnulo sa mga pagdili sa pagbalay-balay ug sa pag-apod-apod ug mga pulyeto. Dili kay aksidente lang nga ang kadaghanan niining mga kasoha nalangkit sa mga isyu labot sa First Amendment nga gipasaka sa mga Saksi ni Jehova, tungod kay ang pagbalay-balay gisugo man sa ilang relihiyon.” Sama sa giingon sa Korte, kining maong “mga kaso nagpasundayag nga ang mga paningkamot sa mga Saksi ni Jehova sa pagbatok sa pagbaod sa kagawasan sa pagsulti maoy pagpakigbisog dili lamang alang sa ilang mga katungod.”

Dugang pa, sa Hulyo 1, 2002, ang Korte Suprema sa South Carolina naglaban sa katungod sa usa sa mga Saksi ni Jehova sa pagdumili sa mga pag-abonog dugo. (Buhat 15:​28, 29) Gikiha ni Charles Harvey ang iyang doktor aron pabayron sa miresultang kadaot tungod sa tinuyo nga paglapas sa iyang pagdumili sa pag-abono ug dugo. Sa wala pa ang operasyon, klarong gipahibalo ni Brader Harvey ang iyang doktor bahin sa iyang binase sa Bibliya nga baroganan. Apan, aron kaabonohan ug dugo sa dihang may mga komplikasyong mitungha human sa operasyon samtang wala pa maulii sa panimuot si Brader Harvey, ang doktor nangayog permiso sa dili-Saksi nga inahan ni Brader Harvey. Kay wala mopabor sa pagtugot sa inahan sa pag-abono ug dugo, ang Korte Suprema sa South Carolina miingon nga ang “pagsupak sa usa ka pasyente batok sa paagi sa pagtambal kinahanglang sundon sa nag-atiman nga doktor kon gipahibalo nang daan ang doktor sa wala pa ang operasyon.” Busa, ang korte nagmando nga si Brader Harvey dunay katungod sa pagpasaka sa sumbong aron masusi sa hurado kon ang doktor nakalapas ba sa iyang kasabotan sa pagtambal kang Brader Harvey nga walay dugo ug kon ang doktor nakahimo bag sayop nga pamaagi sa pagpanambal tungod sa pag-abonog dugo kang Brader Harvey nga supak sa iyang kabubut-on.

 Agig Handomanan sa Ilang Pagkamaunongon

Sa kapin nag 30 ka tuig, ang Buchenwald Memorial, nga kampong konsentrasyon kaniadto sa Nazi, wala maghisgot bahin sa mga Saksi ni Jehova. Ang mga Saksi wala lantawa sa mga awtoridad sa Sidlakang Alemanya nga mga biktima ug mga magsusupak sa rehimeng Nazi. Bisan karon daghang tawo sa Alemanya naglisod sa pagdawat sa talagsaong rekord sa pagkamaunongon sa mga Saksi. Busa, ang Mayo 9, 2002, maoy usa ka halandomon gayod nga adlaw. Usa ka plake nga naghandom sa mga Saksi nga nag-antos sa Buchenwald ang gipasundayag ni Gn. R. Lüttgenau, nga luyoluyong direktor sa Buchenwald ug sa Mittelbau-Dora Memorials Foundation.

Ang klima niadtong adlawa mainit ug hayahay. Ang kampo kanhi, nga nahimutang sa daghag kahoyng bungtod nga nag-umbaw sa matahom nga banika, nadayandayanan sa makaparepreskong katanoman sa tingpamulak. Apan bisan pa niana, kining dapita ginganlan kaniadto ug lunhawng impiyerno sa Buchenwald. Ang kadaghanan sa mga bisita karon maglisod sa paghanduraw sa gibating kaguol sa mga priso sa kampo kinsa sa panahong tawgon ang mga ngalan magtan-aw saylo sa ilang mga baraks diha sa mao gihapong matahom nga dapit apan walay paglaom nga makakita niini pag-usab nga may kagawasan.

 Apan, ang mga Saksi ni Jehova dunay paglaom pinasukad sa Bibliya ug bug-os nga pagsalig kang Jehova. Kini nakatabang kanila sa paghupot sa ilang integridad ug sa maisogong pagsunod sa sumbanan sa mga apostoles, kinsa miingon: “Kinahanglang among sugton ang Diyos ingong magmamando inay ang mga tawo.” (Buh. 5:29) Tungod sa ilang pagtuo, labing menos 38 ka Saksi ang namatay sulod sa kampo o sa gawas, nga nagtrabaho ingong usa sa mga trabahante sa kampo. Ang teksto sa Buhat gikutlo diha sa plake agig paghandom, nga gisundan sa mga pulong nga gikulit: “Agig Paghandom sa mga Saksi ni Jehova Kinsa Nag-antos ug Namatay Dinhi, Gilutos Tungod sa Ilang Relihiyosong mga Pagtuo.”

Ang mga 800 ka priso nga mailhang Bibelforscher (mga Estudyante sa Bibliya) pinaagi sa usa ka purpura nga trayanggulo nga gitahi  diha sa ilang mga sinina maoy naapil sa kapin sa 250,000 nga gipriso sa daghang tuig sa mga Nazi diha sa kampo. Ang ubang mga Saksi nabalhog didto sa 1937 ug gipugos sa pagtukod sa kampo. Sa 1945, sa dihang gibuhian ang nahibiling mga priso, ang mga Saksi nga gibuhian naghimaya kang Jehova sa ilang kagawasan. Halos sa tibuok panahon nga nagbarog kini ingong kampo sa Nazi, pirme nga aduna gayoy mga 300 ug 450 ka Saksi sa Buchenwald.

Ang plake nagbutang sa mga priso kinsa nagsul-ob ug purpurang trayanggulo diha sa ilang hustong dapit uban sa mga biktima sa rehimen sa Nazi. Kini magpahinumdom usab sa mga bisita sa pagkamaunongon sa mga Saksi. “Ang plake,” miingon si Gn. Lüttgenau, “nagpakita nga sa katilingban karong panahona, ang gidangatan sa mga Saksi ni Jehova nakita ug giila.”

Sa Huwebes, Marso 7, 2002, gipasundayag sa mga opisyales sa lungsod sa Körmend sa kasadpang bahin sa Hungaria ang usa ka plake sa paghandom sa tulo ka Saksi ni Jehova nga namatay ingong mga martir. Sila mao si Bertalan Szabó, Antal Hőnisch, ug Ján Žondor. Ang tulo midumili sa pagsundalo panahon sa Gubat sa Kalibotan II ug gipatay atubangan sa publiko. Ang plake mabasa: ‘Agig paghandom sa mga Kristohanon kinsa gipatay sa Marso 1945 tungod sa pagdumili sa pagsundalo tungod sa konsensiya.’ Ang sanga nagtaho nga aron makabahin sa okasyon sa paghandom sa dihang gipasundayag ang plake, kapin sa 500 ka tawo nanglakaw sa lungsod paingon sa bilding diin gipatay ang mga igsoon.

Komite sa Sanga Natukod sa Tinipong Bansa

Sa Biyernes, Pebrero 9, 2001, ang Nagamandong Lawas nagpahibalo sa pamilyang Bethel sa Tinipong Bansa nga sugod sa Abril 1, 2001, ang Komite sa Sanga magsugod sa pag-obra sa Tinipong Bansa. Sa 2002 nga tuig sa pag-alagad, ang Komite sa Sanga anam-anam nga nangabaga sa ilang mga kaakohan. Ang sanga sa Tinipong Bansa nagdumala sa buluhatong pagsangyaw sa Gingharian sa Tinipong Bansa mismo maingon man sa Bermuda ug sa mga isla sa Turks ug Caicos. Dunay kapin sa usa ka milyong magmamantala  sa Tinipong Bansa, nga niana 215,000 ang nakig-anib sa Kinatsila-ug-pinulongang mga kongregasyon. Sa kapin sa 11,700 ka kongregasyon, mga 2,600 maoy Kinatsila ug pinulongan. Niining miaging tuig sa pag-alagad, 210 ka bag-ong mga kongregasyon ang natukod. Taliwala niini, 123 maoy Kinatsila ug pinulongan, 63 Iningles ug sinultihan, ug 24 sa ubang mga pinulongan.

Sulod sa Tinipong Bansa, karon aduna nay mga kongregasyon o mga grupo sa 37 ka pinulongan gawas sa Iningles ug Kinatsila. Diha sa daghang Kinatsila ug ubang langyaw ug pinulongang mga kongregasyon, ang tumatambong sa Pakigpulong Publiko kasagaran mosobra sa 200 porsiyento. Ang ubang mga kongregasyon nagtaho ug mas daghang pagtuon sa Bibliya kay sa mga magmamantala. Ang Iningles ug pinulongang mga igsoong lalaki ug babaye nagtuon ug ubang mga pinulongan aron makatabang niining malamboon kaayong natad.

Ang sanga sa Tinipong Bansa talagsaon tungod kay ang mga pasilidad sa Bethel nahimutang sa tulo ka lokasyon​—Brooklyn, Patterson, ug Wallkill. Aron may prutas ang pamilyang Bethel, may mga uma duol sa South Lansing, New York, ug Immokalee, sa Florida. Tanantanan, ang pamilyang Bethel sa Tinipong Bansa may gidaghanong 5,465.

Sa pagkakaron adunay 109 ka sanga sa tibuok kalibotan. Ang kahikayan sa pagtukod ug mga Komite sa Sanga sa pag-atiman sa espirituwal nga mga panginahanglan sa mga igsoon nga nagpuyo sa nagkalainlaing kayutaan nag-obra na sukad sa 1976. Kini nga mga komite nagsunod sa Kasulatanhong giya ug pagpanguna nga gihatag sa Nagamandong Lawas. Ang mga Komite sa Sanga dunay responsibilidad sa pagdumala sa pagsangyaw sa maayong balita diha sa teritoryo nga naasayn sa sanga. Ang komite naghatag sa gikinahanglang pagdumala sa Kristohanong mga kongregasyon, misyonaryo, ug mga payunir. Kini nagaorganisar usab sa mga kongregasyon nga mahimong mga sirkito ug mga distrito ug nagarekomendar ngadto sa Nagamandong Lawas sa pagtudlo sa mga magtatan-aw sa sirkito ug distrito, mga membro sa pamilyang Bethel, ug sa mga estudyante sa Tunghaang Gilead. Gawas sa katibuk-ang  pagdumala sa pag-alagad sa kanataran, ang Komite sa Sanga nag-atiman sa buluhaton sa Bethel. Tino nga tugob nga gipanalanginan ni Jehova kining maong kahikayan.

Paghubad Aron Matagan-an ang Daghang Panginahanglan

Sa mga katuigang dili pa dugay, daghang publikasyon ang mabatonan sa nagkadaghang pinulongan. Likod niining tanan, gatosan sa kugihang mga maghuhubad naningkamot sa pagpatungha ug mga publikasyon nga tukma, masabtan, ug makawiwiling basahon.

Ang pangunang panginahanglan sa katawhan sa Diyos mao ang usa ka tukma nga hubad sa Bibliya. Aron matagan-an kini nga panginahanglan, ang Bag-ong Kalibotang Hubad giluwatan na karon sa 44 ka pinulongan. Bahin niini, 29 maoy kompletong mga edisyon. Sa miaging tuig sa pag-alagad, ang Kristohanon Gregong Kasulatan natapos sa tulo ka Aprikanong mga pinulongan​—Cibemba, Igbo, ug Lingala—​ug giluwatan ang kompletong Bibliya sa pinulongang Afrikaans.

Ang dili pa dugayng giluwatan nga mga edisyon sa Bibliya gidawat uban sa dakong pasalamat. Usa ka taho gikan sa Uropa nag-ingon: “Ang mga igsoon nga nag-alagad sa kanataran sa Insek ilabinang nagpabili sa Bibliya sa ilang pinulongan, nga nag-ingon nga gilantaw kini nga ‘maayo kaayo nga pagkahubad.’” Ang ubang interesadong mga estudyanteng Insek sa Canada miingon: “Seguradong Insek ang naghubad niini nga Bibliya! Kini masabtan dayon namo!” Sa Habagatang Aprika usa ka tagbalay nga Xhosa nangutana: “Diin man ninyo nakuha kini nga Bibliya nga maayo kaayong pagkahubad?” Sa Albania usa ka igsoon miingon lamang: “Ang paagi sa Bag-ong Kalibotang Hubad sa pagpahayag sa Kasulatan naghimo sa hunahuna ni Jehova nga motidlom sa kasingkasing.” Usa ka magmamantala sa Croatia nagsulat: “Mas dali ko nga malarawan sa hunahuna ang mga butang, ug morag ako ang nagsulti niadtong mga pulonga. Ang bag-ong hubad yano, natural kaayong pamation, ug bisan pa niana maalamon kaayo. Karon mas  masabtan na nakog maayo kon unsa ka tahom ang mensahe ug instruksiyon ni Jehova kanato.”

Ang pangunang mga publikasyon gikinahanglan gihapon aron masangyaw ang maayong balita sa Gingharian ngadto “sa tanang kanasoran ug mga tribo ug katawhan ug mga pinulongan.” (Pin. 7:9) Sa mga katuigang dili pa dugay, ang mga brosyur sa Lahu nga pinulongan, nga gisulti sa mga tawo sa tribo sa kabukiran sa amihanang Thailand ug sa silingang mga nasod, dunay maayong epekto. Usa ka misyonaryo nagsulat: “Ang brosyur nga Gikinahanglan sa pagkatinuod mao ang labing hinungdanong giya sa Lahu. Kini napahimutang sa tanang dapit sa teritoryo.” Ang resulta? “Nakadawat kami ug mga imbitasyon sa daghang baryo, apan tungod sa kalayo ug sa dili maayong mga dalan, wala pa kami makaadto sa tanan niini. Ang Mateo 9:37 tinuod sa among kahimtang. Pananglitan, among nahibaloan nga diha sa usa ka layong baryo nga mga 160 kilometros sa amihanan sa Chiang Mai, usa ka interesadong babaye regular nang nagtudlo sa brosyur nga Gikinahanglan nga siyasiya ra ngadto sa grupo sa mga ilo.”

Sa Tinipong Bansa, daghang Nitibong mga Amerikano ginasangyawan sa ilang kaugalingong pinulongan. Daghang publikasyon mabatonan na karon sa pinulongang Navajo, lakip sa mga audiocassette sa brosyur nga Unsay Gikinahanglan sa Diyos Kanato? Usa ka magmamantala nagsulat: “Sa Bukid sa Navajo, sa kinalay-ang dapit sa among teritoryo, dunay usa ka magbalantay sa karnero kanhi nga kapin na sa 80-anyos ang edad nga hanap ug panan-aw. Ang iyang apo nga babaye nangutana kaniya kon gusto ba siyang maminaw ug teyp bahin sa Bibliya, sa pinulongang Navajo. Misugot siya. Mibangon siya sa iyang katre ug milingkod sa sopa aron maminaw. Kon nakakita lang unta mo sa dagway sa iyang nawong  samtang naminaw siya sa mga teksto sa Bibliya sa iyang kaugalingong pinulongan. Ang mga luha sa akong mga mata manglugmaw sa mag-asoy ako niini. Dayon siya miingon, ‘Nizhoni,’ nga nagkahulogang ‘pagkanindot.’”

Sa Mozambique, ang mga publikasyon gipatik sa lima sa mga pinulongan sa maong nasod. Aron matabangan ang mga magbabasa nga makapahimulos, ang brosyur nga Apply Yourself to Reading and Writing gipatik niining mga pinulongana, ug gisugdan ang usa ka dakong kampanya sa pagtudlo sa pagbasa ug pagsulat. Nakadayeg kaayo niini si Presidente Chissano sa Mozambique nga tungod niana iyang gipahayag ang iyang kinasingkasing nga pagpaluyo sa atong pagtudlog Bibliya ug sa pagtudlo sa pagbasa ug pagsulat.

Ang mga magasing Bantayanang Torre ug Pagmata! karon mabatonan na sa 146 ug 87 ka pinulongan matag usa​—usa ka internasyonal gayod nga sirkulasyon. Giapresyar kinig dako sa tibuok yuta tungod sa espirituwal ug edukasyonal nga bili niini. Pananglitan, ang duolan sa 80,000 ka molupyo sa Kiribati, usa ka grupo sa mga isla sa Dagat sa Pasipiko, nagsulti ug pinulongang Gilbertese. Ang mga Saksi didto, nga dili moabot ug 100, matag usa sa aberids makugihong nag-apod-apod ug duolan sa 20 ka magasin matag bulan sa mga katuigang dili pa dugay. Ang 1,200 ka magmamantala sa Bulgaria nakaapod-apod ug kapin sa 100,000 ka magasin sa Abril 2002.

Walay duhaduha nga gisangkapan ni Jehova ang iyang katawhan aron sa pagbuhat sa buluhaton nga iyang gitudlo kanila nga buhaton. Sa tibuok yuta, kanang buluhatona gihimo diha sa nagkalainlaing pinulongan.​—Filip. 4:20.

 Mga Dedikasyon sa Sanga

Sulod sa 2002 nga tuig sa pag-alagad, dihay gihimong dedikasyon sa sanga sa matahom nga isla sa Trinidad sa Caribbeano. Ang mga pasilidad sa sanga didto gipahinungod kang Jehova niadto pang 1985, apan sukad niadto ang Trinidad dunay 94-porsiyento nga pagtubo sa mga magmamantala. Tungod niini, ang mga pasilidad sa sanga bug-os nga giayo ug dihay gidugang nga tinukod nga midoble ang gidak-on sa luna. Ang sanga karon adunay bag-ong mga puy-anan, opisina, usa ka librarya, salasala, komedor, ug kosina. Ang tapad nga Kingdom Hall giayo  usab ug gipadako. Kini nga proyekto bug-os nga gitrabaho sa lokal nga mga boluntaryo.

Sa Septiyembre 29, 2001, mga 220 ka delegado gikan sa 14 ka kayutaan maingon man ang 695 ka lokal nga mga igsoong lalaki ug babaye nagtigom alang sa dedikasyon. Sila naminaw sa makapadasig nga mga taho bahin sa teokratikanhong kasaysayan sa buluhaton, ug bahin sa mga papel nga gidula ni Evander J. Coward ug William R. Brown. Daghang langyawng mga misyonaryo, lakip sa 88-anyos nga sister kinsa nag-alagad gihapon ingong regular payunir, nag-asoy ug makapatandog nga mga  eksperyensiya mahitungod sa ilang mga asaynment sa Trinidad nga kapin na sa 50 ka tuig ang milabay.

Si Stephen Lett sa Nagamandong Lawas ang naghatag sa pakigpulong sa dedikasyon. Sa naghisgot sa tema nga “Nagpabili sa Miagi ug Presenteng mga Balay ni Jehova sa Pagsimba,” iyang gipasiugda nga ang mga tawo, dili mga bilding, ang nagsimba kang Jehova. Busa, mahigugmaong gidasig ni Brader Lett ang mga igsoon nga mahimong mapasalamatong mga magsisimba pinaagi sa ilang pagkamasinugtanon ug panggawi.

Sa pagkasunod adlaw usa ka linaing tigom ang gihimo diha sa siyudad sa Port of Spain alang niadtong wala makatambong sa programa sa dedikasyon tungod sa kakulag lugar. Kapin sa 13,000 ang mitambong. Diha sa kanait nga isla sa Tobago, kapin sa 300 ka igsoon ang namati sa programa pinaagi sa koneksiyon sa telepono. Si Brader Lett mihatag ug pakigpulong nga “Panalipdi ang Inyong Relasyon Kang Jehova Pinaagi sa Pag-ugmad sa Pagkamapainubsanon.” Ang tanang mitambong ‘nagmalipayon gayod’ sa pagpahinungod niining nagkadako nga mga pasilidad sa sanga.​—Deut. 16:15.

Di pa dugay, gipadako usab ang sanga sa Czech Republic. Si Samuel F. Herd sa Nagamandong Lawas mibiyahe didto aron sa pagpahinungod sa bilding sa Bethel, sa usa ka bilding sa tapad, ug sa duha ka Assembly Hall. Ang programa sa dedikasyon gihimo sa Sabado, Mayo 4, 2002, ug dihay mitambong nga 2,125 aron maminaw sa pakigpulong ni Brader Herd. Pagkasunod adlaw usa ka linaing miting ang gihimo, ug 5,286 ang naikag sa makapalig-ong pakigpulong ni Brader Herd nga nag-ulohang “Pagpasig-uli sa Kusog​—Ayaw Pagkataka.” Ang mga igsoon sa Czech Republic nadasig pag-ayo sa mga programa.

Sa tibuok-kalibotan, ang total nga 19,823 ka ordinadong mga ministro nagboluntaryo sa maong mga pasilidad sa sanga. Ang tanan maoy mga membro sa Tibuok-Kalibotang Orden sa Linain nga Bug-os-Panahong mga Alagad sa mga Saksi ni Jehova.

 [Chart/Mga hulagway sa panid 12, 13]

PIPILA KA PANGHITABO SA 2002 NGA TUIG SA PAG-ALAGAD

Septiyembre 1, 2001

Septiyembre 11: Nahugno ang World Trade Center.

Septiyembre 29: Dedikasyon sa sanga sa Trinidad.

Nobyembre 20: Nagsugod ang mga Kingdom Ministry School.

Enero 1, 2002

Enero 17: Mibuto ang bolkan sa Congo.

 Abril 4: Gipaurong ang husay sa Moscow sa pagdili sa mga Saksi ni Jehova.

Mayo 1, 2002

Mayo 4: Dedikasyon sa sanga sa Republika sa Czech.

Mayo 9: Plake gipasundayag agig paghandom sa mga Saksi nga nag-antos sa kanhing kampong konsentrasyon sa Nazi.

Hunyo 17: Gilabanan sa Korte Suprema sa T.B. ang katungod sa pagsangyaw sa pultahan ug pultahan nga dili kinahanglang mangayog lisensiya sa paghimo niini.

Agosto 31, 2002

Agosto 31: 6,304,645 ka magmamantala sa 234 ka kayutaan.

[Mga hulagway sa panid 11]

Ibabaw: Bisan pa sa mga kalamidad nga sama niini, ang atong mga brader ug sister nagpasundayag ug samag-Kristo nga gugma

[Hulagway sa panid 11]

Ubos: Kini nga Kingdom Hall sa Rwanda nagsilbing kampo sa mga lalin

[Hulagway sa panid 22]

Ang bag-ong napormang Komite sa Sanga sa Tinipong Bansa, gikan sa wala ngadto sa tuo: (naglingkod) John Kikot, Max Larson, George Couch, Maxwell Lloyd; (nagtindog) Baltasar Perla, Harold Corkern, Leon Weaver, William Van De Wall, John Larson, ug Ralph Walls

[Hulagway sa panid 26]

Ang “Bag-ong Kalibotang Hubad” sa Afrikaans

[Hulagway sa panid 27]

“Unsay Gikinahanglan sa Diyos Kanato?” sa Navajo nga pinulongan

[Hulagway sa panid 28, 29]

Ang mga delegado gikan sa 14 ka kayutaan miduyog sa lokal nga mga brader ug sister sa dedikasyon sa sanga sa Trinidad

[Mga hulagway sa panid 29]

Ang mga igsoon sa Czech Republic nalipay sa dedikasyon sa bag-ong bilding sa Bethel, sa bilding sa tapad, ug sa duha ka Assembly Hall