Sulat Gikan sa Nagamandong Lawas

Minahal nga mga Igsoong Lalaki ug Babaye:

DAKO kaayong kalipay ang pagsulat kaninyo! Among gipabilhan ang gugma ug pagsakripisyo sa kaugalingon nga inyong gipasundayag gihapon. Inyong makita gikan sa mga panid niining Tinuig nga Basahon nga dako ang nahimo sa miaging tuig sa pag-alagad. Sa makausa pa, kita nakagugol ug kapin sa usa ka bilyong oras sa buluhatong pagsangyaw ug pagpanudlo, nga direktang nagdasig sa mga tawo nga makigsuod kang Jehova. Dili ba usa ka kadungganan nga mahimong mga isigkamagbubuhat sa atong mahimayaong Diyos ug langitnong Amahan?​—1 Cor. 3:9.

Samtang maglantaw kita sa buluhaton sa unahan, kami masaligon nga kamo magpadayon sa pagsundog sa kasibot ug pagtuo sa mga alagad sa Diyos, ingon sa gihubit diha sa rekord sa Bibliya. Si apostol Pablo, pananglitan, maikagon nga mahimong epektibo kutob sa maarangan sa pagpauswag sa mga intereses sa Gingharian. Dayag nga sa kataposang bahin sa iyang pagduaw sa Efeso nga iyang gisulat ang iyang unang sulat ngadto sa Kristohanong kongregasyon sa Corinto. Mahitungod sa iyang mga plano, siya nagsulat: “Magpabilin ako sa Efeso hangtod sa pista sa Pentekostes; kay nabuksan kanako ang usa ka dakong pultahan nga nagatultol ngadto sa kalihokan, apan adunay daghang magsusupak.”​—1 Cor. 16:​8, 9.

Si Pablo nagplano sa pagbiyahe ngadto sa Macedonia ug Corinto. Apan, siya nakakita ug higayon nga makahimog mapuslanong buluhaton pinaagi sa pagpabilin makadiyot sa Efeso. Si Pablo mapailin-ilinon; siya nakakita ug maayong situwasyon nga iyang mapalambo ang mga intereses sa Gingharian diha mismo sa iyang nahimutangan, busa iyang gipasibo ang iyang eskedyul sumala sa kahimtang. Usa ka dakong pultahan nga nagatultol ngadto sa kalihokan ang nabuksan kaniya, ug si Pablo maikagong nagpahimulos sa higayon sa pagsulod niana.

 Ang pagtuman niini nagkinahanglag daghang trabaho​—pagsangyaw sa maayong balita ug pagpalig-on sa kongregasyon sa Efeso. Ngadto sa tigulang nga mga lalaki sa kongregasyon nianang siyudara, si Pablo sa ulahi miingon: “Ako wala magpugong sa pagsulti kaninyo sa bisan unsa man sa mga butang nga makaayo ni sa pagtudlo kaninyo sa publiko ug sa balay ug balay. Apan ako bug-os nga nagpamatuod ngadto sa mga Hudiyo ug sa mga Grego mahitungod sa paghinulsol ngadto sa Diyos ug sa pagtuo diha sa atong Ginoong Jesus.”​—Buh. 20:​20, 21.

Sa susama, daghan kaninyo minahal nga mga igsoong lalaki ug babaye ang nagpahimulos sa kahigayonan nga nabuksan kaninyo. Sa miaging tuig sa pag-alagad, sa aberids, 798,938 ang nakapaigo sa ilang mga kalihokan aron makabahin sa usa ka matang sa payunir nga pag-alagad. Ang pipila kaninyo mibiyahe ngadto sa lagyong mga dapit aron mag-alagad ingong mga misyonaryo. Inyong madasigong gipakaylap ang maayong balita ug gipalig-on ang mga kongregasyon. Ang uban kaninyo nagtuon ug laing pinulongan aron kamo makatabang sa langyaw ug pinulongang mga tawo nga nagpuyo sa duol. Ang uban pa naghikay sa ilang mga kalihokan sa pag-alagad sa teritoryo nga wala ikaasayn o sa pag-alagad diin mas dako ang panginahanglan. Ang pipila pa nakakita ug usa ka dakong pultahan sa kahigayonan nga nabuksan diha sa tunghaan, sa trabahoan, o sa ubang mga situwasyon diin mahimong ikahatag ang epektibong pagsangyaw, sama sa pagtawag sa telepono. Ang mga eksperyensiya gikan sa tibuok kalibotan nagpamatuod nga ang katawhan sa Diyos, batan-on ug tigulang, maikagong nangitag kahigayonan sa pagpaambit sa kahibalo sa kamatuoran ngadto sa mga tawo sa tanang dapit.

Makasalig kamo nga si Jehova nakakita ug nalipay pag-ayo sa inyong mga paghago. Ang Bibliya nag-ingon: “Ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan.” (Heb. 6:10) Padayon sa pagkahimong alisto sa kahigayonan nga mabuksan kaninyo sa pagpalambo sa putli nga pagsimba. Ang uban kaninyo tingali makaarang sa pagpadako sa inyong ministeryo. Kitang tanan makapaningkamot sa paghimo sa atong ministeryo nga mas epektibo.

Kita makaatubang gayod ug pagsupak sa atong buluhatong pagsangyaw. Hinumdomi nga human naghisgot si Pablo bahin sa usa ka dakong  pultahan nga nagatultol ngadto sa kalihokan nga nabuksan kaniya, siya nagsulat: “Adunay daghang magsusupak.” Lakip sa mga magsusupak ni Pablo mao ang mga Hudiyo ug Hentil, ang pipila milargo pag-atake kaniya ug ang uban tagong naglaraw ug daotan batok kaniya.​—Buh. 19:24-​28; 20:​18, 19.

Kita nag-atubang ug susamang situwasyon karon. Samtang nagkaduol na kita sa kalaglagan niining daotang sistema, kita makadahom ug dugang nga pagsupak. Si Satanas napuno sa “dakong kasuko,” ug kana nga kasuko gitumong ilabina batok niadtong nag-alagad sa Diyos. (Pin. 12:12) Ayaw gayod kalimot nga si Satanas mao “ang magmamando sa kalibotan.” Gisultihan ni Jesus ang iyang mga tinun-an: “Kon kamo bahin pa sa kalibotan, higugmaon sa kalibotan ang mga iyaha. Karon tungod kay kamo dili man bahin sa kalibotan, apan gipili ko kamo gikan sa kalibotan, tungod niini ang kalibotan nagdumot kaninyo.”​—Juan 14:30; 15:19.

Kita determinado nga dili magpadala kang bisan kinsa nga nagtinguha sa pagpaluya sa atong pagtuo sa Diyos o paghimo kanato nga dili na kaayo aktibo sa atong buluhatong pagsangyaw. Kita nahibalo nga may mga tawo nga moatake kanato ug maglaraw ug daotan batok kanato. Bisan pa niana, kita magpadayon sa pagsangyaw sa maayong balita sa Gingharian, nga masaligon nga laglagon ni Jesus si Satanas ug ang iyang mga panon sa nahiangay nga panahon ni Jehova. Ang mga magsusupak wala makapahilom kang apostol Pablo ug dili usab sila makapahilom sa mga alagad ni Jehova karong panahona. Bisan pa sa kasuko ni Satanas ug sa pagdumot sa kalibotan, ang espiritu ni Jehova gamhanang nagalihok sa Iyang katawhan. Pagkamakapalipay ang pagkahibalo nga ang gidaghanon niadtong nagwali sa maayong balita nakaabot ug bag-ong kinatas-ang gidaghanong 6,304,645!

Nanghinaot kami nga kamo magpadayon sa pagpahimulos sa kahigayonan sa pagpalambo sa intereses sa katingalahang Gingharian ni Jehova. Makasalig kamo sa among mahigugmaong kaikag kaninyo mismo samtang kita “abaga sa abaga” nga mag-alagad sa Labing Hataas nga Diyos, si Jehova.​—Sof. 3:9.

Inyong mga igsoon,

Nagamandong Lawas sa mga Saksi ni Jehova