Tibuok-Kalibotang Taho

◼ OCEANIA

Gidaghanon sa kayutaan: 30

Populasyon: 33,773,304

Gidaghanon sa mga magmamantala: 92,691

Gidaghanon sa mga pagtuon sa Bibliya: 44,999

Sa usa ka hilit nga estasyon sa tren sa baryo sa New South Wales, Australia, duha ka magmamantala nagbutang ug estante sa literatura sa matag higayon nga dunay moabotay nga tren nga nagtadlastadlas sa mga estado. Tungod kay ang mga tren—ang Indian Pacific ug ang The Ghan—mohunong man didto hangtod duha ka oras, ang mga magmamantala nakapakig-estorya sa mga pasahero ug nakapahimutang ug daghang literatura. Sa pagkatinuod, sa ilang pagpauli, dunay pipila ka pasahero nga mihimo pa ug “pagbalikduaw” sa mga magmamantala.

Kasagarang ipahibalo sa konduktor sa The Ghan ang mga talan-awon nga makita sa mga pasahero samtang mohunong ang tren sa  nagkalainlaing mga lokasyon. Kay nakapangayo na ug permiso sa mga magmamantala sa Gingharian, iyang ilakip na karon ang ilang estante sa literatura diha sa iyang mga pahibalo. Oo, tungod sa pagkamapaagihon sa mga Saksi, ang mga biyahedor nga gikan sa tibuok Australia ug sa ubang nasod masangyawan gayod.

Usa ka magtiayong misyonaryo sa Kosrae, Micronesia, nakapahimutang ug librong Kahibalo sa usa ka ministro sa Baptist nga nag-edad ug mga 80. Ang libro gisulat sa pinulongan sa Kosrae, nga maoy sinultihan sa labing menos 10,000 ka tawo. Ang ministro mapasalamaton alang sa libro. Sa dihang gibalikduaw siya sa magtiayon, siya miingon nga iyang gidasig ang mga membro sa iyang iglesya sa pagdawat sa atong literatura. Siyempre, ang misyonaryo nangutana kon ngano. “Tungod kay ang among relihiyon walay mga libro sa among kaugalingong pinulongan,” siya mitubag. Ang misyonaryong magtiayon karon regular na nga magsultihay uban niining tigulang nga klerigo.

Sa Marshall Islands, usa ka misyonarya gihangyo nga dumalahan ug pagtuon sa Pulong sa Diyos ang usa ka dili-aktibo nga sister. Kay wala man mouswag, gipangutana sa misyonarya ang babaye: “Unsay imong bation kon dunay mosulti nimo nga gimahal ka nila?” Naglibog, siya mitubag: “Wala pay nakasulti nako niana.” Dayon ang misyonaryo miduol, gikagos siya, ug miingon: “Gimahal ko ikaw. Ug mas labaw nang gimahal ka ni Jehova.” Ang dili-aktibong sister misugod sa paghilak, ug sukad niadto ang iyang tinamdan kang Jehova nausab. Siya miuswag sa espirituwal pinaagi sa pagsugod ug programa sa adlaw-adlawng pagbasa sa Bibliya, pagtambong sa tanang miting, ug bisan pagpakigbahin sa buluhatong oksilyare payunir. Dayon, sa Enero 2002 miaplay siya sa pag-alagad ingong regular payunir. Sukad niadto daghang pagtuon sa Bibliya ang iyang nasugdan ug nakagugol pa gani siya ug usa ka bulang pagsangyaw sa layolayo nga isla diin mas dako ang panginahanglan.

Samtang nagpahayahay sa baybay uban sa pipila ka higala, gisangyawan sa impormal nga paagi sa usa ka misyonarya sa New Caledonia ang usa ka babaye nga taga-Pransiya nga mianha sa isla aron sa pagduaw sa mga paryente. Ang babaye maoy usa ka sundalo ug nakasilbi sa Sarajevo. Gipangutana sa misyonarya ang babaye  kon gusto ba niyang mopuyo taliwala sa mga tawo nga tinuod nga naghigugmaay sa usag usa. Mitando ang sundalo, apan siya nagtuo nga usa ka gamhanan lamang kaayo nga gobyerno nga dunay episyenteng mga sundalo ang makapatungha ug tinuod nga kalinaw.

Dayon gipatin-aw sa misyonarya nga ang iyang mga higalang Saksi, bisan pag lahi sila ug mga nasyonalidad, nagkahiusa tungod sa ilang pagtuo sa Diyos ug gugma alang kaniya. Human sa makaikag nga panagsultihay, ang duha nagsabot nga magkita sa pagkasunod adlaw aron hisgotan pag dugang ang maong mga butang. Miabot ang sundalo ug nawili sa iyang unang pagtuon sa Bibliya. Human niadto, siya nagsugod sa pagtambong sa tanang miting. Ang iyang espirituwal nga gana miuswag, ug sa hapit nang matapos ang iyang bakasyon, siya gitun-an adlaw-adlaw. Dayon human nga nakatambong sa usa ka asembliya ug nakapaseyo sa lokal nga sangang buhatan, siya mipauli sa Pransiya, diin siya nagpadayon sa pag-uswag sa espirituwal.

Si Jeannie maoy usa ka batan-ong magmamantala nga nagpuyo sa Papua New Guinea. Siya kanunayng magdala sa eskuylahan ug librong Mga Pangutanang Gisukna sa mga Batan-on—Mga Tubag nga Mosaler. Usa ka adlaw niana gisugo sa iyang maestro sa English ang tanan sa klase sa pag-andam ug mubong pakigpulong bahin sa ulohan nga ilang gusto. Si Jeannie mipili sa paghisgot bahin sa mga droga ug alkohol, nga ang iyang laraw gikuha sa seksiyon 8 sa librong Mga Batan-on Nangutana. Nakadayeg pag-ayo ang maestro sa iyang pakigpulong nga iyang giingnan siya sa “paggamit sa tibuok oras sa klase” kon buot niya. Busa mao kanay gihimo ni Jeannie. Dayon gihangyo siya sa iyang maestro kon makapakigpulong ba siya sa klase sa ikanapulong ang-ang pagkasunod adlaw. Gidawat ni Jeannie ang imbitasyon. Human sa pakigpulong, giingnan siya sa iyang maestro sa English nga kon maghikay ang eskuylahan ug usa ka gabii diin ang mga estudyante makahatag ug pakigpulong, paningkamotan sa maestro nga si Jeannie makabahin sa programa. Ingong resulta sa iyang duha ka pakigpulong, dihay mihangyo kang Jeannie ug 64 ka kopya sa librong Mga Batan-on Nangutana. Dugang pa, duha ka batan-ong babaye mihangyo ug mga kopya sa brosyur nga Gikinahanglan, ug si Jeannie nakasugod ug pagtuon sa Bibliya uban sa duha ka batan-ong babaye.

 Tungod sa panag-awayay sa tribo sa Solomon Islands, daghang igsoon napildihan ug mga kabtangan ug nagkalisodlisod sa pangabuhi. Usa ka magtiayon kansang balay naguba midesidir sa pagsangyaw sa usa ka teritoryo nga wala maasayn, bisan pag magasto alang niini ang ilang gamayng nabiling kuwarta. Ilang gipagamit ang ilang sakayan alang sa biyahe ug nalipay sa ilang giingon sa ulahi nga ilang kinanindotang eksperyensiya sa pagsangyaw sukad. Nagplano na sila sa pagbisita pag-usab sa mga nagpakitag interes. Apan unsay ilang igasto? Aw, mga usa ka semana human sila mipauli gikan sa panagsa rang masangyawan nga teritoryo, usa ka tawong sapian ang miduol kanila ug mitanyag sa pagpalit sa propiedad nga ilang gibiyaan panahon sa panaggubat.

Diha sa isla sa Santo sa Vanuatu, ang lokal nga Kingdom Hall kasagarang pagahimoan sa distritong mga kombensiyon. Apan, sa pagka-2001, midaghan ang mga magmamantala nga dili na arang masulod diha sa tigomanan. Busa ang mga igsoon nag-abang ug gamayng estadyum nga, niadtong tungora, gigamit alang lamang sa mga dula. Kay nabalaka nga basig maguba sa mga delegado ang pasilidad, naningil ug dakong bayad ang manedyer, bisan pag gipasaligan siya sa mga igsoon nga ilang limpiyohan ang estadyum sa dili pa ug inigkahuman sa kombensiyon ug ayohon usab ang mga nangaguba.

Kay ang manedyer mao may tag-iya sa lokal nga tindahan, iyang nakita ang mga Saksi nga namalit ug mga materyales sa paglimpiyo ug pag-ayo sa estadyum. Dayon tungod sa kahibulong, miadto siya sa pagtan-aw kon unsay nagakahitabo. Sa dihang miabot siya sa estadyum, nakita niya ang kapin sa 100 ka boluntaryo nga nanguskos, nanilhig, ug namintal, ug nangayo sa mga kasilyas. Milakaw siya nga wala makatingog. Wala magdugay, ang estadyum—nalimpiyohan ug naayo—nabaniog sa lungsod. Sa dihang miadto ang mga igsoon aron sa pagbayad human sa kombensiyon, ang tinamdan sa manedyer nausab. Gihatagan niya sila ug 80-porsiyento nga diskuwento ug miingon nga sa umaabot, ang mga Saksi ni Jehova makagamit sa estadyum nga walay bayad! Ang 300 ka magmamantala nalipay nga dunay 832 nga mitambong sa kombensiyon ug nakita ang 13 nga gibawtismohan.

 ◼ ASIA UG TUNGANG SIDLAKAN

Gidaghanon sa kayutaan: 47

Populasyon: 3,869,881,970

Gidaghanon sa mga magmamantala: 561,276

Gidaghanon sa mga pagtuon sa Bibliya: 390,151

Ang sanga sa India nalipay sa pagtaho nga nahatagan ug maayong pagpamatuod ang nasod pinaagi sa video nga gisalida sa telebisyon. Usa ka estasyon sa TV nakadungog bahin sa video nga The Bible—Its Power in Your Life, nga hinimo sa mga Saksi ni Jehova. Dayon, ang estasyon sa TV misulat ngadto sa tibuok-kalibotang hedkuwarter sa New York nga nangayog permiso nga isalida kini nga video diha sa programang Home Shanti (Kalinaw sa Panimalay). Gitugotan sila sa pagpasalida niini, ug ang sanga sa India nag-ingon nga ang video “nasibya diha sa mga panimalay sa tibuok teritoryo” sa unang mga bulan sa 2002.

 Sa Israel usa ka sister nga makamao ug sign language nakakita ug bungol nga magtiayon, nga si Benny ug Sharon, diha sa dalan. Imbes mosakay sa bus sa pagpauli, siya mihunong ug nagpamatuod sa magtiayon, ug ilang gidapit siya ngadto sa ilang balay. Ang pagkamaukit-ukiton ni Benny sa primero nahimong tinuod nga kaikag sa mensahe sa Bibliya, ug wala magdugay siya tigtambongan na sa mga miting sa kongregasyon. Apan, gawas nga dili gayod makadungog, hanap usab siya ug panan-aw. Busa, maglisod siya sa pag-adto sa mga miting ug sa pagsabot sa interpretasyon sa sign language. Apan siya naningkamot, ug sa samang higayon, siya nagpadayon sa pagpahiuyon sa iyang kinabuhi ug personalidad sa mga prinsipyo sa Bibliya.

Bisan pa sa mga depekto ni Benny, talagsaon ang iyang pag-uswag. Siya mokomento sa mga miting, madasigong mohatag ug mga pakigpulong ingong estudyante sa Teokratikanhong Tunghaan sa Ministeryo—bisan pag ipakigpulong niya kini pinaagig usa ka interpreter—ug bag-o pang nahimong dili-bawtismadong magmamantala. Ang iyang asawa, si Sharon, nga bungol usab ug hanap ug panan-aw, ulahi nga nagsugod sa pagtuon apan nagmauswagon. Siyempre, si Benny ug Sharon nagpakig-ambit sa ilang bag-ong napalgang pagtuo uban sa daghan sa ilang bungol nga mga kaila.

Sa Japan giisip sa usa ka sister nga ginganlag Fukue nga iyang linaing teritoryo ang mga tawo nga iyang mahibalag pinaagi sa iyang tulo ka anak. Lakip sa iyang mga teritoryo mao ang mga silingan ug mga ginikanan nga iyang mahibalag sa kindergarten, sa eskuylahan, ug sa mga miting sa eskuylahan alang sa mga ginikanan. Matag higayon nga ipailaila niya ang iyang kaugalingon, yano apan kinasingkasing nga isulti niya nga ang Bibliya maoy usa ka dakong tabang sa pagmatuto sa iyang mga anak. Dayon maalamong mopadayon siya sa ubang mga topiko. Kay nakaila na siya kanila, siya wala na maglisod sa paghisgot bahin sa Bibliya. Epektibo ba ang paagi ni Fukue? Oo, siya nakatabang ug 12 ka tawo hangtod nga nagpabawtismo, lima kanila payunir na karon. Si Fukue makugihon sa impormal nga pagsangyaw tungod kay niining paagiha siya nahibalo sa kamatuoran.

 Diha sa gamayng lungsod sa Kazakhstan, usa ka babaye dunay bata nga nagsakit ug sa ngadtongadto namatay. Dayon ang iyang ikaduhang anak namatay, human kini matawo. Kay nag-antos sa pisikal ug sa emosyonal, ang babaye naospital. Samtang naghigda siya usa niana ka gabii, nadunggan niya ang usa ka nars nga naghagawhawg sulti. Namati pag-ayo, iyang naamgohan nga ang nars, nga usa sa mga Saksi ni Jehova, aktuwal nga nag-ampo alang kaniya, nga gihisgotan pa gani ang iyang ngalan. Pagkasunod buntag, gihupay sa nars ang babaye bahin sa paglaom sa pagkabanhaw. Wala magdugay human niadto, ang babaye migawas sa ospital.

Usa ka adlaw paglabay sa lima ka tuig, nadunggan niining babayhana ang iyang mga paryente nga nakigsulti sa usa ka tawo bahin sa mao gihapong mga butang nga gihisgotan sa nars sa ospital. Kombinsido nga ang estranghero maoy usa sa mga Saksi ni Jehova, iyang gipailaila ang iyang kaugalingon, ug usa ka pagtuon sa Bibliya ang gihikay. Determinado nga dili gustong mag-usik ug laing lima ka tuig, siya makugihong nagtuon ug miuswag ug maayo sa espirituwal. Wala magdugay, iyang gipahinungod ang iyang kinabuhi kang Jehova ug nabawtismohan. Handurawa ang iyang kalipay sa dihang sa iyang unang asembliya, iyang nahibalag ang nars mismo nga naghupay kaniya kapin sa lima ka tuig nga milabay! Nagluhaluha, siya miingon: “Dili ko unta madawat ang kamatuoran kon dili pa sa imong hilom nga pag-ampo diha sa ospital. Kini nakatandog pag-ayo sa akong kasingkasing.”

Usa ka sister nga nagtrabaho uban sa 20 pa ka babaye sa usa ka bangko sa Taiwan mihimog bag-ong paagi aron maikag ang iyang kaubang mga empleyado sa Pulong sa Diyos. Sa usa ka tingpaniudto, siya nag-andam ug sinulat-sa-kamot nga imbitasyon “sa pagtambong sa libreng panaghisgot sa Bibliya nga mokabat ug 30-45 minutos matag semana panahon sa tingpaniudto.” Ang panaghisgot, matod pa niya, “motabang kanimo sa pagbaton ug paninugdang kahibalo bahin sa Bibliya.” Iyang gipirmahan ang imbitasyon ug nagbutang ug usa ka kopya diha sa matag lamesa sa opisina. Niana mismong hapona, upat ka tawo ang midawat sa iyang tanyag.

 Sa Thailand usa ka tawo nga ginganlag Arun naikag sa mga Saksi ni Jehova pinaagi sa usa ka higala sa trabahoan. “Akong namatikdan nga sukad nagsugod ang akong kauban sa trabaho sa pagpakig-uban sa mga Saksi,” miingon si Arun, “siya nakahimog maayong mga kausaban sa iyang kinabuhi, ug buot ko nga mohimo usab niana.” Si Arun sugarol ug nagdroga. Bisag misulay siya sa paghunong niining dili maayong mga batasan, siya wala molampos. Siya minyo ug sa usa ka higayon siya naghunahuna nga ang pagpanganak basin makaparesponsable kaniya. Apan human natawo ang ilang anak nga babaye, walay nabag-o kaniya. “Sa kataposan,” miingon si Arun, “ang akong asawa dili na makaagwanta sa kahimtang, ug ako iyang gibiyaan, unya ang among anak gipaatiman sa usa ka iyaan.”

Sa panahong nagmagul-anon si Arun, siya gidapit sa iyang kauban sa trabaho ngadto sa Kingdom Hall. Si Arun miadto, ug bisag wala kaayo siyay nasabtan sa gipamulong diha sa entablado, siya nalipay sa mainit, mahigalaong palibot. Human niadto, siya regular nang tigtambongan sa mga miting, dayon midawat sa tanyag sa pagtuon sa Bibliya, ug nagsugod sa pagpadapat sa iyang nakat-onan. Kay gustong matul-id ang iyang kaminyoon, giduol niya ang iyang asawa bahin niini, apan ang iyang asawa dili makatuo nga nabag-o na gayod siya. “Gisangyawan nako siya ug gidapit aron mahimamat ang akong bag-ong mga higala,” miingon si Arun, “apan siya mibalibad, nga nag-ingon nga ako nalimbongan. Apan, nagpadayon ako sa pagduaw ug pagdasig kaniya. Human sa mga lima ka bulan, ang iyang kasingkasing nalukmay ug siya miuban nako sa miting. Wala magdugay human niadto, siya midawat usab sa pagtuon sa Bibliya.”

Karon si Arun, iyang asawa, ug ang ilang anak nagkauli ingong nahiusa ug malipayong pamilya. Ang duha ka ginikanan gibawtismohan sa 2001 nga distritong kombensiyon sa Bangkok. Dugang pa, ang manghod nga lalaki ni Arun, nga imoral usab ug kinabuhi, midawat pod sa maayong balita ug karon maoy usa na ka dili-bawtismadong magmamantala.

 ◼ UROPA

Gidaghanon sa kayutaan: 45

Populasyon: 727,550,200

Gidaghanon sa mga magmamantala: 1,456,309

Gidaghanon sa mga pagtuon sa Bibliya: 647,279

Tungod sa sakit nga dala sa pagkabata, ang 25-anyos nga si Eva, nga nagpuyo sa Tiranë, Albania, maoy 44 pulgadang gitas-on. Apan, bisan pa sa mga kakulian siya malipayon sa pag-oksilyare payunir, bisag bugalbugalan siya tungod sa iyang gitas-on. Imbes masuko, matinahorong gitagad ni Eva ang tanan ug mapahiyomon kanunay, nga namatikdan sa mga tawong mahunahunaon. Ang usa niini mao ang usa ka babaye kansang 26-anyos nga anak nga babaye nag-antos sa depresyon. Nadala na sa babaye ang iyang anak ngadto sa ospital ug sa nagkalainlaing relihiyosong mga organisasyon, nga naglaom nga matambalan. Dayon usa ka adlaw siya nakamatikod sa malipayong disposisyon ni Eva ug mihukom  sa pagduaw kaniya. Sa dihang gibuksan ni Eva ang iyang pultahan, gihangyo siya sa babaye kon mahimo ba niyang tun-an sa Bibliya ang iyang anak nga babaye. Siyempre, misugot si Eva. Wala magdugay, ang panglawas sa anak nga babaye miarang-arang nga tungod niini ang inahan mihangyo nga moapil sa pagtuon. Regular nang ginauban ni Eva karon ang inahan ug ang anak ngadto sa mga miting, ug ang duha nagmauswagon sa espirituwal.

Usa ka batan-on nga ginganlag Benjamin nagdako sa usa ka Kristohanong pamilya sa Belgium. Apan, sa batan-on pa siya, si Benjamin nagsugod sa pagkinabuhi ug dobleng kinabuhi. Samtang nagpakaaron-ingnon nga nagkinabuhi sumala sa mga prinsipyo sa Bibliya, siya nakig-uban sa grupo sa mga batan-on nga kusog moinom, nagdroga, ug nanigarilyo. Si Benjamin namati usab ug malaw-ayng musika. Wala magdugay, siya nagsugod sa pag-antos sa pagpanghasi sa demonyo ug nakoma sa daghang higayon tungod sa alkoholikong ilimnon—bisan pa niana, siya nagpadayon sa paggamit ug isog nga mga droga. Siya naglago na ug grabeng nagsakit. Sa panahon nga siya naguol pag-ayo, iyang nadiskobrehan nga ang iyang gitawag kono nga mga higala wala gayoy interes kaniya! Diha lamang nga nagsugod si Benjamin sa pagpamalandong ug maayo sa iyang kinabuhi ug kon unsay iyang dangatan. Sa pagkamaalamon, siya mihukom sa pagbalik ngadto niadtong nagpakita kaniya ug tinuod nga gugma, nga mao, ang iyang pamilya ug si Jehova.

Apan, sa primero, ang desisyon ni Benjamin nasulayan. Nakaagom siya ug grabeng mga pag-atake sa demonyo, ug gihangyo siya sa iyang trato nga dili makig-uban sa mga Saksi. Ang iyang trato naghangyo pa gani sa Katolikong mga pari ug mga apostata sa pagmaymay kang Benjamin. Apan uban sa mahigugmaon, malahutayong tabang sa iyang mga ginikanan ug sa mga ansiyano sa kongregasyon, si Benjamin nagsugod sa pagtukod ug buhi nga pagtuo kang Jehova, nga nakaamgo nga ang balaod sa Diyos sa pagkatinuod maoy “hingpit, nga nagapahiuli sa kalag.” (Sal. 19:7) Tungod niini, iyang gitalikdan sa kataposan ang iyang miaging kinabuhi. Ang panglawas ni Benjamin miarang-arang, ug iyang nakaplagan ang tinuod nga kalipay.

 Samtang nagsangyaw diha sa dalan, usa ka magtiayon nga gikan sa Pranses-ug-pinulongan nga kongregasyon sa Britanya miduol sa duha ka babaye nga taga-Zimbabwe. Ang mga Saksi nagsaysay nga sila nagtanyag ug libreng mga pagtuon sa Bibliya diha sa balay ug nangutana kon Pranses ba ug pinulongan ang mga babaye. Sila mitubag ug dili apan miingon nga gusto sila nga magtuon sa Pulong sa Diyos. Wala magdugay ang duha ka babaye nagsugod sa pagtambong sa Pagtuon sa Libro sa Kongregasyon. Sa natapos ang ilang unang pagtuon sa libro, gipakitaan sila sa usa ka brader sa eksperyensiya ni Nathan Muchinguri sa Zimbabwe, nga giasoy diha sa panid 20 sa 2002 Tinuig nga Basahon. Sa dihang ilang nakita ang letrato ni Brader ug Sister Muchinguri sa panid 21, sila nahingangha sa kakurat. Letrato kadto sa ilang mga apohan! Ang mga babaye miingon nga balik sa Zimbabwe, sila nagpuyo nga layo sa uban nilang membro sa pamilya ug wala na mahibalo kon diin na sila. Busa, ilang gipangayo ang Tinuig nga Basahon. Ang duha ka babaye regular na nga nagtuon karon, nga napalig-on sa matinumanong panig-ingnan sa ilang mga apohan.

Samtang nagsangyaw sa usa ka layo nga teritoryo sa Czech Republic, duha ka sister nakahimamat ug maabiabihong babaye nga nagpadayon kanila. Apan, may lig-on siyang mga opinyon bahin sa pipila ka ulohan sa Bibliya, sama nianang kon unsay kahulogan sa pagkabaton ug “mga gasa sa espiritu.” (1 Cor. 14:12) Dugang pa, siya mibalibad sa pagbasa gikan sa Bag-ong Kalibotang Hubad sa Balaang Kasulatan, nga mas mipili sa paggamit sa iyang Ecumenical nga bersiyon. Human sa usa ka oras nga daw walay-kapuslanang diskusyon, ang mga sister nagdali sa paglakaw aron makaapas sa pagsakay sa tren. Sila nahuwasan pag-ayo nga nakalakaw. Apan, nadiskobrehan sa usa sa mga sister nga nabiyaan diay niya ang iyang Bibliya ug mga nota sa balay sa babaye, nga ilang kinahanglang balikan. Nakurat gayod sila sa ilang pagbalik! Ang babaye miingon nga gipangahasan niyag tan-aw ang Bibliya sa sister ug nakadayeg sa kalidad sa paghubad, sa mga cross-reference, ug sa konkordansiya. Dayon siya mihangyo kon mahimo ba siyang makabaton ug Bag-ong Kalibotang Hubad. Dugang pa, siya misugot  sa pagtuon sa Bibliya. Sukad niadto, ang iyang inahan miduyog usab sa pagtuon.

Usa ka sister sa Reykjavík, Iceland, nagtrabaho sa Marine Research Institute nga nagtagana ug mga pasilidad sa programa sa pagbansay sa pagpangisda. Di pa dugay, 14 ka tawo nga gikan sa nagkalainlaing nagakaugmad nga mga nasod mitambong sa unom ka bulang kurso. Ang sister nagtanyag ug librong Is There a Creator Who Cares About You? sa matag tawo nga pagabansayon. Siya mikuhag mga kopya sa Iningles, Ininsek, Kinatsila, Portuges, ug Vietnamese. Tanantanan 14 ka tawo ang midawat sa libro. Ang mga nawong sa lalaki ug babaye nga taga-Vietnam misanag sa dihang nakakita sa publikasyon sa ilang kaugalingong pinulongan. “Dili ako makatuo!” miingon ang lalaki. “Nahingangha kaayo ko. Diin ka nakakuha niini?” Usa ka taga-Uganda pamilyar na sa libro ug girekomendar kini sa uban. Usa ka babaye nga taga-Cuba miingon nga gusto siyang makabaton ug usa ka kopya tungod kay ang iyang 13-anyos nga anak nga babaye nagsugod sa pagpangutana ug malisod nga mga pangutana bahin sa kinabuhi.

Sa wala pa mobalik ngadto sa ilang tagsatagsa ka nasod ang mga tawo nga gibansay, gipahibalo sila sa sister nga nagbutang siya ug pipila ka literatura (10 ka Kahibalo nga libro, 30 ka magasin, ug 10 ka brosyur) diha sa lamesa sa klasehanan nga ilang madala sa ayroplano inigpauli. Siyempre, ang unang butang nga iyang gihimo sa Lunes sa buntag human nga sila nakagikan mao ang pag-adto sa lamesa. “Nagdahom ako nga may mahibilin sa mga librong Kahibalo ug mga magasin,” siya miingon, “apan walay nahibilin diha sa lamesa!”

Usa ka batan-ong lalaki sa Latvia, nga tawgon natong Arthur, walay interes sa Diyos. Bisan pa niana, dili siya makadawat nga ang mga tawo mitungha gikan sa mga unggoy. Sa 1996, nalambigit si Arthur sa mabug-at nga krimen ug gipriso. Didto siya nagsugod sa pagpalandong pag-ayo bahin sa kinabuhi. Sa dihang miduaw ang iyang mga ginikanan, ilang gidasig siya sa pagbasa sa Bibliya, nga nagtuo nga basin kini makatabang kaniya. Dayon usa ka adlaw niana sa 1998 samtang naghimog sulat si Arthur, gitunolan  siya sa iyang kauban sa selda ug libro aron himoong pad-anan sa papel nga sulatan. Nahitabo nga kanang libroha mao ang Ikaw Mabuhing Walay Kataposan sa Paraiso sa Yuta. Kay gustong mahibalo, gibuksan kana ni Arthur, ug naikag pag-ayo mao nga iyang gibasa ang tibuok libro sulod sa tulo ka adlaw. Laing kaubang priso dunay kopya sa librong Kahibalo diha sa iyang selda. Sa dihang iyang nakita ang interes ni Arthur sa Bibliya, iyang gihatag ang libro ngadto kaniya. Iyang gihatag usab ang adres sa Saksi nga iyang kaila.

Gisulatan ni Arthur ang Saksi ug human niana nagsugod sa pagtuon sa Bibliya pinaagig sulat. Sa dihang gibuhian sa prisohan sa Abril 2000, siya nagsugod dayon sa pagtambong sa mga miting sa kongregasyon. Apan komosta ang iyang mga ginikanan, kinsa sa primero nagdasig kaniya sa pagbasa sa Bibliya? Siyempre, gipaambit ni Arthur ang impormasyon bahin sa iyang bag-ong napalgang pagtuo ngadto nila. Ang resulta? Sila usab nagsugod sa pagtuon sa Pulong sa Diyos. Handurawa ang ilang kalipay sa dihang silang tulo gibawtismohan sa mao rang adlaw sa espesyal nga asembliya sa Marso 2002!

Sa batan-on pa, usa ka siruhano sa bukog didto sa Espanya nagtuon sa pagkapari sa usa ka relihiyosong seminaryo. Kay naglibog, human sa tulo ka tuig siya nahimong ateyista. Bisag negatibo siya ug panglantaw sa mga Saksi ni Jehova, siya gustong mahibalo kon nganong kining “kulag edukasyon” nga mga tawo daghan kaayog nahibaloan sa Kasulatan, samtang siya, nga nakatungha ug daghang tuig sa seminaryo, wala kaayoy nahibaloan. Ang iyang kaikag sa mga Saksi misamot sa dihang sa usa ka higayon, mapihigong gitratar siya sa mga trabahante sa ospital. Kini nakapahinumdom kaniya sa paagi sa pagtratar nga ipakita usahay ngadto sa mga Saksi. Human niadto, ang siruhano midawat sa libreng pagtuon sa Bibliya. Wala madugay, siya nakadayeg pag-ayo sa iyang nakat-onan nga siya nagtuon tulo ka beses sa usa ka semana! Siya nagsugod usab sa pagtambong sa tanang tigom ug nagpalista sa Teokratikanhong Tunghaan sa Ministeryo. Di pa dugay, siya gibawtismohan.

 ◼ APRIKA

Gidaghanon sa kayutaan: 56

Populasyon: 739,543,571

Gidaghanon sa mga magmamantala: 915,262

Gidaghanon sa mga pagtuon sa Bibliya: 1,550,572

Sa Benin, ang pagtukod ug Kingdom Hall nakapadasig pag-ayo sa mga igsoon, nga nakahatag ug maayong pamatuod. Sa dedikasyon sa usa ka Kingdom Hall, may iladong membro sa lokal nga komunidad nga miingon sa usa sa mga Saksi ni Jehova: “Ang inyong simbahan mao ang kinanindotang dapit sa pagsimba dinhi, ug kini magpabiling nindot. Nganong ako, nga usa ka debotadong Katoliko, nakaingon niana? Kay dili pa dugay, ang among Katolikong komunidad gihatagan ug 17,000,000 CFA [$23,000, T.B.] sa pagtapos sa pagtukod sa among simbahan, nga gisugdan niadto pang 1950. Apan gigamit sa pari ang kuwarta sa laing paagi. Usa ka Katolikong komunidad sa laing dapit sa siyudad nakatigom ug  3,000,000 CFA [$4,000, T.B.] aron itukod ug simbahan sa ilang lugar, apan ang kuwarta ‘nawagtang’ usab. Mao nga nakaingon ako nga kining bildinga mao ang kinanindotan sa siyudad ug kini magpabiling nindot.”

Diha sa ubang kayutaan ang mga bag-ohan nalisdan sa pagbarog alang sa kamatuoran sa Bibliya tungod sa pagtuo ug mga anito. Tagda ang pananglitan sa usa ka pamilya sa Côte d’Ivoire nga nagahimog mga seremonya adlaw-adlaw atubangan sa ilang mga anito. Sa dihang ang usa sa mga dalagita mibarog alang sa kamatuoran sa Bibliya ug mibalibad sa pagpakigbahin sa bakak nga pagsimba, ang pamilya nahadlok nga siya daoton sa anito. Apan, ang dalagita mibarog nga malig-on, nga misangpot ug pagsupak ug pagpalayas kaniya. Bisan pa niana, wala siya maghambin ug kasuko sa iyang pamilya apan nagpadayon sa pagduaw kanila.

Ang resulta mao nga ang iyang apohang babaye nagsugod sa pagpakitag kaikag sa Bibliya, nga naghangyo pa gani sa iyang apo sa pagpauli, ug siya mipauli. Ang apohan miuswag sa espirituwal ug gibawtismohan sa edad nga 62. Kay nakadayeg sa nakat-onan sa apohan, ang inahan sa dalagita nagsugod usab sa pagtuon sa Pulong sa Diyos, ug karon siya usab nagsangyaw na ngadto sa uban. Oo, tulo ka kaliwatan ang nakalingkawas gikan sa bakak nga pagsimba, ug tungod kini sa usa ka dalagita nga nagpabiling maunongon kang Jehova ug wala mohunong sa pagpakitag gugma ngadto sa iyang pamilya.

Sa Mozambique ang mga igsoon tigduawan sa mga prisohan aron sa pagdumalag mga klase sa pagtuon sa Bibliya uban sa mga priso. Sa 2001 dihay mipuga sa usa niini nga mga prisohan. Apan, ang mga priso nga tigtambongan sa mga klase sa pagtuon wala mopuga. Ang mga awtoridad nakamatikod niini ug gidayeg ang mga Saksi ni Jehova sa ilang buluhaton. Karon ang mga awtoridad nagdasig sa tanang priso sa pagtuon uban sa mga igsoon. Tungod sa dakong kausaban sa ilang panggawi, ang mga sentensiya sa duha ka priso gikunhoran. Ang usa kanila nagpaabot nga mabawtismohan sa sunod nga distritong kombensiyon.

Ang 27-anyos nga si Judith, nga nagpuyo sa Namibia,  naaksidente nga nakaparalisar kaniya gikan sa liog hangtod sa tiil. Siya nagsugod sa pagpamalandong sa paghikog, nga naghunahuna: ‘Nganong nahitabo man kini nako?’ Ang mga tawo sa nagkalainlaing mga relihiyon miduaw kaniya ug nag-ampo nga siya unta makalakaw pag-usab. Kay wala man tubaga ang ilang mga pag-ampo, ilang giingnan si Judith nga tingali gisilotan siya sa Diyos tungod sa usa ka katarongan. Misamot hinuon si Judith sa paghunahuna sa paghikog. Apan gusto una siyang mahibalo kon nganong gisilotan siya sa Diyos. Busa usa ka adlaw niana iyang gihangyo ang iyang inahan sa pagdapit sa pastor sa lokal nga simbahan sa pagduaw sa ilang balay. Samtang naghulat si Judith sa pag-abot sa pastor, ang mga Saksi ni Jehova miabot. Gidawat ni Judith ang ilang tanyag sa pagtuon sa Bibliya ginamit ang librong Kahibalo, nga naglaom nga matubag sa Bibliya ang iyang makatugaw nga mga pangutana. Sa nagtuon sa kapitulo 8, “Nganong Gitugotan sa Diyos ang Pag-antos?,” iyang nasayran nga dili ang Diyos ang nakaingon sa iyang aksidente. “Handurawa ang akong kahupayan ug kalipay sa dihang akong nahibaloan nga dili gikan kang Jehova ang daotang mga butang!” siya miingon. Si Judith nagpadayon sa pagtuon, nagpahinungod sa iyang kinabuhi kang Jehova, ug karon nagpaabot sa bag-ong sistema, sa dihang siya makabaton pag-usab ug maayong panglawas.

Sa panahon sa pagpuo sa kaliwat didto sa Rwanda sa 1994, usa ka batan-ong babaye nga ginganlag Chantal mikalagiw ngadto sa kanait nga Burundi. Didto siya nakakita ug kopya sa librong Ikaw Mabuhing Walay Kataposan sa Paraiso sa Yuta ug gibasa kana gikan sa sinugdanan hangtod sa kataposan. Sa nakapauli na sa Rwanda, wala siya makakita ug mga Saksi tungod kay ang iyang pamilya nagpuyo sa usa ka hilit nga lugar. Apan, ang iyang inahan nakahinagbo ug duha ka magmamantala sa Gingharian nga nagsangyaw sa tiyanggihan. Aron makita nila si Chantal, nagsulat sila diha sa usa ka pirasong papel sa mga adlaw nga sila nagplano nga moanha sa tiyanggihan ug gihatag kini ngadto sa inahan ni Chantal. Sa usa sa giingong mga adlaw, si Chantal milingkod sa entrada sa tiyanggihan, nga nagkapot sa pirasong papel aron makita sa tanang lumalabay.  Pagkadako sa iyang kalipay sa dihang nakit-an siya sa mga igsoon ug gipailaila nila ang ilang kaugalingon! Kay nakakita nga siya interesado kaayo, ilang gidapit siya sa taliabot nga Memoryal, ug mitambong si Chantal niini—bisan pag kinahanglang magbaktas siya ug duha ka adlaw aron makaabot sa tigomanan!

Sukad niadto regular nang tigtambongan si Chantal sa mga miting, bisan pa sa gilay-on. Ikasubo, ang iyang pamilya misupak. Sa usa ka higayon giabog pa gani siya sa balay sa usa sa iyang mga igsoong lalaki nga nagdalag sundang! Apan nagpabiling malig-on si Chantal. Paglabay sa usa ka tuig, ang mga miting gihimo na duolduol sa iyang balay, apan baktasonon gihapon ug walo ka oras. Bisan pa niana, si Chantal madumalahan na mismo ug pagtuon sa Bibliya sa unang higayon. Sa ngadtongadto, iyang gipahinungod ang iyang kinabuhi kang Jehova, ug karon nag-alagad ingong regular payunir. Ug komosta ang iyang pamilya? Aw, nabag-o ang ilang tinamdan kaniya. Ang igsoong lalaki nga nag-abog kaniya sa balay usa na ka regular payunir, ug ang laing igsoong lalaki di pa dugayng gibawtismohan, ug ang iyang inahan usa na ka dili-bawtismadong magmamantala. Dugang pa, natukod ang isolated group sa ilang lugar, busa karon ang pamilya magbaktas na lang ug lima ka minutos paingon sa mga miting.

Si Thembisile maoy usa ka masibotong sister nga nagpuyo duol sa kinoralang pundok sa mga balay sa harianong pamilya, sa Swaziland. Gusto niyang sangyawan ang mga residente sa mga balay, apan lisod kining sudlon tungod kay kini guwardiyado. Human giampo kining butanga, nakabaton siyag kaisog ug miadto sa pundok sa mga balay. Iyang gisangyawan ang mga guwardiya, ang usa kanila midawat ug brosyur nga Ikaw Mahimong Higala sa Diyos! Human sa pagsukitsukit kaniya ug pagrekisa kaniya, ilang gipasulod siya—nga gikalipay niyag dako. Si Thembisile labaw pang nahingangha sa pagkamahigalaon sa mga residente. Siya karon regular nang tigsangyawan sa teritoryo ug nakasugod ug tulo ka panagtuon sa Bibliya. Dugang pa, ang mga polis maayo na kaniya. Sa pagkatinuod, giingnan siya sa usa ka guwardiya: “Sige lang Madam; sulod lang. Maayo kaayo ang imong ginahimo dinhi.”

 ◼ MGA NASOD SA AMERIKA

Gidaghanon sa kayutaan: 56

Populasyon: 807,517,534

Gidaghanon sa mga magmamantala: 3,023,062

Gidaghanon sa mga pagtuon sa Bibliya: 2,676,288

Sa usa ka gamayng lungsod sa Argentina, duha ka espesyal payunir nakakita ug magtiayon nga nagduso ug kareton diin gisakay ang nasamdang iro. Ang mga payunir mitanyag sa pagpasakay kanila ug sa iro sa paghatod ngadto sa beterinaryo. Mapasalamatong gidawat sa magtiayon ang tanyag, ilabina kay walay usa sa ilang mga silingan ang mitanyag ug tabang. Nahibaloan sa mga payunir nga ang tawo maoy usa ka Katolikong katekista ug tigkuyogan sa iyang asawa sa tanang lokal nga mga prosesyon sa paghimaya sa mga santo. Bisan pa niana, ang ilang pagkalinga sa Iglesya Katolika wala makasanta kanila sa pagdawat sa mga magasing Bantayanang Torre ug Pagmata! Human sa pagduaw niining maong magtiayon  sa mga duha ka tuig, gidapit sila sa mga payunir sa pagtambong sa Memoryal. Miulan ug kusog nianang gabhiona, bisan pa niana mitambong ang magtiayon ug nakadayeg kaayo sa mainitong pag-abiabi kanila. Dugang pa, sila miingon nga sa unang higayon, ilang nasabtan ang kahulogan sa Panihapon sa Ginoo. Ilang gikalingawan ang regular nga pagtuon sa Bibliya ug tigtambongan na sa tanang miting, nga wala mabalaka kon unsa unyay isulti sa ilang Katolikong mga silingan.

Samtang nagsangyaw sa Barbados, usa ka payunir nga sister ug laing Saksi naglakaw sa karsada sa dihang ilang naagian ang usa ka babaye nga nagtindog sa iyang pultahan. Ilang gisangyawan siya apan nakurat sa dihang, kay morag duna siyay gipaabot, siya miingon: “Dali, dayon mo. Kuhaon nako ang akong Bibliya.” Ang mga sister misulod, milingkod uban sa tagbalay, ug gipasundayag ang kahikayan sa pagtuon, nga gigamit ang leksiyon 1 sa brosyur nga Gikinahanglan. Human niana, ang babaye nangutana sa sister nga payunir kon siya ba ang mitelepono ug mitanyag kaniya ug libreng pagtuon sa Bibliya nga himoon nianang buntaga mismo. “Akong giingnan siya nga dili ako ang mitawag,” matod pa sa payunir. “Busa kon kinsa man ugaling ang mitawag klaro nga siya wala moabot. Apan kami nalipay nga miabot sa eksaktong alas 11:30 s.b., nga maoy panahon nga pagasugdan ang pagtuon.” Kining babayhana nagmauswagon ug nagtambongan na sa mga miting.

Ang mga tiyanggihan maoy usa ka mabungahong teritoryo nga pagasangyawan. Usa ka misyonaryo sa Bolivia nag-asoy: “Nakapahiluna ang akong bana ug tract sa babaye nga ang mga baligya gibutang sa kareton diha sa taboanan. Siya mahigalaon, busa mibalik ako ug gitanyagan siyag pagtuon sa Bibliya, ginamit ang brosyur nga Gikinahanglan. ‘Dinhi ba ta magtuon?’ siya nangutana. ‘Sige lang,’ matod ko. ‘Anad na ako niana.’ Busa inig-abot nako, iyang itunol nako ang iyang bangkito, ug kami magtuon diha mismo tapad sa iyang kareton. Kon may moduol nga mga kustomer, iyang atimanon sila, ug dayon mobalik kami sa pagtuon.”

Usa ka babaye sa Canada nakabaton ug kopya sa Bag-ong Kalibotang Hubad sa Balaang Kasulatan gikan sa usa ka higala.  Naikag kaayo siya sa pagbasa niana ug mihukom nga gusto niyang makakat-on pag dugang. Busa iyang gitan-aw ang opisyal nga lokasyon diha sa Internet sa mga Saksi ni Jehova (www.watchtower.org) ug dayon nagsulat nga naghangyo ug pagtuon sa Bibliya ug usa ka kopya sa librong Kahibalo. Sa dihang giduaw siya sa duha ka sister ug gitunol kaniya ang libro, iyang gikaptan kinig maayo ug miingon nga iyang basahon ang tibuok libro sa pagkasunod buntag! Sa pagkasunod gabii siya mitambong sa iyang unang tigom ug mibati dayon siya ug kaharuhay uban sa mga igsoon. Kusog ang iyang espirituwal nga pag-uswag ug karon usa na ka dili-bawtismadong magmamantala nga nagplanong magpabawtismo sa umaabot.

Sa Colombia usa ka babaye nga ginganlan ug Sol nag-antos gumikan sa depekto nga tungod niana siya kanunay na lang maghigda. Dili siya gustong makigkita kang bisan kinsa gawas sa mga membro sa iyang pamilya. Usa ka adlaw niana gihatagan sa usa ka silingan, nga usa sa mga Saksi ni Jehova, ang inahan ni Sol ug pipila ka kopya sa Ang Bantayanang Torre ug Pagmata! nga ipahatag ngadto kang Sol. Gidawat ni Sol ang magasin, ug mga usa ka tuig sa ulahi, siya mitambong sa Memoryal. Mao pa kana ang unang higayon nga siya migawas sa balay sulod sa pito ka tuig. Paglabay sa duha ka adlaw, siya mitambong sa iyang unang asembliya. Bisag dili siya makabakod sa paglingkod, si Sol karon nakigbahin na sa pag-alagad sa kanataran. Sa unsang paagi? Itulod siya sa mga igsoon gikan sa iyang linain nga katre nga ilang gihimo para niya sa dihang mamalaybalay. Tungod sa panig-ingnan ug pagdasig ni Sol, ang iyang inahan karon bawtismado na ug duha sa iyang mga igsoon mga payunir.

Usa ka bag-ong natudlo nga espesyal payunir nga magtiayon sa Costa Rica miduaw sa usa ka babaye sa ilang teritoryo. Sa dihang sila miabot, ilang gisultihan siya nga ang lokal nga sangang buhatan sa mga Saksi ni Jehova nakadawat ug tawag sa telepono gikan sa iyang umagad nga babaye, nga usa ka Saksi nga nagpuyo sa Tinipong Bansa, nga naghangyo nga duawon ang iyang ugangang babaye. “Sa among kakurat,” ang payunir nga magtiayon miasoy, “kining  65-anyos nga babaye misugod paghilak. Siya miingon nga siya dili makatuo nga kami nakaabot na didto, kay bag-o pa niyang nahinabi sa telepono ang iyang umagad nga babaye, nga nagdasig kaniya sa pagpaminaw sa isulti sa mga Saksi. Siya wala makatuo nga kami moduaw dihadiha.”

Sumala sa mga payunir, mao pa kini ang unang higayon nga andam makigsulti ang babaye sa mga Saksi. Siya maoy usa ka debotadong Katoliko, ug 12 ka tuig niyang gitun-an pag-ayo ang mga doktrina sa Katoliko aron makatudlo sa uban. Ang mga payunir nalipay nga nakapatin-aw kaniya sa daghan niyang mga pangutana bahin sa Bibliya ug sa mga Saksi ni Jehova, diin human niana siya midawat sa pagtuon sa Bibliya. Ang iyang bana ug anak nga babaye gusto usab makakat-on ug dugang bahin sa Pulong sa Diyos.

Usa ka membro sa pamilyang Bethel sa Puerto Rico nag-asoy: “Nangandam ako nga magdalag Hulyo 8, 2002, nga Pagmata! nga nag-ulohang ‘Mga Polis—Nganong Gikinahanglan Nato Sila?’ ngadto sa kapitan sa hedkuwarter sa polis. Siya naikag kaayo sa mga artikulo ug nagsugyot nga dad-an nako ug mga kopya sa magasin ang lokal nga mayor ug ang ubang mga estasyon sa polis nianang dapita. Gani, gipasakay ako sa usa sa mga polis sa sakyanan sa kapolisan aron adtoon ang tanang uban pang mga estasyon. Dugang pa, gihatagan usab ako ug awtorisasyon niining maong polis nga magdalag umaabot nga gula sa mga magasin ngadto niadtong ilalom sa iyang pagdumala. ‘Kini makahatag sa puwersa sa kapolisan sa gikinahanglan niini—sikolohikal ug espirituwal nga tabang,’ siya miingon.” Sa usa ka bulan, kini nga Bethelite nakaduaw ug walo ka estasyon sa polis, ug daghang polis ang nangayog ekstra nga mga magasin. Tanantanan, siya nakapahimutang ug 164 ka magasin ug nadugangan ug lima ka tawo ang iyang ruta sa magasin.

Sa mga isla sa Trinidad ug Tobago, usa ka babaye nga inilang membro sa Denominasyong Nasareno sulod sa 25 ka tuig mitambong sa pakigpulong publiko sa magtatan-aw sa sirkito agig pagsanong sa usa ka imbitasyon sa kauban sa trabaho. Sa dihang natapos ang miting, giduol siya sa magtatan-aw sa sirkito ug mahigalaong nakighinabi kaniya. Nahibulong siya niini tungod kay diha  sa iyang kaugalingong simbahan, ang mga tawo gustong makig-uban niadtong sama ra nilag rasa ug pagkabutang. Sa pagkatinuod, kay siya lahi man ug rasa sa iyang bana, ang kauban niya sa simbahan dili maayong motagad kaniya. Busa ang iyang kasinatian sa Kingdom Hall ug personal nga pagdasig nga iyang nadawat sa magtatan-aw sa sirkito nagpalihok kaniya sa pagdawat sa pagtuon sa Bibliya. Sulod sa unom ka bulan siya nahimong dili-bawtismadong magmamantala, nga nagagugol ug 70 ngadto sa 100 ka oras sa pag-alagad matag bulan. Siya nabawtismohan sa “Masibotong Magmamantala sa Gingharian” nga Distritong Kombensiyon sa 2002 ug naglaom nga mahimong regular payunir. Iyang gitabangan usab ang iyang siyete-anyos nga anak nga babaye, kinsa sa pagkakaron naghatag ug mga bahin sa Teokratikanhong Tunghaan sa Ministeryo.

Sa Uruguay usa ka negosyante nga namalaybalay sa pagpamaligyag kuwentas nga dunay krus miadto sa balay sa usa ka Saksi. Gipahimuslan sa sister ang higayon sa pagpatin-aw gikan sa Bibliya kon nganong dili siya mopalit sa iyang mga produkto. Gitahod sa negosyante dili lamang ang iyang mga komento kondili miingon pa nga siya interesado sa espirituwal nga mga butang. Sa pagkatinuod, siya miingon nga siya nakig-anib sa daghang lainlaing mga relihiyon aron masayran ang mga tubag sa iyang mga pangutana, apan sa walay kapuslanan. Sa kataposan, siya miingon nga ang mga relihiyon mas interesado sa kuwarta kay sa pagtabang sa mga tawo sa espirituwal nga paagi. Sa wala pa siya mogikan, gidapit siya sa sister sa pagtambong sa Kingdom Hall.

Mao kadto ang kataposang higayon nga iyang nakita ang negosyante hangtod nga mitungha pag-usab ang negosyante diha sa iyang pultahan paglabay sa mga usa ka tuig. Sa iyang dakong katingala, ang negosyante miingon: “Niining higayona ako ania dinhi, dili sa pagbaligya ug bisan unsa, kondili sa pagpahibalo kanimo nga nakaabot na ako sa kapitulo 15 sa librong Kahibalo.” Siya miingon nga ang iyang tibuok pamilya nagtuon ug tigtambongan na sa mga miting. Sa dihang migikan, siya miingon: “Magkita unya ta sa asembliya sa sunod nga hinapos sa semana.”

[Hulagway sa panid 43]

New Zealand

[Hulagway sa panid 43]

Tahiti

[Hulagway sa panid 43]

Papua New Guinea

[Hulagway sa panid 47]

Thailand

[Hulagway sa panid 47]

India

[Hulagway sa panid 47]

Japan

[Hulagway sa panid 51]

Britain

[Hulagway sa panid 51]

Albania

[Hulagway sa panid 51]

Spain

[Hulagway sa panid 56]

Namibia

[Hulagway sa panid 56]

Benin

[Hulagway sa panid 56]

Congo (Kinshasa)

[Hulagway sa panid 60]

Canada

[Hulagway sa panid 60]

Tobago

[Hulagway sa panid 60]

Bolivia