Ang Labing Makaiikag nga Bahin sa Miaging Tuig

SI Jehova nagtagna nga “sa kaulahiang bahin sa mga adlaw,” ang mga tawo magaganayan ngadto sa iyang mahulagwayong bukid aron tudloan niya. (Miq. 4:​1, 2) Sa miaging tuig, kanang tagnaa nagpadayon sa pagkatuman kay mas daghan pa ang misanong nga nahiuyon sa tinuig nga teksto sa 2003, “Duol sa Diyos, ug siya moduol kaninyo.” (Sant. 4:8) Ang usa ka dakong tabang nga nakabulig sa daghan sa pag-ugmad ug mas suod nga relasyon uban kang Jehova mao ang seryal sa “Himayaa ang Diyos” nga Distrito ug Internasyonal nga mga Kombensiyon.

“Himayaa ang Diyos” nga mga Kombensiyon

“Kon ang walay kinabuhi nga kalalangan ni Jehova makahatag ug kadayeganan kaniya, kita nga makahunahuna ug makasulti labaw nang makahatag ug kadayeganan sa atong Dakong Maglalalang!”  matod pa sa usa sa mga mamumulong sa gihisgotan sa ibabaw nga mga kombensiyon. Dayon iyang gikutlo ang Pinadayag 4:11, nga nag-ingon: “Takos ikaw, Jehova, nga among Diyos, nga modawat sa himaya ug sa dungog ug sa gahom, tungod kay imong gilalang ang tanang butang, ug tungod sa imong kabubut-on sila milungtad ug nalalang.”

Ang “Himayaa ang Diyos” nga mga Kombensiyon naghatag ug linaing higayon sa pagdayeg kang Jehova, tungod sa 32 ka internasyonal nga mga panagkatigom. Kini gihimo didto sa Australia, Canada, Chile, Denmark, Espanya, Ghana, Habagatang Aprika, Hawaii, Hungaria, Japan, Mexico, Switzerland, Tinipong Bansa, ug sa Ukraine. Ang mga misyonaryo ug uban diha sa langyawng mga asaynment nakapauli sa ilang kaugalingong mga nasod, diin sila giinterbiyo bahin sa ilang kalihokan sa Gingharian diha sa halayong mga teritoryo. Libolibong langyawng mga delegado mitambong usab niining mga kombensiyona.

Usa ka linain nga dalit alang sa internasyonal nga mga delegado mao ang pagbisita sa mga sanga sa mga nasod nga naghimo sa asembliya. Ang sanga sa Tinipong Bansa nakapribilehiyo sa pag-abiabi sa kapin sa 6,750 ka delegado gikan sa 36 ka kayutaan, nga nagsilbi kanila ug halos 15,000 ka pagkaon! Human sa usa ka paniudto, giawitan sa usa ka bus sa mga brader ug sister nga gikan sa Habagatang Aprika ang pamilyang Bethel ug upat ka tono nga awit diha sa unom ka pinulongan: Afrikaans, Ingles, Sepedi, Sesotho, Xhosa, ug Zulu. Punog-pagbati ug matahom kaayo ang pag-awit nga tungod niini nakahilak ang daghang namati.

Diha sa laing grupo nga nagpaseyo, usa ka delegado kansang lapel card nagpakita nga siya nakabiyahe ug katunga sa kalibotan miingon: “Alang kanako ang ingon niini nga pagpakig-uban sa imong espirituwal nga mga brader ug sister maoy talagsa ra nga kasinatian. Dili gayod nako kini makalimtan. Kini maoy pagtilaw daan sa bag-ong sistema.” Usa ka brader sa Britanya kinsa mibiya sa kamatuoran sa edad nga 17 apan mibalik sa dili pa dugayng mga tuig natandog sa dihang iyang nakita ang dibuho nga naglarawan sa usikan nga anak. Sa ulahi, samtang nagsalo sa pagpangaon uban  sa pamilyang Bethel sa Brooklyn, iyang napalandong ang kaluoy ni Jehova, ug milugmaw ang mga luha sa iyang mga mata. Usa ka brader sa Espanya miingon nga sa 29 ka tuig nga kaminyoon, ang iyang asawa wala pa gayod makakita kaniya nga mihilak. Apan siya mihilak sa dihang ang iyang grupo nga nagpaseyo gisugat sa malipayong panon sa mga Saksi diha sa internasyonal nga erport sa Houston, Texas.

Alang sa dagkong mga kombensiyon, lisod ang pagpangitag angay nga mga pasilidad nga may rasonableng abang. Apan, kasagaran, ang maayong dungog sa mga Saksi ni Jehova sa daghan nang katuigan nakahatag kanila ug bentaha. Kini gipakita nianang gisulat sa usa ka sanga: “Human sa dugayng pagpangita, kami nakakita ug usa ka lugar nga haruhayng makapalingkod ug 50,000 ka delegado nga gilaomang motambong sa kombensiyon. Apan, human makigkita sa mga opisyal sa estadyum, nahibaloan sa mga igsoon nga mahal kaayo ang abang. Paglabayg pipila ka adlaw human kini nasusi sa mga hawas sa sanga, giduol sa mao gihapong mga opisyales ang sanga alang sa dugang nga panagsabot. Sa ulahi, ang labaw-labawng mga manedyer miingon: ‘Sa primero, kami walay ideya kon unsay inyong gihangyo. Apan sa nasabtan namo ang kinaiyahan sa inyong mga kombensiyon ug sa inyong katakos sa pagtagana sa gikinahanglang mga serbisyo, kami naikag kaayo niini. Kami nakadayeg sa inyong dekalidad nga pagpalakaw, sa inyong detalyadong pagplano, ug sa inyong pagkapropesyonal.’” Ang resulta mao nga ang estadyum gipagamit ngadto sa mga Saksi ni Jehova sa ilang kombensiyon sa igoigo nga abang.

Mga Basahon nga Giluwatan sa Kombensiyon

Ikaw ba makugihong estudyante sa Pulong sa Diyos? Nan walay duhaduha nalipay ka sa pagdawat sa 36-panid, dekolor nga brosyur nga “Tan-awa ang Maayong Yuta.” Ang mga diagram, mapa, hulagway, mga dibuho nga gihimo diha sa kompiyuter, ug daghan pang ubang mga bahin makatabang ug dako sa imong personal nga pagtuon. Busa paneguroa nga makabaton ka ug kopya sa “Tan-awa ang Maayong Yuta” uban sa imong personal nga Bibliya ug sa mga tabang sa pagtuon nga imong gamiton kanunay. Ug  ayawg kalimot sa pagdala sa imong brosyur ngadto sa mga tigom sa kongregasyon kon ang mga pakigpulong ug mga tema naghisgot bahin sa mga kayutaan sa Bibliya.

Sa panahon sa pakigpulong nga “Ang Atong mga Anak​—Usa ka Hamiling Panulondon,” giluwatan sa mamumulong ang nindot ug mga ilustrasyon, 256-panid nga librong Pagkat-on Gikan sa Dakong Magtutudlo. Ang mga ginikanan nga nagmahal pag-ayo niining maong panulondon nga gikan sa Diyos malingaw sa pagtuon niining maayo nga bag-ong publikasyon uban sa ilang gagmayng mga anak. “Ang mga anak,” matod pa sa libro, “nagkinahanglan ug moral nga giya, mga prinsipyo nga pagakinabuhian. Ug ilang gikinahanglan kini panahon sa ilang linghod nga mga edad. Makaguol nga mga butang ang mahitabo kon ang mga bata dili makadawat ug tabang hangtod nga ulahi na ang tanan.”

Ang Pagkat-on Gikan sa Dakong Magtutudlo dunay kapin sa 230 ka hulagway​—halos duha ka pilo sa gidaghanon nga makita diha sa librong Mga Estorya sa Bibliya. Ang matag hulagway ug grupo sa mga hulagway dunay kapsiyon, ang kadaghanan maoy pinaagig pangutana. Ang mga tubag makita sa mao gihapon nga panid. Kini ug daghan pang ubang mga pangutana sa tibuok libro makatabang sa pagsugod ug maayong mga topiko sa panaghisgot, nga makahimo sa kabataan sa pagpadayag sa ilang gibati mismo. Pananglitan, ang kapsiyon diha sa panid 101 mabasa: “Nganong hinungdanon ang paghinumdom sa pagpasalamat?” Ug mga ginikanan, paneguroa nga mabasa ang pasiunang pamulong, “Kon Unsay Gikinahanglan sa mga Anak Gikan sa mga Ginikanan.” Kon inyong ipadapat ang mga sugyot nga gihisgotan didto, ang inyong pamilya makaani ug dagkong kaayohan gikan niining maayong tabang sa pagtuon.

Video Gikahinangpan sa mga Bungol

Sa tuig 1915 sa Tinipong Bansa, usa ka peregrino, o nagapanawng ansiyano, nga ginganlag John A. Gillespie miawit pinaagig senyas ngadto sa gamayng pundok sa mga bungol nga mitambong sa usa ka kombensiyon sa International Bible Students, nga maoy pag-ila sa mga Saksi ni Jehova kaniadto. Karon aduna nay kapin sa  1,200 ka kongregasyon ug mga grupo sa bungol nga mga magmamantala ug mga interesado sa tibuok kalibotan. Sa unsang paagi ginapakaon sila sa espirituwal?

Sa pagkakaron, ang mga giya sa pagtuon sa Bibliya mabatonan diha sa 18 ka pinulongan pinaagig senyas, ug ang gidaghanon nagpadayon sa pagtubo. Kadtong nagagamit ug American Sign Language (ASL) nakadawat ug linain nga dulot sa Septiyembre 2002. Sugod nianang bulana, ang mga artikulo sa pagtuon sa Bantayanang Torre mabatonan na diha sa video ingong binulan nga edisyon. Kini nga kahikayan nakatabang sa mga bungol sa mga paagi nga alang sa uban tingali wala kaayoy importansiya.

Palandonga: Ang kadaghanang Saksi nga dili bungol makakutlo ug daghang teksto nga nasag-ulo. Tungod kini kay sila makadungog o makabasa sa mao gihapong mga pulong sa matag higayon. Apan, ang mga bungol nga mga magmamantala, dili gayod makadawat ug sama nga mga paghubad pinaagig senyas sa kamot. Ngano? Tungod kay ang Bibliya dili man mabatonan sa ASL, ug kadtong naghatag sa mga bahin sa tigom sa kongregasyon dili man makasenyas sa mga teksto sa Kasulatan sa sama gayod nga paagi. Apan kini nagsugod sa pagkausab sa dihang gisugdan paggamit ang mga publikasyon sa ASL diha sa video. Ug karon, kay ang tun-anang mga artikulo sa Bantayanang Torre mabatonan na man usab diha sa video, ang bungol nga mga tumatambong makabaton ug sama nga mga paghubad sa mga teksto sa Bibliya.

Dugang pa, ang ASL nga mga kongregasyon ug mga grupo dili na kinahanglang magtudlo pag mga interpreter ingong tigbasa sa Pagtuon sa Bantayanang Torre. Diha sa mga kongregasyon nga walay bungol, ang gitudlo nga tigbasa mogugol ug dugang oras sa pagpangandam sa iyang Bantayanang Torre aron maayo ang iyang pagbasa. Apan diha sa kongregasyon sa bungol nga mga magmamantala, kadtong gieskedyul nga maoy mosenyas sa usa ka artikulo kasagarang mogugol ug daghang oras sa pagpangandam. Karon, kanang maong bililhong oras magamit na sa ubang espirituwal nga mga kalihokan. Unsay gibati sa mga igsoong lalaki ug babaye bahin niining bag-ong tabang?

 Usa ka grupo sa bungol nga mga magmamantala sa estado sa Rhode Island, T.B.A., nagsulat: “Nalipay kaayo kami sa dihang gipahibalo nga kami makabaton ug Ang Bantayanang Torre diha sa video. Gani, ang pipila sa among mga magmamantala nakahilak.” Usa ka konduktor sa Pagtuon sa Bantayanang Torre sa Florida miingon nga daghan kaayo ang nag-isa sa ilang kamot aron sa pagkomento nga siya “nalipay nga daghan kaayong kamot ang mahimong tawgon sa paghatag ug tubag!” Siya midugang nga “dayag usab nga miuswag ang kalidad sa mga komento.” Laing ansiyano misulat: “Talagsaon kaayo ang mga resulta! Ang pagsabot sa lisod nga mga ideya talagsaon kaayo.” Oo, tungod sa dagayang panalangin ni Jehova, usa ka nagtubong panon sa mga bungol nalipay sa pribilehiyo sa pagkahibalo ug paghimaya sa Diyos.​—Roma 10:10.

Tabang Alang sa mga Maghuhubad

Ang espirituwal nga pagkaon nga gitagana sa matinumanong piniyalan nga matang mabatonan karon sa labing menos 390 ka pinulongan. (Luc. 12:42) Busa, ang paghubad naghawas ug dako ug padayong nagtubo nga bahin sa buluhaton sa organisasyon ni Jehova.

Ang tukma nga paghubad dili kay pag-ilis lamang ug usa ka lokal nga pinulongan nga katumbas alang sa matag pulong nga makita diha sa orihinal nga mga teksto. Hinunoa, kini maoy  paghubad sa eksakto nga ideya. Nan, klaro nga kinahanglang masabtan gayod sa mga maghuhubad ang orihinal nga teksto sa dili pa sila magsugod paghubad. Usahay, kini lisod kaayo.

Busa, sa pagdumala sa Nagamandong Lawas, usa ka grupo sa kuwalipikadong mga igsoon nga gitudlo aron mahimong mga magtutudlo gibansay sa usa ka programa nga gitawag ug Course in Improved English Comprehension. Sa natapos ang kurso, nga gihimo didto sa Watchtower Educational Center sa Patterson, New York, gibisitahan sa mga igsoon ang mga grupo sa mga maghuhubad sa tibuok kalibotan sa 2002 ug sa 2003 nga mga tuig sa pag-alagad. Tulo ka bulan nga gibansay nila ang matag grupo, nga nagtudlo sa kurso ug naghatag ug praktikal nga tabang sa paghubad. Tungod niining maong programa, ang mga maghuhubad karon nahupayan nga nasangkapan na sa pagtugkad sa bug-os nga diwa sa Iningles nga mga pulong.

Nag-ingon ang usa ka grupo sa maghuhubad: “Si Jehova malulotong mihatag kanamo ug tabang aron mas mahimong kuwalipikado sa pagtuman sa among buluhaton. Karon mas may pagsalig na kami. Uban sa panalangin ni Jehova, kami nanghinaot nga makakita ug maayong mga resulta.” Usa ka magtatan-aw sa departamento sa paghubad miingon: “Kaniadto, malisdan kaayo kami  sa paghubad sa Iningles nga mga ekspresyon ug mga pulong. Kini nagpahinay sa among trabaho. Busa ang Course in Improved English Comprehension gikahinangpan gayod. Gipakita niini kanamo kon unsaon pag-analisar sa Iningles nga mga pulong sa sistematikong paagi, ug kini naghatag kanamo ug mapuslanong mga pamaagi sa paghubad sa lisod nga mga pulong. Tungod niini, ang among kabalaka namenosmenosan ug makahimo na ug mas tukmang hubad nga mas dali.”

Laing grupo nagsulat: “Kini nga kurso mas praktikal kay sa bisan unsang susamang sekular nga edukasyon nga gilaraw alang sa among espesipikong mga panginahanglan. Kami nagtuo nga kining maong tagana motabang sa mga maghuhubad sa tibuok kalibotan, nga mas magpasayon sa mga karnerohon sa ‘pagsabot’ sa kamatuoran.”​—Mat. 13:23.

Sa pagkakaron, duolan sa 1,660 ka maghuhubad nga nagtrabaho diha sa kapin sa 150 ka pinulongan ang nakapahimulos sa kurso. Dugang pa, ang kurso gipasibo sa pagtabang niadtong naghubad sa mga pinulongan pinaagig senyas ug kadtong naghubad sa Kinatsila nga mga pulong ngadto sa lumad nga mga pinulongan sa Amerika del Sur ug Sentral Amerika.

Nasangkapan Aron Mahimong Mas Maayong mga Magtutudlo

Si Jehova ug ang iyang bugtong Anak​—“ang Pulong”—​naghatag ug dakong pagtagad sa komunikasyon. (Juan 1:​1, 14; 3:16; Pin. 19:13) Nagpabanaag nianang sama nga panghunahuna, ang matinumanong ulipon nga matang nagpadayon sa pagpaningkamot sa pagtabang sa katawhan sa Diyos sa pagpauswag sa ilang mga katakos sa pagsangyaw ug pagpanudlo. Naghunahuna nianang tumonga, ang organisasyon ni Jehova nag-andam sa librong Pahimusli ang Edukasyon sa Teokratikanhong Tunghaan sa Ministeryo. Daghang magmamantala ang nagpahayag sa ilang apresasyon niining libroha sukad nga gigamit kini sa Teokratikanhong Tunghaan sa Ministeryo sa Enero 2003.

“Walay laing relihiyosong grupo ang nagpakitag dakong pagtagad sa pagtabang sa mga sakop niini, batan-on man o tigulang,  sa pagpakigsulti nga mas epektibo,” nagsulat ang usa ka ansiyano sa Pilipinas. Usa ka ansiyano sa Brazil miingon: “Para nako, ang Enero 2003 mao ang hinungdanon kaayong yugto sa pagpanudlo sa kasaysayan sa mga Saksi ni Jehova.” Dunay lain nga miingon: “Akong namatikdan nga ang mga batan-on sa kongregasyon mas nagpakitag dugang interes sa pagpakigbahin sa tunghaan. Nabasa sa uban ang tibuok libro ug natapos ang tanang mga pagbansaybansay​—una pa hisgotan ang materyal diha sa tunghaan!” Usa ka nagapanawng magtatan-aw kanunayng mogamit sa librong Tunghaan sa Ministeryo diha sa mga pagduaw isip magbalantay. Siya nagsulat: “Ang mga kapitulo sama sa ‘Magmakugihon sa Pagbasa,’ ‘Ang Pagtuon Adunay Balos,’ ug ‘Hibaloi Kon Unsaon Nimo Pagtubag’ dako kaayog tabang sa pagpangandam alang sa mga miting ug sa ministeryo.”

Usa ka sister sa Britanya miingon nga “ang paglakip sa mga pagbansaybansay maoy usa ka maayo kaayong bahin sa proseso sa pagtudlo. Kon buot nato nga maugmad ang mga katakos nga gitudlo sa tunghaan, kinahanglang himoon nato kini diha sa atong adlaw-adlaw nga kinabuhi. Ang mga pagbansaybansay makatabang kanato sa pag-ugmad niini nga mga katakos.” Gikan sa Japan, usa ka brader nga dunay diperensiya sa pagsulti nagsulat: “Matag higayon nga duna akoy asaynment sa pagbasa, mabalaka kaayo ako kon maayo ba unya ang akong pagbasa diha sa entablado. Akong naamgohan nga ang akong negatibong hunahuna nakapasamot lang sa kahimtang. Busa sa dihang nadawat nako ang akong kinaulahiang asaynment, gisulat nako ang mga punto diha sa librong Tunghaan sa Ministeryo ilalom sa sub-ulohang ‘Kon Unsaon Pagsulti nga Tin-aw’ (mga panid 87 ug 88) ug kanang anaa sa kahon nga ‘Pagsagubang sa Pagnganga’ (panid 95). Wala ako magpaabot nga mabuntog nako ang akong problema sa pagkanganga dihadiha, apan dili gayod ako moangka!”

“Sa Burundi,” nagsulat ang sanga sa Kenya, “nagpasalamat ang mga igsoon alang niining bag-ong libro, nga karon mabatonan sa Kirundi nga pinulongan. Diha sa usa ka nasod diin daghan ang walay pormal nga edukasyon, ang mga estudyante sa Teokratikanhong  Tunghaan sa Ministeryo mas makasabot na karon sa mga punto sa tambag. Tungod niini, sila mas madasigon na dihang mohatag sa ilang mga bahin.”

Ang libro nakatabang usab sa uban sa pagpauswag sa ilang katakos sa pagsulat. Ang usa ka tigulang, maluyahon nga sister sa Mexico miingon: “Diha sa librong Tunghaan sa Ministeryo, sa mga panid 71 ngadto sa 73, nakakita ako ug pipila ka praktikal nga mga sugyot kon unsaon pagsulat. Mosangyaw ako niining paagiha tungod sa akong pisikal nga limitasyon. Bisan pa niana, naglikay ako kaniadto sa pagsulat sa akong mga paryente. Apan pinaagi sa tabang nga gitagana sa bag-ong libro, ako karon makahatag na kanila ug mas maayong pamatuod.” Usa ka magtatan-aw sa distrito sa Habagatang Aprika mikomento: “Talagsaon kaayo kining libroha. Gitagad niini dili lamang ang teknikal nga paagi sa pagsulti kondili ang espirituwal nga paagi usab, nga nagpakita nga kining mga hiyasa maoy bunga sa Kristohanong gugma ug pagkabalaka sa uban.”

Legal nga mga Panghitabo

Sa Hunyo 17, 2002, ang Korte Suprema sa Tinipong Bansa nagpakanaog ug makasaysayanhong desisyon sa Watchtower Bible and Tract Society of New York, Inc. v. Village of Stratton. Diha sa hukom niini nga gipaboran sa 8 kontra 1, ang kinatas-ang Korte sa nasod nagtuo nga ang mga ordinansa nga ang pagpangampanya nagkinahanglan ug permit maoy supak sa balaod kon ipadapat sa publikong ministeryo sa mga Saksi ni Jehova.

Human niini nga kadaogan, gikontak sa Departamento Labot sa Pamalaod sa sanga sa Tinipong Bansa ang mga munisipalidad sa tibuok nasod. Tungod niini, ang mga problema labot sa atong buluhatong pagsangyaw nasulbad diha sa 238 ka munisipalidad nga kaniadto misulay sa pagpatuman diha sa atong pangpubliko nga ministeryo sa ordinansa maylabot sa regulasyon alang sa pagpangambas ug pagsolisitar. Dugang pa, tungod sa desisyon labot sa Stratton nga kaso, ang mga magmamantala sa Gingharian diha sa 216 uban pang mga munisipalidad dili na kinahanglang  magparehistro sa kapolisan o sa ubang mga opisyales sa lungsod una pa makigbahin sa pag-alagad sa kanataran. Hinaot nga magpadayon si Jehova sa pagwagtang sa mga kababagan.​—Isa. 40:4; Mat. 24:14.

Ang mga igsoon padayong gipangdakop ug gipriso sa Armenia tungod sa pagdumili sa pagserbisyo militar kay supak kini sa ilang mga konsensiya. Ang piskal sa Yerevan, nga kaulohang siyudad, miapelar sa mga sentensiya sa ubay-ubayng mga igsoon sa tuyo nga pahamtangan pa sila ug mas taas nga sentensiya sa pagkabilanggo. Ang mga huwes mipabor sa iyang mga apelasyon, nga nagpahamtang ug mas bug-at nga mga sentensiya.

Sa Pebrero 2003 ang Uropanhong Korte sa Tawhanong mga Katungod mideklarar nga dalawaton ang usa ka aplikasyon sa duha ka misyonaryo kaniadto sa mga Saksi ni Jehova aron mahusay sa Korte. Gimandoan sa paghawa sa Bulgaria sa 1995, ang magtiayon nagtuo nga ang ilang katungod sa kagawasan sa pagpilig relihiyon ug kagawasan sa pagpihig gilapas. Nasuta sa Korte nga ang sumbong “may katarongan.”

Pagkahuman dayon sa pagsaulog sa kongregasyon sa Panihapon sa Ginoo sa Asmara, Eritrea, gilibotan sa mga polis ang tigomanan ug gipriso ang 164 ka tumatambong​—mga lalaki, mga babaye, ug kabataan. Sila gitener ug gisukitsukit sa tibuok gabii. Pagkasunod adlaw gibuhian sa mga awtoridad ang kabataan ug ang kadaghanan sa mga sister ug mga interesado. Ang uban gibalhin ngadto sa kinadak-ang prisohan sa Asmara, diin ang uban gipriso halos usa ka bulan sa wala pa buhii. Gawas pa niining hitaboa, napulo ka brader atua gihapon sa kampong prisohan tungod sa ilang pagdumili sa pagserbisyo militar tungod sa konsensiya. Tulo ang gipriso sulod na sa siyam ka tuig.

Ang mapintas nga mga pag-atake nagpadayon batok sa atong mga igsoon sa Georgia. Ang distritong mga kombensiyon pinugos nga gikanselar sa lokal nga mga opisyales ug sa armadong mga polis nga misulod sa mga kombensiyon nga nagsesyon na. Misaka sila sa entablado ug gipapauli ang nanambong. Sa usa ka higayon ilang gialihan ang mga dalan sa duol aron dili makasulod ang mga igsoon  sa pagtambong sa kombensiyon. Ang pangunang maglulutos sa mga Saksi ni Jehova naghulat pa sa husay, apan wala siya dakpa. Ang iyang husay gipalangan 19 na ka beses. Usahay ang iyang mga sumusunod magsamoksamok diha sa korte, nga nangatake sa mga igsoon sa pisikal ug sa binaba. Ang Departamento sa Pamuhis nagnulo sa desisyon nga gipakanaog sa miagi maylabot sa numero sa rehistrasyon sa mga Saksi nga ilang gikinahanglan aron makapasulod ug literatura ug aron makahimog mga transaksiyon.

May maayong balita ang Kosovo ug Romania. Niadtong Mayo 20, 2003, ang 90 ka magmamantala sa Gingharian sa Kosovo legal nang giila ug ang ilang karta narehistro na. Sa susama, sa Mayo 22, 2003, nagpakanaog ang Romania ug reglamento nga nag-ila sa mga Saksi ni Jehova ingong relihiyon. Ang Artikulo 3 sa reglamento nag-ingon: “Ang Kristohanon nga relihiyong ‘Ang Relihiyosong Organisasyon sa mga Saksi ni Jehova’ dunay katungod ug obligasyon nga gitagana sa balaod alang sa mga relihiyon nga giila sa Estado sa Romania.” Ang sugo giisyu agig pagtuman sa desisyon nga gipakanaog sa Korte Suprema sa Romania sa tuig 2000.

Sa Rusya ang husay sa pagdili sa mga Saksi ni Jehova sa Moscow gipauswag nga walay gitakda nga petsa niadtong Mayo 22, 2003. Wala magtakda ug panahon, ang huwes nagpasugo ug laing “eksperto” nga pagtuon sa sikolohikal nga epekto sa literatura nga gipatik sa mga Saksi ni Jehova sulod sa miaging napulo ka tuig. Ang siyentipikanhong mga ebidensiya sa maong mga pagtuon kuwestiyonable. Kasamtangan, ang Uropanhong Korte sa Tawhanong mga Katungod nagsugod sa pagproseso sa apelasyon nga gipasaka sa mga igsoon. Ang apelasyon nagtutol sa pagpanghasi ug pagkamapihigon sa hukmanan batok sa mga Saksi sa Moscow sulod sa miaging pito ka tuig.

Ang Konseho sa mga Ministro sa amihanang bahin sa Cyprus, pinaagi sa Desisyon Num. E-1516-2002 sa Agosto 8, 2002, nagkuha sa gipahamtang nga pagdili sa mga Saksi ni Jehova sa pagsulod sa amihanang bahin sa isla. Ang mga payunir gipapahawa didto sa 1997, dihang gipahamtang ang pagdili. Duha ka Kingdom Hall nga gikompiskar giuli na ngadto sa mga igsoon.

 Sa Uzbekistan, si Marat Mudarisov gisentensiyahan nga sad-an tungod sa giingong “nagpukaw ug relihiyosong pagdumot ug nangdani sa mga menor de edad” ngadto sa iyang tinuohan. Ang iyang sentensiya nga pagkabilanggo gisuspender. Apan ang tinuod, siya “sad-an” lamang sa pagsangyaw sa maayong balita ngadto sa iyang mga silingan ug sa pagdumala ug senemanang mga panaghisgot sa Bibliya diha sa mga tigom sa kongregasyon. Dili pa dugay, dihay apelasyon nga gipasaka diha sa Korte Suprema sa Uzbekistan, ug ginulo ang dili makataronganong sentensiya ni Brader Mudarisov.

Pagsagubang sa mga Pagsulay

Samtang nagkahiduol na ang kataposan sa presenteng sistema sa mga butang, ang kapintasan ug kawalay-kalig-on sa politika nagkagrabe, nga kasagaran nakahatag ug dakong kalisod. Sa miaging tuig, ang sibil nga gubat nagpadayon sa paggusbat sa Liberia ug sa kaulohan niini, ang Monrovia. “Dihay rinakrakay sa kadalanan ug ang tibuok siyudad nagkaguliyang sulod sa usa ka semana,” nag-ingon ang taho sa Reuters. “Human nga miatras ang mga rebelde morag mikalma ang kahimtang, apan dayon sa Hunyo 24 miulbo na usab ang mas grabeng pag-atake nga misangpot ug dakong kapildihan sa mga tinukod ug sa tawhanong kinabuhi.” Diha sa usa ka bahin sa siyudad, ang mga igsoon nanghapa sa basa nga salog sa ilang Kingdom Hall tungod sa mga bala ug sa pagpamomba, miingon ang sangang buhatan. “Ang kagun-oban sa siyudad makalilisang,” misulat ang mga igsoon. “Among mapanimahoan ang makapasuka nga baho sa patayng mga lawas.” Dihay epidemya nga kolera nga nakapatay ug dugang nga mga tawo.

Sa regular ug sa sistematiko nga paagi, gipanglungkab sa mga tawong armado ang mga balay ug mga Kingdom Hall. Kay nahibalo nga ang tanang butang nga mahalon kawaton lang, daghang igsoon mihukom nga magbaton na lamang sa pangunang mga panginahanglan sa kinabuhi, miingon ang magtiayong misyonaryo sa Monrovia. Wala na pulihi sa mga pamilya ang gipangawat nga mga katre apan nangatulog na lang sa banig diha sa salog. Kadtong  wala makapauli sa mga balay nagpuyo ingong mga lalin o mikalagiw sa kasikbit nga nasod.

“Ang mga tawo nagkinabuhi sumala lamang sa ilang adlaw-adlaw nga maarangan,” nagsulat ang sanga. “Bisan pa niana, makapadasig kaayo ang pagkakita nga ang mga igsoon maikagon sa pagtambong sa mga miting ug sa pagpakigbahin sa pag-alagad sa kanataran kon itugot sa kahimtang.” Kon moabot ang mga hinabang, ang mga misyonaryo miingon nga “ang usa sa una nga hangyoon sa mga igsoon mao ang pinasukad-sa-Bibliya nga literatura ug, sa ubang mga kahimtang, bag alang sa pagsangyaw aron may ikapuli sa bag nga nawala.”

Pag-imprenta nga Himoon Diha sa Lainlaing mga Rehiyon

Sa Septiyembre 1, 2001, pito ka igsoon nga gikan sa nagkalainlaing bahin sa kalibotan gipili sa pag-alagad ingong Printing Study Group. Ang Nagamandong Lawas naghangyo niining mga igsoona sa pagsusi sa tanang sanga nga nagaimprenta sa tibuok kalibotan ug sa pagrekomendar ug mga paagi aron mas magamit pa kining naglungtad nga mga pasilidad. Pinasukad sa mga rekomendasyon sa grupo nga naghimo sa pagtuon, sa Oktubre 17, 2001, ang Nagamandong Lawas miuyon nga ang pag-imprenta himoon diha sa lainlaing mga rehiyon, nga ang matag rehiyon maoy magdumala sa kaugalingong mga panginahanglan niini sa pag-imprenta. Ang mga rehiyon mao ang Amerika del Norte, Amerika del Sur, Aprika, Asia, ug Uropa.

Ang bag-ong kahikayan nagsugod paglihok sa tuig 2002. Ang mga resulta makapadasig. Tagda ang pag-imprenta ug mga libro. Sa tuig 2000, ang sanga sa Tinipong Bansa nakaimprenta ug halos 50 porsiyento sa mga libro sa tibuok kalibotan. Apan karon, ubos sa kahikayan sa pag-imprenta nga himoon diha sa lainlaing rehiyon, kini nakaimprenta ug 26 porsiyento lamang. Nakapamenos kini sa gastos sa pagpadala, mga trabahante, mga makina, ug gikinahanglang luna nga imprentahan sa Tinipong Bansa ug misangpot kinig mas episyenteng paggamit sa naglungtad nga mga pasilidad diha sa ubang mga nasod.

 Duyog sa kausaban sa pag-imprenta ilalom sa usa ka rehiyon, giaprobahan sa Nagamandong Lawas ang pagpalit ug pito ka bag-ong MAN Roland Lithoman nga mga makina sa pag-imprenta. Kini maoy mopuli sa daan na ug dili kaayo maayong kasangkapan, busa nagtabang sa pag-atiman sa umaabot nga mga panginahanglan sa pag-imprenta. Lima sa bag-ong mga makina sa pag-imprenta, nga ang pipila nainstalar na, maoy alang sa mga sanga sa Brazil, Britanya, Habagatang Aprika, Japan, ug Mexico. Ang ubang duha maoy alang sa imprentahanan sa Wallkill, New York, diin kini gieskedyul nga iinstalar sa Abril ug Mayo 2004. Ang kada usa ka makina maoy 133 piye ang gitas-on, nga makaimprenta ug 90,000 ka magasin o magasin-ug-gidak-ong palid nga papel alang sa mga libro kada oras (25 kada segundo), ug makaimprenta ug dekolor diha sa tanang panid.

Dugang Kausaban Diha sa Brooklyn ug sa Wallkill

Duyog sa bag-ong mga makina sa pag-imprenta, ang Wallkill makadawat usab ug bag-ong kasangkapan nga makahimo ug gahig-hapin nga mga libro ug deluxe nga mga Bibliya sa gikusgong 120 matag minuto. Ang Shipping Department, nga ibalhin gikan sa Brooklyn ngadto sa Wallkill, makabenepisyo sa bag-o, andana-andanang pagkamada sa literatura tungod kay labaw sa katunga ang madaginot nga luna kon itandi sa luna nga giokupar niini sa Brooklyn.

Ang gibakantehang mga bilding sa Brooklyn gamiton alang sa ubang mga katuyoan. Dugang pa, sa Hunyo 2003 gipahibalo sa  Nagamandong Lawas nga posibleng ibaligya ang 95,000 metro kuwadradong bilding diha sa 360 Furman Street, nga nahimutangan sa Shipping ug ubang mga departamento. Ang ubang mga departamento diha sa bilding nabalhin na o ibalhin sa umaabot ngadto sa nagkalainlaing mga bilding sa Brooklyn.

Pagpanukod ug Kingdom Hall

Sa 2003 nga tuig sa pag-alagad, 2,340 ka Kingdom Hall ang natapos sa tibuok kalibotan. Kini naghawas ug aberids nga 195 ka tigomanan matag bulan, o kapin lamang ug 6 matag adlaw! Sukad sa Nobyembre 1999 sa dihang gisugdan ang programa sa pagpanukod diha sa kayutaan nga limitado ug panalapi, 7,730 ka Kingdom Hall na ang natukod. Diha sa daghang lugar, sa dihang matapos ang tigomanan, ang tumatambong sa mga tigom mokalit pagdaghan ug ang mga tigomanan sa ngadtongadto mapuno pag-ayo.

Sa dihang gisugdan ang programa sa pagpanukod sa Aprika, dihay 550 ka nahiangayng mga dapit sa pagsimba sa 38 ka kayutaan niana nga kontinente. Walay upat ka tuig sa ulahi, ang mao gihapong 38 ka kayutaan nakabaton ug kapin sa 5,060 ka Kingdom Hall​—may aberids nga 1 sa matag 3 ngadto sa 4 ka kongregasyon. Sa usa ka taho bahin sa epekto diha sa publiko sa mga proyekto sa pagtukod ug Kingdom Hall, ang sanga sa Malawi naghisgot sa usa ka bag-ong diksiyonaryo nga gipatik sa Christian Literature Association sa Malawi. “Ang diksiyonaryo,” nag-ingon ang sanga, “naglakip ug pulong alang sa mga Saksi ni Jehova ug tukmang naghubad sa atong ngalan diha sa Chichewa. Dayon sa pagpakita kon  unsaon paggamit sa ngalan diha sa sentence, ang diksiyonaryo midugang: ‘Ang mga Saksi ni Jehova nakatukod ug daghang simbahan.’”

Ang sangang buhatan sa laing nasod sa Aprika misulat: “Sa dihang giduol sa mga igsoon ang usa ka opisina sa opisyales aron sa pagparehistro sa atong aplikasyon sa pagtukod ug Kingdom Hall, gigisi dayon sa tawo ang among mga papeles ug gilabay kini. Sa dihang nahitabo kini sa ikatulong higayon, gitugyan na lang sa mga igsoon kining mga butanga diha kang Jehova. Wala magdugay human niadto, ang usa niining mga igsoona nga ilado sa iyang pagkamatinud-anon gipiyalan ug trabaho sa mga awtoridad sa pag-apod-apod sa pahulam nga kuwarta ngadto sa mga opisyales sa gobyerno.

“Ang usa niadtong naghangyo sa paghulam ug kuwarta mao ang opisyales mismo nga migisi sa among mga papeles. Busa sa pagkakita niya sa atong igsoon, migawas dayon siya gikan sa opisina, ug mibalik paglabay sa usa ka semana nga naglaom nga makakita ug laing opisyales nga moatiman sa pagpautang. Apan niining tungora giduol siya sa atong igsoon, gipangayoan siya sa iyang aplikasyon, ug giaprobahan ang iyang hangyo nga mangutang. Kay naulaw, giingnan sa opisyales ang mga igsoon sa pagsumiter pag-usab sa ilang mga papeles sa pagtukod. Siya mismo ang mitunol niini ngadto sa iyang labaw aron maaprobahan ug nakakuha ug titulo sa yuta alang sa Kingdom Hall. Tungod sa bag-ong nakaplagang pagtahod sa mga Saksi, siya miingon: ‘Sila dili mobalos ug daotan sa daotan.’”

Ang sanga sa Ukraine nag-asoy: “Samtang nangita ug yuta, gikontak sa mga igsoon sa siyudad sa Artsyz ang usa ka arkitekto sa rehiyon. Ilang gipakitaan siya ug mga letrato sa natapos na nga mga Kingdom Hall. Kay nakadayeg, siya miingon: ‘Ang ingon niini nga Kingdom Hall angayng tukoron duol sa lugar sa administrasyon sa distrito, kay makapanindot kini sa sentro sa siyudad.’ Dayon dihay iyang gitanyag nga yuta. Human niana, ang labaw nga arkitekto sa rehiyon midugang: ‘Mao pay akong pagkakita ug relihiyosong grupo nga nagkauyon nang daan sa mga plano una  pa nagsugod pagtukod. Kasagaran, dili ingon niini ang mahitabo.’”

Diha sa lugar nga gitukoran sa Kingdom Hall sa siyudad sa Lysychans’k, usa ka babayeng negosyante sa kanait nga siyudad miingon: “Naniid ako kaninyo. Sa akong hunahuna kinahanglang magtukod kamo ug Kingdom Hall nga sama niini diha sa akong siyudad. Motabang pa ako sa inyong pagpangitag maayong lugar nga katukoran.” Dayon gisultihan siya sa mga igsoon nga lima lamang ka Saksi ang nagpuyo sa maong lugar​—diyutay ra kaayo nga mahimong kongregasyon aron tukoran ug tigomanan. “Buweno, pilay inyong gikinahanglan?” siya nangutana ug dayon miingon: “Ilista ako ingong ikaunom.” Tingali nagkomedya lang siya. Bisan pa niana, siya misugot sa usa ka pagtuon sa Bibliya.

Bag-ong mga Assembly Hall

Sulod sa miaging tuig sa pag-alagad, ang mga Assembly Hall natapos ug gidedikar sa Nhandeara ug Goiânia, Brazil; El Trébol, Santiago, Chile; Morne Daniel, Dominica; Machala, Ecuador; Syracuse, Sicily, Italya; Gerehu, Papua New Guinea; Lomé, Togo; Newburgh, New York, ug West Palm Beach, Florida, T.B.A. Mahitungod sa proyekto sa Newburgh, usa ka lokal nga negosyante miingon: “Ang inyong organisasyon talagsaon kaayo! Kamo naggamit ug mga boluntaryo nga lainlain ug mga kagikan, abilidad, ug mga katakos, ug silang tanan malinawon nga nagtrabaho. Wala pa gayod ako makakita ug sama niana sukad!” Usa ka lokal nga inspektor sa bilding nakadayeg dili lamang sa pulido nga trabaho kondili sa mga brader ug mga sister usab. “Malingaw ako sa pag-anhi dinhi,” siya miingon. “Maayo kaayo ang akong panimati nga makauban kamo.”

Sa dihang hapit nang matapos ang proyekto sa Newburgh, dihay nahitabong sunog nga nagdaot sa mga 20 porsiyento sa tinukod. Imbes maluya, ang mga igsoon milihok dayon sa pagtabang sa pag-ayo sa bilding. Busa, ang proyekto sa pag-ayo nahuman nga walay usa ka bulan, nga tungod niini ang programa sa dedikasyon gihimo sumala gayod sa eskedyul, sa Oktubre 19, 2002. Nagkomento bahin sa mga boluntaryo, usa ka lokal nga mantalaan  miingon: “Ang ilang pagtuo mas init pa kay sa kalayo nga nag-ugdaw sa gamayng bahin sa 60,000-kuwadrado-piye nga bilding.” Agig pag-ila sa hamiling panaghiusa sa katawhan sa Diyos, ang mga igsoon gihatagan ug permiso sa pagngalan sa publikong karsada paingon sa Assembly Hall nga Unity Place.

Mga Dedikasyon sa Sanga

Sa taliwala sa sibil ug politikanhong panag-away, ang mga igsoon sa Côte d’Ivoire malinawong nagtigom sa Marso 29, 2003, aron sa pagpahinungod sa pipila ka bag-ong mga bilding sa sanga sa Abidjan. Lakip niini mao ang usa ka bag-ong Kingdom Hall, duha ka bilding nga puy-anan, ug bilding alang sa opisina nga may dakong komedor, usa ka kosina, labhanan, mga bodega, ug mga talyer. Ang bag-ong mga pasilidad tabok lang sa dalan gikan sa unang sanga, nga gitukod niadtong 1982. Ang mga boluntaryo gikan sa 15 ka nasod, nga ang kadaghanan miabot sa ilang kaugalingong gasto, mitabang sa 110 ka membro sa lokal nga grupo sa magtutukod. Si Sébastien Johnson, ang magtatan-aw sa sona nga miduaw sa sanga, mihatag sa pakigpulong sa dedikasyon, “Bug-osa ang Inyong Kasingkasing Diha sa Putli nga Pagsimba.”

Sa Sabado, Pebrero 15, 2003, ang dedikasyon sa bag-ong sanga sa Guyana gitambongan sa 332. Si Richard Kelsey, nga gikan sa sanga sa Alemanya, ang mihatag sa pakigpulong sa dedikasyon. Iyang gipasiugda si Jehova ingong Dakong Magtutukod sa uniberso. Apan, si Brader Kelsey miingon nga ang kinadak-ang buhat ni Jehova sa paglalang, nga mao usab ang iyang una, maoy usa ka mahimayaong espiritu nga linalang​—ang iyang bugtong Anak. Daghang unang mga misyonaryo mibalik sa pagtambong sa programa sa dedikasyon, ang pipila nakabalik sa unang higayon sulod sa daghang tuig! Kon palandongon nga ang Guyana duna lamay kapin sa 2,000 ka magmamantala sa maayong balita, ang tanan nalipay sa pagkakita sa 4,752 ka tawo gikan sa 12 ka nasod nga mitambong sa linain nga programa sa Dominggo.

Diha sa inagurasyon sa gidugang nga bilding sa Bethel sa Haiti, ang tingog sa dugay nang Saksi nga si George Corwin nagkurogkurog  sa emosyon samtang iyang giasoy ang iyang dili pa dugayng pagduaw sa St. Marc, nga usa ka lungsod nga dunay dunggoanan nga 60 kilometros sa amihanan sa Port-au-Prince. Samtang misyonaryo pa sa St. Marc kapin sa 40 ka tuig kanhi, siya nakatabang sa pagtukod sa ilang unang kongregasyon. Karon ang lungsod duna nay upat ka dagkong mga kongregasyon. Ang iyang mga estudyante sa Bibliya, nga dugay nang malig-on, matinumanong mga Saksi, nalipay kaayo sa pag-abiabi kaniya. Sa dihang miabot si Brader Corwin sa Haiti, ang mga magmamantala sa nasod wala makaabot ug 900, ug ang sangang buhatan​—usa ka gamay, inabangan nga balay​—dunay duha ka trabahante.

Usa ka bag-ong sanga ang natukod sa Haiti sa 1986, apan kini apiki na usab. Ang bag-ong gidedikar, gipadakong sanga makapapuyo ug 40 ka membro sa pamilyang Bethel, nga nag-alagad sa kapin sa 12,000 ka magmamantala. Ang mga boluntaryo nga gikan sa Alemanya, Australia, Britanya, Canada, Denmark, ug Tinipong Bansa mitabang sa buluhaton sa pagtukod. Ilang gibansay usab ang mga boluntaryo nga taga-Haiti ug mapuslanong mga kahanas sa pagtukod.

Tungod sa kakulang ug mga gamit sa pagtukod, ang bug-at nga mga makinarya ug halos ang tanang materyales sa pagtukod kinahanglang paliton pa gikan sa ubang nasod. Kini nakalangan usahay apan wala makapahunong sa trabaho. Ang adlaw sa dedikasyon miabot sa Sabado, Nobyembre 23, 2002. Ang 3,122 ka tumatambong naglakip sa 240 ka delegado gikan sa 13 ka nasod. Si David Splane sa Nagamandong Lawas ang mihatag sa pakigpulong sa dedikasyon. Pagkasunod adlaw, kapin sa 20,000 ang mitambong sa linain nga programa sa Sylvio Cator Stadium sa Port-au-Prince.

“Manindog kita, ug magtukod.” (Neh. 2:18) Kining makapadasig nga mga pulong, nga gisulti sa matinumanong mga Hudiyo sa panahon ni Nehemias, migawas sa pasukip sa Hunyo 2000 nga gula sa Atong Ministeryo sa Gingharian sa Hungaria. Ang katawhan ni Jehova sa tibuok nasod gidapit sa pagtabang sa pagtukod sa bag-ong bilding sa sanga sa Budapest. Gihawasan sa tanang 251 ka kongregasyon sa nasod, 13,741 ka boluntaryo ang mitabang sa  proyekto, nga mikabat ug duha ka tuig sa pagtukod ug pag-ayo sa pasilidad sa militar kaniadto. Ang programa sa dedikasyon, nga gitambongan sa 554 ka dinapit gikan sa 22 ka kayutaan, gihimo sa Mayo 10, 2003. Ang membro sa Nagamandong Lawas nga si Guy Pierce ang mihatag sa pakigpulong sa dedikasyon, “Si Jehova ang Nagpatubo Niini.”

Ang pagpadako sa sanga nahimo nang regular nga bahin sa Mexico. Ang 14 ka bag-ong mga bilding, nga gidedikar niadtong Marso 15, 2003, maoy dugang niadtong gipahinungod sa 1974, 1985, ug sa 1989. Ang pag-ugbok sa 860,000 piye kuwadrado nga pundasyon sa bag-ong mga bilding maoy dako kaayo nga problema tungod sa duha ka katarongan. Una, ang yuta hugka tungod kay lanaw kaniadto ang maong lugar. Ikaduha, ang lugar kanunayng linogon. Busa, aron makatukod ug lig-on, luwas nga pundasyon,  nagbugsok ang mga trabahante ug 3,261 ka pilote, ang matag usa sa giladmong mga 80 piye! Ang pagplano ug pagtukod mikabat ug 12 ka tuig ug naglangkit ug 28,600 ka boluntaryong mga trabahante gikan sa Mexico ug 734 gikan sa gawas sa nasod.

Tulo ka membro sa Nagamandong Lawas dunay bahin sa programa sa dedikasyon. Si Guy Pierce naghisgot bahin sa mas dakong kalipay nga maangkon tungod sa pagkabaton ug suod nga relasyon uban kang Jehova. Gisaysay ni Theodore Jaracz kon sa unsang paagi ang mga panalangin sa matinumanong dalan sa pag-alagad sa Diyos mas dako kay sa mga pagsulay nga pagaagoman sa mga Kristohanon panahon sa kataposan. Ug si Gerrit Lösch, nga nag-Kinatsila, mihatag sa pakigpulong sa dedikasyon, “Simbaha ang Diyos sa Kamatuoran!”

Sa Nobyembre 23, 2002, gipahinungod sa sanga sa Peru ang pipila ka mga pasilidad, lakip ang usa ka maanindot nga bag-ong lima-ka-andanang bilding alang sa opisina ug pinuy-anan. Si Gerrit Lösch mihatag sa pakigpulong sa dedikasyon, “Pagpadako Mosangpot ug Kadayeganan ni Jehova.” Pagkasunod adlaw, sa Dominggo, 59,940 ang nagtigom diha sa San Marcos Stadium sa Lima, diin ang linain nga programa naghisgot sa dagayang panalangin ni Jehova sa buluhaton sa Gingharian sa Peru. Ug klarong makita kanang maong panalangin! Sa 1946 sa dihang miabot ang unang mga misyonaryo aron manguna sa buluhaton, pipila lang ang mga magmamantala ug mga interesado sa nasod. Karon ang Peru aduna nay 87,318 ka magmamantala ug 916 ka kongregasyon.

 Diha sa sanga sa Rusya, 600 ka dinapit ug 350 ka membro sa pamilyang Bethel​—sa tingob naghawas sa 30 ka nagkalainlaing nasod—​nagtigom sa Mayo 17, 2003, sa pagsaksi sa dedikasyon sa bag-ong mga bilding nga puy-anan, mga opisina, ug mga pasilidad sa bodega. Ang dedikasyon sa miagi gihimo sa unom pa lang ka tuig nga milabay, busa nganong nagtukod na usab dayon?

Ang sanga sa Rusya, nga nahimutang sa Solnechnoye sa kadaplinan sa St. Petersburg, nag-atiman sa buluhaton sa pagsangyaw sa Gingharian sa napulo ka nasod. Kapin sa 100 ka pinulongan ang ginasulti niining dako kaayong rehiyon, nga gilangkoban ug 11 ka time zone. Busa, ang paghubad maoy usa ka panguna ug nagdakong bahin sa buluhaton sa sanga. Sa pagkakaron ang mga igsoon naghubad sa pinasukad-sa-Bibliya nga literatura ngadto sa 34 ka pinulongan. Dugang pa, sukad sa miagi nga dedikasyon, ang gidaghanon sa mga magmamantala sa dapit mitubo ug kapin sa 40,000​—halos 7,000 sa usa ka tuig! “Ug ang pag-uswag nagpadayon,” nagsulat ang sanga. Busa agig sanong sa dagayang panalangin ni Jehova, ang mga igsoon sa Rusya nalipay sa ‘paglugway sa pisi sa ilang mga tolda.’​—Isa. 54:2.

Mitambong sa dedikasyon sa Sabado mao ang daghang matinumanong mga tigulang nga nag-antos pag-ayo sa paglutos panahon sa paggahom sa Sobyet. Ang tanan namati pag-ayo samtang gipahayag ni David Splane ang diskurso sa dedikasyon, “Pun-on Ko Kining Balaya sa Himaya,” nga gipasukad sa Haggeo 2:7. Iyang gisaysay nga bisan pag maanindot ug makahatag ug kadayeganan ang bag-ong mga bilding, ang labing importante mao ang diyosnong panggawi ug espirituwal nga mga hiyas sa matag indibiduwal nga Kristohanon nga makahatag ug himaya kang Jehova ug makapatahom sa matuod nga pagsimba. Sa Dominggo, giagwanta sa 9,800 ang tugnawng habohabo sa pagpamati sa linain nga programa diha sa Kirov Stadium sa St. Petersburg.

Sa tibuok kalibotan, ang total nga 19,848 ka ordinadong mga ministro nag-alagad sa mga pasilidad sa sanga. Ang tanan maoy mga membro sa Tibuok Kalibotan nga Orden sa Espesyal Bug-os-Panahong mga Alagad sa mga Saksi ni Jehova.

 [Chart/Mga hulagway sa panid 12, 13]

PIPILA KA PANGHITABO SA 2003 NGA TUIG SA PAG-ALAGAD

Septiyembre 1, 2002

Septiyembre 1: Ang mga tun-anang artikulo sa Bantayanang Torre mabatonan diha sa video nga American Sign Language.

Nobyembre 23: Dedikasyon sa sanga sa Haiti ug Peru.

Enero 1, 2003

Enero 1: Ang mga kongregasyon nagsugod sa paggamit sa bag-ong tun-anang libro nga Pahimusli ang Edukasyon sa Teokratikanhong Tunghaan sa Ministeryo.

Pebrero 15: Dedikasyon sa sanga sa Guyana.

 Marso 15 ug 29: Dedikasyon sa sanga sa Mexico ug Côte d’Ivoire.

Abril 16: Gibilanggo sa kapolisan sa Asmara, Eritrea, ang 164 nga mitambong sa Memoryal.

Mayo 1, 2003

Mayo 10 ug 17: Dedikasyon sa sanga sa Hungaria ug Rusya.

Mayo 20: Ang mga Saksi ni Jehova legal nga girehistro sa Kosovo.

Mayo 22: Legal nga giila sa Romania ang relihiyong mga Saksi ni Jehova. Ang husay sa pagdili sa mga Saksi sa Moscow gihunong.

Agosto: Bag-ong MAN Roland Lithoman nga imprentahan gitaod didto sa sanga sa Britanya.

Agosto 31, 2003

Agosto 31: Diha sa nagakaugmad nga kayutaan, 7,730 ka Kingdom Hall na ang natapos sukad sa Nobyembre 1999. 6,429,351 ka magmamantala sa 235 ka kayutaan.

[Mga hulagway]

Haiti

Peru

[Graph sa panid 11]

(Tan-awa ang publikasyon)

Pagtubo sa gidaghanon sa mga pinulongan:

Tanang publikasyon

“Ang Bantayanang Torre”

“Pagmata!”

400

300

200

100

1880 1920 1960 2000

[Hulagway sa panid 14]

Mga instruktor sa Course in Improved English Comprehension, ug ilang mga asawa

[Hulagway sa panid 22, 23]

Makina sa pag-imprenta gitandi sa bus sa siyudad

Gidak-on sa makina sa pag-imprenta:

Gitas-on: 133 piye

Gihabogon: 18 piye

Gibug-aton: 201 tonelada

[Mga hulagway sa panid 28, 29]

Ang dili pa dugay nga gipahinungod nga mga pasilidad sa sanga sa (1) Guyana, (2) Hungaria, ug (3) Côte d’Ivoire