Sulat Gikan sa Nagamandong Lawas

Minahal nga mga Igsoong Lalaki ug Babaye:

“HINAOT nga kamo adunay dili-takos nga kalulot ug kalinaw gikan sa Diyos nga atong Amahan ug sa Ginoong Jesu-Kristo.” (1 Cor. 1:3) Kami nangandoy gayod sa panahon dihang ang tanang buhing mga butang magahimaya kang Jehova nga maoy nahiangay kaniya! (Sal. 150:6) Samtang naghulat kita nianang dakong adlaw, kita magpadayon sa pagwali sa maayong balita sa Gingharian sa Diyos ug sa paghimog mga tinun-an.

Ang ministeryo nga pag-ebanghelyo mao karon ang gihatagan ug pagtagad sa mga buluhaton ni Jehova dinhi sa yuta. (Mar. 13:10) Kay kita nahibalo nga interesado si Jehova niining buluhatona, kita moampo sa Diyos aron kita tabangan sa pagtuman niining buluhatona, nga nahibalo nga ang matag tawo dunay higayon nga makapahimulos gikan sa tagana nga lukat. (Pin. 14:​6, 7, 14, 15) Tinuod, kita nag-atubang ug daghang malisod nga mga problema, apan kita mapasalamaton gayod nga ‘nasul-oban sa gahom gikan sa itaas’ aron mahimo kining maong ministeryo!​—Luc. 24:49.

Makapalipay ang pagsubli sa miaging tuig sa pag-alagad ug sa pagpalandong kon unsay nahimo ni Jehova pinaagi sa iyang maunongong mga alagad. Kay gipalihok sa balaang espiritu, ang katawhan sa Diyos nagpasundayag ug gugma nga sama nianang kang Kristo, nga nagbuntog sa pagdumot sa tibuok kalibotan. Ang maong gugma nadayag diha sa atong mga kombensiyon. Gikan sa Hunyo ngadto sa Disyembre 2003, ang mga delegado nga gikan sa kapin sa usa ka gatos ka kayutaan mibiyahe ngadto sa 32 ka internasyonal nga mga kombensiyon nga gihimo diha sa unom ka kontinente. Ang mga misyonaryo, internasyonal nga mga alagad, ug mga taga-Bethel nga nag-alagad sa langyawng nasod giinterbiyo diha sa distrito ug internasyonal nga mga kombensiyon.

Niining mga kombensiyona, atong nadawat ang mga publikasyong “Tan-awa ang Maayong Yuta” ug Pagkat-on Gikan sa Dakong Magtutudlo. Dugang pa, gipahibalo nga usa ka rebisadong libro sa Tunghaan sa Payunir nga Pag-alagad ang gieskedyul nga ipagula sa kataposan sa 2004 nga tuig sa pag-alagad. Sa inanay, ang dugay-nang mga payunir nga nakatambong  na sa tunghaan moduyog sa mga klase nga langkoban sa bag-ong mga payunir.

Ang tabang sa Diyos ug ang tawhanong pagkamahinatagon maoy nagpaposible sa pagtukod ug mas daghan pang mga Kingdom Hall, ilabina sa kayutaan nga menos ug kahinguhaan. Tungod sa nagkadakong panginahanglan sa tibuok kalibotan ug espirituwal nga pagkaon, ang mga proyekto sa pagpadako sa sanga gikamulo ug tukod diha sa daghang dapit. Ang brosyur nga Tagamtama ang Kinabuhi sa Yuta sa Walay Kataposan! karon mabatonan na sa 299 ka pinulongan, nga may total nga naimprenta nga 139 ka milyong kopya; ang Kahibalo nga Motultol sa Kinabuhing Walay Kataposan misobra na sa 93 ka milyong kopya diha sa 161 ka pinulongan; ug kapin sa 200 ka milyong kopya sa brosyur nga Unsay Gikinahanglan sa Diyos Kanato? ang naimprenta sa 267 ka pinulongan.

Kinasingkasing namong gipahalipayan ang 258,845 nga nagpasimbolo sa ilang pagpahinungod pinaagi sa bawtismo sa tubig sa miaging tuig sa pag-alagad! Bisan pag ang inyong pagsuportar sa Gingharian sa Diyos naghimo kaninyo nga mahimong linain nga mga puntirya sa kasuko ni Satanas, kini naghimo usab kaninyo nga linain nga mga magdadawat sa panalangin ug espirituwal nga panalipod ni Jehova samtang ginadagan ninyo ang lumba nga anaa sa inyong atubangan. (Heb. 12:​1, 2; Pin. 12:17) Oo, makasalig kamo nga ‘ang Usa nga nagabantay kaninyo dili mahimong magduka.’​—Sal. 121:3.

Ang 2004 nga tinuig nga teksto, “Magpadayon sa pagbantay . . . Pamatud-i ninyo nga kamo andam,” tukma gayod sa panahon. (Mat. 24:​42, 44) Ang mga Kristohanon gihubit sa Pulong sa Diyos ingong temporaryong mga molupyo niining himalatyong sistema sa mga butang. (1 Ped. 2:​11; 4:7) Busa, kinahanglan nga atong ibug-os ang atong hunahuna diha sa espirituwal nga mga butang, himoon ang atong kinabuhi nga simple, ug susihon pag-ayo ang atong mga kasingkasing. “Ang dakong dragon” nagtinguha sa pagtukob kanato, aron kita malangkob diha sa iyang sistema sa mga butang.​—Pin. 12:9.

Aron kita padayon nga makabantay, hinungdanon nga basahon nato ang Bibliya kada adlaw. Kini makatabang kanato aron mahimo ang ‘atong Oo nga magkahulogang Oo’ maylabot sa atong pagpahinungod ug aron ‘mahuptan pag-ayo ang pagsalig nga atong nabatonan sa sinugdan nga malig-on hangtod sa kataposan.’ (Sant. 5:​12; Heb. 3:14) Ang pagbasa sa Bibliya  kada adlaw makatabang kanato sa paghinumdom nga halayo na kaayo ang kalibotan gikan sa walay-pagkausab nga mga sukdanan sa Diyos. (Mal. 3:6; 2 Tim. 3:​1, 13) Ang kahibalo bahin sa Bibliya makatabang kanato sa paglikay sa “inantigong pagkamugna nga mga bakak nga sugilanon” ug sa pagpabiling matinumanon ngadto kang Jehova.​—2 Ped. 1:​16; 3:11.

Mga ginikanan, samtang inyong gimatuto ang inyong mga anak sa disiplina ug pahamatngon ni Jehova, sila ba inyong gitabangan nga magbaton ug espirituwal nga mga tumong ug “magpadayon sa pagbantay”? (Efe. 6:4) Sila ba inyong gibansay sa paglantaw sa ilang umaabot nga sama nianang paglantaw sa labing maalamong tawo nga nabuhi sukad? Si Jesus may ikasarang nga mahimong labing hawod nga karpintero, imbentor, o doktor nga nabuhi sukad, apan iyang gipangagpas ang bug-os-panahong ministeryo. Hinaot nga ang iyang panig-ingnan mopalihok sa inyong mga anak sa pag-una sa mga intereses sa Gingharian diha sa ilang kinabuhi.

Ang matinumanong ulipon nga matang, nga gihawasan sa Nagamandong Lawas, mapasalamaton kaayo sa “dakong panon” sa pagtabang kanamo sa pagtuman sa among obligasyon nga ‘kining maayong balita sa gingharian mawali sa tibuok gipuy-ang yuta ingon nga pagpamatuod.’ (Pin. 7:9; Mat. 24:​14, 45) Kamo nga mga minahal makasalig kang Jehova nga siya dili malimot sa ‘inyong buhat ug sa gugma nga inyong gipakita alang sa iyang ngalan, sa pagkaagi nga kamo nag-alagad sa mga balaan ug nagpadayon sa pag-alagad.’ (Heb. 6:10) Samtang magbasa kamo sa makapaikag kaayo nga mga eksperyensiya ug makakita sa mga resulta sa inyong hiniusang paningkamot diha sa mga panid nga mosunod, hibaloi nga kamo dunay dakong bahin sa paghatag niining tibuok-kalibotan nga pagpamatuod.

Hinaot nga inyong atubangon ang umaabot nga may kaisog samtang kamo padayong ‘motutok ngadto sa pagbayad sa ganti,’ nga dili tugotan ang tawo o demonyo nga magkuha niana gikan kaninyo. (Heb. 11:26; Col. 2:18) Oo, salig kang Jehova, nga may dakong pagtuo nga siya motabang sa tanan nga nahigugma kaniya nga makabaton ug kabug-osan sa kinabuhi.​—Juan 6:​48-​54.

Gipaabot namo ang among kalipay diha sa pag-alagad uban kaninyo sa kadayeganan sa himaya ni Jehova.

Inyong mga igsoon,

Nagamandong Lawas sa mga Saksi ni Jehova