Tibuok-Kalibotang Taho

◼ UROPA

Gidaghanon sa kayutaan: 46

Populasyon: 728,162,887

Gidaghanon sa mga magmamantala: 1,476,554

Gidaghanon sa mga pagtuon sa Bibliya: 697,044

Ang pipila dugay kaayong makadesisyon sa pagdawat sa dalan sa kamatuoran. Sa 1951, gisilbihan ni Steponas ang iyang sentensiya ingong binilanggo tungod sa politika diha sa kampo sa Kazakhstan. Didto siya nagtrabaho uban kang Edvardas, usa ka madasigon nga batan-ong Saksi sa Lithuania kinsa napriso tungod sa pag-imprenta sa magasing Bantayanang Torre. Gipaambit ni Edvardas ang iyang paglaom nga gipasukad sa Bibliya, ug si Steponas nakombinsir nga nakaplagan niya ang kamatuoran. Sa 1955, si Steponas gibuhian. Sa dihang nagbulag, giingnan siya ni Edvardas: “Tingali magkita ra unya kita sa umaabot.” Bisan pag dili pa bawtismado si Steponas, ang Soviet State Security Committee nagtuo nga usa na siya ka Saksi  ni Jehova. Girekisa sa kapolisan ang iyang apartment ug gikompiskar ang mga dokumento nga dunay listahan sa mga adres sa mga igsoon. Tungod niini, wala na siyay kontak sa katawhan sa Diyos.

Milabay ang 47 ka tuig. Si Steponas nagpuyo diha sa usa ka gamayng baryo sa amihanan sa Lithuania diin walay mga Saksi. Dayon sa tingpamulak sa 2002, siya nakabaton ug pipila ka literatura ug nagpadala pinaagig koreyo ug usa ka kupon ngadto sa sangang buhatan sa mga Saksi ni Jehova sa Lithuania nga naghangyo sa librong Ang Sekreto sa Kalipay sa Pamilya. Siya miingon: “Nagpadala ako ug kupon, nga naglaom nga makontak nako pag-usab ang mga igsoon.” Usa ka magtiayon nga espesyal payunir mibiyahe aron sa pagpakigkita kaniya ug sa pagtuon sa Bibliya uban niya. Walay usa ka tuig sa ulahi, si Steponas gibawtismohan sa edad nga 80.

Nagkita ba sila pag-usab ni Edvardas, kinsa sa halos singkuwenta ka tuig na nga milabay miingon: “Tingali magkita ra unya kita sa umaabot”? Oo, nagkita sila! Sa pagkasunod adlaw human nga siya gibawtismohan, kining duha ka lalaki, nga karon espirituwal nga managsoon na, mainitong naghalogay ug nagkalipay.

Sa Britanya, si Tim ug Sam, nga pulos 11 anyos ang edad ug dili-bawtismadong mga magmamantala, nagsangyaw uban sa inahan ni Tim. Ang mga bata nagkinahanglan ug bag-ong mga bag nga kasudlan sa ilang mga Bibliya ug literatura, apan kuwarta ang problema. Sayo pa niana, sa wala pa magsugod sa pag-alagad sa kanataran nianang adlawa, ang mga inahan sa duha ka batan-ong mga magmamantala nag-ampo bahin niini. Diha sa kataposang balay nga pagaduawon nianang buntaga, si Tim ang nakigsulti sa tagbalay ug mibasa sa usa ka teksto sa Bibliya ngadto kaniya. Ang tagbalay misalga aron sa pagpangutana kaniya kon unsay iyang relihiyon. Sa dihang mitubag si Tim nga usa siya sa mga Saksi ni Jehova, gikasab-an siya sa babaye ug giingnan ang iyang inahan nga dili siya makasabot kon nganong pasagdan sa mga Saksi ang ilang mga anak nga mamatay inay modawat ug pag-abonog dugo.

Gisugyotan sa inahan ni Tim ang babaye nga ipangutana kini ngadto sa mga bata kon unsay ilang hunahuna bahin niini, ug tuod man gipangutana sa babaye kining butanga. Si Tim misaysay nga siya mopili gayod ug laing pamaagi sa pagtambal imbes lapason niya  ang iyang binansay-sa-Bibliya nga konsensiya. Dayon si Sam miingon nga ang iya mismong igsoong babaye nakadawat ug laing pamaagi sa pagtambal ug mas dali nga naulian kay sa mga pasyente nga giabonohan ug dugo.

Gibali na usab sa tagbalay ang iyang pagtagad ngadto sa inahan ni Tim. Niining higayona iyang gipahayag nga siya wala makaangay sa pagpauban sa mga bata diha sa pagsangyaw. Ang duha ka bata mitubag nga malipay sila nga mosangyaw, ug midugang nga mas gusto nila kini kay sa paglibodlibod sa kadalanan sama sa ubang mga bata nga kaedad nila. Kay nakadayeg sa ilang tubag, gisultihan sa tagbalay ang mga bata sa paghulat makadiyot ug misulod siya sa iyang balay. Nakurat gayod sila sa dihang siya mibalik ug gihatagan silang duha ug nindot, bag-ong bag nga panit nga maayong gamiton sa ilang pagsangyaw! Ang iyang panginabuhian maoy pagpamaligya ug mga bag. Kay nausab na man ang iyang tinamdan, ang mga bata nakahikay ug pagbalikduaw. Sa dihang talilakaw na sila, ang 94-anyos nga inahan sa tagbalay, nga nagapamati, miduol sa pultahan ug mihangyo sa inahan ni Tim nga duawon siya diha sa iyang kaugalingong balay.

Duha ka sister nga nagsangyaw nakakita niining mosunod nga mensahe nga gipaskin diha sa hunonganan sa bus sa Portugal: “Usa ako ka estudyante sa sikolohiya ug nag-andam ug thesis bahin sa ulohan nga patuotuo. Kon makatabang ka kanako, palihog tubaga ako pinaagig E-mail sa mosunod nga adres . . .” Nianang hapona ang mga sister nagtanyag ug artikulo sa Ang Bantayanang Torre nga nag-ulohang “Gigamhan ba sa mga Patuotuo ang Imong Kinabuhi?” Busa sila midesisyon sa pagtubag sa E-mail ug sa pagtanyag sa magasin.

Paglabay sa usa ka semana ang babaye nga nagpaskin sa mensahe nagpadala kanila sa mosunod nga tubag: “Salamat sa inyong pagtagad. Pasayloa ako nga nalangan ako sa pagtubag. Gusto ko nga modawat sa magasin nga inyong gihisgotan. Dili pa dugay, sa matag higayon nga duolon ako sa mga Saksi, kanunay akong magdali sa pag-adto sa trabaho o sa pag-apas nga makasakay sa bus ug wala ako makahinabi kanila. Nahibalo ako nga nagtanyag kamo ug mga pagtuon sa Bibliya, ug interesado akong magpatuon.”

 Ang mga sister miingon: “Sa among unang pagbisita daghan siya ug mga pangutana. Among gihatag kaniya ang librong Kahibalo ug naghikay ug pagtuon sa Bibliya uban kaniya. Siya kanunay gayod nga mangandam ug maayo sa iyang pagtuon ug karon tigtambongan na sa tanang tigom sa kongregasyon.”

Samtang nagsangyaw sa kadalanan, si Lina, nga usa ka magmamantala sa siyudad sa habagatang Alemanya, giduol sa usa ka babaye nga ginganlag Tatjana. “Nakaila ka ba nako?” si Tatjana nangutana. Si Lina mitubag nga wala. “Dili kana ikatingala,” mipadayon si Tatjana. “Kausa ra kita magkita, lima ka tuig na ang nakalabay.” Siya mipadayon sa pag-ingon: “Sa tingpamulak sa 1998, giduol ko nimo diha sa dalan ug gitanyagan ako ug brosyur nga Unsay Gikinahanglan sa Diyos Kanato? Dili maayo ang akong pagtagad kanimo, apan ang imong maluloton ug mahigalaong disposisyon maoy nagtukmod kanako sa pagdawat sa brosyur ug sa pagbasa niana. Natandog gayod ako sa unod niana.” Sa ulahi, duha ka Saksi nga wala makaila kang Lina miduaw sa balay ni Tatjana. Tungod sa nabasa ni Tatjana diha sa brosyur, siya misugot sa usa ka pagtuon sa Bibliya. Sa dihang nagkita pag-usab sila ni Lina, sa 2003, siya maoy usa na ka bawtismadong Saksi. Gani, siya ug si Lina nag-oksilyare payunir nianang bulana!

Usa ka sister sa Pskov, Rusya, nakadawat gikan sa sangang buhatan ug adres sa usa ka tawo nga nagpuyo sa layo nga lugar. Dugay siya nga nakaabot sa lugar sa maong tawo. Sa nakaabot na siya sa kataposan, iyang nasuta nga ang lalaki wala mahibalo nga siya nakahangyo ug libreng pagtuon sa Bibliya. Diha sa usa ka tindahag mga magasin, ang lalaki nakapalit ug magasin nga ang gihimong bookmark mao ang usa ka ginunting nga kupon gikan sa usa sa atong mga tract. Ang lalaki miingon nga abi niyag dunay ganti nga gitanyag, busa iyang gipadala ang kupon nga naglaom nga siya dunay madaog. Ang sister mitubag: “Nakadaog ka ug libreng pagtuon sa Bibliya!” Ang lalaki ug ang iyang pamilya nagpakitag interes, ug gisugdan ang pagtuon sa Bibliya. Ang pagtuon ginadumala duha ka beses sa usa ka bulan, kay layo man ang balay sa maong pamilya gikan sa balay sa sister.

 ◼ OCEANIA

Gidaghanon sa kayutaan: 30

Populasyon: 34,355,946

Gidaghanon sa mga magmamantala: 93,718

Gidaghanon sa mga pagtuon sa Bibliya: 47,270

Ang 14-anyos nga si Alyce, nga nagpuyo sa Australia, migamit ug mga topiko gikan sa atong mga magasin sa pagpangandam sa mga asaynment sa eskuylahan. Sa usa ka semana niana siya nagsulat ug essay bahin sa pangutana, “Unsa Kahay Dangatan Niining Kahimtang sa Kalibotan?” Gisaysay diha sa essay ang kahulogan sa atong panahon sumala sa tagna sa Bibliya. Gipangutana siya sa iyang maestra kon unsay iyang relihiyon. Si Alyce mitubag nga siya nagtuon sa Bibliya uban sa mga Saksi ni Jehova, ug iyang gihatagan ang iyang maestra ug pipila sa atong mga magasin aron iyang mabasa.

Bisan pag naikag niining tanan ang maestra, gitambagan sa usa ka maestro ang maestra ni Alyce nga dili kini ipadayon. Apan,  human nakaobserbar sa maayong pamatasan ni Alyce sa pipila ka bulan, ang iyang maestra midesidir sa pagsusi pag dugang. Kay nabalaka nga basig si Alyce nakig-uban sa usa ka peligroso nga relihiyosong kulto, siya miadto sa lokal nga librarya ug mihulam sa librong Mga Saksi ni Jehova​—Mga Magmamantala sa Gingharian sa Diyos. Iyang gibasa ang tibuok tomo sa usa lang ka hinapos sa semana! Kay nakombinsir nga iyang nakaplagan ang kamatuoran, iyang giteleponohan ang inahan ni Alyce alang sa dugang literatura ug nagsugod sa pagtuon sa Bibliya uban sa mga Saksi. Sulod sa usa ka bulan, siya tigtambongan na sa tanang miting ug giaghat ang iyang bana ug ang iyang inahan sa pagtambong sa mga miting sa Dominggo. Sila usab nagsugod sa pagtuon sa Bibliya ug naghimog maayong kauswagan. Sulod sa tulo ka bulan, ang maestra nahimong usa ka dili-bawtismadong magmamantala ug mihatag sa iyang unang pakigpulong ingong estudyante diha sa Teokratikanhong Tunghaan sa Ministeryo. Paglabay sa pipila ka bulan, si Alyce ug ang iyang maestra, si Linda, gibawtismohan sa samang adlaw.

Handurawa nga nagpuyo ka sa isla diin ikaw lang ang magsisimba ni Jehova! Sa Marshall Islands, mao kanay kahimtang sa usa ka sister kansang bana midawat ug trabaho diha sa isla sa Mejatto. Gidapit siya sa mga silingan sa pagsimba sa simbahan sa Protestante, apan siya mibalibad. Gipunting hinuon niya ang iyang pagtagad sa pagtudlo sa iyang mga anak ginamit ang Akong Basahon sa mga Estorya sa Bibliya. Iyang gipaambit usab ang iyang pagtuo uban sa mga silingan, nga magkugos sa iyang masuso sa dihang mamalaybalay. Sa ngadtongadto, ang uban nagpakita ug interes, ug kining nahilit nga sister nagdumala na karon ug daghang pagtuon sa Bibliya ginamit ang brosyur nga Gikinahanglan. Matag bulan magpadala siya ug report sa pag-alagad ngadto sa iyang gianiban nga kongregasyon kanhi. Uban sa iyang mga anak, mobiyahe siyag layo nga mosakay ug barko aron sa pagtambong sa Memoryal ug sa mga asembliya nga himoon sa isla sa Ebeye. Ang mga membro sa kongregasyon sa Ebeye nagpadalag mga sulat sa pagdasig kaniya, nga nag-asoy sa mga eksperyensiya sa pag-alagad sa kanataran ug sa mga butang nga ilang nakat-onan sa mga tigom sa kongregasyon. Sila, sa baylo, nadasig pag-ayo niining matinumanong panig-ingnan sa nahilit nga sister.

 Daghang lagyong mga baryo sa Papua New Guinea walay koryente. Ang mga tawo didto mogamit ug mga generitor o mga baterya sa pagpaandar sa mga gamit nga dekoryente. Aron matabangan ang mga tawo sa iyang baryo nga makasabot ug dugang sa Bibliya, usa ka bag-ong nabawtismohang sister gustong magpasalida ug pipila ka video nga gihimo sa mga Saksi ni Jehova. Human nakakuwarta pinaagi sa pagpamaligya sa mga abot sa iyang pananom, iyang giduol ang lokal nga babayeng negosyante nga dunay telebisyon, VCR, ug generitor sa paghangyo kon puwede ba niyang abangan kining maong tulo ka gamit. Gisaysay sa atong sister nga gusto niyang dapiton ang tibuok baryo aron sa pagtan-aw ug pipila ka pinasukad-sa-Bibliya nga mga video nga iyang gituohan nga makatabang kanila sa espirituwal nga paagi. Gimenosan dayon sa babayeng negosyante ang abang sa gamay lamang nga kantidad, nga nag-ingon nga siya usab gustong motan-aw sa mga video. Halos tanan sa baryo miabot. Human niana, daghan ang mikomento nga sila walay ideya nga ang buluhaton sa mga Saksi ni Jehova ginahimo diay diha sa daghang dapit. Sila nakadayeg usab sa tibuok-kalibotan nga panag-igsoonay, usa ka butang nga wala nila makita diha sa ilang kaugalingong relihiyon. Daghang imbitasyon ang nadawat sa sister ngadto sa mga balay sa mga tawo nga kaniadto dili makigsulti sa mga Saksi apan karon sila buot nga makakat-on pag dugang sa atong mga pagtulon-an.

Sa Savaii, ang kinadak-ang isla sa Samoa, ang ubang mga lider sa komunidad nagdili sa mga Saksi ni Jehova sa pagsangyaw sa ilang mga baryo. Usa ka sister nga nagpuyo niini nga baryo nagpabiling malig-on sa kamatuoran sa dihang naghikay sa paglubong sa iyang anak nga lalaki. Kay diha man sa iyang balay himoon ang serbisyo sa paglubong, ang mga igsoong lalaki ug babaye sa duha ka kongregasyon sa isla mitabang sa paglimpiyo sa balay ug lagwerta ug sa pag-andam sa generitor. Nakita sa mga tawo sa baryo kining mahigugmaong tabang. Ang paagi sa mga brader sa pag-organisar ug pagdumala sa paglubong lahi kaayo sa kostumbre sa Samoa.

Duha ka adlaw human sa paglubong, ang konseho sa baryo nagpatawag ug miting ug gihisgotan ang maong okasyon. Ang tanang membro niini nakadayeg kon giunsa pagtabang sa mga Saksi  ang pamilya, sa wala pa ug human sa paglubong. Ang mga pangulo sa baryo natandog pag-ayo sa pagdumala sa paglubong nga tungod niana silang tanan nagkauyon sa pag-usab sa mga kostumbre sa paglubong sama nianang sa Faa-Molimau a Ieova (Ang Paagi sa mga Saksi ni Jehova). Paglabay sa duha ka adlaw, ang tinuig nga Memoryal sa kamatayon ni Kristo gihimo diha sa gamayng Kingdom Hall nga mga pipila ka kilometros ang gilay-on. Gihatod sa tulo ka trak nga pik-ap ang mga pamilya gikan niining baryoha aron makatambong. Karon ang atong mga igsoong lalaki ug babaye wala na did-i sa pagsangyaw niini nga baryo, ang usa sa kinadak-an diha sa isla. Duha ka espesyal payunir nagdumala ug unom ka pagtuon sa Bibliya didto. Ang Pagtuon sa Libro sa Kongregasyon gitambongan dili lamang sa mga interesado sa baryo kondili sa pangulo usab sa baryo.

Sa Fiji usa ka batan-ong lalaki naglingkod ilalom sa punoan sa kahoy nga naghunahuna bahin sa iyang kinabuhi ug sa umaabot. Iyang gidapit ang usa ka lumalabay sa paglingkod tapad niya. Ang lumalabay usa diay ka igsoon, kinsa nagpahimulos sa higayon sa pagpamatuod. Ang batan-ong lalaki nakadungog na kaniadto sa saad sa Bibliya bahin sa usa ka paraisong yuta, ug ang pagpakighisgot uban sa igsoon nakapukaw pag-usab sa iyang interes. Siya mihukom sa pagpauli sa isla nga gipuy-an sa iyang inahan ug nagsugod sa pagtuon sa Bibliya. Sa dihang miabot siya didto, gidaot sa mga membro sa pamilya nga supak sa iyang bag-ong nakaplagang pagtuo ang mga tanom nga iyang gisugdan pagtikad. Gimandoan siya sa hepe sa baryo sa pagpahawa, nga nag-ingon nga dili sila motugot ug laing relihiyon gawas nianang ilang relihiyon. Sunod miadto siya sa baryo sa iyang amahan diha sa laing gamayng isla. Didto naghimo siya ug baroto nga gama sa daang sin, ug kada semana mamugsay siya ug daghang kilometros sa pagtabok sa baloron nga dagat aron makigkita sa mga Saksi. Ang pagsupak sa pamilya nagpadayon, ug siya napugos sa pagpuyo nga samag ermitanyo diha sa hilit nga bahin sa isla. Sa kataposan, siya nakabalhin ngadto sa pangunang isla, duol sa usa ka dakong kongregasyon. Siya nagpadayon sa pag-uswag sa espirituwal ingong usa ka dili-bawtismadong magmamantala.

 ◼ MGA NASOD SA AMERIKA

Gidaghanon sa kayutaan: 56

Populasyon: 857,137,983

Gidaghanon sa mga magmamantala: 3,095,083

Gidaghanon sa mga pagtuon sa Bibliya: 2,898,369

Usa ka Dominggo sa buntag sa Septiyembre 2002, usa ka sister sa Tinipong Bansa nagbalikduaw sa usa ka tag-iyag tindahan. Kay okupado siya sa mga kustomer niadtong tungora, ang sister naglakawlakaw diha sa tindahan. Siya nakamatikod ug usa ka babaye nga nagdali sa pagpalit ug mala, nga rosaryohan sa Hindu. Ang mala maoy usa ka tuhog sa kapehon-ug-kolor nga mga lobitos nga gamiton sa pagsumaysumay sa mga pag-ampo ngadto sa daghang diyos sa Hindu. Ang babaye nga ginganlag Shwe, morag may nakitang mala nga iyang nagustohan, ug sa maong higayon giduol siya sa atong sister ug miingon: “Tabi ra. Kana bang maong mala gama sa sandalwood?”

 “Oo! Nag-ampo ako sa diyos nga makakita ug maayong mala, ug karon may nakit-an na ako. Simhota ra!”

“Humota ini oy! Kinsa ba nga diyos ang imong ampoan pinaagi niini?”

“Aw, usahay kang Ganesa o kang Siva o kang Durga. Mag-ampo ako kanila pinaagi niini nga mala.”

“Nahibalo ka ba kon kinsa kanila ang labing dako nga diyos?”

“Naglibog ako bahin niana. Wala ako mahibalo kon kinsa ang labing dako nga diyos.”

“Ako naglibog usab kaniadto sa Hindu pa ako ug nagsimba niining maong mga diyos. Apan karon nahibalo na ako kon kinsa ang labing makagagahom nga Diyos. Ipakita ko kanimo. [Iyang gibasa ang Salmo 83:18.] Si Jehova nga Diyos mao ang Labing Makagagahom ibabaw sa tibuok yuta. Siya mas dako kay kang Siva, Ganesa, ug Durga. Makatudlo ako kanimo bahin sa labing makagagahom nga Diyos nga walay bayad.”

“Tinuod ka, tudloan mo ako bahin sa matuod nga Diyos? Karon ang tanan nakong mga pag-ampo gitubag gayod!”

“Sa unsang paagi?”

“Nag-ampo ako adlaw-adlaw nga makakita ug maayong mala aron pinaagi niana makaplagan nako ang matuod nga Diyos. Nag-ampo usab ako nga makakaplag ug tinuod nga higala nga makatabang kanako tungod kay ako walay higala. Unsay imong ngalan?”

“Mala ang akong ngalan, ug oo, ako mahimong higala nga mogiya kanimo pinaagi sa Bibliya.”

“Dili ako makatuo nga ang Diyos naghatag kanako ug usa ka buhi nga Mala!”

Ang duha ka babaye nagsabot nga magtuon sa brosyur nga Gikinahanglan. Si Shwe tigtambongan na sa mga miting ug naghisgot bahin sa iyang tinguha nga magpabawtismo.

Sa Honduras usa ka misyonaryong sister nga naningkamot nga makakat-on ug Kinatsila misulod sa usa ka opisina ug nakapahimutang ug mga magasin sa receptionist. Dayon mikiring ang telepono  sa opisina, ug abi sa misyonaryong sister nga gidapit siya sa receptionist sa paglingkod, busa siya milingkod. Sayop ang iyang pagsabot. Gisultihan diay siya sa receptionist sa paghawa. Kasamtangan, usa ka babaye sa duol nga opisina dugay nang nangayog tabang pinaagi sa pag-ampo sa pagputol sa imoral nga relasyon uban sa lalaking minyo ug sa pagtuon sa dalawatong paagi sa pagsimba sa Diyos. Sa dihang nadunggan niya ang tingog sa atong sister diha sa hulatanan sa opisina, siya nagtuo nga ang iyang pag-ampo gitubag. Apan, sa dihang iyang nadunggan nga ang sister gipapahawa sa receptionist, siya nabalaka nga ang misyonaryo makalakaw na sa dili pa siya makapakigsulti kaniya. Apan, ang misyonaryo sa ulahi miingon: “Tungod kay wala kami magkasinabot sa receptionist, didto gihapon ako sa dihang ang babaye midalidali pagduol aron sa pagpakigsulti kanako. Kaming duha nagtuo gayod nga pagtultol kini ni Jehova.” Sa mga tuig nga nangagi, ang babaye nakabasa sa publikasyon sa mga Saksi ni Jehova, ug karon siya mihukom sa paghatag ug bug-os nga pagtagad sa espirituwal nga mga butang. Gibulagan na niya ang minyong lalaki ug nagtuon sa Bibliya ug tigtambongan na sa mga tigom.

Usa ka espesyal payunir nga sister sa El Salvador gitudlo ngadto sa usa ka kongregasyon diin pipila lang ang misanong sa kamatuoran. Siya miampo kang Jehova nga tabangan siya nga makakaplag ug mga interesado. Usa ka Dominggo niana nakahibalag siya ug batan-ong lalaki nga iyang napakigsultihan bahin sa Bibliya. Iyang gidawat ang librong Kahibalo ug misugot nga duawon siya pag-usab. Ang sister makadaghang higayon nga mibalik sa pagduaw, apan dili gayod niya siya masapnan sa balay. Apan iyang nakaila ang asawa sa maong lalaki, nga wala kaayo magpakita ug interes sa Bibliya. Sa ikalimang pagduaw, siya gidapit sa asawa sa pagsulod sa balay, bisan tuod ug miingon ang asawa nga “sulod sa diyes minutos lamang.” Gipangutana siya sa sister kon anaa ba ang librong Kahibalo. Nakita sa babaye ang libro, ug lakbit nga gihisgotan sa sister ang pipila ka punto sa libro ug gipasundayag ang kahikayan sa pagtuon sa Bibliya. Human sa tulo ka bulan nga pagtuon, ang babaye nagsugod sa pagtambong sa mga miting ug  nagpakitag tinuod nga mga ilhanan sa pag-uswag. Ug komosta ang iyang bana? Sa pagdagan sa panahon, ang bana miapil sa pagtuon. Dayon ang bana nagsugod sa pagtambong sa mga miting uban sa iyang pamilya. Kining maong magtiayon nagkamulo sa paghikay sa pagpalegal sa ilang kaminyoon. Ang pagkamalahutayon nga inubanan ug pag-ampo miresulta ug maayo.

Si Margarita, nga nagpuyo sa Mexico, nag-asoy bahin sa kalamposan sa iyang pagsangyaw sa impormal nga paagi: “Diha sa klase sa pagpanahi, nakigsulti ako sa usa sa akong kauban sa klase bahin sa Bibliya. Siya miingon nga nagtuo siya nga ang mga pamilya sa mga Saksi ni Jehova malipayon ug kinabuhi, kay sila mapahiyomon man kanunay ug morag masadyaon kaayo. Gisultihan nako siya nga husto ang iyang pagtuo ug nga ang tinuod nga kalipay masinatian niadtong nagsalig kang Jehova ug nagsunod sa mga prinsipyo sa Bibliya.” Gisugdan pagtuon ni Margarita diha sa balay ang iyang kauban sa klase, nga karon tigtambongan na sa mga miting ug nagmauswagon sa iyang kahibalo sa kamatuoran.

Sa Dominican Republic, si Ana nakabilin ug brosyur nga Gikinahanglan sa usa ka tawo nga morag nabalaka. Ang iyang asawa naospital aron magpaopera sa kanser. Siya miingon nga ang iyang asawa ganahan nga mobasa, busa iyang dad-on ang brosyur ngadto sa ospital. Sa ulahi nahibalag ni Ana ang asawa sa lalaki, kinsa miingon: “Makasugod na kita sa pagtuon. Andam na ako.” Siya miingon sa ulahi nga samtang didto pa sa ospital, siya mihangyo sa Diyos nga tultolan siya ngadto sa tinuod nga relihiyon. Niana mismong gutloa, gidad-an siya sa iyang bana ug brosyur nga Gikinahanglan. Iya kining gibasa nga nakaamgo nga kini ang tubag sa Diyos sa iyang pag-ampo, ug gipangagpas dayon niya nga mahimong usa sa mga Saksi ni Jehova. Bisan pag magbaktas siya ug kapin sa oras aron sa pagtambong sa mga miting sa Kingdom Hall, siya kusog nga miuswag ug wala magdugay naaprobahan ingong magmamantala. “Karon makatuman na ako sa akong panaad sa Diyos,” siya miingon. Walay unom ka bulan, siya gibawtismohan  sa distritong kombensiyon, ug karon siya nagpadayon sa pag-alagad kang Jehova nga malipayon.

Si Martin, nga usa ka 13-anyos nga magmamantala nga nagpuyo sa Paraguay, malipay sa pagpakigbahin sa impormal nga pagsangyaw. Usa ka adlaw niana samtang nagpaingon sa balay sa pagpauli gikan sa eskuylahan ug nagsangyaw sa usa ka lumalabay, may nakit-an siya nga usa ka gamayng pakete diha sa karsada. Gipunit kini ni Martin ug nakadiskobre nga kini dunay sulod nga kuwarta. Kay wala man siyay nakita nga nangita niini, iya kining gisulod sa iyang bulsa. Samtang nagpadayon siya sa iyang paglakaw, siya namalandong: ‘Pinaagi niining kuwartaha mabayran nako ang akong matrikula sa eskuylahan nga tulo ka bulan ug makatabang ako sa pagbayad sa galastohan sa akong mga ginikanan.’ Kasamtangan, wala lang makaamgo niana, siya miliko sa dalan nga dili niya kasagarang agian. Didto nakamatikod siya ug usa ka lalaki nga klaro kaayong dunay gipangita. Iyang nadunggan ang lalaki nga miingon nga nawad-an siya ug 115,000 ka guarani ($18.25, T.B.) ug mao na lang ang nahibiling kuwarta nga iyang magasto-gasto sa tibuok bulan. Nahinumdoman dayon ni Martin ang mga pulong sa usa sa mga ansiyano nga nagrepaso kaniya sa mga pangutana sa bawtismo. Ang ansiyano miingon: “Makaatubang ka ug daghang pagsulay, ug labi na karon nga magpabawtismo ka na.”

Si Martin nagkinahanglan gayod ug kuwarta. Nianang adlawa wala gani siyay igong makaon diha sa eskuylahan, mas labaw nang wala siyay kuwarta nga ibayad sa matrikula. Bisan pa niana, nga wala magduhaduha nga husto ba ang iyang gihimo, gipangutana ni Martin ang lalaki sa pagtino kon pilay iyang nawala nga kuwarta. Ang kuwarta nga nawala mao gayod ang kantidad sa kuwarta nga nakit-an ni Martin. Gihatag ni Martin kaniya ang kuwarta uban sa usa ka tract ug gisultihan siya nga usa siya sa mga Saksi ni Jehova. Kay nalipay, balikbalik nga gipasalamatan sa lalaki si Martin ug gigakos. Gihatagan sa lalaki si Martin sa iyang adres aron siya makaduaw kaniya. Si Martin gibawtismohan uban sa iyang mga ginikanan sa dili pa dugayng sirkitong asembliya.

 ◼ ASIA UG TUNGANG SIDLAKAN

Gidaghanon sa kayutaan: 47

Populasyon: 3,931,574,927

Gidaghanon sa mga magmamantala: 568,370

Gidaghanon sa mga pagtuon sa Bibliya: 417,308

Tungod sa problema sa panglawas, si Kumiko, nga usa ka payunir nga sister nga nagpuyo duol sa Tokyo, Japan, dili kaayo makapakigbahin diha sa balay-balay nga ministeryo. Busa, mas daghang panahon ang iyang gigugol sa pagsangyaw pinaagig sulat. Hatagan siya sa mga membro sa iyang kongregasyon ug mga adres sa mga tawo nga kanunayng wala sa balay. Siya maghimog mga sulat, ug ang mga magmamantala sa kongregasyon maoy mohatod niini. Kapig tuig nga wala siyay nadawat nga tubag. Bisan pa niana, siya matinumanong nagpadayon sa paghimog sulat. Sa kataposan, human nakasulat ug duolan sa 1,500 ka sulat, siya nakadawat ug usa ka postcard nga nag-ingon: “Salamat sa imong sulat.  Interesado kaayo ko sa imong giingon. May panahon ako sa mosunod nga mga adlaw, ug maghulat ako kanimo sa pagkontak kanako.” Nakahilak sa kalipay, iyang giduaw kining tawhana, ug nasugdan dihadiha ang usa ka pagtuon sa Bibliya. Siya miingon: “Sa primero, gikulbaan ako bahin sa paghimog sulat, apan karon ako masaligon nga kon kita mapailobong mangitag mga tawong karnerohon, panalanginan gayod ni Jehova ang atong mga paningkamot.”

Usa ka buntag niana samtang namalaybalay sa India, usa ka sister nanuktok sa pultahan. Gibuksan kini sa usa ka magul-anon-ug-dagway nga babaye. Duha ka gagmayng mga bata nagyaka sa salog nga dunay basiyo nga mga plato diha sa ilang atubangan. Gipahayag sa sister ang makapahupayng mensahe sa Gingharian sa Diyos ug sa mga panalangin niini, ug ang babaye namati pag-ayo. Kasamtangan, ang gigutom nga kabataan nagsigeg hangyo sa ilang inahan nga hatagan sila ug pagkaon. Siya mibalibad. Ang sister miingon nga siya malipay nga mohulat hangtod makakaon ang mga bata. Dayon ang babaye nagsugod sa paghilak, nga nag-ingon nga ang pagkaon dunay hilo. Iya na unta kining idalit ngadto sa iyang mga anak sa dihang nakadungog siya ug tuktok sa pultahan. Tungod sa problema sa pamilya, lakip na sa bana nga palahubog, siya mihukom nga maghikog uban sa iyang duha ka gagmayng mga batang babaye. Sa pagkadungog niini, gilabay sa sister ang pagkaon, unya midalikyat siya sa duol nga tindahan, ug mipalit ug mga pagkaon alang sa pamilya. Giluto nilang duha kini ug gihatag kini ngadto sa mga bata. Ang mensahe sa Gingharian nakapahupay gayod niining babayehana. Siya midawat sa pagtuon sa Bibliya ug karon maoy usa na ka bawtismadong Saksi. Ang iyang duha ka anak tig-uban kaniya sa mga miting. Dili pa dugay, ang bana nagsugod sa pagtambong sa mga miting ug nagmauswagon.

SARS! Kining mga pulonga nakapalisang sa kadaghanang tawo sa Taiwan. Ang mga residente nahadlok nga nagtan-aw sa mga balita kon sa unsang paagi kining sakita nakaapektar sa Hong Kong. Dayon kini nakaabot sa Taiwan! Daghang ospital ang  gikuwarentinas tungod sa pagkaylap sa impeksiyon, ug daghang tawo ang nahadlok nga sila mahimong sunod nga mga biktima. Bisan sa wala pa ipakanaog sa gobyerno kini nga kinahanglanon, ang sangang buhatan mitabang sa mga kongregasyon sa pagbaton ug mga termometro aron ang mga igsoon makakuha ug temperatura sa lawas sa tanang motambong sa mga miting.

Dayon ang gobyerno naghangyo sa tanang narehistro nga mga relihiyon nga likayan ang pagsangyaw sa pipila ka residensiyal nga dapit. Usa ka linain nga programa sa Tigom sa Pag-alagad nakatabang sa mga igsoon sa pagkakita kon unsaon nila pagpasibo sa ilang kalihokan aron malikayan ang mga problema. Usa ka espesyal payunir misunod sa sugyot sa pagduaw ug balik bisan ngadto sa mga tawo nga nagpakitag gamayng interes. Tungod niini, midaghan ang mga pagtuon sa Bibliya nga iyang gidumala. Karon daghan niining bag-ong mga pagtuon nagpakitag maayong pag-uswag. Siya miingon: “Ang dili maayong kahimtang miresulta sa akong pagtagamtam ug mas mabungahong ministeryo.”

Samtang nakigbahin sa pag-alagad sa kanataran sa Cyprus, ang usa ka sister nakahibalag ug babaye kinsa miingon nga daghan siyag trabaho. Pinaagi sa usa ka bukas nga bentana sa kosina, nakigsulti ang sister sa makadiyot, nga nagbasa sa Salmo 72:12-​14, ug nakigsabot nga moduaw pag-usab sa mas kombenyenteng panahon. Sa dihang siya miduaw pag-usab, ang sister nakurat sa pagkadungog nga ang babaye naghinamhinam nga nagpaabot sa iyang pagbalik. Ngano? Ang babaye nahupayan pag-ayo sa teksto​—tibuok adlaw niya kining gihunahuna. Ang sister mitanyag ug pagtuon sa Bibliya diha sa balay, ug gidawat dayon kini sa babaye. Karon ang babaye nagpahayag ug pasalamat sa iyang nakat-onan gikan sa Pulong sa Diyos.

Si Polo, nga taga Cambodia, nagsugod sa pagtuon uban sa usa ka misyonaryo ug nagpakitag maayong pag-uswag. Siya tigtambongan na sa tanang lima ka miting sa kongregasyon sa Phnom Penh. Dayon gipabalhin siya sa iyang amo ngadto sa Battambang, usa ka siyudad duol sa utlanan sa Thailand. Walay kongregasyon  didto, busa iyang gihatag ang numero sa iyang cell phone ngadto sa nagdumala kaniya ug pagtuon sa Bibliya, ug sila nagpadayon sa pagtuon pinaagig cell phone sulod sa 30 minutos matag Miyerkoles ug Biyernes. Si Polo buot usab nga mokomento sa Pagtuon sa Bantayanang Torre. Kay layo man ang kongregasyon, iyang isulat ang iyang tulo o upat ka tubag alang sa pagtuon sa umaabot nga semana ug ihatag kini ngadto sa iyang magtatan-aw sa Pagtuon sa Libro sa Kongregasyon aron basahon kini diha sa miting alang niana nga semana. Ang iyang kasibot nakadasig sa mga magmamantala sa kongregasyon. Naningkamot usab siya sa pagpamatuod sa mga tawo nga iyang mahibalag. Sa pagsakayg bus ngadto-nganhi sa Phnom Penh, siya nagpamatuod ngadto sa daghang tawo ug nagdasig kanila sa pagtambong sa mga miting. Ang iyang sunod nga tumong mao ang pagkahimong dili-bawtismadong magmamantala.

Sa Mongolia duha ka sister nakahibalag ug tawo nga 30 anyos ang edad. Iyang gihangyo sila sa paghulat, dayon misulod siya sa iyang balay, ug nagdalag duha ka libro: Ang Pagpangita sa Katawhan sa Diyos ug Ang Labing Bantogang Tawo nga Nabuhi Sukad. Siya miingon nga nakatuon siya sa Bibliya uban sa mga Saksi ni Jehova sa Polandia sa 12 ka tuig kanhi. Sa pagpauli ngadto sa Mongolia sa 1993, nagpadala dayon siya ug sulat nga naghangyo nga duawon siya ug mga Saksi. Apan, niadtong higayona, walay Saksi sa Mongolia, busa wala siya maduaw. Paglabay sa panahon, siya miadto sa India aron magtungha sa usa ka unibersidad, diin siya miestar didto sulod sa lima ka tuig. Niadtong mga tuiga, gikan sa 1994 ngadto sa 1998, siya walay kontak sa mga Saksi ni Jehova. Dayon siya mipauli sa Mongolia, diin sa kataposan nakontak niya ang mga igsoon. Siya gidumalahan na usab ug pagtuon sa Bibliya, ug sa pagka-Abril 2003, siya mitambong sa iyang unang miting. Karon siya malipayong nagtuon sa brosyur nga Gikinahanglan.

Nahibulong ang duha ka Saksi didto sa Sri Lanka sa dihang mainitong gipasulod sila sa usa ka Budhistang babaye, kinsa miingon nga sila mao ang tubag sa iyang pag-ampo! Siya miingon  nga ang iyang batan-ong anak nga babaye bag-o pang naghikog tungod sa iyang pagdisiplina kaniya. Ang pari nga Budhista nga iyang giduol aron makabaton ug paghupay sa kaguol miingon kaniya nga ang iyang anak nga babaye mobalik aron manimalos kaniya. Nahadlok niini ang babaye. Ang usa sa iyang mga higala miingon kaniya nga ang mga Kristiyano dili motuo niining mga butanga. Busa kining babayehana nag-ampo nga makakita siya ug tinuod nga Kristohanon, nga nagtuo nga usa ka Katoliko ang ipadala. Hinunoa, duha ka Saksi ni Jehova ang miduaw ug gihatagan siya ug paghupay sa kamatuoran sa Bibliya. Siya karon nagtuon sa Bibliya bisan pa sa pagsupak sa pari nga Budhista.

Sa Kyrgyzstan usa ka batan-ong babaye daghang tuig nang tigtambongan sa simbahang Ebanghelikal. Sa nagbasa siya sa Bibliya, iyang nakita ang kalainan tali nianang nasulat diha ug nianang gitudlo sa iyang simbahan. Pananglitan, dili niya masabtan ang doktrina sa simbahan nga si Jesu-Kristo mao ang Amahan ug ang Anak. Kay nagtuo nga ang anak aduna gayoy amahan, iyang gitumong ang tim-os nga pag-ampo ngadto sa Amahan ni Jesu-Kristo, nga naghangyo Kaniya nga tabangan siya sa pagkaplag sa mga tubag sa iyang mga pangutana bahin sa Bibliya. Pagkasunod adlaw duha ka Saksi ni Jehova miduaw kaniya. Sila nangutana: “Unsay imong hunahuna? Kinsay gitudlo ni Jesu-Kristo sa iyang mga tinun-an nga maoy ampoan, ug unsang ngalan ang iyang giawhag kanila nga balaanon?” Siya nahibulong nga sa miaging adlaw lamang nag-ampo siya ngadto sa Amahan ni Jesu-Kristo sa pagtubag niining mga pangutanaha. Human sa panaghisgot, siya wala gayod magduhaduha nga gitubag sa Diyos ang iyang pag-ampo. Ang babaye misugot sa usa ka regular nga pagtuon sa Bibliya ug nagsugod sa pagtambong sa mga tigom sa mga Saksi ni Jehova. Sa dihang iyang nakat-onan nga si Jehova mao ang Amahan ni Jesus, siya nagsugod sa pag-ampo kang Jehova nga naggamit sa iyang personal nga ngalan. Mauswagon siya karon sa espirituwal ug nagpaambit sa iyang mga paryente sa kahibalo nga iyang nakaplagan.

 ◼ APRIKA

Gidaghanon sa kayutaan: 56

Populasyon: 755,145,559

Gidaghanon sa mga magmamantala: 950,321

Gidaghanon sa mga pagtuon sa Bibliya: 1,666,518

Diha sa kadaghanang biyahe sa mga siyudad sa Zambia, ang mga pasahero lingawon pinaagig mga salida sa video nga kasagaran mapintas ug imoral. Usa ka magtiayong misyonaryo nga nagbiyahe sakay sa bus paingon sa kaulohan mihangyo kon mahimo bang ipasalida ang video nga The Bible​—Its Power in Your Life. Ang drayber misugot. “Among nakita nga ang mga pasahero maikagong nagtan-aw, ug namati pag-ayo,” nahinumdom si Ruth. “Human niana, nakigsulti kami kanila, nga nagtanyag ug mga tract ug mga magasin. Madasigon kaayo silang misanong.” Ang magtiayon mihangyo sa drayber kon puwede ba niyang ipasalida pag-usab ang video, nga nagtuo nga unya pa niya kini ipasalida paglabay sa pipila ka oras.  Kini iya dayong gipasalida pag-usab. Si Richard miingon: “Ang mga pasahero nalingaw sa video sa ikaduhang higayon, ug nalipay kami nga mihangyo kami sa pagpasalida niini.”

Si Miranda, nga usa ka tin-edyer nga estudyante sa Malawi, nagpakita sa librong Ang Sekreto sa Kalipay sa Pamilya ngadto sa usa ka klasmet panahon sa reses sa eskuylahan. Usa ka maestro nakadungog sa panaghisgot ug iyang gipatawag si Miranda ngadto sa iyang opisina. Iyang gipangutana si Miranda kon nganong iyang gisultihan ang iyang amiga nga siya kinahanglang magminyo. Si Miranda mitubag nga wala siya magsulti sa iyang amiga nga magminyo. Hinunoa, nagpatin-aw lang siya kon sa unsang paagi ang libro makatabang sa mga pamilya nga makakaplag ug tinuod nga kalipay. Kay nasuko, gisinggitan sa maestro si Miranda: “Bata ka pa kaayo nga mohatag ug tambag bahin sa kaminyoon!”

Nahiubos ug nagkurog, migawas si Miranda sa opisina sa maestro. Paglabay sa duha ka adlaw gipatawag na usab siya ngadto sa iyang opisina. Si Miranda miasoy sa sunod nga nahitabo: “Ang akong maestro nangayog pasensiya sa iyang pagsilaob sa kasuko, ug iya akong gisultihan nga siya ug ang iyang asawa magsigeg away ug sa ulahi nagkabulag ra gayod. Mihangyo siya ug kopya sa libro nga akong gipakita sa akong kauban sa klase. Nalipay ako sa paghatag kaniya ug kopya. Paglabay sa duha ka semana iya akong giingnan nga ang libro mapuslanon kaayo ug nga kini iyang gipabasa sa iyang asawa. Sa ngadtongadto, siya ug ang iyang asawa nagkauli.”

Sa Habagatang Aprika usa ka tigulang nga ginganlag Eric daghang tuig nang nagtuon sa Bibliya uban sa mga Saksi ni Jehova, apan tungod sa pagpanabako siya wala mouswag sa espirituwal. Human nga nabawtismohan ang iyang asawa, siya mihukom nga magpabawtismo usab unya siya. Nagpakopya siya ug dagkong letra sa teksto sa Kasulatan nga makita diha sa 2 Corinto 7:​1, nga mabasa: “Sanglit nakabaton man kita niining maong mga saad, mga hinigugma, hinloan nato ang atong kaugalingon sa tanang kahugawan sa unod ug espiritu, nga magahingpit sa pagkabalaan diha sa kahadlok sa Diyos.” Gibutang ni Eric kining tekstoha sa mga lugar nga daling makita diha sa iyang balay. Sa matag higayon nga motokar ang  iyang gana sa pagpanabako, iyang basahon ang teksto ug mag-ampo kang Jehova nga tabangan siya sa paghunong sa pagpanabako. Tungod niini, siya mihunong sa pagpanabako kapin sa napulo ka bulan. Si Eric karon maoy dili-bawtismadong magmamantala ug nagplano nga magpabawtismo sa sunod nga distritong kombensiyon.

Samtang naghulat ug lansa diha sa usa sa mga isla sa Seychelles, usa ka misyonaryang sister nakamatikod ug usa ka babaye nga nag-inusarang naglingkod. Bisan tuod ug gikapoy ang sister human sa tibuok adlaw nga pagsangyaw, iyang giduol ang babaye ug gitanyagan siya ug tract. Gidawat kini sa babaye, nga nag-ingon nga usa siya ka Hindu. Paglabay sa pipila ka adlaw, sila nagkita pag-usab diha sa dalan, ug ang sister nakigsabot kaniya alang sa pagtuon sa Bibliya. Ang bana sa babaye, nga usa ka doktor, maoy Katoliko, apan human nga nabasa ang Pagpangita sa Katawhan sa Diyos ug ang librong Kahibalo, ang bana misugot sa pag-apil sa pagtuon. Usa ka gabii niana, gidapit sa magtiayon ang sister ug ang iyang bana ug pagpangaon diha sa hawanan sa balay. Gisunog nilang duha ang ilang relihiyosong mga imahen ug diha gisugba ang pagkaon! Wala magdugay sila nagsugod sa pagtambong sa mga miting ug sa pagpakigbahin sa pag-alagad sa kanataran. Human sa ilang bawtismo, silang duha nagsugod sa pag-oksilyare payunir. Kay gamay man ang isla, ang brader ilado sa komunidad. “Ang doktor nahimo nang pari karon,” miingon ang uban. Siya karon nag-alagad ingong ministeryal nga alagad, ug ang iyang asawa nalipay sa iyang pag-alagad ingong regular payunir.

Si Ishmael nagtuon ug senyas nga pinulongan aron ang mga bungol sa Zimbabwe makakat-on sa kamatuoran. Samtang nagsakay ug bus usa ka adlaw niana, nakamatikod siya ug usa ka babaye nga nagpakilimos sa mga pasahero. Gisangyawan siya ni Ishmael ug nakigsabot nga makigkita kaniya pag-usab. Sa dihang gipangutana kon unsay gitudlo sa iyang relihiyon bahin sa kon nganong bungol siya, ang babaye mitubag: “Sila miingon nga pagbuot sa Diyos nga mahimo akong bungol.” Gipatin-aw kaniya ni Ishmael nga dili pagbuot sa Diyos nga ang mga tawo nahimong bungol apan kanang maong diperensiya sa pandungog maoy resulta sa napanunod nga sala ug pagkadili-hingpit. Iyang gipatin-aw usab nga wagtangon sa Diyos sa dili  madugay ang tanang balatian. Ang babaye mitubag: “Gusto kong masayod kon nganong gitudloan ako sa akong relihiyon ug kabakakan.” Sa dihang nakigkita si Ishmael kaniya sa ikatulong higayon, siya miingon: “Sukad karon mahimo na ako nga usa kaninyo. Dili na ako gustong mamati pa ug mga kabakakan.” Siya gidumalahan ug pagtuon sa Bibliya, ug siya tigtambongan na sa mga miting sa kongregasyon ug naglaom nga sa dili madugay makuwalipikar siya sa pagkahimong usa ka dili-bawtismadong magmamantala.

Sa Ghana, tungod sa pagpangamas aron mabuhi, ang mga tawo wala kaayoy panahon sa pagtagad sa espirituwal nga mga butang. Usa ka sister nga regular payunir miduol sa usa ka batan-ong lalaki diha sa pagpamalaybalay nga ministeryo ug mihangyo ug singko minutos lamang sa iyang panahon sa pagpakighisgot bahin sa Bibliya. Siya mitubag: “Okupado ako kanunay maadlaw. Mopauli lang ko pasado alas 8:00 s.g. aron matulog.”

Ang sister nangutana: “Makagahin ka ba ug diyutayng panahon sa imong oras sa pagkatulog aron magtuon sa Bibliya?”

Siya miingon: “Puwede kon moanhi ka pasado alas 8:00 s.g.” Pagkasunod adlaw, ang sister ug ang iyang bana miadto sa balay sa lalaki sa untop alas 8:00 s.g. Bag-o pa siyang miabot gikan sa trabaho. Usa ka pagtuon sa Bibliya ang nasugdan, ug wala magdugay siya nagsugod sa pagtambong sa mga miting. Wala magdugay siya nakuwalipikar sa pagkahimong dili-bawtismadong magmamantala ug sa ngadtongadto nabawtismohan. Ang kausaban nga iyang gihimo sa iyang kinabuhi nakapadayeg pag-ayo sa iyang asawa ug misugot usab sa pagtuon sa Bibliya ug sa ulahi nakuwalipikar sa pagkahimong dili-bawtismadong magmamantala. Ang mga silingan ug ang kadaghanan nga nahibalo sa paagi sa pagkinabuhi kaniadto sa batan-ong lalaki dili makatuo sa dihang ilang nakita siya nga nagsangyaw sa balay-balay. Daghan ang gustong masayod kon unsay nakapabag-o sa maong tawo nga ilado sa pagkapalahubog, pagpangawat, ug pag-abuso sa mga droga. Tungod niini, 22 ka tawo sa lungsod mihangyo nga magpatuon sa Bibliya. Napulog-duha kanila tigtambongan na sa mga miting sa kongregasyon ug basin sa dili madugay makuwalipikar ingong dili-bawtismadong mga magmamantala.

[Hulagway sa panid 43]

Si Steponas ug Edvardas, sa Lithuania

[Hulagway sa panid 47]

Si Alyce uban sa iyang maestra, si Linda, sa Australia

[Hulagway sa panid 51]

Si Mala, sa Tinipong Bansa

[Hulagway sa panid 56]

Si Kumiko, sa Japan

[Hulagway sa panid 61]

Si Ruth ug Richard, sa Zambia