Iceland

Ang ngalang Iceland makapahunahuna ug mga yelo, niyebe, ug mga igloo (pormag simboryo nga mga balay). Kita makatuo gayod nga tugnaw kaayo kining lugara kon makita nato ang nahimutangan niini diha sa mapa. Pipila lang ka tawo ang namuyo sa lagyong mga lugar sa amihanan sama sa Iceland. Gani, ang amihanang kadaplinan niining isla nga nasod ug ang Arctic Circle halos mag-abot na!

Apan, ang tinuod, ang Iceland dili sama ka tugnaw sa kahulogan sa ngalan niini ug sa nahimutangan niini nga lugar. Tungod sa mainit-init nga sulog sa dagat, nga naggikan duol sa amihanan sa ekwetor, ang klima dili kaayo tugnaw kay sa gidahom. Walay igloo didto. Ang Icelandikong katilingban moderno kaayo, ug ang mga tawo nagpuyo sa lig-ong mga balay nga hitso sa gamit nga pangpainit sa sulod sa balay.

Ang Iceland maoy usa ka nasod nga lahi kaayo. Sa kinatung-ang bahin sa tingtugnaw, ang adlaw mosubang ug diyutay sa kapunawpunawan sa pipila lang ka oras matag adlaw. Bisan tuod ang maanindot kaayong northern lights, o aurora borealis, kasagarang makahatag ug kinabuhi sa dugay, ngitngit nga mga gabii sa tingtugnaw, ang adlaw morag maulaw nga mosubang. Apan, mabawi gayod kini panahon sa ting-init kay ang adlaw dili motunod sulod sa ubay-ubayng mga bulan. Sa kinatumyang bahin sa amihanan sa nasod, ang adlaw magpabilin sa kapunawpunawan sa ubay-ubayng semana. Didto ang adlaw hayag gihapon bisag tungang gabii na.

Ang Iceland gitawag ug yuta sa yelo ug kalayo, nga eksakto gayod nga kahubitan niini. Ang halos ikanapulong bahin sa nasod natabonan sa dagkong mga bukid nga yelo. Kini maoy yuta usab  sa kalayo sa pagkaagi nga ang Iceland daghag aktibong mga bolkan ug nagbukalbukal nga mga linaw. Daghan nang bolkan ang mibuto dinhi, ug niining pipila ka siglong milabay, ang mga pagbuto sa bolkan mahitabo matag lima o unom ka tuig. Daghan pod dinhig init nga mga tubod.

Kining wala kaayoy tawo nga nasod dunay kinaiyanhong katahom ug abunda sa ihalas nga mga mananap. Ang preskong hangin, nindot kaayo nga mga busay, batoon nga kabukiran, ug nanganawkanaw nga kamingawan nakadanig daghang bisita. Sa unang bahin sa tingpamulak, ang mga langgam nga tiglalin mamalik sa ilang mga pinuy-anan sa ting-init diha sa mga pangpang sa daplin sa dagat ug sa mga kalamakan. Lakip niining mga langgama mao ang mga arctic tern (gamay nga matang sa kanaway), kinsa molalin tuigtuig ngadto sa Antartika, sa pikas tumoy sa kalibotan. Ang mga langgam nga puffin, pato nga eider, ug mga kanaway makita diha sa mga pangpang ug sa baybayon. Ang mga karnero manibsib sa kabanikahan, ug ang gamay, taas-ug-lanat nga gagmayng mga kabayo sa Iceland magdagandagan sa kabukiran. Sa unang bahin sa ting-init, linibo ka isda nga salmon ang mamalik, nga manglangoy ug manglukso paingon sa mga suba ug mga busay aron mangitlog.

Ang 290,570 ka molupyo sa Iceland maoy kaliwat sa mga Viking, nga namuyo didto kapin sa 1,100 ka tuig na kanhi. Ang kadaghanan niining unang nangabot naggikan sa Norway, ug ang ilang sinultihan maoy Old Norse, nga gikan niini gikuha ang Icelandiko nga pinulongan. Ang dakong impluwensiya sa ilang mga sinulat ug ang pagkahilit sa nasod nakatabang sa pagpreserbar sa pinulongan. Tungod niini, ang mga tawo karon makabasa sa karaang mga sugilanon, nga ang kadaghanan gisulat sa ika-13ng siglo. Ang mga taga-Iceland magarbohon sa ilang pinulongan, ug supak kaayo sila sa paggamit ug bag-ong langyaw nga mga pulong.

Ang kadaghanan sa unang mga molupyo maoy “mga pagano,” ug sa ulahing bahin na lamang sa ikanapulong siglo nga ang mga taga-Iceland gisulayan sa pagkombertir ngadto sa “Kristiyanidad.”  Sa ulahing bahin niana nga siglo, ang ubang prominenteng mga lider sa Iceland nakabig, ug sa tuig 1000, ang Althing nga parliamento sa Iceland, nangutana sa pangunang mga lider sa paganong relihiyon sa pagdesisyon kon hain sa duha ka relihiyon ang mas maayo. Katingalahan nga siya miingon nga usa lang ka relihiyon ang kinahanglang sundon, ang relihiyong “Kristiyano.” Wala kaayoy misupak niini. Apan, ang iyang sugo nagtugot sa mga tawo sa pagsimba nga tinagotago sa mga diyos sa pagano ug sa pagpadayon sa pagsunod sa paganong mga kostumbre. Bisan tuod ang sugo gipasukad sa dakong bahin sa politikanhon inay sa relihiyoso nga mga isyu, tingali kini ang hinungdan kon nganong ang mga taga-Iceland independente ug mga kaisipan, nga dili hiktin ug hunahuna labot sa relihiyosong mga isyu.

Karon, mga 90 porsiyento sa populasyon sakop sa Evangelical Lutheran Church, nga mao ang relihiyon sa nasod. Bisan tuod  adunay Bibliya ang halos matag panimalay, pipila lang ang nagtuo niana ingong Pulong sa Diyos.

Ang Maayong Balita Nakaabot sa Iceland

Sa sinugdanan sa ika-20ng siglo, daghang taga-Iceland ang milalin sa Canada, aron makalingkawas sa kalisod gumikan sa mga pagbuto sa bolkan ug sa grabeng katugnaw. Didto sa Canada unang nadungog sa uban ang maayong balita sa Gingharian sa Diyos. Ang usa kanila mao si Georg Fjölnir Lindal. Wala magdugay human sa pagpahinungod sa iyang kinabuhi ngadto kang Jehova nga Diyos, siya nagpayunir. Icelandiko ang pinulongan ni Brader Lindal, busa sa 1929, sa nag-edad siya ug 40, siya midesisyon sa pagbalik sa Iceland. Miabot sa Reykjavík sa Hunyo 1 nianang tuiga, siya ang una nga nakasangyaw sa maayong balita sa Iceland.

Si Brader Lindal naghulat ug tulo ka bulan ayha pa miabot ang unang gipadala kaniya nga mga literatura, apan sa miabot kini, nagsugod dayon siya sa pagsangyaw sa tanan diha sa nasod. Sa kataposan sa Oktubre 1929, siya nakaapod-apod ug 800 ka kopya sa The Harp of God sa Icelandiko nga pinulongan. Niadtong panahona, siya nagsulat: “Sukad sa akong pag-abot dinhi, nakasangyaw na ako sa daghang lungsod nga may populasyon nga mga 11,000 ka tawo. Ang total nga populasyon sa Iceland maoy duolan sa 100,000 o kapig diyutay niana, busa mga 90,000 pa ang kinahanglang masangyawan. Nagkinahanglan gayod ug dakong panahon aron makobrehan sa usa ka tawo ang tanang teritoryo dinhi kay lisod kaayo ang pagbiyahe. Ang Iceland maoy usa ka bukiron nga nasod nga dili patag ang kabaybayonan, walay tren, ug diyutay ra kaayo ang mga dalan alang sa mga sakyanan, busa barko ang akong sakyan halos sa tanang panahon.”

Walay bisag gamayng reklamo nga mabasa diha sa pipila ka sinulat-sa-kamot nga mga sulat nga nahipos diha sa daang polder nga brawon nga may ngalang “Iceland.” Sa mao gihapong sulat sa 1929, si Lindal miingon: “Malipay kaayo ako sa pag-asoy sa usa ka makapadasig nga eksperyensiya nako dili pa dugay. Nakahigayon  ako sa pagduaw pag-usab sa usa ka dapit nga akong gisangyawan sa miagi. Nakahibalag ako ug ubay-ubayng mga tawo nga nakakuha ug mga libro niadtong una nakong pagduaw. Usa ka tawo miingon: ‘Duha ka beses na nakong nabasa ang librong Harp ug nagbasa ako niini sa ikatulong higayon. Makaiikag kaayo kining libroha. Salamat sa imong pagduaw.’ Dihay lain nga miingon: ‘Maayo kay mibalik ka. Makaiikag kaayo kanang libroha. Nganong dili man ninyo hubaron ang tanang libro ni Judge Rutherford sa Icelandiko nga pinulongan?’ Akong gisultihan siya nga daghan niining mga libroha mabatonan sa pinulongan nga Danes. Siya mitubag: ‘Padalhi ako sa tanan ninyong libro, oo, sa mga libro usab ni Pastor Russell, aron daghan ako ug matun-an sa taliabot nga tingtugnaw.’ Ang  uban nagpahayag sa ilang apresasyon sa maong mga libro. Mapasalamaton ako sa Diyos sa pagtugot kanako sa pagdala sa mensahe sa kamatuoran ngadto sa mga tawo nga mapatalinghogon.”

Lisod kaayo alang sa usa ka tawo ang pagsangyaw ngadto sa tanan niining maong isla, nga kapin sa katunga sa gidak-on sa Inglaterra. Ang Iceland may sukod nga mga 300 kilometros gikan sa amihanan ngadto sa habagatan ug mga 500 kilometros gikan sa sidlakan ngadto sa kasadpan. Ang kabaybayonan, lakip na sa mga luok, maoy duolan sa 6,400 kilometros ang gitas-on. Bisan pa niana, nalibot ni Brader Lindal ang tibuok isla sulod sa napulo ka tuig, nga nagsangyaw sa maayong balita ug nag-apod-apod sa mga literatura. Mamaybay siya nga nagsakay ug barko, ug kon moduaw siya sa mga uma sa ilaya, mogamit siya ug duha ka gagmayng kabayo, ang usa iyang sakyan ug ang lain maoy kargahan sa iyang mga literatura ug mga gamit. Sumala pa sa mga igsoon nga nakapribilehiyo  sa pagsangyaw uban kaniya sa pipila ka tuig una pa siya mihawa sa Iceland, si Brader Lindal maoy usa ka debotado ug ligdong-ug-hunahuna nga igsoon, maulawon ug maugdang, hilomon nga tawo. Maayo siya ug barog​—taas​—nga dako ra alang sa gagmayng mga kabayo sa Iceland nga iyang gigamit sa iyang mga biyahe. Usahay kon walay kabayo, siya ray magbitbit sa iyang mga libro ug mga butang.

Sa pagsugod ni Brader Lindal sa iyang misyon sa Iceland sa 1929, siya wala magdahom nga kini lisod diay kaayo ug gikinahanglan ang dakong pailob ug pagkamalahutayon sa pagsagubang sa pagsupak sa mga tawo. Sa halos 18 ka tuig, si Brader Lindal mao lang ang bugtong Saksi sa Iceland. Bisan pa sa iyang pagpaningkamot, wala gayoy usa nga mibarog dapig sa Gingharian. Sa 1936 siya misulat: “Sa didto pa ako, nakapahimutang ako sa mga tawo ug mga 26,000 ngadto sa 27,000 ka libro. Daghang tawo ang nakabasa niini. Ang uban supak gayod sa kamatuoran, apan ang kadaghanan wala gayoy interes.”

Hinunoa, ang pipila nagpabili sa mensahe nga iyang gisangyaw. Pananglitan, usa ka tigulang nga tawo midawat ug kopya sa librong The Harp of God. Sa dihang mibalik si Brader Lindal paglabay sa pipila ka bulan, iyang nakaila ang anak nga babaye sa tigulang, kinsa miingon nga naikag gayod ang iyang amahan sa libro ug gitun-an kana pag-ayo sa wala pa siya mamatay. Kay nagsunod sa paganong kostumbre, siya mihangyo pa gani nga inigkamatay niya ang libro isulod sa iyang lungon, ug kini ilang gihimo.

Ang dugay ug mingaw nga pagpuyo ni Brader Lindal sa Iceland natapos sa Marso 25, 1947, sa dihang miabot ang mga graduwado sa Watch Tower Bible School of Gilead. Siya nagpadayon sa iyang pag-alagad didto hangtod mipauli siya sa Canada sa 1953. Paglabay sa napulog-unom ka tuig, si Páll Heine Pedersen, nga nag-alagad niadtong higayona ingong espesyal payunir sa Iceland, midesisyon sa pag-adto sa Winnipeg, Canada, aron makadungog gikan kang Brader Lindal mismo bahin sa iyang buluhaton sa Iceland, tungod kay niadtong tungora ang mga misyonaryo nga  nakauban ni Brader Lindal sa Iceland mihawa na sa nasod. Samtang nagbakasyon sa Tinipong Bansa, si Brader Pedersen misakay ug bus paingon sa Winnipeg. Sa pag-abot, iyang nahibaloan nga natapos na ni Brader Lindal ang iyang yutan-ong kinabuhi nianang buntaga. Siya nag-alagad kang Jehova nga matinumanon hangtod sa iyang kamatayon.

Dugang mga Mamumuo Alang sa Pagpangani

Sa 1947 usa ka bag-ong yugto sa pagsangyaw sa maayong balita ang nagsugod sa pag-abot sa unang mga misyonaryo sa Gilead, nga pulos taga-Denmark. Ang usa kanila mao si Leo Larsen. Laing duha pa ka misyonaryo ang miabot sa Disyembre 1948: si Ingvard Jensen nga taga-Denmark ug si Oliver Macdonald nga taga-Inglaterra. Gipadayon niining bag-ong mga mag-aani ang buluhaton nga gihimo ni Brader Lindal ug nang-apod-apod sila ug daghan kaayong literatura. Sa tingtugnaw, sila manangyaw sa Reykjavík, ug sa mubo nga ting-init, manangyaw sila sa mga teritoryo sa  banika nga duol sa dagat. Si Ingvard Jensen mahinumdom gayod sa usa ka panahon sa pagsangyaw. Siya misulat: “Sa akong unang ting-init sa Iceland, miuban ako sa usa sa mga misyonaryo sa pagsangyaw sa kabaryohan. Kasagaran mosakay kami ug bus o barko paingon sa napili nga teritoryo, nga magdala ug mga bisikleta, tolda, bag nga katulganan, literatura, ug mga pagkaon. Busa, usa ka gabii niana milawig kami paingon sa lungsod sa Stykkishólmur sa kasadpang baybay, nga miabot sa hapon pagkasunod adlaw. Nagplano kami sa pagduaw sa tanang balay sa lungsod ug dayon sa pagbisikleta paingon sa lungsod sa Borgarnes, mga 100 kilometros ang gilay-on. Adlaw-adlaw dihay lansa nga mobiyahe gikan didto paingon sa Reykjavík. Primero, maayo ang among biyahe. Tungatunga sa Hunyo kadto, ug init ang adlaw. Sa unang gabii, gisaklob namo sa among lawas ang bag nga katulganan human makasangyaw  sa usa ka bahin sa lungsod. Apan, sa tibuok gabii, wala mosaler ang bag nga among gisaklob sa lawas tungod kay gitugnaw gihapon kami, ug pagkaugma among nakita kon ngano: Diyes sentimetros nga gibag-on sa niyebe ang nangatagak sa miaging gabii! Imposibleng mapamubo ang among biyahe, kay walay barko sa tibuok semana. Busa among gisunod ang among eskedyul, gisangyawan ang lungsod, ug gibisikleta ang dalandalan sa bukid paingon sa sunod nga lungsod, nga gisangyawan ang mga uma nga maagian.”

Nakaabot sila sa Borgarnes paglabay sa upat ka adlaw, nga gisungsong pagbisikleta ang niyebe, ulan, ug kusog nga hangin nga kutob sa 110 kilometros por ora. Apan, kining dili maayong panahon nabawi ug diyutay tungod sa talagsaong pagkamaabiabihon sa mga mag-uuma nga ilang maagian, nga nagpakape ug nagpakaon kanila. Si Brader Jensen nahinumdom nga makakaon sila ug walo ngadto sa napulo ka beses sa usa ka adlaw! Siya miingon: “Nagtuo ako nga ang mga tawo masilo kon dili namo dawaton ang ilang malulotong pagdapit, ug kini nakahatag kanamo ug higayon sa pagpamatuod kanila sa bug-os mahitungod sa natukod nga Gingharian ni Jehova.”

Sa unang tulo ka tuig nga pagmisyonaryo sa Iceland, ang mga igsoon nakapahimutang ug kapin sa 16,000 ka buok literatura. Apan, ang mga pagbalikduaw ug panagtuon wala mouswag​—ang mga tawo daling modawat sa literatura apan dili interesado sa mensahe. Pananglitan, si Brader Larsen ug iyang asawa, si Missie​—nga miabot gikan sa Denmark sa 1950 aron makigminyo kang Leo​—miadto sa sidlakan nga baybay, diin sila nagsangyaw sa mga lungsod sa Höfn, Eskifjördhur, Neskaupstadhur, ug Seydhisfjördhur. Niining lisod nga biyahe, sila nakapahimutang ug 300 ka libro ug sama usab ka daghang mga pulyeto. Ang mga pangtimaan sa libro nga dunay mensahe gikan sa Kasulatan ug ang adres sa mga misyonaryo sa Reykjavík giimprenta ug gisukip diha sa tanang libro. Ang tanan nga modawat sa literatura gidapit sa pagsulat ug sa pagkuhag dugang impormasyon bahin sa kamatuoran​—bisan pa niana, walay usa nga misulat.

 Sa 1952 nadesisyonan nga ang teritoryo sa amihanang baybayon nagkinahanglan ug dugang pagtagad. Busa sa Hunyo nianang tuiga, si Oliver Macdonald ug iyang asawa si Sally, nga miabot gikan sa Inglaterra sa 1949 aron pakaslan siya, giasayn sa Akureyri ingong mga espesyal payunir. Didto nakaatubang sila ug grabeng pagsupak sa usa ka pundok sa Plymouth Brethren nga gipangulohan sa hawas sa embahada sa Britanya diha sa lungsod. Daghan siya ug mga sakop, ug ang uban namati kaniya sa dihang iyang giatake ang mga Saksi diha sa iyang mga pakigpulong ug diha sa sinulat nga mga artikulo. Bisan tuod ang mga payunir wala makaagi niini nga pagsupak didto sa Reykjavík, ilang giatubang ang pag-atake nga walay kokahadlok, nga nagpadayon sa ilang buluhaton sama sa naandan ug nagpahimulos sa tanang higayon sa pagtubag sa bakak nga mga sumbong. Gipatik sa ubang mga mantalaan ang ilang mga tubag.

 Dili lamang sa lungsod nagsangyaw ang mga payunir kondili nangadto usab sila sa hilit nga mga lugar, nga nagpahimutang ug literatura ug giabiabi sumala sa nabatasan, apan wala silay nakaplagang interesado sa mensahe sa Gingharian. Si Brader ug Sister Macdonald mibalik sa Reykjavík sa Hulyo 1953, apan sa wala pa sila mogikan sa Akureyri, sila mipugas ug mga binhi sa kamatuoran, nga mitubo ra sa ulahi.

Natukod ang Pundasyon

Human sa 27 ka tuig nga pagpananom ug pagbisibis, ang mga igsoon sa Iceland sa kataposan nagsugod sa pagkakita sa mga bunga sa ilang paghago. Sa unang bahin sa 1956, pito ka bag-ohan ang mibarog dapig sa Gingharian ug nagpahinungod sa ilang kinabuhi kang Jehova. Hangtod nianang higayona, ang kadaghanan niadtong nagpakitag interes sa kamatuoran wala magpadayon. Apan lahi si Iris Åberg, usa ka sister nga taga-Inglaterra nga sa ulahi mibiya sa Iceland. Niining tungora pito ka bag-ohan ang nabawtismohan, ug usa ka malig-on nga pundasyon ang natukod. Apan, sa pagka-1957, ang mga misyonaryo ug mga payunir nga nagkugi pag-ayo aron makagamot ug maayo ang kamatuoran mibiya sa Iceland, ang kadaghanan tungod sa dili maayong panglawas.

Busa sa 1957, usa ka sister nga espesyal payunir​—si Edith Marx, nga miabot gikan sa Denmark sa 1956​—maoy miatiman sa gamay nga kongregasyon. Nagkinahanglan ug mga mangangani sa pagtabang sa grupo, nga sa kalit nahikawan sa mga tawo nga mitabang sa mga bag-ohan nga makakat-on sa kamatuoran ug makagamot diha niana. Apan, wala magdugay, miabot ang mga espesyal payunir gikan sa Denmark, Sweden, ug Alemanya. Dugang pa, daghang magmamantala ug mga payunir ang mibalhin sa Iceland aron sa pagpakigbahin sa pagsangyaw sa Gingharian. Sukad niadto, ang pag-uswag hinayhinay apan kanunay.

Ang pag-uswag giduyogan usab ug makalilipay nga mga kaugmaran, lakip na sa regular nga mga pagduaw sa magtatan-aw  sa sirkito ug tinuig nga distritong mga kombensiyon. Dugang nga mga literatura ang gikinahanglan sa Icelandiko nga pinulongan. Ang unang magasing Bantayanang Torre sa Icelandiko mao ang gula sa Enero 1, 1960. Kini nakahatag ug dakong tabang sa buluhaton. Nalipay kaayo ang mga igsoon nga nakatanyag niining publikasyona ngadto sa mga taga-Iceland diha sa ilang kaugalingong pinulongan! Ug pagkamakapalig-on alang sa mga igsoon mismo nga makapahimulos sa maayong espirituwal nga pagkaon kada bulan! Sa dihang gipahibalo sa sirkitong asembliya sa Reykjavík nga ipatik sa Icelandiko nga pinulongan Ang Bantayanang Torre, usa ka dakong hulad sa magasin ang gipaskin diha sa luyo sa mamumulong. Puwerteng pamakpak sa mga igsoon alang niining bag-ong gasa gikan kang Jehova!

Si Brader Pedersen nahinumdom nga sa dihang miabot siya sa Iceland sa Oktubre 1959, ang pulyetong “This Good News of the Kingdom” mao lamang ang bugtong publikasyon sa Icelandiko nga pinulongan nga magamit niadtong higayona alang sa kanataran, ug daghang tagbalay duna nay kopya. Ang mga magmamantala nagtanyag ug Ang Bantayanang Torre ug Pagmata! sa pinulongang Aleman, Danes, Iningles, o Sweko sa mga tawong makabasa sa usa niining mga pinulongana. Bisag daghan ang makasabot sa usa niining mga pinulongana, mas dakog epekto alang kanila nga mabasa Ang Bantayanang Torre sa ilang kaugalingong pinulongan. Kining publikasyona sa Icelandiko nga pinulongan dako kaayog epekto sa buluhatong pagsangyaw. Ang 41 ka magmamantala ug mga payunir nakapahimutang ug 809 ka suskrisyon  ug 26,479 ka magasin nianang maong tuig sa pag-alagad. Miuswag usab ang gidaghanon sa mga pagtuon sa Bibliya.

Laing halandomong hitabo mao ang pag-organisar ug sangang buhatan sa Enero 1, 1962. Ang Iceland ilalom kanhi sa pagdumala sa sanga sa Tinipong Bansa ug una pa niana sa sanga sa Denmark. Dayon, sa 1969, ang mga Saksi ni Jehova nakabaton ug permiso sa gobyerno ug narehistro sa Ministry of Justice and Ecclesiastical Affairs. Nianang panahona ang mga Saksi sa Iceland aduna nay mga katungod sama sa tanang ubang mga denominasyon ug may awtorisasyon na sa pagkasal ug pagdumala sa mga paglubong.

Pagsupak sa Klero

Sa bulan nga naorganisar ang sanga, nasinati sa mga igsoon ang pagsupak sa klero. Usa ka buntag niana, ang mga ulohan sa balita sa pangunang mantalaan nagpahibalo nga ang obispo sa relihiyon sa nasod nagpagula ug pulyeto nga nagpasidaan batok sa mga Saksi ni Jehova, nga nagtambag sa mga tawo nga dili mamati kanila. Ang pulyeto nag-ulohang Vottar Jehóva​—advörun (Mga Saksi ni Jehova​—Usa ka Pasidaan). Kini usab ang gihisgotan sa ubang mga mantalaan. Ang Vísir, nga pangunang mantalaan nga mabatonan mahapon, nagpatik sa interbiyo sa usa ka igsoon nga nag-alagad sa sangang buhatan. Gipatin-aw sa maong artikulo ang among mga panghunahuna, ug wala magdugay ang ubang mga mantalaan nagreport usab bahin niini. Niining paagiha, usa ka dakong pamatuod ang nahatag, ug daghang tawo ang nakabaton ug kahibalo bahin sa among buluhaton. Ang ubang mga magbabasa nagsulat aron suportahan ang mga Saksi, ug kini gipatik sa mga mantalaan. Ang obispo mikontra-atake, nga nagpatik ug “tubag” alang namo. Apan, diha sa tibuok-panid nga artikulo sa labing popular nga mantalaan, ang Morgunbladid, bug-os nga gipatin-aw sa mga Saksi ni Jehova ang ilang buluhaton ug mga pagtulon-an.

Ang pulyeto nga may pasidaan giapod-apod sa tibuok nasod. Nakahatag kini ug dakong publisidad sa mga Saksi ni Jehova, ug ang epekto niini sa among buluhaton milungtad ug daghang tuig  diha sa teritoryo. Tungod sa tanang publisidad, ang usa sa mga mantalaan nagtaho: “Ang obispo nahimong manedyer sa panganunsiyo sa mga Saksi ni Jehova.” Nabantog ang katawhan ni Jehova, bisan sa hilit nga mga lugar sa nasod nga wala pa masangyawi sa mga Saksi. Bisan tuod ang uban misunod sa tambag sa obispo, ang kadaghanan naikag. Apan, sa amihanan, sa Akureyri, dihay pagbatok. Usahay, batoon sa mga batan-on sila Heinrich ug Katherine Karcher, nga nag-alagad didto ingong mga payunir. Paglabay sa mga tuig, ang ubang relihiyosong mga magsusupak sa Akureyri nag-apod-apod pag-usab sa pulyeto gikan sa obispo, nga nag-imprenta pag-usab niini diha sa ilang lugar. Ingon usab niini ang gihimo sa mga Pentekostal sa Reykjavík, nga nagtuo nga mapahunong o mababagan nila ang among pagsangyaw.

Ang Suliran sa Paghikay ug mga Kombensiyon

Ang mga asembliya ug mga kombensiyon maoy malipayon gayod nga mga okasyon alang sa katawhan sa Diyos sa Iceland. Bisan ug diyutay lang ang mga magmamantala, ang mga igsoon madasigon sa paghikay ug mga asembliya. Ang unang asembliya gihimo sa Hulyo 1951, sa dihang duha ka brader​—si Percy Chapman sa Canada ug si Klaus Jensen sa Brooklyn​—miduaw sa Iceland paingon sa sunodsunod nga mga asembliya nga gipahigayon didto sa Uropa niana nga ting-init. Bisag diyutay lamang ang mga magmamantala sa Iceland niadtong panahona, ang kinadaghanang tumatambong sa asembliya maoy 55. Ang sunod nga asembliya gihimo paglabay sa pito ka tuig, sa Hunyo 1958, panahon sa pagduaw sa magtatan-aw sa sona, si Filip Hoffmann, ug 38 ang namati sa pakigpulong publiko. Sukad niadto, ang mga asembliya ug mga kombensiyon tuig-tuig nang ginahimo.

Si Fridrik Gíslason maoy usa sa pipila ka igsoon nga dunay bahin sa mga programa sa kombensiyon sa mga tuig sa 1950. Siya miasoy: “Nahinumdom ako nga ako ang nagdumala sa Food Service Department sa unang mga asembliya. Gawas nga ako ray naghimo sa halos tanang trabaho, kasagarang duna akoy tulo o upat ka bahin sa programa matag adlaw. Samtang nagtrabaho sa  kosina, nagsul-ob ako ug epron. Sa dihang magdalidali sa pagsulod sa tigomanan aron mopakigpulong, isul-ob nako ang akong amerkana, apan usahay pahinumdoman ako sa mga igsoon sa paghubo sa akong epron. Niining panahona mga 400 ngadto sa 500 na ang tumatambong sa among mga asembliya, ug daghan nang maayong mga ansiyano ang kuwalipikadong modumala sa mga bahin sa programa.”

Ang mga drama sa Bibliya maoy makapahinam ug matulon-anon nga kinatayuktokang bahin sa distritong mga kombensiyon. Apan, tungod kay diyutay ra kaayo ang mga magmamantala sa Iceland, ang mga drama mapaminawan lamang pinaagig tingog sa teyp. Ang sanga sa Denmark mitabang sa paghimong buhi sa mga drama pinaagi sa pagtagana ug dekolor nga mga slide nga mahimong ipasalida dungan sa tingog sa teyp. Bisan pa niana, ang mga drama nagkinahanglan ug dakong panahon sa pag-andam. Una, kinahanglang hubaron kini sa Icelandiko nga pinulongan. Dayon  kini irekord diha sa teyp pinaagi sa mga tingog sa mga igsoon nga makasulti sa lumad nga pinulongan. Dugang pa, ang musika ug ubang mga tingog idugang gikan sa Iningles nga mga teyp. Ang uban magdula sa nagkalainlaing mga papel, nga lainlainon ang ilang tingog sumala sa karakter nga ipresentar. Sa kadugayan, ang pipila ka drama giakto na nga nagbesti nahiuyon sa panahon sa Bibliya.

Ang una niini nga drama, nga bahin kang Rayna Ester, gipasundayag sa distritong kombensiyon sa 1970. Ang mga igsoon maikagong naghago niana nga proyekto ug masibotong nag-ensayo sa drama. Bag-ong kasinatian ang pagsul-ob ug mga besti sama nianang gigamit panahon sa Bibliya ug ang pagtaod ug bungot diha sa nawong sa mga igsoong lalaki. Wala ipahibalo nga dunay aktuwal nga drama nga ipasundayag sa kombensiyon. Kini nakapalipay gayod nga sorpresa. Diha sa gagmayng mga kombensiyon, diin ang tanan halos nakaila sa usag usa ug ang tanan duol sa entablado, ang uban nangagpas kon kinsa ang nanag-akto sa lainlaing mga papel. Human makakita sa drama, usa ka sister miingon, “Tiaw mo na, usa lang ka igsoon ang akong nailhan sa drama, ug siya ang nagdula sa papel ni Haring Nabucodonosor!” Iyang gisulti ang ngalan sa brader ug nakurat sa pagkahibalo nga nasayop siya. Gipabilhan gayod sa mga igsoon ang paghago sa daghan aron ang programa mapresentar diha sa gagmayng mga kombensiyon ug mga asembliya. Ang tanan nakapahimulos sa hamiling mga leksiyon sa drama nga gipresentar diha sa ilang kaugalingong pinulongan.

Internasyonal nga mga Kombensiyon Nakahatag ug Kalipay

Sulod sa daghang katuigan, ang mga igsoon sa Iceland nalipay usab nga nakatambong sa mga kombensiyon sa ubang mga nasod. Lima ka delegado gikan sa Iceland ang nakapribilehiyo sa pagtambong sa Balaang Kabubut-on Internasyonal nga Asembliya sa New York sa 1958. Daghan ang mitambong sa Nagkahiusang mga Magsisimba nga mga Asembliya sa Uropa sa 1961 ug sa “Walay  Kataposang Maayong Balita” nga mga Asembliya sa 1963. Ang uban nalingaw sa pagpakig-uban sa mga igsoon gikan sa daghang nasod diha sa “Balaang Kadaogan” Internasyonal nga mga Asembliya sa 1973. Kapin sa usa ka gatos ka magmamantala gikan sa Iceland ang mitambong sa “Pakigdait sa Yuta” Internasyonal nga Asembliya sa Copenhagen, Denmark, sa Agosto 5-​10, 1969. Kini ang kinadak-ang grupo gikan sa Iceland nga nakatambong sa usa ka internasyonal nga kombensiyon sa laing nasod. Niana nga ting-init, 80 porsiyento sa mga magmamantala sa Iceland miadto sa gawas sa nasod aron motambong ug kombensiyon.

Kay daghan man kaayo gikan sa Iceland ang nagplano sa pagtambong sa 1969 nga kombensiyon, gihikay sa sanga sa Denmark nga ang mga igsoon sa Iceland mag-usa paglingkod didto. Sa mabuntag, una pa magsugod ang mga sesyon, ang mga igsoon nga taga-Iceland mag-abot diha sa ilang seksiyon diin ilang masayran ang mga sumaryo sa programa sa ilang kaugalingong pinulongan.

Lakip niadtong mitambong niining kombensiyona mao ang usa ka batan-ong lalaki nga ginganlag Bjarni Jónsson. Siya ang anak sa abogadong tag-iya sa bilding sa Reykjavík nga giabangan sa mga igsoon ingong balay sa misyonaryo ug sangang buhatan. Si Bjarni wala pa kaayoy nahibaloan bahin sa kamatuoran, ug siya mibiyahe uban sa mga igsoon ngadto sa Copenhagen dili aron motambong sa kombensiyon. Sa unsang paagi kini nahitabo?

Si Kjell Geelnard, nga mao ang alagad sa sanga niadtong higayona, dunay buot ipakigsulti sa amahan ni Bjarni. Gisultihan siya ni Kjell bahin sa internasyonal nga asembliya sa Copenhagen ug sa grupo sa mga igsoon nga nagplano sa pagtambong. Sa nakadungog niini ang abogado, siya mihangyo kon ang iyang kinamagulangang anak mahimo bang mobiyahe uban sa grupo. Iyang giingnan si Brader Geelnard nga ang iyang anak bag-o pang nakatapos sa hayskul, ug buot niyang ihatag nga gasa ang usa ka biyahe ngadto sa laing nasod, ug ang Copenhagen maoy usa ka maayong dapit nga adtoan. Si Kjell naghunahuna nga maayo kini nga ideya ug giingnan ang abogado nga kon gusto ni Bjarni nga motambong  sa asembliya aron makita kon unsa kini, mahatagan siya ug sak-anan sa Copenhagen. Nalipay sa pagkadungog niini, gipangutana sa abogado ang iyang anak kon gusto ba niyang mokuyog sa grupo sa mga Saksi ni Jehova nga moadto sa asembliya. Misugot dayon ang anak.

Ang Rooming Department gikontak aron mapangitaan ug sak-anan si Bjarni sa Copenhagen. Ang gihikay sa mga igsoon nga sak-an niya mao ang usa ka pamilyang Saksi. Ang usa ka Amerikanong delegado nga mao untay kauban sa usa ka igsoon nga taga-Iceland nga ginganlag Jakob mikanselar sa iyang reserbasyon, busa si Bjarni maoy mipuli sa iyang lugar. Apan, tungod sa usa ka hinungdan, wala makaabot si Jakob. Ang miabot lang sa sak-anan mao si Bjarni. Tungod kay wala man masultihi sa Rooming Department ang pamilya nga puy-an ni Bjarni nga siyay mopuli sa Amerikanong brader, sila nagtuo nga ang ilang bisita mao si Jakob.

Naandan na nga sa dihang magkita ang mga igsoon gikan sa lainlaing mga dapit, sila mag-ambitay ug mga kasinatian. Ang Danes nga mga igsoon natingala nga walay ikaasoy nga kasinatian si “Jakob.” Si Bjarni, sa laing bahin, medyo naglibog nga ang magtiayong tagbalay nagpunayg tawag kaniya nga Jakob. Siya nagtuo nga sanglit ang ngalang Jakob gikan man sa Bibliya, basin  nabatasan na sa mga Saksi ni Jehova ang paggamit ug mga ngalan gikan sa Bibliya sa dihang mag-estoryahanay. Nahibaloan ang tinuod sa dihang ang usa sa mga brader diha sa balay nga gisak-an ni Bjarni nakahimamat ug Danes nga igsoon nga nagpayunir sa Iceland. Iyang gipangutana ang igsoon kon bag-ohan ba si “Jakob” sa kamatuoran kay wala man siyay ikasulti bahin sa buluhaton sa Iceland. Gipatin-aw sa Danes nga igsoon nga si “Jakob” sa pagkatinuod mao si Bjarni, usa ka estudyante sa Iceland nga mibiyahe uban sa mga igsoon paingon sa Copenhagen. Mainiton ang pag-abiabi kang Bjarni sa pamilyang iyang gisak-an ug gidapit siya sa pagpabilin ug usa pa ka semana samtang magsuroysuroy sa Denmark. Ang ilang kaayo nakatandog sa kasingkasing ni Bjarni.

Sa pagkatinuod, mitambong si Bjarni sa asembliya. Ug bisan pag wala siyay pasukaranang kahibalo sa kamatuoran sa pagtabang kaniya nga makabenepisyo sa programa sa bug-os, nakadayeg gayod siya sa iyang nakita ug nadungog. Pagbalik niya sa Iceland, siya ug ang iyang pamilya nagtuon dayon sa Bibliya. Si Bjarni miuswag pag-ayo sa kamatuoran ug nabawtismohan sa 1971. Siya nag-alagad ingong membro sa Komite sa Sanga sa Iceland sukad sa 1979.

 Si Svanberg Jakobsson nag-alagad ingong maghuhubad sa sanga sa Iceland sa daghan nang tuig ug siya na karon ang magtatan-aw sa Departamento sa Paghubad. Sa batan-on pa siya nga magmamantala, mitambong siya sa “Balaang Kadaogan” Internasyonal nga Asembliya sa London, Inglaterra, sa 1973. Siya miasoy: “Nahinumdom ako nga malipayon kaayong nagtan-aw sa libolibo ka igsoon nga nagganayan ngadto sa estadyum sa kombensiyon. Naikag ako nga nakakita sa daghang brader ug sister gikan sa Aprika, nga ang tanan nagsul-ob sa ilang mabulokon nga tradisyonal nga sinina. Dili makalimtan nga kasinatian ang pagpakig-uban sa tinagpulo ka libo nga igsoon, pagpamati sa programa uban nila, pag-awit uban nila, pagduyog kanila sa pag-ampo, pagpangaon uban nila, ug bisan ang pagpakig-uban lamang kanila.”

Si Sólborg Sveinsdóttir, nga nabawtismohan sa 1958, mibiyahe ug unom ka adlaw paingon sa Denmark pinaagig barko uban sa upat sa iyang mga anak sa pagtambong sa kombensiyon sa Copenhagen sa 1961. Kaanib si Sólborg sa usa ka nahilit nga gamayng grupo sa Keflavík. Sa unsang paagi nakaapektar kaniya ang pagtambong sa usa ka dakong internasyonal nga kombensiyon? Siya miingon: “Nindot kaayong paminawon ang kapin sa 30,000 ka igsoon nga nahiusang nag-awit sa mga awit sa Gingharian sa lima ka pinulongan​—nakatandog kini kanako. Ang tanan organisado kaayo.”

Dako ang magasto sa biyahe paingon sa internasyonal nga mga kombensiyon, apan gibati sa mga igsoon nga ang pagtambong takos gayod kaayo sa gastos. Ang pagtambong sa maong makapalipay nga espirituwal nga mga pista nga giandam ni Jehova ug ang pagpakig-uban sa libolibo ka tawo nga may samang pagtuo maoy usa ka panalangin.

Miduaw ang usa ka Espirituwal nga “Silbidor”

Daghan ang namalhin sa Iceland aron sa pag-alagad sa dapit nga mas dako ang panginahanglan. Alang kanilang tanan, ang pagbalhin nagkahulogan ug dugay ug malisod nga paningkamot  sa pagkat-on sa komplikadong Icelandiko nga pinulongan. Bisan pa niana, usahay ang sayop nga pagsabot sa mga pulong moresulta sa panalangin. Pananglitan, usa ka adlaw niana si Heinrich Karcher namalaybalay, nga nagpailaila sa iyang kaugalingon nga ministro, o alagad. Diha sa usa ka balay, usa ka babaye ang mibukas sa pultahan, ug sa dihang gipailaila niya ang iyang kaugalingon, gipadayon siya sa babaye. Nasayop ang babaye sa pagsabot kon kinsa siya tungod kay sa Icelandiko nga pinulongan, usa ra ang pulong alang sa “alagad” ug “silbidor.” Abi sa babaye nga ang iyang bisita kauban sa trabaho sa iyang bana, nga usa ka silbidor sa lokal nga hotel. Nahibalo siya nga moabotay na ang iyang bana, busa nagtuo siya nga padayonon na lang niya kining iyang gituohang kauban sa trabaho sa iyang bana aron magkita sila. Siyempre, puwerte nilang pangatawa sa dihang naklaro ang tanan.

Ang bana miabot, ug gidalitan sa among espirituwal nga “silbidor” ang batan-ong magtiayon ug lamiang espirituwal nga pagkaon, nga nagustohan nila pag-ayo. Gihangyo pa gani nila si Heinrich nga mobalik kuyog ang iyang asawa. Wala madugay nasugdan ang usa ka regular nga pagtuon sa Bibliya, ug ang interesadong magtiayon nagsugod sa pagpamatuod ngadto sa uban. Bisan diha sa lokal nga hotel nga iyang gitrabahoan, ang batan-ong silbidor mosangyaw ngadto sa tanan nga maminaw. Sa ngadtongadto, ang magtiayon nabawtismohan. Nalipay sila nga kining espirituwal nga “silbidor” miduaw kanila ug nga siya wala managana sa pagsangyaw kanila sa laing pinulongan.

Sulod sa daghang tuig, dunay daghang kataw-anan nga panghitabo tungod sa sayop nga paglitok sa mga pulong sa dihang ang mga igsoon gikan sa laing mga nasod nagtuon sa pinulongan. Pananglitan, sa bag-o pa siya sa Iceland, si Sally Macdonald nangandam sa iyang introduksiyon nga isulti: “Akong giduaw ang mga tawo dinhi sa silingan aron ipaambit kanila ang pipila ka makaiikag nga impormasyon gikan sa Bibliya.” Imbes gamiton ang pulong nga pagduaw (heimsækja) ang iyang gigamit nga pulong mao ang paglutos (ofsækja) ug mapahiyomong nag-ingon: “Akong gilutos ang mga tawo dinhi sa silingan.”

 Namalaybalay Kauban ang Lutheranong Ministro

Sa daghang tuig, si Holger ug Tove Frederiksen nga taga-Denmark nag-alagad nga matinumanon ingong mga espesyal payunir sa Iceland, ug nag-alagad sila sa makadiyot sa nagapanawng buluhaton. Bisag lisod kang Tove ang pagkat-on ug pagkahimong hanas sa Icelandiko nga pinulongan, daghan siya ug natabangan nga makadangat sa kamatuoran tungod sa iyang kasibot ug kadasig.

Usa ka higayon samtang nag-alagad sa sirkitong buluhaton, si Holger ug ang usa ka batan-ong magmamantala namalaybalay diha sa usa ka gamayng baryo. Sa ilang kakurat, miuban kanila ang Lutheranong ministro. Nganong nahitabo man kini?

Una pa niana, ilang giduaw ang ministro diha sa iyang balay. Mahigalaon siya ug gipadayon niya sila sa iyang opisina. Sa dihang nakita sa ministro ang mga libro nga ilang gitanyag, siya miingon, “Kining mga libroha naundan ug bakak nga mga pagtulon-an!” Dayon kalit siyang mitindog, giisa ang iyang duha ka kamot, ug gipahayag nganha kanila ang tunglo sa Diyos. “Dili nako gusto nga magsangyaw kamo dinhi sa akong parokya!” siya misinggit. Gisultihan ni Holger ang ministro nga wala siyay katungod sa pagpugong kanila sa pagsangyaw ug nga padayonon gihapon nila ang ilang buluhatong pagsangyaw. Dayon ang ministro miingon, “Kon padayonon ninyo ang pagsangyaw ngadto sa mga tawo sa akong parokya, kuyogan ko kamo.” Giingnan siya ni Holger nga makakuyog siya.

Human nga ang ministro nagsunodsunod kanila diha sa duha ka balay nga kinadul-an sa iyang puy-anan, ilang nahibalag si Tove ug ang laing sister, kinsa natingala sa pagkakita kon kinsay ilang kauban sa pagpamalaybalay. Nianang tungora, gidapit silang tanan sa ministro ngadto sa iyang balay aron mangape. Mangayaon silang nagkabildohay. Nagtuo si Holger nga ang kalit ug wala-damha nga pagkamaabiabihon sa ministro lagmit gituyo aron dili nila masangyawan ang tanan sa teritoryo. Busa pagkasunod adlaw, mibalik sila ug gisangyawan nila ang tibuok baryo, nga nagpahimutang ug daghang literatura ug nakahimamat ug daghang tawo nga interesadong maminaw.

 Nababagan sa Midahili nga Niyebe

Aron makasangyaw sa mga tawo sa kabanikanhan, kasagarang gikinahanglan ang pagdrayb agi sa mga kimba sa bukid diin ang mga karsada adunay yelo ug natabonan sa napalid nga niyebe panahon sa mangiob nga mga bulan sa tingtugnaw. Niadtong Disyembre 1974, samtang nag-alagad sa sirkito, si Kjell ug Iiris Geelnard miduaw sa Akureyri, sa amihanang baybayon. Sa semana nga sila miduaw sa kongregasyon didto, sila mibiyaheg kapin sa 80 ka kilometros paingon sa lungsod sa Húsavík. Ilang gikuyog si Holger ug Tove Frederiksen. Silang upat nagsangyaw sa teritoryo sulod ug palibot sa Húsavík sa pipila ka adlaw ug gitapos ang pagduaw pinaagi sa paghatag ug pakigpulong publiko ug pagpasalida ug mga slide diha sa usa ka eskuylahan. Pagsugod sa tigom, mihapak ang usa ka bagyo sa maong dapit, nga nagdalag bugnaw kaayong hangin, niyebe, ug ulan nga halos nayelo na. Human sa tigom, samtang ang nanambong nanghipos sa ilang mga butang aron mamauli, ang tibuok lungsod mingitngit sa pagkawala sa koryente tungod sa bagyo sa niyebe. Ang mga igsoon namiya sa eskuylahan nga wala nay suga, pero ang tanan nalipay nga napasalida ang mga slide sa wala pa mawala ang koryente.

Ang mga magtiayong Geelnard ug Frederiksen kinahanglang modrayb balik sa Akureyri. Sila nangutana sa lokal nga kapolisan ug sa pipila ka drayber sa bus ug trak bahin sa kahimtang sa karsada ug sila gipasaligan nga sayosayo nianang adlawa walay dakong suliran. Busa mihukom sila nga molarga dayon, apan nalangan sila sa paghipos sa ilang mga butang tungod kay kandila lang ang ilang suga. Ug sa dihang nagpatubil sila sa kotse, ang nagbantay kinahanglang manomano nga magbomba sa gasolinahan. Sa kataposan, sila andam nang molarga sa mga alas nuybe sa gabii.

Sa pagbatbat sa biyahe, si Kjell miingon: “Sa sinugdan ang kahimtang maayo ra, apan nagkakusog ang ulan sa niyebe. Usahay lisod kaayong makita ang karsada mao nga si Holger kinahanglang mogawas sa kotse aron giyahan kami pinaagig plaslayt. Unya miungot ang kotse diha sa bundo sa napalid nga niyebe. Nakalingkawas  kami gikan sa mga bundo sa niyebe sa pipila ka higayon pinaagi sa pagtulod sa kotse ug pagpala sa niyebe, apan sa ulahi kami nababagan sa nagbuntaog nga paril sa niyebe. Among nasayran sa ulahi nga kadto maoy niyebe nga midahili gikan sa bukid sa ibabaw. Sa ordinaryong kahimtang, dangtan lang ug duha ka oras ang pagdrayb gikan sa Húsavík paingon sa Akureyri, apan niadtong higayona unom ka oras na kaming nagbiyahe apan katunga pa lang ang among nadagan.

“Didto pa kami sa karsada sa alas tres sa buntag​—basa, gikapoy, ug gitugnaw. Pagkadako sa among kalipay sa dihang may nakita kaming mga suga sa duol nga umahan. Nakahatag kadto kanamog kaisog sa pag-adto didto ug pagtuktok sa pultahan. Si Holger, nga usa ka tawong matinahoron ug mahunahunaon, mituktok sa atubangan nga pultahan. Sa dihang walay mitubag, iya kining giablihan, misaka sa itaas, ug hinay nga mituktok sa pultahan sa lawak-higdaan. Bisan tuod nahikurat, ang mag-uuma ug  iyang asawa wala masuko sa wala-damha nga pagkatugaw. Sila misaysay nga nanghigda na sila sa pagkawala sa koryente ug nakalimtan nila ang pagpalong sa mga suga!

“Niadtong higayona among naeksperyensiyahan kon unsa ka maabiabihon ang mga taga-Iceland. Gibalhin sa mag-uuma ug sa iyang asawa ang nangatulog na nilang mga anak ngadto sa laing lawak aron kaming upat may matulgan nga duha ka lawak, ug sa wala madugay, diha nay gidalit nga init nga kape ug lamian nga tinapay sa lamesa sa kosina. Pagkaugma human sa pamahaw, miinsistir ang mag-uuma nga didto na lang kami maniudto. Human makapaniudto uban sa pamilya, gipadayon namo ang among biyahe paingon sa Akureyri tungod kay niadtong higayona ang karsada nahawanan na sa duha ka dagkong tighinlo sa niyebe. Tungod sa pagkamaabiabihon sa mag-uuma ug sa iyang asawa, nakahigayon kami sa pagpakigsulti kanila bahin sa kamatuoran sa Bibliya.”

Pagsangyaw Diha sa Barko sa Pamaling

Pipila ka tuig nga miagi, si Kjell Geelnard nakahibalag ug usa ka batan-ong lalaki sa iyang pagsangyaw sa kanataran. Fridrik ang iyang ngalan. Siya ang kinamagulangang anak nga lalaki sa pamilya, ug siya mahunahunaon sa espirituwal ug gustong makighisgot bahin sa Bibliya. Siya daghag pangutana ug interesado kaayo nga mahibalo bahin sa Bibliya. Ugaling lang, malisod ang pagbalikduaw kaniya, sanglit siya makinista sa usa ka barko sa pamaling. Siya kasagarang tua sa dagat, nga moestar lang ug pipila ka adlaw sa balay kon wala silay biyahe. Bisan pa niana, pinaagi sa pagsusi sa eskedyul sa barko sa pamaling ug pagpangutana sa inahan ni Fridrik kon kanus-a siya gilaomang mopauli sa balay, si Kjell nakahimo sa pagpakigkita kaniya, usahay sa pantalan ug usahay sa balay. Sa ingong paagi siya natabangan sa mga igsoon aron mouswag sa espirituwal.

Sa hinapos sa tuig 1982, si Fridrik naimbitar sa pagtambong sa usa ka asembliya sa Reykjavík. Niadtong panahona ang iyang pagtuo kang Jehova miuswag na, ug siya miampo nga siya makahigayon  unta sa pagtambong. Unya nahitabo nga ang usa ka tripulanteng natagaag bakasyon gikan sa pagpamaling kalit mihukom nga dili na idayon ang pagbakasyon. Mihatag kadto ug higayon kang Fridrik nga malibre sa trabaho ug makatambong sa asembliya. Natandog kaayo si Fridrik sa programa, nga niadtong higayona nakombinsir nga gusto na niyang moalagad kang Jehova.

Sa pag-uli ni Fridrik sa iyang kaugalingong lungsod, iyang giingnan ang iyang trato bahin sa iyang desisyon ug sa epekto unya niana diha sa iyang kinabuhi. Giingnan niya ang iyang trato nga siya gustong makigminyo kaniya apan kon siya dili gustong maminyo sa usa ka Saksi ni Jehova, kinahanglang bugtoon sa iyang trato ang ilang sabot nga magminyo. Pagkabuntag, dihay nanuktok sa pultahan sa balay sa mga misyonaryo. Didto sa gawas si Fridrik ug ang iyang trato nagbarog. Mubo apan lig-on ang mensahe ni Fridrik: “Gusto ni Helga nga magtuon sa Bibliya!” Busa ang mga misyonaryo mihikay sa pagtuon uban kang Helga. Sa pagkahapon niadtong adlawa, usa sa mga manghod nga lalaki ni Fridrik mihangyo usab ug usa ka pagtuon sa Bibliya. Niadtong semanaha mismo, gidala ni Fridrik ang iyang kinamanghoran nga igsoong babaye sa tigom ug miingon: “Gusto ni Unnur nga magtuon sa Bibliya!”

Gusto ni Fridrik nga magpasimbolo sa iyang pagpahinungod kang Jehova pinaagi sa bawtismo sa tubig. Ugaling, kinahanglan una nga pauswagon niya ang iyang kahibalo ug unya repasohon ang mga pangutana alang sa bawtismo. Ang problema mao nga tua siya sa dagat kanunay. Kon si Kjell dili makaduaw kang Fridrik diha sa iyang balay, basin puwede siyang maduaw diha sa iyang trabahoan. Ang solusyon? Gipatrabaho ni Fridrik si Kjell kauban niya sa lawak sa makina diha sa barko sa pamaling. Sa sayong bahin sa 1983, dala ang iyang Bibliya ug tun-anang basahon, si Kjell misakay sa barko sa pamaling nga ginganlag Svalbakur.

“Ang pagtrabaho ug pagsangyaw sakay sa Svalbakur maoy halandomong kasinatian,” nahinumdom si Kjell. “Ang adlaw sa trabaho magsugod sa alas 6:30 s.b. ug matapos sa alas 6:30 s.h. Sa  pagkaudto, kami maniudto, ug may higayon sa pagpangape sa buntag ug sa hapon. Ang mga oras nga walay trabaho gigamit sa pagtuon uban kang Fridrik, ug daghan ang kahigayonan sa pagsangyaw ngadto sa ubang mga tripulante. Ang mga gabii gigamit sa pagtuon ug paghisgot sa espirituwal nga mga topiko. May mga higayong matulog kami nga lapas na sa tungang gabii. Sa tingpaniudto, among gipaningkamotan nga dili magdugay sa lawak kan-anan aron makahisgot kami sa inadlaw nga teksto sulod sa kamarote ni Fridrik.”

Siyempre, ang mga tawo sa barko nakamatikod nga diha  nay usa ka misyonaryo nga sakop sa tripulante. Sulod sa unang pipila ka adlaw, ang mga tawo mapanagan-on bahin kang Kjell, sanglit wala sila mahibalo kon unsa kahay iyang buhaton. Bisan pa niana, ang pipila sa tripulante maikagong namati sa isulti ni Kjell. Usa kanila nagpakitag dakong interes, ug sa dihang iyang nasayran ang bahin sa panaghisgot sa inadlaw nga teksto sa tingpaniudto, gusto niyang moapil. Usa ka adlaw niana sa dihang nadugay ang estoryahay sa lawak kan-anan, siya dili mahimutang ug miingon kang Kjell ug Fridrik atubangan sa tanang uban pa: “Dili ba angayng moadto na ta sa kamarote ug magbasa sa inadlawng teksto?”

Usa ka gabii niana, gidapit ni Kjell ug Fridrik ang mga tripulante nga moadto sa kamarote ni Fridrik aron hisgotan ang artikulo bahin sa alkoholismo diha sa magasing Pagmata! Pito sa mga tripulante ang mitambong sa maong dugay-malimtan nga tigom, ug ang balita bahin sa maong tigom nabatian usab sa mga tripulante sa ubang mga barko sa pamaling.

“Human sa halos duha ka semana nga pagsangyaw ug pagtrabaho sakay sa Svalbakur, kami midunggo na usab sa pantalan,” matod ni Kjell. “Niadtong panahona narepaso na nako si Fridrik sa mga pangutana sa bawtismo, gawas pa sa pagsusi uban niya sa daghan pang laing mga topiko sa Bibliya, pagsangyaw ngadto sa ubang mga tripulante, ug pagpahimutang kanilag mga magasin ug literatura.” Si Fridrik nabawtismohan sa tingpamulak sa 1983. Ang trato ni Fridrik nga si Helga; iyang inahan; ug iyang manghod nga babaye mibarog tanan sa kamatuoran.

Mga Pagtuon Pinaagig Telepono

Lisod kanunay ang pagsangyaw sa maayong balita ngadto sa mga tawong nagpuyo sa lagyong mga dapit niining dakong pulo. Ang telepono maoy epektibong instrumento aron maabot ug padayong makontak ang interesadong mga tawo.

Daghan ang nakapahimulos tungod niini nga paagi sa pagpaambit sa maayong balita. Pila ka tuig kanhi, usa ka babayeng ginganlag Oddný Helgadóttir miduaw sa iyang anak nga lalaki ug  binalaye, kinsa nagtuon uban sa mga Saksi ni Jehova. Sa dihang sila misugilon kaniya sa ilang ginatun-an, gusto usab niyang magtuon sa Bibliya. Ugaling lang, si Oddný nagpuyo sa usa ka layong dapit sa amihanan-kasadpang baybayon sa Iceland, kapig 300 ka kilometro gikan sa kinadul-ang kongregasyon. Sa dihang ang usa ka Saksi nga babaye, si Gudrún Ólafsdóttir mitanyag sa pagtuon uban niya pinaagi sa telepono, siya malipayong midawat niana. Human sa usa ka pangbukas nga pag-ampo, si Oddný motubag dayon sa mga pangutana nga gipatik sa libro. Sa iyang bug-os nga pagpangandam alang sa pagtuon, isulat ni Oddný ang gisitar nga mga teksto aron mabasa dayon niya kana inighisgot na niana. Sa ingon, dili na siya kinahanglang mangita pa sa mga teksto samtang nagpadayon ang pagtuon. Sa usa ka higayon, didto sila nagtuon sa balay ni Gudrún sa dihang si Oddný miduaw niadtong dapita. Silang duha dili relaks, sanglit kadto ang unang higayon nga sila nagtuon nga nag-atubangay, mao nga gisugyot ni Gudrún agig komedya nga moadto siya sa pikas nga lawak diin may laing telepono!

Sa dihang nakasabot na si Oddný sa kamatuoran, siya misugod pagsangyaw ngadto sa iyang bana, si Jón. Sa dihang ang iyang bana nagpakitag interes, wala siya makaseguro kon mahimo ba niyang dumalahan ug pagtuon ang iyang bana. Nasayran niya nga mahimo siyang makadumala sa pagtuon apan angay siyang magpandong samtang magdumala sa pagtuon. Gawas sa pagtuon uban sa iyang bana, siya nagsangyaw usab ngadto sa mga silingan. Dayon, miingon siya nga gusto na niyang magpabawtismo. Gihikay ni Gudrún nga marepaso sa usa ka ansiyano si Oddný sa mga pangutana diha sa librong Organisado sa Pagtuman sa Atong Ministeryo pinaagi sa telepono, aron masusi kon takos na ba siya. Dayag nga siya takos na gawas lang sa usa ka butang: Siya dili pa pormal nga nakabulag sa simbahan.

Mga usa ka semana sa ulahi, si Oddný mitelepono kang Gudrún sa pagpahibalo kaniya nga mibulag na siya sa simbahan. Mibulag na usab ang iyang bana. Kadto maoy dakong desisyon  alang sa iyang bana, sanglit siya ang tsirman sa konsilyo sa lokal nga parokya. Sa ulahi, si Oddný nabawtismohan panahon sa usa ka sirkitong asembliya. Ang asembliya maoy makalipayng kasinatian alang kaniya kay kausa lang siya nakahimamat ug gamayng grupo sa mga Saksi una pa niana. Sa usa ka interbiyo sa programa sa maong asembliya, siya gipangutana kon lisod ba ang pagpuyo nga layo kaayo sa mga Saksi. Siya mitubag nga wala gayod niya batia nga nag-inusara, sanglit siya nasayod nga anaa usab ang presensiya ni Jehova sa amihanan-kasadpang baybayon sa Iceland. Unya siya miingon pa nga siya nasubo nga wala makatambong ang iyang bana sa asembliya apan ang iyang bana nagpasalig kaniya nga motambong siya sa dihang andam na siyang magpabawtismo. Gituman niya ang iyang saad! Wala madugay, sila mibalhin sa dapit nga mas daghan ug molupyo aron regular nga makatambong sa mga tigom.

 Nagkinahanglan ug mga Balay sa mga Misyonaryo ug mga Kingdom Hall

Sa dihang si Nathan H. Knorr nga gikan sa tibuok-kalibotang hedkuwarter sa mga Saksi ni Jehova miduaw sa Iceland niadtong 1968, gusto niyang mangita ug mas haom nga bilding alang sa usa ka sangang buhatan ug puy-anan sa mga misyonaryo. Una pa niana, nagkalainlaing mga balay ang giabangan. Niadtong panahona ang mga igsoon nagsugod pagpangitag lote aron matarokan nilag bilding nga gamitong Kingdom Hall, balay sa mga misyonaryo, ug sangang buhatan. Kasamtangan, ang usa ka haom nga balay sa Hrefnugata 5 sa Reykjavík giabangan, ug niadtong Oktubre 1, 1968, ang unom ka misyonaryo mibalhin niana. Ang maong bilding nagsilbing sentro sa buluhaton sa Iceland sa misunod nga lima ka tuig. Sa ulahi, ang mga igsoon nakakitag lote nga maayog lokasyon diha sa Sogavegur 71, sa Reykjavík. Sa tingpamulak sa 1972, gisugdan pagtukod ang bag-ong bilding sa sanga. Kadto maoy usa ka dakong hagit alang sa pipila ra ka igsoon didto, nga dili kaayo antigo sa inhenyeriya ug pagpanukod. Walay mga kontratista sa pagpanukod o mga kantero, busa gikinahanglan ang pagsuhol ug mga kontratista nga dili mga Saksi. Ang maong mga kontratista andam kaayong mokooperar ug nagtugot sa mga igsoon nga moapil sa pagtrabaho sa maong proyekto. Giabangan sa mga igsoon ang usa ka bahin sa daang balay nga tupad sa lugar nga tukoran ingong silonganan diin sila makapangaon. Nagturnohay ang mga igsoong babaye sa paglutog pagkaon sa ilang mga balay ug nagdala niana ngadto sa lugar nga gitukoran aron mapakaon ang mga trabahante.

Ang pagtukod nahimong dakong pamatuod sa maong dapit. Ang mga kontratista ug mga opisyales sa siyudad nakahigayon gayod nga masinati ang mga Saksi ni Jehova. Mohunong ang ubang mga tawo duol sa maong lugar aron motan-aw sa pag-uswag sa pagtukod. Sa dihang palitadahan na ang bungbong, usa ka igsoong lalaki nga taga-Denmark nga propesyonal nga kantero miabot aron motabang. Gawas pa, ang mga igsoong babaye  maoy naghimo sa dakong bahin sa trabaho. Sa dihang ang pipila ka superbisor sa siyudad miduaw sa lugar nga gitukoran, ilang namatikdan nga ang mga igsoong babaye nagpaandar sa makina nga magsagol sa semento. Usa sa mga superbisor miingon: “Sa akong hunahuna may makat-onan gikan niini ang mga babaye sa among simbahan. Tino nga mas molampos ang pagtukod ug  mga simbahan pinaagi sa pagtrabaho inay sa paglibot ug kahon aron mangolektag kuwarta.” Ang bilding gipahinungod niadtong Mayo 1975, sa dihang si Milton G. Henschel miduaw sa Iceland ug naghatag sa pakigpulong sa pagpahinungod. Sa daghang katuigan, ang bilding nahimong pangunang balay sa mga misyonaryo sa nasod ingon man Kingdom Hall alang sa mga kongregasyon sa Reykjavík. Kini karon maoy sangang buhatan.

Pagka-1987 ang usa ka bag-ong Kingdom Hall ug balay sa mga misyonaryo gitukod sa lungsod sa Akureyri. Ang ebidensiya sa panaghiusa ug internasyonal nga panag-igsoonay nga naglungtad taliwala sa katawhan ni Jehova nadayag sa dihang kapig 60 ka igsoong mga lalaki ug babaye gikan sa Pinlandia ug Sweden nangabot aron motabang sa mga igsoon sa Iceland sa maong proyekto.

“Ang Kinamaayohang Matang sa Kahoy”

Latas sa katuigan, ang mga hawas sa Nagamandong Lawas sa mga Saksi ni Jehova nakaduaw sa Iceland, ug ang maong mga pagduaw nakapadasig gayod sa mga igsoon. Ang makapaikag nga hitabo sa 1968 mao ang pagduaw ni Brader Knorr, nga gihisgotan ganina. Siya mihatag ug makapadasig nga pakigpulong alang sa mga igsoon, miasoy ug mga kasinatian, ug mihisgot sa pag-uswag sa buluhatong pagsangyaw sa Gingharian diha sa Iceland.

Si Brader Henschel miduaw sa Iceland sa unang higayon niadtong Mayo 1970. Giabiabi siya sa pipila ka katulgon pang mga misyonaryo. Ang hinungdan niadto mao nga dili lang kay sayo kaayo sa buntag miabot si Brader Henschel kondili ang Hekla, usa ka nabantog nga bolkan, misugod pagbuto sa miaging adlaw, ug ang mga misyonaryo nagpulaw sa pagtan-aw niana!

Si Brader Henschel mihatag ug espesyal nga pagtagad sa mga misyonaryo ug sa mga espesyal payunir. Gidapit niya silang tanan sa usa ka espesyal nga tigom ug siya miasoy kanilag mga kasinatian gikan pa sa panahon sa iyang pagpayunir niadtong Dakong Depresyon. Giasoy niya nga ang literatura gipabayloan sa mga payunir ug mga manok, itlog, mantekilya, utanon, antipara, ug bisan usa ka itoy! Niadtong paagiha, nagpadayon ang buluhaton sa lisod  nga panahon, ug ang mga payunir wala makulangi sa mga kinahanglanon sa kinabuhi.

Ang mga tawong mobisita sa Iceland makamatikod dayon nga ang pagkaon dili sama sa ilang naandan. Apil sa mga kinaham nga potahe sa Iceland mao ang svid, usa ka ulo sa karnero nga gitunga ug gilat-an. Tiaw mo na nga motan-aw ka sa imong plato ug unya makakita sa katungang ulo sa karnero nga may ngipon ug usa ka mata! Daghang langyaw ang dili moangay nga magtan-aw sa mata sa karnero diha sa ilang plato. Hinuon, kanunay nga adunay lab-as nga isda. Ang usa ka kinaham sa taga-Iceland mao ang hardfiskur: isda nga gikuhaan sa bukog ug gihiwahiwa ug unya gibulad. Kini kan-on nga hilaw, nga mas lami kon pahiran ug mantekilya. Kining isdaa kasagarang gahi ug kinahanglang dukdokon aron mohumok. Busa, mahinamon kaayong gipaabot sa mga misyonaryo ang reaksiyon ni Brader Henschel sa dihang siya gidalitan sa maong isda. Human siya makatilaw niana, ang mga misyonaryo nangutana kon gilamian ba siya niana. Naghunahuna siyag kadiyot ug unya mataktikanhong mitubag: “Aw, mao tingali kini ang kinamaayohang matang sa kahoy nga akong nakaon sukad.”

Ang daghang ubang mga pagduaw sa mga hawas sa Nagamandong Lawas maoy halandomon ug makapadasig. Tungod sa maong mga pagduaw nasabtan sa mga igsoon sa Iceland nga bisan pag sila diyutay ra ug atua sa layo, sila maoy bahin sa internasyonal nga kapunongan sa mga igsoon, nga nahiusa sa mga bugkos sa Kristohanong gugma.

Pakigkooperar sa mga Doktor ug sa Media

Ang Hospital Liaison Committee (HLC) nga gilangkoban ug upat ka igsoong lalaki misugod sa pag-alagad sa Iceland niadtong 1992. Aron mabansay, duha sa mga igsoong lalaki ang mitambong sa usa ka seminar sa HLC sa Inglaterra, ug laing duha ang mitambong sa seminar nga gipahigayon sa Denmark. Sa dihang naorganisar na ang bag-ong naporma nga HLC, gipahigayon ang usa ka miting uban sa medikal nga mga trabahante sa dakong ospital sa usa ka unibersidad. Usa ka gatos ug katloan ka tawo  ang mitambong sa miting, apil ang mga doktor, nars, abogado, ug mga administrador sa ospital. Siyempre, medyo gikulbaan ang mga igsoon sanglit kadto ang unang miting nga gipahigayon sa HLC uban sa medikal nga mga propesyonal. Bisan pa niana, ang miting milampos, ug human niana, sila nakigtagbo sa pipila ka doktor ug ubang mga propesyonal sa nagkalainlaing ospital. Naugmad usab niini nga mga igsoon ang maayong relasyon uban sa pipila ka inilang siruhano ug mga anestesyologo. Ang maong mga pagpakigkontak nakatabang sa pagsanta ug pagsulbad sa mga suliran maylabot sa pagpanambal nga dili mogamit ug dugo.

Ang usa ka bag-ong balaod bahin sa mga katungod sa pasyente gipasaka niadtong 1997. Ang balaod naggarantiya nga ang usa ka pasyente dili mahimong hatagan ug tambal nga dili niya gusto ug kon nasayran ang gusto sa walay-panimuot nga pasyente, kini kinahanglang tahoron. Ang balaod nag-ingon usab nga ang mga bata nga 12 anyos pataas kinahanglang konsultahon kanunay kon bahin sa pagtambal kanila. Si Gudmundur H. Gudmundsson, tsirman sa HLC, mitaho: “Kasagaran, ang mga doktor matinabangon kaayo, ug talagsa ra ang mga suliran. Bisan ang delikadong operasyon ginahimo nga dili mogamit ug dugo.”

Sa dihang napatik ang Enero 8, 2000 nga Pagmata! bahin sa walay-dugo nga pagpanambal ug operasyon, ang sangang buhatan nagdasig sa mga igsoon nga maningkamot gayod sa pagpanagtag niadtong isyuha sa magasin ngadto sa daghang tawo kutob sa mahimo. Ang sangang buhatan mihatag ug mga sugyot kon unsaon pagtanyag ang magasin ug kon unsaon pagtubag ang mga pangutana bahin sa isyu sa dugo. Sa sinugdan ang pipila nagpanuko sa pagtanyag sa magasin, apan sa wala madugay ilang nakita nga gusto sa mga tawo nga mahibalo bahin niana. Kapin sa 12,000 ka kopya ang gipanagtag ngadto sa publiko. Kana maoy 1 ka magasin sa matag 22 ka molupyo sa nasod. Usa ka igsoong lalaki miingon, “Naglisod ako sa paghuman sa akong teritoryo tungod kay daghan kaayo ang maikagong nakighisgot kanako bahin niini.” Usa ka igsoong babaye miingon, “Duha lang ka tawo ang wala modawat sa akong mga magasin!”

 Usa ka babayeng tigsibya sa usa ka senemanang programa sa radyo nga madungog sa tibuok nasod nakadawat niining magasina bahin sa pagpanambal nga dili mogamit ug dugo. Sa iyang programa, iyang giasoy kon sa unsang paagi nabatonan niya ang magasin, ug unya iyang girepaso ang kasaysayan sa mga pag-abono sa dugo sumala sa pagpatin-aw niana sa Pagmata! Iyang gitapos ang iyang paghisgot pinaagi sa pag-ingon nga si bisan kinsa nga gustog dugang impormasyon bahin sa pagpanambal nga dili mogamit ug dugo makahangyo ug basahon bahin niini gikan sa mga Saksi.

Ang espesyal nga pagpanagtag sa maong isyu sa Pagmata! nakatabang sa daghan nga masabtan ang pagkamakataronganon sa atong baroganan bahin sa dugo. Dugang pa, ilang nasayran nga ang mga Saksi ni Jehova dili gustong mamatay. Hinunoa, sila nagatinguha sa labing maayong paagi sa pagtambal kon posible. Tungod niini, ang pipila nga sa nangagi may sayop nga impormasyon mahitungod sa atong baroganan bahin sa dugo nahimo nang madinawaton sa mensahe sa Gingharian.

Duha ka Kingdom Hall Natukod sa Upat ka Adlaw

Alang sa mga igsoon sa Iceland, ang usa ka talagsaong hitabo sa 1995 nga tuig sa pag-alagad mao ang pagtukod ug duha ka Kingdom Hall sa bulan sa Hunyo, ang usa sa Keflavík ug ang lain didto sa Selfoss. Kini mao ang unang mga Kingdom Hall sa Iceland nga natukod ginamit ang daling metodo sa pagtukod. Gidangtan lang ug upat ka adlaw ang pagtukod nianang duha. Tungod sa mahigugmaong tabang sa mga igsoon sa Norway, milampos ang maong buluhaton. Ang sangang buhatan sa Norway nagpadala sa kadaghanan sa materyales, ug kapig 120 ka igsoong mga lalaki ug babaye nga taga-Norway nangabot aron motabang sa proyekto. Ang labing kasagarang komento nga nadungog diha sa lugar nga gitukoran mao: “Makapahingangha gayod kini.” Ang mga igsoon sa Iceland dugay nang nakabasa ug nakadungog bahin sa mga Kingdom Hall nga daling natukod, apan nianang tungora nakita nila mismo kana. Siyempre, makapahingangha kadto  tungod kay ang gidaghanon sa mga Kingdom Hall sa Iceland midoble sa pipila ra ka adlaw!

Gawas nga nakabaton ug duha ka bag-ong mga Kingdom Hall, ang mga igsoon sa Iceland nadasig sa makapalig-ong pagpakig-uban sa mga igsoong nangabot gikan sa Norway sa ilang kaugalingong gasto aron gugolon ang ilang panahon sa bakasyon sa pagtukod sa mga tigomanan. Talagsaon gayod kini nga ebidensiya sa atong internasyonal nga panag-igsoonay! Ang mga igsoon sa Iceland mitabang usab sa maong mga proyekto sa pagpanukod. Kapig 150 ka lokal nga mga magmamantala ang mitabang sa trabaho, duolag katunga sa gidaghanon sa mga magmamantala sa tibuok nasod.

Kining mga proyektoha sa pagpanukod ug mga Kingdom Hall maoy dakong pamatuod usab sa katilingban. Duha ka estasyon sa telebisyon, nga ang pagsibya makita sa tibuok nasod, nagtaho sa estorya diha sa ilang mga programa sa balita ug nagpakitag mga letrato gikan sa duha ka lugar nga gitukoran. Ang proyekto gitaho usab sa ubay-ubayng estasyon sa radyo ug sa mga mantalaan. Usa ka ministro sa lokal nga simbahan sa Selfoss wala moangay sa gihatag nga pagtagad ngadto sa mga Saksi. Iyang gipapatik sa lokal nga mantalaan ang usa ka artikulo nga nagpasidaan batok sa giisip niyang peligrosong bakak nga mga pagtulon-an sa mga Saksi ni Jehova. Matod pa niya, ang mga tawong menos ug pangutok ug daling motuo maoy ilabinang magbantay. Iyang gisubli ang maong mga pasidaan diha sa usa ka interbiyo sa radyo. Bisan pa niana, ang mga pulong sa ministro walay epekto sumala sa iyang gilaoman. Sa kasukwahi, natingala ang kadaghanang tawo sa mga proyekto sa pagpanukod ug Kingdom Hall, ug daghang nahibalag sa mga igsoon diha sa pagsangyaw ang miingon nga sila natingala sa reaksiyon sa ministro.

Mga usa ka semana human sa pagkapatik sa pasidaan sa ministro, ang mantalaan mipatik ug usa ka kartuning. Sa atubang nga bahin sa kartuning, imong makita ang simbahan, ug sa luyong bahin, ang Kingdom Hall. Dunay suba nga nag-ulang sa duha ka bilding,  ug ang pipila ka mapahiyomon, maayog-pamesti nga mga igsoon nagtabok sa taytayan gikan sa Kingdom Hall paingon sa simbahan, nga nagdalag mga bag nga pangsangyaw. Sa gawas sa simbahan, usa ka babaye ang nakalukso sa kalisang gikan sa iyang wheelchair. Usa ka lalaki nga ang tiil gisemento ug ang laing lalaki, nga morag buta, nagdagan, nga nagsinggit: “Dagan mo, dagan mo, nagpadulong dinhi ang mga Saksi!” Nagbarog sa mga ang-ang sa simbahan mao ang ministro, nga ang iyang hitsura natingala. Daghan ang miangay sa maong kartuning. Ang editoryal nga mga kawani sa mantalaan nagpili niana ingong labing nindot nga kartuning sa maong tuig, nga nagpadako niana, ug nagbitay niana sa bungbong sa ilang opisina. Kana nagpabilin sa bungbong sulod sa daghang katuigan.

Ang Eksibit Nakahatag ug Maayong Pamatuod

Sulod sa 2001 nga tuig sa pag-alagad, gihimo ang usa ka eksibit nga nagpasiugda sa neyutral nga baroganan sa mga Saksi ni  Jehova una pa ug panahon sa Gubat sa Kalibotan II samtang sila nag-antos sa paglutos sa mga Nazi. Ang eksibit, nga gihimo sa tulo ka dapit, tanantanan may tumatambong nga 3,896. Sa kataposang hinapos sa semana, ang hawanan sa eksibit sa Reykjavík napuno sa kapig 700 ka bisita. Ang video nga Jehovah’s Witnesses Stand Firm Against Nazi Assault diha sa Icelandiko nga pinulongan gipasalida panahon sa tibuok eksibit sa tulo ka dapit. Daghan sa mga bisita nagpahimulos sa kahigayonan nga makalingkod ug makatan-aw sa tibuok video.

Ang lig-ong pagbarog sa mga Saksi diha sa mga kampo konsentrasyon nakapahingangha sa mga bisita nga kaniadto wala mahibalo sa maong bahin sa atong kasaysayan. Usa ka propesora nga makadaghang mibisita sa dapit sa eksibit miingon nga nakadayeg kaayo siya sa maong eksibit ug nausab ang iyang tinamdan sa mga Saksi ni Jehova. Natandog siya ilabina sa lig-ong pagtuo sa mga Saksi diha sa mga kampo konsentrasyon. Lahi sa ubang mga binilanggo, sila makagawas unta pinaagi sa pagsalikway sa ilang mga tinuohan.

Ang eksibit gitaho usab sa positibong paagi sa usa ka estasyon sa telebisyon nga ang pagsibya makita sa tibuok nasod, ug sa lokal nga telebisyon ug mga estasyon sa radyo. Sa pagbukas sa eksibit, usa ka Lutheranong ministro ang mitambong uban sa iyang asawa ug anak nga babaye. Wala madugay sa ulahi, usa ka igsoong lalaki ang midapit sa ministro sa pagduaw sa Bethel, ug iyang gidawat ang pagdapit. Pipila ka adlaw human sa pagduaw, usa ka babaye ang miduol sa ministro nga may pangutana bahin sa usa ka teksto sa Bibliya. Gidasig siya sa ministro sa pagkontak sa sangang buhatan sa mga Saksi ni Jehova, sanglit segurado siya nga makatubag sila niana. Sa ulahi, usa ka igsoong lalaki ang nagdumalag pagtuon sa Bibliya uban sa ministro.

Pag-uswag sa Buluhaton sa Paghubad

Ang pipila ka magmamantala sa Iceland kasagarang nalisdan sa paghubad sa tanang espirituwal nga pagkaon gikan sa “matinumanon  ug maalamong ulipon” ngadto sa Icelandiko nga pinulongan. (Mat. 24:45) Sa unang katuigan, ang mga Saksi nga taga-Iceland nga nagpuyo sa Canada mao ang naghimo sa kadaghanang paghubad. Sa ulahi ang maong buluhaton gihimo na sa Iceland. Sa pag-abot sa unang mga misyonaryo sa 1947, nailaila nila ang usa ka tigulang nga magbabalak nga nagpuyo sa balay nga ilang gipuy-an. Antigo siyag Iningles ug mitabang siya sa mga misyonaryo nga makakat-on sa pinulongan. Mitanyag usab siya sa paghubad alang kanila, mao nga gisuholan siya sa mga igsoon aron hubaron ang librong “Pasagdi ang Diyos Maminatud-on” ug ang pulyetong The Joy of All the People. Ikasubo, siya migamit ug daang balaknong estilo uban ang daghang karaang mga pulong ug mga ekspresyon, ug bisan pag usa sa bag-ong mga misyonaryo ug si Brader Lindal nagsusi ug nagmakenilya pag-usab sa hinubad, ang libro wala gayod mahimong maayong tabang sa pagtuon ingon sa gidahom. Bisan pa niana, ang libro napanagtag sa daghang dapit sukad sa unang pag-imprenta niana, ug tanantanan 14,568 ka kopya ang napatik. Kapin sa 20,000 ka kopya sa pulyeto ang napatik sa 1949. Sa ulahi ang mga igsoon nagsuhol ug laing maghuhubad sa paghubad sa librong What Has Religion Done for Mankind?

Niadtong mga tuiga, ang gamayng pundok sa mga igsoong lalaki naghubad sa ubay-ubay nga pulyeto. Ang usa mao ang “This Good News of the Kingdom,” nga giluwatan niadtong 1959. Kining pulyetoha nakatabang sa mga igsoon sa pagsugod ug daghang bag-ong pagtuon sa Bibliya. Niadtong tungora gihatag na ang pagtugot nga ipatik Ang Bantayanang Torre sa Icelandiko nga pinulongan.

Daghang maayong mga libro ang gihubad ug giluwatan sa misunod nga katuigan: “Kini Nagkahulogan Sa Walay Katapusang Kinabuhi” nga giluwatan niadtong 1962; Gikan sa Paraisong Nawala Ngadto sa Paraisong Nabatonan Pag-usab, sa 1966; Ang Kamatuoran nga Motultol sa Kinabuhing Dayon, sa 1970; Ikaw Mabuhing Walay Kataposan sa Paraiso sa Yuta, sa 1984;  ug Kahibalo nga Motultol sa Kinabuhing Walay Kataposan, sa 1996. Ang edisyon sa Pagmata! nga mogula matag tulo ka bulan gidugang sa listahan sa Icelandiko nga mga basahon niadtong 1982.

Sa daghang katuigan, ang mga igsoon walay songbok sa Icelandiko nga pinulongan. Sa 1960, upat ka awit ang gihubad ug gimimyograp alang sa usa ka asembliya. Unya sa distritong kombensiyon sa Nobyembre 1963, ang gamayng songbok nga may 30 ka piniling mga awit diha sa Icelandiko nga pinulongan giluwatan, nga gikalipay sa mga igsoon.

Una pa niadto, ang kongregasyon nag-awit sa nagkalainlaing pinulongan. Si Günther ug Rut Haubitz miabot sa Iceland gikan sa Alemanya niadtong 1958 isip mga espesyal payunir. Si Rut makahinumdom pa nga ang langyawng mga igsoon naggamit sa mga songbok sa ilang tagsatagsa ka pinulongan nga Aleman, Danes, Ingles, Norwego, Pinlandes, o Sweko. Ang mga taga-Iceland moduyog sa pag-awit sa pinulongan nga ilang labing naantigohan. Siya nag-ingon, “Kadto maoy koro sa nagkalainlaing pinulongan!” Paglabay sa katuigan, daghan pang awit sa Gingharian ang anam-anam nga gihubad, apan niadto lamang 1999 nga ang kompletong songbok sa tanang 225 ka awit nabatonan sa Icelandiko nga pinulongan. Pagkamapasalamaton sa mga igsoon sa maong gasa aron madayeg si Jehova!

Ang distritong kombensiyon nga gipahigayon sa Agosto 1999 may bag-ong gipresentar alang sa Iceland. Ang librong Patalinghogi ang Tagna ni Daniel! sa Icelandiko nga pinulongan giluwatan dungan sa Iningles nga edisyon. Panahon sa kombensiyon, sa dihang gipahibalo sa mamumulong ang pagluwat sa libro sa Iningles, ang tanang mamiminaw namakpak. Apan inay sultihan ang mga igsoon nga ang maong libro luwatan sa ulahi diha sa Icelandiko nga pinulongan, siya nagpadayon pinaagi sa pagpakitag usa ka kopya sa maong libro sa Icelandiko, nga nag-ingon​—sa dakong kalipay sa tanan​—nga ang maong libro nahubad na ngadto sa Icelandiko! Sukad niadto, ang Tagna ni Isaias​—Kahayag Alang sa  Tibuok Katawhan I ug II giluwatan usab nga dungan sa Iningles nga mga edisyon.

Pagpadako sa Bethel ug Dugang nga Pag-uswag

Gibag-o ang mga pasilidad sa sangang buhatan niadtong 1998. Duha ka apartment tabok sa karsada ang gipalit aron puy-an sa mga Bethelite ug aron adunay mas dakong lugar alang sa Departamento sa Paghubad. Sa di pa dugayng katuigan, ang mga maghuhubad nakapahimulos usab sa mga pagduaw sa mga igsoong lalaki gikan sa tibuok-kalibotang hedkuwarter sa New York. Ang maong mga igsoong lalaki nagtudlo kanila kon unsaon paggamit ang mga programa sa kompiyuter nga gigama sa mga Saksi ni Jehova ug gidisenyo gayod alang sa paghubad.

Karong bag-o, ang mga hawas gikan sa hedkuwarter nagdumala sa Kurso Aron Mouswag ang Pagsabot sa Iningles diha sa sangang buhatan. Ang kurso nakatabang sa mga maghuhubad nga  mas makasabot sa Iningles nga materyal sa dili pa sila mosugod sa paghubad.

Ang sangang buhatan nagsulat: “Sa paghinumdom sa milabayng katuigan, kami nalipay nga ang pipila may kaisog sa pagsugod sa paghubad ngadto sa Icelandiko, bisan pag kulang ang mga kasangkapan ug diyutay ang kahibalo bahin sa pinulongan. Bisan pag ang kalidad sa nahubad nga materyal kaniadto dili sama karon, kita dili ‘motamay sa adlaw sa gagmayng mga butang.’ (Zac. 4:10) Kami nalipay sa pagkakita nga ang ngalan ug Gingharian ni Jehova napaila usab sa Iceland ug daghang tawo ang nakakat-on sa kamatuoran.”

Sa pagkakaron, adunay walo ka bug-os-panahong mga trabahante sa sangang buhatan. Ang uban magngadto-nganhi sa Bethel ug nagatabang nga inoras lamang. Aron mapulihan ang Kingdom  Hall diha sa sangang buhatan, ang usa ka bag-ong Kingdom Hall gitukod na karon alang sa mga kongregasyon sa Reykjavík. Busa, ang mga plano gikamulo na aron bag-ohon ang bilding sa sangang buhatan aron mapuy-an ug mas daghang trabahante sa Bethel.

Gikinahanglan ang pagkamalahutayon, pagsakripisyo sa kaugalingon, ug gugma aron ang maayong balita ikasangyaw sa Iceland. Sa pagkatinuod, ikaingon nga ang paghago sa madasigong mga magmamantala sa Gingharian sa Iceland sa miaging 76 ka tuig wala makawang. Daghang matinumanong mga igsoong lalaki ug babaye ang nakapakigbahin sa buluhaton sa pagpangani. Daghan ang nangabot gikan sa ubang mga nasod aron moalagad sa pipila ka tuig, ug ang ilang buhat dili daling malimtan. Ang uban nagpabilin ug naghimo sa Iceland nga ilang permanenteng pinuy-anan. Dalayegon usab ang pagkamalahutayon sa daghang madasigon nga mga magmamantala nga lumad sa Iceland.

Ang aberids nga gidaghanon sa mga magmamantala sa Gingharian gamay ra, apan ang mga Saksi ni Jehova nahimong ilado kaayo sa nasod. Pito ka misyonaryo ang nagaalagad karon sa kabanikanhan ug sa gagmayng mga kongregasyon sa pulo. Niining miaging tuig sa pag-alagad, 543 ka tawo ang mitambong sa Memoryal sa kamatayon ni Kristo, ug duolan sa 180 ka pagtuon sa Bibliya sa balay ang ginadumala.

Basin moabot ang adlaw nga ang mga igsoon sa Iceland makabaton sa matang sa pag-uswag nga gibatbat sa Isaias 60:22: “Ang diyutay mahimong usa ka libo, ug ang gamay usa ka gamhanang nasod. Ako, si Jehova, magpadali niini sa kaugalingong panahon niini.” Kasamtangan, ang mga Saksi ni Jehova sa Iceland determinado nga humanon ang buluhaton nga gipiyal kanila sa Hari nga si Jesu-Kristo​—ang pagsangyaw sa maayong balita sa Gingharian. Sila masaligon nga patuboon sa Diyos ang mga binhi sa kamatuoran diha sa madinawaton ug mapabilhon nga mga kasingkasing!​—Mat. 24:14; 1 Cor. 3:​6, 7; 2 Tim. 4:5.

[Kahon sa panid 205]

Dapit Diin ang mga Ngalan Himoong Apelyido

Sumala sa lokal nga tradisyon, ang mga taga-Iceland walay apelyido: Tawgon sa mga tawo ang usag usa sa ilang ngalan. Ang apelyido sa bata ibase sa ngalan sa amahan nga sumpayan ug pulong nga -son kon lalaki ug -dóttir kon babaye. Pananglitan, ang apelyido sa anak nga lalaki ug anak nga babaye sa usa ka tawo nga ginganlan ug Haraldur mahimong Haraldsson ug Haraldsdóttir. Ang ngalan sa babaye dili mausab kon siya magminyo. Kay daghan man kaayong tawo ang parehas ug ngalan, ilista diha sa libro sa telepono dili lang ang ngalan, adres, ug numero sa telepono sa usa ka tawo kondili ang iyang trabaho usab. Ang mga rekord sa katigulangan nakatabang sa mga taga-Iceland sa pagsubay sa ilang kaliwat balik pa sa kapin sa usa ka libo ka tuig.

 [Kahon sa panid 208]

Katibuk-ang Larawan sa Iceland

Ang yuta: Kining maong nasod, nga usa ka isla, nahimutang nga ubos lamag diyutay sa Arctic Circle taliwala sa North Atlantic Ocean, sa Greenland Sea, ug sa Norwegian Sea. Kining lugara daghan kaayog bolkan, init nga mga tubod, ug nag-aso-asong mga tubig nga nagbugwak. Ang ikanapulong bahin sa yuta natabonan ug dagko kaayong yelo.

Ang mga tawo: Ang mga taga-Iceland maoy mga kaliwat sa mga Viking nga ang kadaghanan gikan sa Norway. Sila kugihan, mamugnaon, ug masinabtanon. Ang kadaghanan sa mga tawo nagpuyo duol sa dagat.

Ang pinulongan: Bisag Icelandiko ang opisyal nga pinulongan, daghang taga-Iceland makasulti usab ug duha o daghan pang langyawng mga pinulongan, kasagaran Iningles, Aleman, o pinulongan sa Amihanang Alemanya.

Ang pangabuhi: Ang pangisda mao ang pangunang pangita sa Iceland. Ang mga barkong tigpamaling makasikop ug mga capelin, bakalaw, haddock, ug tagbak, nga ang kadaghanan niini iproseso ug itumod sa laing nasod.

Ang pagkaon: Isda ug karne sa karnero maoy naandan. Espesyal nga pagkaon sa Iceland ang linat-ang ulo sa karnero.

Ang klima: Ang klima kasarangan tungod sa paghuros sa mainit-init nga hangin sa Atlantiko. Dili kaayo grabe ang tingtugnaw dinhi apan hanginon. Ang ting-init medyo bugnaw.

[Kahon/Hulagway sa panid 210]

Septiyembre 6, 1942: “Usa ra gihapon ang payunir nga nagsangyaw niining dapita, busa wala kaayoy ikataho. Duolan sa 120,000 ang populasyon sa Iceland, ug dunay mga 6,000 ka balay sa uma. Ang bugtong paagi nga maabot kining mga umaha mao ang pagsakayg gagmayng mga kabayo. Aron maadtoan ang tanang balay, kinahanglang mobiyahe ug mga 16,000 kilometros, ug dunay daghang bukid ug mga sapa diha sa bukid nga tabokonon. Gamay ra kaayo ang interesado sa mensahe hangtod niining yugtoa.”

Gisulat kini ni Georg F. Lindal human sa iyang pagpayunir sa Iceland sa 13 ka tuig. Siya lamang ang magmamantala sa Iceland sa misunod nga lima pa ka tuig.

 [Kahon/Hulagway sa panid 213, 214]

Usa ka Rekord sa Matinumanong Pag-alagad

Si Oliver Macdonald maoy lakip sa unang mga misyonaryo nga giasayn sa Iceland kinsa migraduwar sa ika-11ng klase sa Gilead. Siya miabot sa Disyembre 1948 uban kang Ingvard Jensen. Sila mibiyahe gikan sa New York sakay sa barko nga dekarga. Ang biyahe mikabat ug 14 ka adlaw, ug baloron kaayo sa North Atlantic Ocean. Silang duha gidagat halos sa tibuok biyahe.

Sa Marso 1950, gipakaslan ni Brader Macdonald si Sally Wild nga taga-Inglatera, nga nag-alagad sa Bethel sa Britanya. Si Mac, nga maoy iyang angga, ug si Sally dako kaayog nahimo sa pag-alagad niadtong unang mga katuigan, ug ang mga tawo nga ilang gitun-an matinumanon gihapong nag-alagad kang Jehova.

Sa 1957, si Mac ug Sally mipauli sa Inglaterra, diin si Sally namatay sa kanser nga nadayagnos sa Iceland. Si Mac mibalik sa bug-os-panahong pag-alagad human mamatay si Sally ug nag-alagad ingong regular payunir ug dayon ingong nagapanawng magtatan-aw sa 13 ka tuig. Sa 1960, nagminyo sila ni Valerie Hargreaves, nga usa ka espesyal payunir. Nag-uban sila sa pag-alagad sa nagkalainlaing mga sirkito sa Britanya, gikan sa amihanan sa Scotland ngadto sa Channel Islands, nga duol sa habagatang kadagatan sa Inglaterra. Sa nag-alagad sila sa ilang sirkito paamihanan sa Shetlands duol sa amihanang kadagatan sa Scotland, si Mac miingon, “Ang sunod natong duawon mao ang Iceland!” nga wala gayod maghunahuna nga sila makaadto didto.

Apan, sa 1972, si Mac ug Valerie natudlo ingong mga misyonaryo ug giasayn sa Iceland. Si Mac nag-alagad ingong alagad sa sanga ug sa ulahi ingong koordinetor sa Komite sa Sanga. Silang duha ni Valerie nakapuyo ug pito ka tuig sa Iceland ug giasayn sa Ireland ingong mga misyonaryo, una sa Dublin ug dayon sa Amihanang Ireland. Human makaalagad sa Ireland sa 20 ka tuig, si Mac namatay sa kanser sa Disyembre 1999, nga nakagugol ug 60 ka tuig sa bug-os-panahong pag-alagad. Si Valerie nag-alagad gihapon ingong regular payunir sa Belfast, Amihanang Ireland.

[Hulagway]

Si Valerie ug Oliver Macdonald sa Reykjavík, sa mga tuig sa 1970

[Kahon/Hulagway sa panid 218]

Reykjavík

Ang Reykjavík, nga nagkahulogan ug “Asohon nga Baybay,” mao ang kaulohan sa Iceland ug si Ingólfur Arnarson, ang unang permanente nga molupyo niini, maoy naghatag ug ngalan niini tungod sa alisngaw nga nanggawas gikan sa init nga mga tubod dinhi. Karon ang Reykjavík maoy usa ka puliki nga modernong siyudad nga may total nga populasyon nga duolan sa 180,000.

 [Kahon/Hulagway sa panid 223, 224]

Giisip Nila ang Iceland nga Ilang Pinuy-anan

Si Páll Heine Pedersen taga-Denmark. Siya giasayn sa Iceland ingong espesyal payunir sa 1959. Sa 1961 siya mitambong sa duha sa “Nagkahiusang mga Magsisimba” Internasyonal nga mga Kombensiyon sa Uropa, diin nakaila niya si Violet. Si Violet taga-California, T.B.A., nga miabot aron sa pagtambong niining mga kombensiyona.

Human sa mga kombensiyon, mipauli si Páll sa Iceland, ug si Violet mipauli sa California. Nagsinulatay sila sa lima ka bulan, ug sa Enero 1962, si Violet miadto sa Iceland aron magpakasal kang Páll. Si Páll nagpayunir gihapon, bisag siya lamang ang Saksi diha sa wala kaayoy tawo nga dapit sa amihanan-kasadpang Iceland. Sila nagpuyo sa gamayng lungsod diin, sa tungatunga sa tingtugnaw, ang adlaw dili mosubang sa duha ka bulan. Aron maduaw ang mga balay sa mga tawo sa teritoryo, moagi sila sa titip ug kasagaran nagyelo nga mga dalandalan sa bukid, ug ang ilang bugtong transportasyon mao ang motorsiklo ni Páll nga gidala niya gikan sa Denmark. Kay si Violet natawo ug nagdako man sa init nga California, ang mga igsoon nagtuo nga siya dili makaagwanta sa Iceland. Apan siya nakapabilin didto, ug nakakat-on sa paghigugma sa nasod ug sa mga tawo.

Si Páll ug Violet nagpayunir hangtod natawo ang ilang anak, si Elísabet, sa 1965. Si Páll nagpadayon sa pagpayunir hangtod sa 1975, ug si Violet nagpayunir panagsa niadtong mga tuiga. Sa 1977 sila midesidir sa pagbalhin sa California tungod sa panglawas ni Páll. Sa ulahi, ilang gibati ang dakong tinguha sa pag-alagad sa dapit nga nagkinahanglan ug mga magmamantala sa Gingharian. Sila nagpayunir pag-usab, ug sa nakatapos na sa pag-eskuyla ang ilang anak ug dili na menor-de-edad, sila giasayn ug balik sa Iceland ingong mga misyonaryo. Sila nag-alagad ingong misyonaryo ug sa nagapanawng buluhaton sa pipila ka tuig. Sa 1989, si Páll gihangyo sa pag-alagad ingong membro sa Komite sa Sanga. Dayon, sa 1991, gibuksan ang Balayng Bethel sa Iceland, diin si Páll ug Violet mao ang unang mga membro sa pamilyang Bethel. Sila nag-alagad gihapon didto.

 [Hulagway sa panid 228, 229]

Ilado sa Ilang Pagkamaabiabihon

Si Fridrik Gíslason ug ang iyang asawa, si Ada, maoy apil sa pito nga gibawtismohan sa 1956. Si Fridrik ug Ada nakakat-on sa kamatuoran gikan kang Oliver ug Sally Macdonald. Sa primero, si Fridrik ang gidumalahan sa pagtuon sa Bibliya, samtang si Ada okupado sa iyang grupo sa pagpanahi sa tibuok tingtugnaw. Sa dihang ang grupo natapos sa pagpanahi sa pag-abot sa tingpamulak, siya molingkod sa kosina panahon sa pagtuon. Wala magdugay, tungod sa iyang interes sa panaghisgot bahin sa Bibliya, siya mihangyo sa pag-apil sa panagtuon apan dili lang siya motubag. Hinunoa, sa ngadtongadto, siya nagsugod sa pagkomento.

Sa ulahi, ang Iningles nga Pagtuon sa Bantayanang Torre regular nang ginahimo diha sa ilang balay. Sila nagsugod sa pagtambong sa mga tigom diha sa balay sa misyonaryo. “Nahinumdom ako nga nagtigom kami diha sa gamayng lawak sa kisame nga gipuy-an sa mga misyonaryo,” miingon si Fridrik. “Ang lawak igo lang sa 12 ka lingkoranan, apan usahay kon daghan ang motambong, among buksan ang pultahan sa tapad nga gamayng lawak. Pagkadako na kaayo sa kalainan karon​—tulo na ka kongregasyon ang naggamit sa Kingdom Hall sa Reykjavík!”

Si Fridrik ug Ada ilado sa ilang pagkamaabiabihon. Bisag unom ang ilang mga anak, ang ilang balay bukas sa tanang panahon alang sa mga igsoon. Sa bag-o pa ang kongregasyon, daghan niadtong nangabot sa Iceland nga gikan sa ubang nasod nalipay kaayo sa pagpuyo uban kang Fridrik ug Ada, kinsa nagpasaka kanila hangtod nga sila makakita ug balay nga kapuy-an.

 [Kahon/Hulagway sa panid 232]

Ang Bibliya sa Icelandiko nga Pinulongan

Ang kinaunahang hubad sa Bibliya sa Icelandiko nga pinulongan makaplagan diha sa ika-14ng siglong libro nga gitawag ug Stjórn, nga nasudlan ug mga hubad ug mga pagbatbat sa ubang bahin sa Hebreohanong Kasulatan. Ang unang kompleto nga “Bag-ong Testamento” sa Icelandiko nga pinulongan, napatik sa 1540. Ang maghuhubad mao si Oddur Gottskálksson, anak sa obispo sa Hólar. Siya mibalhin sa Relihiyong Lutherano sa Norway ug nakahibalag kang Martin Luther sa Alemanya. Sumala pa sa kasaysayan sa dihang mipauli si Oddur sa Iceland, iyang gihimo ang iyang paghubad diha sa kuwadra sa baka, nga naglisod pag-ayo, tungod kay dili niya gustong masuko ang iyang Katoliko nga amo, nga obispo sa Skálholt. Gihubad ni Oddur ang teksto gikan sa Latin Vulgate, ug iya mismong gidala ang iyang manuskrito ngadto sa Denmark aron ipaimprenta kini. Sa 1584, gipaimprenta ni Obispo Gudbrandur Thorláksson ang unang kompletong Bibliya sa Icelandiko nga pinulongan. Ang unang kompletong hubad sa Bibliya gikan sa orihinal nga Hebreohanon ug Grego nga pinulongan naimprenta sa 1908, ug naimprenta ang rebisadong edisyon sa 1912.

[Hulagway]

Ang “Gudbrandsbiblía,” ang unang kompletong Bibliya sa Icelandiko nga pinulongan

 [Chart/Graph sa panid 216, 217]

ICELAND—TALAAN SA DAGKONG PANGHITABO

1929: Si Georg F. Lindal miabot, ang unang magmamantala sa nasod.

1940

1947: Unang mga misyonaryo sa Gilead miabot.

1950: Natukod ang usa ka gamayng kongregasyon.

1960

1960: Ang Bantayanang Torre napatik sa Icelandiko nga pinulongan.

1962: Sangang buhatan natukod sa Reykjavík.

 1975: Bag-o, gipadak-ang sangang buhatan natapos ug gipahinungod.

1980

1992: Hospital Liaison Committee naporma.

1995: Duha ka Kingdom Hall ang natukod sulod sa upat ka adlaw sa Hunyo.

2000

2004: 284 ka magmamantala ang aktibo sa Iceland.

[Graph]

(Tan-awa ang publikasyon)

Total nga mga Magmamantala

Total nga mga Payunir

300

200

100

1940 1960 1980 2000

 [Mga mapa sa panid 209]

(Alang sa aktuwal nga pagkahan-ay, tan-awa ang publikasyon)

ICELAND

Húsavik

Hólar

Akureyri

Seydhisfjördhur

Neskaupstadhur

Eskifjördhur

Stykkishólmur

Borgarnes

Höfn

REYKJAVÍK

Skálholt

Keflavík

Selfoss

 [Tibuok-panid nga hulagway sa panid]

[Hulagway sa panid 207]

Tuo: Si Georg F. Lindal, 1947

[Hulagway sa panid 207]

Ubos: Si Brader Lindal ug ang usa ka gamayng kabayo sa Iceland, sa unang mga tuig sa 1930

[Hulagway sa panid 212]

Ang pipila sa unang mga misyonaryo sa Iceland, gikan sa wala patuo: Ingvard Jensen, Oliver Macdonald, ug Leo Larsen

[Hulagway sa panid 220]

Kini ang tinukod nga nahimutangan sa sangang buhatan gikan sa 1962 hangtod sa 1968

[Hulagway sa panid 227]

Kapin sa usa ka gatos ka magmamantala sa Iceland ang mitambong sa “Pakigdait sa Yuta” Internasyonal nga Asembliya sa Copenhagen, Denmark, sa 1969

[Hulagway sa panid 235]

Si Iiris ug Kjell Geelnard sa Akureyri, sa Enero 1993

[Hulagway sa panid 238]

Tuo: Ang barko sa pamaling nga “Svalbakur”

[Hulagway sa panid 238]

Ubos: Si Fridrik ug Kjell

[Hulagway sa panid 241]

Tuo: Oddný Helgadóttir

[Hulagway sa panid 241]

Ubos: Gudrún Ólafsdóttir

[Hulagway sa panid 243]

Tuo: Kingdom Hall ug balay sa mga misyonaryo sa Akureyri

[Hulagway sa panid 243]

Ubos: Si Bjarni Jónsson atubangan sa sangang buhatan

[Hulagway sa panid 249]

Itaas: Pagtukod sa Kingdom Hall sa Selfoss, sa 1995

[Hulagway sa panid 249]

Tuo: Ang nakompletong bilding

[Hulagway sa panid 253]

Ang pamilyang Bethel sa Iceland

[Hulagway sa panid 254]

Komite sa Sanga, gikan sa wala patuo: Bjarni Jónsson, Gudmundur H. Gudmundsson, Páll H. Pedersen, ug Bergthór N. Bergthórsson