Sulat Gikan sa Nagamandong Lawas

SANGLIT haduol na ang bag-ong sistema sa mga butang, dinalian gayod nga kita kanunayng maghulat kang Jehova. (Sof. 3:8) Ang manalagnang si Daniel nag-ingon nga ang “Diyos . . . Tigpadayag sa mga tinago, ug iyang gipahibalo . . . kon unsay mahitabo sa kaulahiang bahin sa mga adlaw.” (Dan. 2:28) Pagkadakong pribilehiyo nga magkinabuhi sa kataposan nianang gitagna nga yugto ug masabtan ang balaang mga tinago nga gibutyag karon ni Jehova!

Pinaagi sa “matinumanon ug maalamong ulipon,” inanay nga gipadayag ni Jehova ang iyang katuyoan sa pagtigom ug “dakong panon” sa mga magsisimba gikan sa tanang nasod niining magubot nga “kataposang mga adlaw.” (Mat. 24:45; Pin. 7:9; 2 Tim. 3:1) Ang Isaias 2:​2, 3 naghubit niining tibuok-kalibotang kalihokan nga mahitabo sa “kaulahiang bahin sa mga adlaw.” Matag tuig, kini nga pagpanigom nagpadayon bisan pa sa kagubot ug kapintasan nga milukop niini nga kalibotan.

Sa tibuok tuig sa 2004 gipaalinggat gayod kanato nga kinahanglan natong tumanon ang mga pulong ni Jesus: ‘Magpadayon sa pagbantay . . . Pamatud-i ninyo nga kamo andam.’ (Mat. 24:​42, 44) Sa pagkatinuod, ang nagakahitabo sa kalibotan dunay dako kaayong kahulogan alang sa mga Kristohanon, kinsa nakasabot “sa mga ilhanan sa kapanahonan” ug misanong niini. (Mat. 16:1-3) Agig pagtuman sa iyang Pulong, si Jehova magpadayon sa pag-uban sa iyang katawhan nga iyang giorganisar sa teokratikanhong paagi bisan pa sa tanang pagsupak nga ilang maatubang.

 Bisan pa sa paningkamot sa uban sa pagbalda o pagpahunong sa pagsangyaw sa Gingharian, ang atong mga igsoon nagpadayon sa pagsangyaw sa kamatuoran ug sa pagpakigtigom. (Buh. 5:​19, 20; Heb. 10:​24, 25) Sa Rusya niadtong Hunyo 2004, gituboy sa korte sa apelasyon sa Moscow ang desisyon sa ubos nga korte nga idili ang kalihokan sa mga Saksi ni Jehova ug isira ang ilang korporasyon sa maong siyudad. Bisan pa niana, ang mga igsoon nagpabiling malig-on; nasayod sila kon unsay buot sa Diyos nga ipabuhat kanila, ug gituman nila siya ingong Magmamando inay ang mga tawo. (Buh. 5:29) Kami masaligon nga tultolan ni Jehova ang iyang mga alagad bisan pa sa negatibong desisyon sa mga korte.

Sa Republika sa Georgia sa miaging pipila ka tuig, ang mga igsoon nawad-an sa ilang propiedad, gidagmalan sa magubtanong mga tawo, ug gisunog ang ilang literatura. Apan ang mga hinagiban nga gigamit batok kanila wala molampos. (Isa. 54:17) Sa 2004 nga tuig sa pag-alagad, ang mga Saksi ni Jehova legal na usab nga giila sa Georgia. Ang mga kombensiyon gihimo nga walay kababagan, ug ang literatura libreng gipasulod sa nasod. Gitaho ang bag-o nga kinatas-ang ihap sa mga magmamantala ug tumatambong sa Memoryal.

Sa Armenia, Eritrea, Republika sa Korea, Rwanda, ug Turkmenistan, ang mga igsoon nabilanggo tungod sa ilang pagtuo. Bisag gidagmalan, sila nahibalo sa Kasulatanhong hinungdan sa ilang mga pagsulay nga nakatabang kanila sa paghupot sa ilang integridad samtang nagsalig kang Jehova alang sa kaluwasan.​—1 Ped. 1:6; 2 Ped. 2:9.

Malipay kamo sa kaayo ni Jehova sa dihang magbasa kamo sa Labing Makaiikag nga Bahin sa Miaging Tuig ug magsusi sa Tibuok-Kalibotang Taho sa 2004. (Sal. 31:19; 65:11) Hinaot nga  kining Tinuig nga Basahon makadasig kaninyo sa pagpadayon sa paglakaw sa paagi nga gikahimut-an sa Diyos.​—1 Tes. 4:1.

Padayon nga ginahimo ang dagkong mga buluhaton aron mahatod ang kamatuoran ngadto sa tanang matang sa mga tawo. Pananglitan, ang mga video, DVD, ug ubang mga kasangkapan alang sa sign language ug mga publikasyon nga Braille ginahimo aron ang mga bungol ug buta matabangan sa espirituwal nga paagi. Daghang magmamantala sa Gingharian nagtuon ug mga pinulongan nga ginasulti sa mga langyaw nga nagpuyo diha sa teritoryo sa ilang kongregasyon.

Dugang pa, gatosan ka nahilit nga mga grupo ang naporma diha sa lagyo kaayong mga teritoryo. Ang usa ka sanga dunay kapin sa 300 ka nahilit nga mga grupo nga gilangkoban sa kapig 7,000 ka magmamantala. Pagkadakong posibilidad nga kini mahimong bag-ong mga kongregasyon! Dugang pa, sa 16,760,607 nga nanambong sa Memoryal niining tuig sa pag-alagad, kapin sa 10 ka milyon ang dili Saksi. Nagpamatuod gayod kini nga daghan pa ang anihonon.

Kita magpasalamat kang Jehova tungod sa iyang dagayang panalangin ug mahigugmaong pag-atiman kanato sa matag adlaw. (Prov. 10:22; Mal. 3:10; 1 Ped. 5:7) Samtang kita nagpadayon sa pag-alagad nga nahiusa niining “kaulahiang bahin sa mga adlaw,” kita mosalig kang Jehova. Bisag unsa pa ang mga problema nga atong maatubang, itisok nato sa kasingkasing ang atong tinuig nga teksto sa 2005: “Ang akong tabang nagagikan kang Jehova.” (Sal. 121:2) Makasalig kamo sa among gugma ug mga pag-ampo alang kaninyo.

Inyong mga igsoon,

Nagamandong Lawas sa mga Saksi ni Jehova