Tibuok-Kalibotang Taho

◼ APRIKA

Gidaghanon sa kayutaan: 56

Populasyon: 770,301,093

Gidaghanon sa mga magmamantala: 983,057

Gidaghanon sa mga pagtuon sa Bibliya: 1,769,182

Nahibalo ka ba nga ang maayong balita ginawali na didto sa Sahara? Ang desisiyete-anyos nga si Nafissatou nagpuyo sa usa ka lungsod sa minahan sa amihanang Niger. Sa dihang ang topiko sa panag-estoryahay sa grupo sa iyang mga kauban sa tunghaan misimang sa pornograpiya, si Nafissatou milakaw. Usa ka estudyante misunod ug nangutana kon nganong milakaw siya. Si Nafissatou mitubag nga dili siya gustong maminaw niining matanga sa panag-estoryahay. Sa primero, gibugalbugalan siya sa batan-ong babaye, kinsa miingon nga ang simpleng pagtan-aw ug pornograpiya dili makadaot. Si Nafissatou mitubag nga seryoso ang maong butang tungod kay supak ang Maglalalang niining butanga. Dayon iyang gikuha ang  librong Mga Pangutanang Gisukna sa mga Batan-on​—Mga Tubag nga Mosaler gikan sa iyang bag nga gisudlan sa mga gamit sa eskuylahan ug gipakita sa batan-ong babaye ang bahin nga naghisgot sa kapeligrohan sa pornograpiya. Unya gikuha niya ang iyang Bibliya ug gibasa ang 2 Corinto 7:1 ngadto sa batan-ong babaye. Ang batan-on miadmitir nga kon magtan-aw siya ug malaw-ayng mga salida sa video, tugkan siya ug kusganong mga pagbati nga dili siya makasabot. Nangayo siya ug kopya sa librong Gisukna sa mga Batan-on. Gihatagan siya ni Nafissatou ug libro ug sa ulahi miingon: “Sa dihang akong nakit-an siya pag-usab, siya nag-inusara, busa nangutana ko kon hain na ang iyang mga higala. Siya mitubag, ‘Ang akong higala mao kining libroha.’ Gisugdan nako ang pagdumala ug pagtuon kaniya, ug siya mitambong sa Memoryal.”

Kapin sa 15 ka tuig kanhi, usa ka babaye ang nagtuon sa Bibliya uban sa sister nga misyonaryo sa Tanzania. Ang pagtuon gidumala sa daghang tuig. Ang babaye nagduhaduha sa pagbarog sa kamatuoran tungod kay supak ang iyang pamilya, ug sa ngadtongadto ang pagtuon nahunong. Apan, ang iyang duha ka batan-ong mga anak nga babaye hilom nga namati samtang ang ilang inahan gitun-an. Sa dihang mibalhin ug puyo ang kamagulangang anak nga babaye sa edad nga 18, miadto dayon siya sa Kingdom Hall ug nagpadumala ug pagtuon. Siya kusog nga miuswag ug nabawtismohan. Ang iyang manghod nga babaye mihangyo usab nga dumalahan sa pagtuon sa Bibliya, ug siya usab nabawtismohan. Ang inahan, kay nadasig sa malig-ong pagbarog sa kamatuoran sa iyang mga anak nga babaye, midesisyon sa pagbalik sa pagtuon sa Bibliya. Niining higayona, nabuntog niya ang kahadlok sa tawo nga maoy nakapugong kaniya kanhi, ug siya gibawtismohan sa sirkitong asembliya sa Mayo 2004.

Kon ang kongregasyon motuman sa sugo nga ‘atimanon ang mga ilo ug ang mga babayeng balo sa ilang kasakitan,’ si Jehova magapanalangin gayod. (Sant. 1:27) Nahitabo kini sa kongregasyon sa Lesotho. Ang usa sa bawtismadong mga membro sa kongregasyon maoy usa ka nag-inusara nga ginikanan nga ginganlan ug Mapolo, kinsa adunay upat ka batang lalaki. Si Mapolo nahibalo nga siya dunay makamatay nga sakit ug iyang giandam ang iyang mga anak sa  pag-atiman sa ilang kaugalingon. Iyang gitun-an sila sa Bibliya, gidala sila sa mga miting, ug gitudloan sila kon unsaon paghimog mga silhig, nga ilang ikabaligya sa daplin sa karsada. Sa dihang namatay si Mapolo sa 1998, ang ilang apohang babaye maoy miatiman sa nailo nga mga bata. Ang sister nga misyonaryo nga maoy nag-agak kang Mapolo nga mahimong bawtismadong Saksi miduol sa ahensiya sa gobyerno nga nagtagana ug tabang alang sa mga ilo ug nakadawat ug kuwarta nga pangmatrikula. Gihatagan sa ubang mga Saksi ang mga bata ug mga besti. Dayon ang apohang babaye namatay. Sila gitun-an sa Bibliya sa usa ka brader sa kongregasyon ug gibayran ang ilang abang sa balay. Ang upat ka bata regular nga nagatambong sa mga miting. Ang duha maoy dili-bawtismadong mga magmamantala, ug ang kamagulangan, si Rantso, nga karon 20 anyos na, gibawtismohan sa sirkitong asembliya sa Marso 2004. Siya nagdumalag pagtuon sa Bibliya sa iyang ig-agaw, si Retselisitsoe, kinsa gibawtismohan usab nianang adlawa. Si Rantso mapasalamaton kaayo sa mahigugmaong pag-atiman nga gipakita sa mga igsoon ngadto kaniya ug sa iyang mga igsoon sulod sa daghang tuig.

Usa ka misyonaryo sa Cameroon nagtaho: “Matag semana dihang akong tun-an ug Bibliya ang usa ka batan-ong lalaki, may madunggan ako diha sa balay nga mokanta ug relihiyosong mga alawiton. Akong gipangutana ang akong estudyante, ‘Kinsa man kanang nagkantakanta?’ Ang iyang buta nga igsoon, si Stephen. Gisugdan nako pagtuon sa Bibliya si Stephen pinaagi sa audiocassette sa brosyur nga Unsay Gikinahanglan sa Diyos Kanato? Ang tumong namo mao ang pagsag-ulo ug usa ka bersikulo sa Bibliya sa matag leksiyon. Maayo kaayo nga mosag-ulo si Stephen ug nakakat-on ug daghang teksto sa Bibliya. Siya tigtambongan na usab sa mga miting ug mokomento kanunay. Di pa dugay, mihatag siya sa iyang unang pakigpulong sa Teokratikanhong Tunghaan sa Ministeryo. Ang iyang bahin maoy pagbasa sa Bibliya, ug kay dili man makamao si Stephen ug Braille, kinahanglang iyang memoryahon ang mga teksto. Nagpaabot ako sa pag-agak kang Stephen ug pag-uban kaniya sa pagsangyaw sa dili madugay. Ang usa sa paboritong mga teksto ni Stephen mao ang Isaias 35:​5, nga nag-ingon: ‘Ang mga mata sa mga buta mangabuka na unya.’ Si Stephen nalipay nga ang iyang  espirituwal nga mga mata nabuksan na, ug karon siya nagaawit sa mga awit sa pagdayeg kang Jehova, nga nagpasalamat kaniya nga sa umaabot ang iyang literal nga panan-aw mapasig-uli na.”

Diha sa gigusbat-sa-gubat nga Liberia, usa ka babaye nga ginganlan ug Nancy miduol sa usa ka Saksi ug mihangyo nga dumalahan ug pagtuon sa Bibliya. Gisultihan siya sa iyang pastor sa simbahan nga ibalhog sa Diyos ang mga Saksi ni Jehova sa impiyerno tungod kay sila mini nga mga Kristohanon. Apan, siya nagpuyo duol sa pipila ka mga Saksi, ug siya nakapaniid nga matag panahong walay rinakrakay, susihon gayod sa lokal nga mga ansiyano sa kongregasyon ang kahimtang sa ilang mga igsoon. Iyang napanid-an usab nga pahimuslan sa mga Saksi ang linaw nga mga higayon sa pagsangyaw sa uban. Si Nancy ug daghan pang uban sa lungsod nakadayeg sa dihang ang sakyanan sa sangang buhatan maoy una nga miabot sa lugar nga gigubatan, sa paghatod sa gikinahanglan pag-ayong mga hinabang nga gihatag sa mga Saksi sa Pransiya ug Belgium. “Nagtuo ako nga kamo ang nakabaton sa kamatuoran,” siya miingon. Siya mauswagon kaayo sa iyang pagtuon.

Usa ka batan-ong lalaki mianha sa usa ka baryo sa Uganda aron sa paghan-ay ug tisa sa balay nga gitigoman sa mga igsoon. Gipahimuslan sa usa sa mga payunir ang higayon sa pagsangyaw ngadto sa tighan-ay ug tisa, kinsa nainteres sa iyang nadunggan. Apan, sa dili madugay siya kinahanglang mopauli sa iyang baryo sa kabukiran. Kay wala may Saksi sa dapit nga gipuy-an sa tawo, gisultihan siya sa payunir kon diin ang kinaduolang Kingdom Hall. Ang batan-ong lalaki mipadagan sa iyang bisikleta duolan sa 30 kilometros diha sa mga dalan-dalan sa bukid aron sa pagpangita sa mga igsoon. Kay wala may tawo sa Kingdom Hall, nagbilin siya ug nota ilalom sa pultahan, nga naghangyo nga dumalahan siya ug pagtuon sa Bibliya. Gipangita siya sa usa ka payunir diha sa iyang baryo ug nakurat sa pagkakita nga duolan sa 200 ka tawo ang naghulat sa pagpamati sa iyang mensahe sa Bibliya! Daghan kanila nagpakitag kinasingkasing nga interes sa pagtuon sa Bibliya. May mga miting na karon nga ginahimo niining layo kaayo nga lugar.

Sa usa ka sayo nga kagabhion diha sa gamayng baryo nga dunay  mga 600 ka tawo sa habagatan-sidlakang Nigeria, ang mga baryohanon nakakita ug siga kaayong kahayag sa kalangitan nga mianinag sa suba. Ang kahayag morag nagkaduol sa ilang nahimutangan, busa nanagan ang mga tagabaryo paingon sa luwas nga lugar. Abi sa kadaghanan nga kalaglagan na kadto nga ginasangyaw sa mga Saksi ni Jehova, busa sila nanagan paingon sa Kingdom Hall, nga nag-ingon, “Dili gub-on sa Armagedon kining maong bilding.” Sa kataposan, sa mga alas 10:00 s.g., naamgohan sa mga tagabaryo nga gikan ang kahayag sa usa ka dakong sunog sa kalugotan. Sa dihang gipangutana sa mga igsoon ang mga tagabaryo kon nganong wala sila modangop sa mga simbahan, usa ka tawo miingon: “Walay hinungdan ang ubang mga simbahan. Gub-on kini sa inyong Armagedon apan dili ang Kingdom Hall.”

Usa ka sister nga regular payunir sa kampo sa mga kagiw sa Guinea miasoy: “Samtang namalaybalay, nakahibalag ako ug otso-anyos nga batang babaye diha sa iyang balay. Siya baldado. Gisultihan niya ako nga kasagarang ibilin siya sa iyang mga ginikanan diha sa balay sa tibuok adlaw ug kandadohan ang pultahan. Giingnan nako siya nga gusto ko nga makighigala kaniya. Dayon akong gipangutana siya kon unsay gusto niya nga buhaton sa Diyos alang kaniya. Iya akong gitubag nga gusto niya nga palakwon siya sa Diyos. Akong gibuksan ang Bibliya sa Isaias 35:​5, 6 ug gipakita kaniya ang saad ni Jehova nga ang mga bakol makalakaw na unya. Dayon akong gibuksan ang hulagway sa brosyur nga Tagamtama ang Kinabuhi sa Yuta sa Walay Kataposan! nga nagpakita kang Jesus nga nag-ayo sa masakiton. Gisultihan usab nako siya nga kining maong mga panalangin iyang matagamtam kon siya magtuon sa Bibliya ug magtuman sa gipangayo sa Diyos kaniya. Siya misugot nga dumalahan ug pagtuon sa Bibliya diha sa balay. Natapos na namo ang brosyur nga Kinabuhi sa Yuta ug hapit na namong matapos ang brosyur nga Ikaw Mahimong Higala sa Diyos! Human sa tulo ka semana nga pagtuon, mipahayag siya nga gusto siyang motambong sa mga miting. Kay dili man siya makalakaw paingon sa mga miting, hapiton nako siya sa iyang balay ug babahon nako siya paingon sa mga miting. Maikagon kaayo siya sa mga miting nga kon dili nako siya mahapit, maguol siya ug mohilak pa gani.”

 ◼ MGA NASOD SA AMERIKA

Gidaghanon sa kayutaan: 56

Populasyon: 868,871,739

Gidaghanon sa mga magmamantala: 3,165,925

Gidaghanon sa mga pagtuon sa Bibliya: 3,089,453

Si Marie nga taga-Guadeloupe nagtaho: “Diha sa baybay daplin sa hotel nga akong gitrabahoan, gisultihan ako sa pipila ka kustomer nga may mga sinina ug sapatos nga nabilin diha sa bato sulod na sa duha ka adlaw. Akong gikuha kini aron masusi kon kinsay tag-iya niini. Ang akong nakita maoy usa ka pitaka nga dunay sulod nga 1,067 ka euro [$1,372 T.B.]! Daghan ang miaghat nako nga itago ang ubang kuwarta ug ihatag kanila ang nabilin. Giingnan dayon nako sila nga usa ako sa mga Saksi ni Jehova ug nga ang akong konsensiya dili motugot nga manglimbong ako. Busa akong gidala ang mga butang ngadto sa reception desk sa hotel.  Ang mga empleyado didto nahibulong usab nga akong giuli ang kuwarta. Gisulti na usab nako ang akong baroganan. Sa dihang mibalik ako sa baybay, ang ubang mga tawo didto interesadong mahibalo bahin sa akong tinuohan. Gisangyawan nako sila nga naggamit sa Bibliya. Lakip kanila maoy usa ka babaye kinsa miingon, ‘Mga Saksi ni Jehova lang ang akong dawaton sa pagtrabaho nako.’” Human niadto, ang tag-iya nakit-an, ug gipahalipayan sa polis ang sister sa iyang pagkamatinud-anon.

Si Antonio maoy usa ka membro sa pamilyang Bethel sa Mexico nga nagpahimulos sa tanang higayon sa pagsulti sa mga tawo bahin sa kamatuoran. Di pa dugay, samtang nagbiyahe sakay ug bus paingon sa miting sa kongregasyon, iyang gihatagan ug tract ang maayog-pamiste nga lalaki ug babaye. Bibo ang ilang pag-estoryahanay. “Nanamilit ako kanila pag-abot nako sa akong destinasyon,” matod pa ni Antonio, “apan sa akong katingala, sila mikawas usab uban nako aron mapadayon ang among pag-estoryahanay, bisag dili pa kini dapit nga ilang kanaogan. Pagkanaog namo sa sakyanan, nag-estoryahanay pa kami ug dugang, ug nanamilit na usab ako. Sila nangutana, ‘Asa ka man paingon?’ ‘Motambong ko ug miting sa among kongregasyon,’ ako mitubag. Nagtinan-away sila ug dayon mihangyo, ‘Mahimo bang mouban mi nimo?’ ‘Maayo hinuon!’ mitubag ako. Ang batan-ong babaye, kinsa usa ka abogado, ug ang iyang pag-umangkong lalaki, nga usa ka estudyante sa unibersidad, nakadungog na sa mensahe sa kamatuoran sa pipila ka tuig nga miagi apan wala magtagad niini tungod kay supak ang ilang pamilya. Samtang nagpaingon sa miting uban kang Antonio, sila miingon nga gusto nilang makita ang tawo nga unang nakigsulti kanila bahin sa Bibliya. Nakurat kaayo sila nga ilang nakita siya didto! Sila nalipay nga nakatambong ug interesado sa pagtuon sa Bibliya. “Si Jehova ang nagtultol kanamo dinhi, ug sukad karon kami magpadayon sa pagtuon ug pagtambong sa mga miting,” miingon ang batan-ong babaye. Gihimo ang kahikayan sa pagtuon, nga gidumala kaduha sa usa ka semana.

 Sa Haiti, si Jacqueline, nga asawa sa magtatan-aw sa sirkito miuban sa usa ka sister nga payunir sa buluhatong pagsangyaw sa dihang nakakita sila ug usa ka batan-ong babaye nga naglingkod nga nag-inusara sa daplin sa dalan ug naghilak. Ang mga sister miduol ug nangutana kon nganong siya naghilak. Sa primero, ang batan-ong babaye wala motubag, apan tungod sa pagsigeg pangutana nga maluloton, siya mitubag, “Gihimo nako ang gusto nakong buhaton.” Kay nakasabot dayon nga siya miinom ug hilo, si Jacqueline nangutana kaniya kon siya miinom bag hilo ug siya miyango. Dalidali nga gidala siya sa mga sister sa ospital aron ipatambal. Pagkasunod semana, ang payunir nga sister mibalik aron sa pagduaw ug pagdasig kaniya. Usa ka pagtuon sa Bibliya ang nasugdan.

Sa dihang mibayad sa kahera sa supermarket sa Paraguay, si Lourdes nakurat sa pagkahibalo nga mini ang kuwarta nga iyang gibayad. Gitawag dayon sa kahera ang guwardiya. Si Lourdes ug Ingrid, ang iyang singko-anyos nga anak, gidala ngadto sa usa ka gamayng lawak ug didto naghulat sa polis. Ang manedyer sa supermarket ug ang guwardiya namugos sa sister sa pagtug-an kon diin gikan ang mini nga kuwarta. Si Lourdes wala makahinumdom kon diin kini niya makuha ug gisultihan sila nga wala siya mahibalo nga mini kini. Nabalaka, gitan-aw ni Ingrid ang manedyer ug ang guwardiya ug miingon: “Gitratar ninyo kami samag mga kawatan. Ang akong inahan dili kawatan. Mga Saksi ni Jehova kami, ug dili kami mamakak sa mga tawo.” Gipangutana sa manedyer si Lourdes kon siya usa ba ka Saksi, ug siya miyango. Sa gitawgan nila sa telepono ang sangang buhatan sa mga Saksi ni Jehova, nakombinsir sila nga Saksi gayod si Lourdes. Sila nangayog dispensa kang Lourdes ug Ingrid sa kahasol ug gipalakaw sila. Ang batang si Ingrid miingon sa ulahi nga tungod sa nahitabo wala hinuon sila makapalit ug papkorn nga gusto kaayo niyang kaonon.

Usa ka brader nagsangyaw sa Costa Rica ug midesisyon sa pagduaw sa iyang Katolikong silingan aron sangyawan siya. Ang brader nahadlok tungod kay ang tawo naglagot sa mga Saksi; manginsulto  pa gani siya kanila. Sa katingala sa brader, siya gipasulod sa tawo ug gisultihan kon nganong nausab ang iyang tinamdan. Usa niya ka higala midapit kaniya sa pag-adto sa usa ka layo nga komunidad aron sa pagsimba sa simbahang Ebanghelikal. Sa pag-abot didto, ang tawo gidapit sa paghatag sa iyang kaugalingong “eksperyensiya may kalabotan sa relihiyon.” Siya miingon lang nga siya Katoliko. Ang mga tawo wala makaangay sa iyang gisulti ug siya gipadlas gawas sa simbahan, ug gisultihan ang iyang higala nga mahimong iekskomunikar siya tungod kay nakighigala siya ug usa ka Katoliko. Ang tawo migawas sa simbahan, apan kay layo man ang iyang balay ug dili siya suheto sa maong lugar, naglibog siya kon asa siya matulog nianang gabhiona. Nanuktok siya sa usa ka balay ug gisaysay ang nahitabo, ug siya gipasulod. Didto siya gipakaon, ug gihatagan siya ug lugar nga katulgan. Gisangyawan usab sa mga tagbalay kining tawhana. Oo, sila mga Saksi ni Jehova. Ang tawo nakadayeg kaayo sa dihang iyang napamatud-an nga gihigugma gayod diay sa mga Saksi ang ilang isigkatawo! Siya karon nagtuon na sa Bibliya uban sa mga Saksi.

Usa ka sister sa Trinidad misulat: “Samtang nagsangyaw ako sa kadalanan, giduol ako sa usa ka babaye nga mihangyo sa kinabag-ohang mga magasin. Human nakapahimutang kaniya ug ubay-ubayng magasin, gitanyagan nako siya ug libreng pagtuon sa Bibliya. Ang babaye miingon nga nakatuon na siya sa miagi apan bag-o pang nakabalhin sa maong lugar. Nangutana ako sa iyang ngalan ug nangayo sa iyang adres, apan mibalibad ang babaye, nga nag-ingon nga kon kita tinuod gayod nga nag-alagad sa matuod nga Diyos, ako iyang tultolan ngadto sa balay sa babaye. Pagkasunod adlaw samtang nagsangyaw sa balay-ug-balay, nanuktok ako sa usa ka pultahan, ug ang mismong babaye ang mibukas niini. Sa pagkakita kanako ug sa akong kauban, siya mikatawa sa kahibulong ug miingon, ‘Nganong nakatultol ka man dayon sa akong balay?’ Gipangutana nako siya kon nahinumdom ba siya sa iyang giingon nako sa miaging adlaw. Iya kaming gipasulod sa iyang balay, ug nasugdan ang pagtuon sa Bibliya. Karon kining babayhana usa na ka dili-bawtismadong magmamantala.”

 ◼ ASIA UG TUNGANG SIDLAKAN

Gidaghanon sa kayutaan: 47

Populasyon: 3,971,703,969

Gidaghanon sa mga magmamantala: 574,927

Gidaghanon sa mga pagtuon sa Bibliya: 444,717

Si Ghanshyam maoy usa ka regular payunir sa Nepal. Usa siya ka drayber sa taksi. Sa iyang trabaho makahibalag siya ug nagkalainlaing mga tawo ug ang kadaghanan kanila nagdali, bisan sa mga oras sa kagabhion, ug walay panahong makigsulti. Bisan pa niana, siya gayoy mouna sa pagpakigsulti. Kutob sa mahimo, hatagan niya ang iyang mga pasahero ug nahiangay nga tract ug adres sa kinaduolang Kingdom Hall. Daghang pasahero ang mapasalamaton. Lima kanila karon nagtuon na sa Bibliya uban kang Ghanshyam.

Sa Taiwan ang bana sa usa ka sister kusog kaayog tingog sa dihang mangasaba sa iyang asawa, ilabina panahon nga mopaingon  na ang asawa sa pagtambong sa Kristohanong miting. Dayon usa ka adlaw ang bana naestrok. Naparalisar siya ug naospital. Mainantoson nga giatiman siya sa sister ug mataktikanhon niyang gigamit ang panahong nagpaayo ang bana gikan sa sakit aron matabangan siya nga makasabot sa kamatuoran sa Bibliya. Siya miingon: “Kinahanglan sa imong utok ang ehersisyo, busa hatagan ti ka ug pipila ka impormasyon, ug paningkamot nga mahinumdoman nimo kini, ha?” Ang bana nahibalo nga kinahanglang gamiton niya ang iyang utok, busa misugot siya. Nagkuha ang sister ug impormasyon gikan sa nagkalainlaing brosyur sa pagtudlo kaniya ug pipila ka pangunang mga kamatuoran, sama sa ngalan ug mga hiyas sa Diyos ug ang tema sa Bibliya. Dugang pa, giduaw siya sa daghang igsoon ug gipakitaan ug kaayo. Siya natandog pag-ayo niini nga sa dihang nakapauli na sa balay gikan sa ospital, siya misugot nga dumalahan ug pagtuon sa Bibliya. Siya karon nagsugod na sa pagtambong sa mga miting nga mag-wheelchair ug kusog kaayog tingog sa dihang mokomento.

Si Rohana nga usa ka espesyal payunir nga nag-alagad sa baryo sa Sri Lanka, gikalagotan sa usa ka tawo nga dunay pedikab. Kon makakita kang Rohana nga magsangyaw, iya siyang singgitan ug balikason. Kas-a iyang gibaharan si Rohana nga kon dili gani siya mohunong sa pagsangyaw sa maong lugar, siya madunggaban. Malumo ang reaksiyon ni Rohana. Sa ulahi, ang tawo naaksidente ug naospital tungod kay siya grabeng nasamdan. Giduaw siya ni Rohana sa ospital ug gidad-an ug regalo. Sa dihang nakita sa tawo kon kinsay miduaw kaniya, siya mihilak ug nangayog pasaylo kang Rohana sa tanan niyang pag-abuso kaniya. “Sir, tungod sa akong nahimong binuang kanimo, mas maayo pag imo akong pusposan kay sa moanhi ka dinhi sa paglipay kanako,” miingon ang tawo. Karon nakagawas na siya sa ospital ug nagpadayon sa iyang negosyo nga pagpaabang ug pedikab. Siya regular usab nga nagbasa sa atong mga magasin.

Daghan kaayong mga langyaw ang nangadto sa Hong Kong sa pagtrabaho ingong mga katabang sa balay. Ang usa niining mga babayhana nagsugod na sa pagtuon sa brosyur nga Unsay Gikinahanglan sa Diyos Kanato? sa Pilipinas ug gustong magpadayon  sa iyang pagtuon sa Bibliya. Ugaling, siya wala mahibalo kon unsaon pagpangita ang mga Saksi, busa nangayo siyag tabang pinaagi sa pag-ampo aron iyang mahibalag sila. Sa usa ka adlaw niana nga wala siyay trabaho, milawig siya paingon sa dakong distrito sa negosyo ug sa parke sa sentro diin daghang Pilipino ang magpundok matag hinapos sa semana. Siya nangita apan walay nakita nga iyang mailhan ingong usa sa mga Saksi ni Jehova, bisan pag sila kanunayng mosangyaw diha sa parke matag hinapos sa semana. Bisan pa niana, siya nakakitag brosyur nga Gikinahanglan nga gilabay diha sa basurahan. Gipunit sa babaye ang brosyur ug nakakita nga kini dunay numero sa telepono nga nasulat diha niana. Ang numero iya sa sister nga nakapahimutang sa brosyur. Apan, tungod kay gusto kaayo siyang makapadayon sa iyang pagtuon sa Bibliya, nangarisgo siya sa pagtawag sa telepono. Ang babaye nakurat ug nalipay kaayo sa pagkahibalo nga ang sister nagtrabaho sa samang puy-anang mga bilding nga iyang gitrabahoan. Siya mibalik sa pagtuon sa Bibliya ug tigtambongan na sa mga miting.

Usa ka magtatan-aw sa sirkito ug laing ansiyano sa Republika sa Korea miduaw sa haom gayod nga panahon. Ilang giduaw ang usa ka sister nga napulo na ka tuig nga dili aktibo. Ang iyang bana nga ateyista nakadesisyon nga mosimba human nga gioperahan. Sa dihang miduaw ang mga brader, ilang nahimamat ang iyang bana, kinsa human sa mahigalaong panagsultihay midawat sa brosyur nga Gikinahanglan. Gidasig sa ansiyano ang sister samtang iyang gidumalahan ug pagtuon ang bana. Ang bana midawat sa imbitasyon sa pagtambong sa distritong kombensiyon, ug human niana mihunong na sa pag-adto sa simbahan ug regular nang tigtambongan sa mga miting. Ang sister miuswag usab ug mihangyo nga duawon ang ilang upat ka anak nga lalaki ug babaye nga nagpuyo sa laing siyudad. Tungod niini, ang bana sa sister, ang iyang kamagulangang anak nga babaye ug iyang bana, ug ang kamanghorang anak nga babaye bawtismado na. Sa ngadtongadto, ang iyang kamagulangang anak nga lalaki ug iyang asawa bawtismado na usab, nga ang tanan mitotal ug unom ka bag-ong mga Saksi.

Si Yuki, usa ka estudyante sa hayskul sa Japan, naglisod sa pagtug-an sa iyang mga klasmet nga usa siya sa mga Saksi ni Jehova.  Kay nahibalo nga siya angay nga mosangyaw, iyang naamgohan nga kinahanglang mohimo siyag lakang, tungod kay ang iyang mga klasmet wala gayod maghisgot sukad bahin sa relihiyon. Siya midesisyon nga iyang pakit-on ang iyang mga higala nga mag-ampo siya dihang maniudto. Sa tibuok buntag, siya tim-os nga nag-ampo nga hatagan ug kaisog. Dayon imbes magdalidali sa pag-ampo aron walay makamatikod, iyang giduko ang iyang ulo ug medyo dugay nga nag-ampo. Sa dihang natapos, gipangutana siya sa iyang klasmet kon lain ba ang iyang panglawas. Apan, si Yuki wala makapamatuod. Naguol tungod niana, siya nangayog pasaylo kang Jehova diha sa pag-ampo ug mihangyo na usab nga hatagan siya ug kaisog. Pagkasunod adlaw, human nga nakaampo si Yuki, ang iyang klasmet nangutana na usab kon lain ba ang iyang gibati, ug si Yuki naghunahuna, ‘Panahon na gayod karon nga magpamatuod ako!’ Siya misaysay nga usa siya sa mga Saksi ni Jehova. Sa primero ang iyang klasmet nakurat, apan human niana pusot-pusot nga iyang gipangutana si Yuki​—Unsay imong giampo? Kinsay ngalan sa Diyos? Kinsa si Jesus? ug uban pa. Si Yuki nalipay.

Sa Kupang, Indonesia, si Glenn gibantog nga palahubog ug adik. Suholan siya sa mga tawo sa pagpanghulga o pagkulata sa uban. Nagpuyo siya uban sa iyang mga ginikanan sa dihang duha ka Saksi ni Jehova ang miduaw ug gisaysayan siya bahin sa Bibliya. Sa ulahi siya misugot nga dumalahan ug pagtuon sa Bibliya ug sa dakong paningkamot nagsugod sa pagbuntog sa iyang dili-maayong mga batasan. Usa ka adlaw niana, siya giabansehan sa usa ka tag-iyag tindahan ug dakong kantidad nga kuwarta agig suhol sa pagkulata sa usa ka tawo. Gipamalandong ni Glenn ang tanyag apan midesisyon nga mohunong na siya nianang matanga sa trabaho. Iyang giuli ang kuwarta ug gibalibaran ang trabaho. Sa ulahi sa dihang miadto si Glenn sa laing tindahan, ang tag-iya nahadlok nga siya mianha aron sa pagkulata kaniya. Gisultihan ni Glenn ang tag-iya nga siya karon nagtuon na sa Bibliya ug nagkinabuhi na nga malinawon. Ang tag-iya midawat ug pagtuon sa Bibliya ug gihatagan usab siya ug trabaho diha sa tindahan. Sa distritong kombensiyon sa miaging tuig, si Glenn gibawtismohan, ug ang tag-iya sa tindahan mitambong.

 ◼ UROPA

Gidaghanon sa kayutaan: 46

Populasyon: 728,373,014

Gidaghanon sa mga magmamantala: 1,490,345

Gidaghanon sa mga pagtuon sa Bibliya: 733,728

Sa dihang namatay si Jacoba, usa ka 88-anyos nga sister sa Netherlands, ang iyang mga paryente nakadawat ug sulat gikan sa opisina sa lokal nga kapolisan. Walay sipyat niyang hatdan ug mga magasin sila sulod sa daghang tuig. Ang usa ka bahin sa sulat nag-ingon: “Siya gimahal kaayo namo. Siya kanunayng moanhi sa among estasyon, ug malipay kaayo kami nga makigsalo kaniya sa pag-inom ug tsa. Nakadayeg kami sa iyang kaisog, kay bisag edaran magbisikleta gihapon siya, mag-ulan man o mag-init, sa pagduaw sa mga tawo aron makigsulti kanila bahin sa iyang tinuohan. Mingawon gayod kami kaniya.”

 Aniay eksperyensiya gikan sa Switzerland. Usa ka pamilya sa mga Saksi ni Jehova ang mibakasyon ug gibilin nila ang mga yawi sa ilang apartment ngadto sa anak nga lalaki sa laing Saksi nga pamilya, nga mihangyo nga samtang wala sila, iyang pakan-on ang mga isda sa akuwaryum. Sa unang pag-adto sa batan-ong lalaki sa apartment, naglisod siya sa pag-abre sa kandado. Usa ka babaye sa atbang nga apartment nakadungog ug kinagulkol ug milili sa iyang pultahan. Sa dihang iyang nakita ang batan-on nga misulay sa pagbukas sa pultahan sa apartment, siya nagtuo nga kawatan ang maong batan-on ug mitawag sa polis. Human nga napakaon ang mga isda, ang batan-ong lalaki migawas ug gisugat sa duha ka armadong polis! “Nag-unsa ka dinhi?” sila nangutana. “Nagpakaon lang ako sa mga isda, kay gihangyo man ko,” siya mitubag. Ang mga polis wala motuo niya. Siya misaysay: “Saksi ni Jehova ako, ug maingon man ang pamilya nga nagpuyo dinhi. Ila akong gihangyo sa pagpakaon sa mga isda samtang wala sila, mao nga ilang gibilin kanako ang ilang mga yawi.” Ang mga polis wala motuo ug buot siyang dad-on sa presinto. “Hulat una makadiyot,” miingon ang batan-on. “Gisulat sa akong mga higala ang numero sa ilang cell phone dinhi niining papela; mahimo ninyo silang tawgan karon ug pangutan-on kon tinuod ba ang akong giingon.” Gitawgan sa mga polis ang numero ug gitino ang gisulti sa batan-on. Human niana, nangayo sila ug dispensa ug milakaw. Sa dihang miabot ang pamilya gikan sa bakasyon, ilang giadto ang babaye sa atbang nga apartment, nga bag-o lang mibalhin didto. Ilang gipasalamatan siya sa iyang kabalaka. Dayon ilang gisaysay nga sama kanila, ang batan-on maoy usa sa mga Saksi ni Jehova ug nga siya bug-os nga kasaligan. Sanglit ang babaye wala man kaayoy nahibaloan bahin sa mga Saksi ni Jehova, nagkaestoryahanay sila ug dugay, nga miresulta sa iyang pagdawat ug pagtuon sa Bibliya.

Samtang namalaybalay sa Italya, usa ka sister nakahigayon sa pagpakigsulti sa batan-ong babaye kinsa usa ka inahan ug okupado sa iyang sekular nga trabaho. Kay nakaduaw kaniya sa  makadaghan apan dili gayod siya maabtan, ang sister midesisyon sa pagtelepono kaniya. Sa telepono, ang batan-ong babaye miingon nga wala gayod siyay panahon sa pagpakig-estorya bahin sa Bibliya. Ang sister miingon: “Sulod sa 10 o 15 minutos, aduna ka nay makat-onan, bisag sa telepono lang.” “Aw, kon sa telepono lang, OK!” mitubag ang babaye. Karong bag-o, gibinlan siya sa sister ug librong Kahibalo nga Motultol sa Kinabuhing Dayon ug nagsugod sa pagdumala ug pagtuon diha sa telepono. Ang pagtuon sagad ginahimo sa mga Sabado sa buntag, apan ang 10 o 15 minutos nahimo na karong 30 minutos.

Si Angela maoy usa sa nagkadaghang magmamantala sa Britanya kinsa naningkamot sa pagpamatuod ngadto sa daghang langyaw nga karon nagpuyo na didto. Sa dihang iyang giduaw ang usa ka tindahag pagkaon nga gipanag-iyag Insek, gisenyasan siya sa usa sa mga trabahante sa pagpahawa. Apan, sa molakaway na si Angela, usa ka babayeng Insek migukod kaniya gikan sa luyo sa tindahan, nga nagsangpit sa ngalan sa Diyos sa Ininsek nga pinulongan. Human nianang unang panagsultihay, si Angela regular na nga naghatod ug mga magasin kaniya. Bisag interesado ang babaye sa mga publikasyon, siya miingon nga naglisod siya sa pagtuo nga gilalang sa Diyos ang uniberso. Nagtuo siya nga ang tanang butang sulagma lang nga nanungha.

Ang trabaho sa babaye diha sa tindahan maoy pagluto ug lumpia. Gipangutana siya ni Angela kon unsa ka daghang sambog ang iyang gigamit sa paghimog  lumpia. Siya mitubag: “Lima.” Dayon si Angela miingon nga sa sunod higayon nga magluto siya ug lumpia, iyang iitsa sa ibabaw ang lima ka sambog ug maghulat kon pila ka lumpia ang magama. Pagkasunod semana sa dihang mianha si Angela sa tindahan, gisugat siya sa babayeng Insek, ug gihatagan siya ug bag-ong luto nga lumpia, ug miingon nga karon motuo na siya nga gihimo sa Diyos ang uniberso. Nasugdan ang regular nga pagtuon sa Bibliya, ug maayo ang pag-uswag niining babayhana sa pagtuon sa kamatuoran gikan sa Pulong sa Diyos.

Sa Alemanya, sa dihang ang makahilong biya sa mga planta sa nukleyar nga enerhiya ibiyahe pinaagig tren, ang mga aktibista moprotesta gayod kay makadaot kini sa kalikopan. Tungod niini ang mga kalihokan sa tren gibantayan pag-ayo sa kapolisan, nga magsusi daan sa mga riles. Niadtong Nobyembre 2003, ang usa niini nga kalihokan nahitabo duol sa dapit nga gipayuniran ni Gudrun. “Nagtuo ko nga ang mga polis dugay kaayong maglingkod ug maghulat,” siya miingon, “busa midesisyon ako sa pagduol kanila aron hatagan sila ug mabasa.” Nakita ni Gudrun nga mahigalaon kaayo ang mga polis. Nagbitbit ug basket nga puno sa mga kopya sa Ang Bantayanang Torre ug Pagmata!, siya wala maglisod sa pagpangayog permiso sa pagpakigsulti sa mga polis. Gikuhaan pa gani siya ug letrato sa mga polis sa Bavaria nga nagtanyag kanila ug magasing Pagmata! diha sa ilang sakyanan. Sa duha ka adlaw nakabiyahe siya ug kapin sa 120 ka kilometros, nga nakapakigsulti ug kapin sa 100 ka polis diha sa dalan. Siya nakapahimutang ug 184 ka magasin. “Dili gayod nako kadto makalimtan!” siya malipayon kaayong miingon.

Sa Espanya, sa dihang mipauli gikan sa trabaho, si Ana María miadto sa hunonganan sa bus, ug samtang naghulat didto, siya nagsugod sa pagbasa sa mga notisya nga gipaskin didto. Usa niini nakakuha sa iyang interes. Kini nag-ingon: “Kinahanglan gayod nga makontak dayon ako sa mga Saksi ni Jehova aron makapadayon ako sa akong pagtuon sa Bibliya.” Gitawgan dayon ni Ana María ang numero sa telepono ug nakigsabot sa pagpakigkita sa  babaye nga ginganlan ug Felicitas. Bag-o pa siyang miabot gikan sa Ecuador, diin siya nagtuon sa Bibliya sulod sa duha ka tuig. Gisugdan dayon ang pagtuon pag-usab sa Bibliya, ug si Felicitas ug ang iyang anak nga lalaki tigtambongan na sa tanang miting sukad niadto. Sila mapasalamaton nga ang ilang espirituwal nga pag-uswag wala mabalda ug dugay.

Usa ka babaye sa Bulgaria miduyog sa iyang apo nga lalaki sa pagtuon sa Bibliya uban sa mga Saksi. Nalipay kaayo siya sa pagkahibalo nga ang ngalan sa Diyos mao si Jehova. Sanglit dili man makita ang ngalan sa Diyos diha sa iyang Bibliya, siya mihukom sa pag-adto sa usa ka tindahag mga libro aron mopalit ug Bibliya nga makita ang ngalan sa Diyos. Gipangutana siya sa tindero kon unsay iyang gipangita. Sa dihang iyang gisultihan siya, gisinggitan siya sa lalaki: “Membro ka niana nga sekta!” Dayon dihay pari nga misulod sa tindahan. Sa dihang ang pari gipangutana, “Kinsay ngalan sa Diyos?” siya mitubag: “Siyempre si Jehova. Ayaw nag singgiti kining babayhana.” Nakurat ang tindero. Miuswag ang espirituwalidad niining babayhana ug tulo ka membro sa iyang pamilya.

Usa ka pamilya sa Rusya nakaagom ug trahedya: ang mga ginikanan namatyan ug pinalanggang anak nga lalaki. Sa bisperas sa paglubong kaniya, gitawgan sa inahan ang mga numero sa telepono sa tanang higala sa iyang anak nga nasulat diha sa notbok. Ang notbok may numero sa telepono sa usa ka pamilya sa mga Saksi ni Jehova, kinsa gidapit usab sa inahan sa paglubong. Ang Saksi nga pamilya wala makaila sa mga ginikanan, apan ilang gipahimuslan ang higayon sa paghupay sa pamilya. Ang brader nakigsulti sa amahan bahin sa paglaom sa pagkabanhaw ug gibinlan siyag brosyur nga Sa Dihang ang Imong Minahal Mamatay. Giduaw siya sa brader paglabay sa duha ka adlaw. Ang amahan miingon: “Naikag kaayo kami sa brosyur. Nakadesisyon kami sa paggahin ug panahon sa pagtuon sa Bibliya.” Ang asawa nagpalista sa Teokratikanhong Tunghaan sa Ministeryo ug nangandam nga mahimong dili-bawtismadong magmamantala.

 ◼ OCEANIA

Gidaghanon sa kayutaan: 30

Populasyon: 34,820,382

Gidaghanon sa mga magmamantala: 94,087

Gidaghanon sa mga pagtuon sa Bibliya: 48,307

Dose anyos pa lang si Olena sa dihang siya gibawtismohan sa Disyembre 2003, sa Hawaii. Lahi sa ubang mga batan-on nga hilig ug kalingawan, si Olena dunay klarong espirituwal nga mga tumong. Siya miingon: “Nalipay kaayo ko nga nakaoksilyare payunir sa Marso ug Mayo, ug naikag ako nga nakauban ug sangyaw sa mga payunir ug sa mga edaran. Pananglitan, sa matag Sabado sa hapon ako nakapribilehiyo sa pag-uban sa kanhi misyonaryo sa iyang mga pagbalikduaw ug mga pagtuon sa Bibliya uban sa mga Insek. Nakita nako nga makaikag ang pinulongan. Ang akong pangunang tinguha mao ang pagkahimong regular payunir sa umaabot diha sa  langyaw-ug-pinulongan nga kongregasyon. Aron matuman kanang tinguhaa, mosangyaw ako human sa klase matag Miyerkoles maingon man sa mga adlawng Sabado ug Dominggo. Dugang pa, nagplano ako nga kanunayng mag-oksilyare payunir kutob sa akong mahimo.” Unsa pay gituohan ni Olena nga makatabang kaniya sa pagkab-ot sa iyang mga tumong? “Ang pagbantay sa akong kasingkasing nagpasabot nga kinahanglang ipakita nako sa akong mga lihok nga importante kanako ang pagpahimuot kang Jehova,” siya miingon. “Ang pagpakig-uban sa mga tawo nga sama kanako ug pagbati bahin kang Jehova makatabang kanako sa pagpabilin diha sa dalan sa pagkamatarong. Ang paggugol ug daghang panahon sa pag-alagad kang Jehova nagpasabot nga dili ako makighugoyhugoy sa mga tawo nga kalibotanon ug tinamdan. Kini magpanalipod kanako sa paghunahuna nga ang materyal nga mga butang ug ang malaw-ay nga kalingawan makahatag kanako ug kalipay.”

Batasan na sa mga ginikanan sa Solomon Islands ang paghatag ug usa o duha sa ilang mga anak ngadto sa ilang mga paryente aron maoy mobuhi. Sa pagkahibalo kon unsay giobligar ni Jehova sa mga ginikanan, ang usa ka magtiayon naghimog kahikayan aron mahibalik kanila ang ilang anak nga babaye, si Deborah, nga tin-edyer na niadtong tungora. Unsa kahay iyang reaksiyon kon kalit lang nga mahimo siyang sakop sa pamilya sa mga Saksi, nga okupado kaayo sa mga miting, pagsangyaw, ug pagtuon sa Bibliya ingong pamilya? Si Deborah nahinumdom: “Bisan sa unang miting nga akong gitambongan, gibati nako nga ang nanambong nalipay gayod nga ako mitambong. Nagpaabot ako nga makakita ug mga klero nga nagsul-ob ug mga sotana, apan wala akoy nakita. Morag ang tanan nakigbahin sa mga miting, bisan ang mga bata.” Wala magdugay si Deborah nakigbahin usab. Siya nakadayeg usab sa paagi sa iyang amahan sa pagtudlo kaniya ug sa iyang mga igsoon. Siya miingon: “Kami gitabangan ni Papa sa pagpamalandong ug maayo bahin sa mga panig-ingnan sa mga tawo sa Bibliya. Kini nakatabang gayod kanako kon duna akoy problema.” Si Deborah, nga karon usa na ka dili-bawtismadong magmamantala, miingon nga siya nalipay gayod nga ang iyang mga ginikanan napalihok sa kamatuoran  sa Pulong sa Diyos sa pagkuha kaniya ug balik ug sa pag-agak kaniya paingon sa dalan sa kinabuhi.

Ang ubang mga bahin sa Papua New Guinea pulos bukid, ug daghang baryo walay mga karsada. Ang uban niining mga baryoha wala pa gayod matandog sa modernong sibilisasyon. Apan, ang maayong balita sa Gingharian nakaabot gihapon bisan niining mga lugara. Usa ka tawo nga ginganlag Leanna mitambong sa miting sa kongregasyon sa Port Moresby, ang kaulohan. Ang mga igsoon nakurat sa pagkahibalo nga siya ang pangulo sa usa ka hilit kaayong baryo sa kabukiran, diin ang iyang mga sakop walay modernong mga gamit. Lima ka adlaw nga gibaktas ni Leanna ang kabagnotan paingon sa haywey. Gikan didto misakay siya ug trak paingon sa kaulohan. Siya miingon nga lima ka tuig kanhi, miadto siya sa siyudad, ug diha sa dalan nahibalag niya ang usa ka brader nga nagpahimutang kaniya ug magasing Bantayanang Torre. Gidala ni Leanna ang magasin ngadto sa iyang baryo, ug ang iyang nabasa sa magasin iyang gitudlo ngadto sa mga tawo sa iyang baryo. Iyang gihimo kini matag Dominggo sa daghang tuig, nga gihapinan ang magasin ug plastik aron dili madaot. Dayon, gikombinsir siya sa mga tawo sa baryo sa pagpangita sa mga magpapatik sa magasin. Siya mibalik sa siyudad ug gikontak ang mga igsoon, kinsa naghikay nga dumalahan siya ug pagtuon sa Bibliya. Si Leanna miestar ug mga duha ka semana uban sa Saksi nga pamilya ug natapos ang pagtuon sa brosyur nga Gikinahanglan. Sa dihang gisultihan siya nga dunay kongregasyon sa lungsod nga dili layo sa iyang baryo, nalipay kaayo siya ug miingon: “Duol ra na kaayo! Lakwon lang kana ug duha ka adlaw gikan sa akong baryo!” Nagdalag bag nga punog literatura ug dugang nga pagsabot sa kamatuoran sa Pulong sa Diyos, iyang gisugdan ang layo nga panaw balik sa iyang baryo. May mga kahikayang gihimo alang niini nga baryo nga maduaw sa umaabot aron ang mga tawo didto matudloan sa hustong paagi sa Bibliya.

Sa isla nga nasod sa Kiribati, usa ka sister nga nagtrabaho sa opisina sa paghubad sa mga publikasyon sa mga Saksi ni Jehova miasoy niini nga eksperyensiya: “Usa ka adlaw nagbutang ako diha sa  akong bag ug magasing Bantayanang Torre nga naghisgot bahin sa impiyerno ug midesisyon sa pagtanyag niini, bisan pag daan-daan na kini nga isyu. Ako ug ang akong kuyog nakahimamat ug usa ka tawo. Among gipailaila ang among kaugalingon ug gitanyagan siya ug magasin human sa lakbit nga pagsaysay kon unsay giingon sa Bibliya bahin sa impiyerno. Miduko siya ug wala magtimik, busa akong gipangutana siya kon unsay nahitabo. Sa dihang miyanghag siya, akong namatikdan nga mihilak siya. Iya kaming gisultihan nga ang topiko sa magasin nakatandog kaayo kaniya. Ang iyang anak nga lalaki namatay mga pipila pa lang ka semanang milabay, ug siya ug ang iyang asawa nagbangotan pa. Silang duha walay hunong nga nag-ampo nga unta lipayon sa Diyos ang ilang mga kasingkasing tungod kay sila nagtuo nga ang ilang anak nga lalaki anaa sa nagkalayo nga impiyerno. Sa pagkadungog sa gipamulong mismo sa Bibliya bahin sa kahimtang sa patay, ang tawo nakurat ug nalipay kaayo. Nasugdan ang pagtuon sa dihang gibalikduaw siya. Siya sagad moingon nga siya nag-ampo sa Diyos nga pakitaan siya sa kamatuoran ug nga siya nangandoy nga makakitag relihiyon nga tinuod nga nagtudlo bahin sa Bibliya. Siya misugod sa pagtambong sa mga miting ug nangandam ug maayo aron makahatag ug kinasingkasing nga tubag panahon sa Pagtuon sa Bantayanang Torre.”

Sa Disyembre 2003, kapin sa 60,000 ka delegado mitambong sa kinadak-ang kombensiyon sa mga Saksi ni Jehova nga nahimo sukad sa Australia. Sa nakapauli gikan sa kombensiyon sa Sydney, ang sayis-anyos nga si Alyscea naghinamhinam sa pagpakita sa bag-ong libro, nga Pagkakat-on Gikan sa Dakong Magtutudlo ngadto sa iyang mga eskolmet. Ang inahan ni Alyscea miabot sa pagkuha kaniya nianang hapona ug nakurat sa pagkakita sa mga pulong “Himayaa ang Diyos” nga gisulat sa dagkong mga letra diha sa blakbord sa klasehanan. Nianang buntaga si Alyscea nag-asoy sa iyang report bahin sa kombensiyon ngadto sa tulo ka magtutudlo ug sa iyang 24 ka klasmet. Ang tanan naikag sa bag-ong libro ug sa madasigong pagrepaso ni Alyscea sa pipila ka dagkong punto sa programa. Ang mga pulong “Himayaa ang Diyos” nagpabilin diha sa blakbord sa tibuok adlaw.

[Hulagway sa panid 43]

Si Nafissatou, sa Niger

[Hulagway sa panid 43]

Si Rantso (ikaduha gikan sa tuo) uban sa iyang ig-agaw ug mga igsoon, sa Lesotho

[Hulagway sa panid 48]

Si Marie, sa Guadeloupe

[Hulagway sa panid 48]

Si Antonio, sa Mexico

[Hulagway sa panid 52]

Si Ghanshyam, sa Nepal

[Hulagway sa panid 56]

Si Jacoba, sa Netherlands

[Hulagway sa panid 58]

Si Angela, sa Britanya

[Hulagway sa panid 61]

Si Olena, sa Hawaii