Ang Labing Makaiikag nga mga Bahin sa Miaging Tuig

SA MGA tuig dili pa dugay daghan kaayong kalamidad ang nahitabo, ug diha sa kadaghanang kayutaan, sama usab niini ang nahitabo sa 2005 nga tuig sa pag-alagad. Siyempre, ang mga igsoon naapektohan usab niining maong mga trahedya. Apan sama sa atong makita unya, ang atong mga igsoon nagpakitag Kristohanong gugma sa dihang sila makaatubang ug pagsulay, nga nakapalig-on sa panag-igsoonay ug nakadani sa mga matinud-anon ug kasingkasing sa kamatuoran.​—Mal. 3:​18; Juan 13:35.

Ang pagdaghan sa mga kalamidad nakatukmod usab sa mga tawo sa pagpamalandong ug maayo bahin sa umaabot ug sa kon unsa gayod ang labing importante sa kinabuhi. Sa pagkatinuod, talagsaon gayod ang atong pribilehiyo sa pagtabang sa mga tawo  sa pagsabot sa kahulogan sa atong panahon pinaagi sa linain nga kampanya sa pag-apod-apod sa brosyur nga Padayon sa Pagbantay! Diha sa kadaghanang nasod, ang kampanya nagsugod sa Oktubre 18, 2004, ug kini dunay maayong mga resulta.

Kampanya sa Brosyur nga Padayon sa Pagbantay!

Argentina: “Kon may mahitabong kalamidad, kinsay maluwas​—ang daotan ba, ang buotan, o ang mamati sa pasidaan?” Kana ang epektibong introduksiyon sa usa ka sister sa pagtanyag sa brosyur nga Pagbantay! diha sa teritoryo diin ang mga tawo walay interes.

Usa ka brader nga ginganlag Juan nakapahimutang ug brosyur sa usa ka 16 anyos nga batan-ong lalaki kinsa nagbasa niini ug maikagong nagbalita sa iyang nabasahan ngadto sa iyang amahan. Kay gustong masayod pag dugang, gibasa kini sa amahan ug gisusi usab ang mga teksto. Siya naikag pag-ayo nga tungod niini siya nagsugod pagtuon sa brosyur uban sa iyang pamilya. Sa pagbalik ni Juan, iyang gitanyagan ang lalaki ug libreng pagtuon sa Bibliya diha sa balay. “Mao gayod kanay among gikinahanglan​—usa ka pagtuon sa Bibliya uban sa pamilya,” ang tawo mitubag. Busa, nasugdan ang pagtuon sa Bibliya.

Pransiya: Gihatagan ni Jocelyne ug usa ka kopya sa Padayon sa Pagbantay! si Alicia, nga usa ka batan-on nga nakatuon na sa una. Malipayon niyang gidawat ang brosyur ug misugot sa pagtuon uban kang Jocelyne. Si Alicia nanaad usab nga iyang regular nga basahon ang Bibliya. “Paglabay lamang ug duha ka semana,” matod pa ni Jocelyne, “si Alicia miingon nga ang mga asoy sa Bibliya bahin sa kinabuhi ni Jesus nakapalugmaw sa iyang mga luha.”

Gisultihan ni Alicia ang iyang puyopuyo nga gusto niya nga magpakasal aron mapahimut-an ang Diyos ug nga gusto niya nga mahimong usa sa mga Saksi ni Jehova. Sa iyang kakurat, ang iyang trato mitubag: “OK. Dili ti ka pugngan sa pagsunod sa gikinahanglan sa Diyos.” Si Alicia nakatambong sa iyang unang sirkitong asembliya.

 Madagascar: Si Nana inahan sa duha ka batang babaye. Sa tin-edyer pa, siya nakatambong sa Kristohanong mga tigom uban sa iyang mga ginikanan apan mihunong sa pagtambong kay sila mihunong man sa pag-alagad kang Jehova. Sa panahon sa linain nga kampanya, gidawat ni Nana ang usa ka brosyur gikan sa usa ka misyonarya ug misugot sa usa ka pagtuon sa Bibliya. Siya karon nagtambongan na sa tanang mga tigom uban sa iyang duha ka anak ug naningkamot nga mahimong usa ka dili-bawtismadong magmamantala. Dugang pa, ang iyang mga ginikanan misugot usab nga magtuon sa brosyur. Ang ilang 14-anyos nga anak nga lalaki, si Josia, nagdumala ug pagtuon sa usa ka tin-edyer nga higala, nga karon nagtambongan na sa Kristohanong mga tigom.

Nigeria: “Sa dihang namatay ang akong inahan panahon sa kampanya, ako nakahigayon sa pagpamatuod sa mga tawo sa akong baryo,” miingon ang usa ka payunir nga brader. “Una pa sa paglubong, ang mga paryente nagminatay ug miligid-ligid sa yuta. ‘Nganong inyo kining gihimo?’ nangutana ako. ‘Ang kamatayon ni Mama pait gayod alang kanatong tanan, apan siya natulog lang diha sa kamatayon. Siya mabuhi pag-usab diha sa pagkabanhaw.’ Bisag naghilak usab ako, akong gibuksan ang brosyur nga Pagbantay! sa panid 8 ug gisaysay ang ilustrasyon sa pagkabanhaw. Tungod niini, ako nakapahimutang ug 195 ka brosyur, lakip sa 45 ka brosyur nga Pagbantay! Diha sa paglubong, ako ug ang ubang mga igsoon nakapahimutang ug 100 ka kopya sa Bantayanang Torre nga gula sa Mayo 1, 2005, nga nagpasiugda sa ulohang ‘Mabuhi ba Pag-usab ang mga Patay?’”

Rusya: Si Irina, nga usa ka espesyal payunir sa Zelenogradsk, nagsulat: “Ako ug usa ka sister nagtanyag ug brosyur nga Pagbantay! sa usa ka babaye nga ginganlag Alla, kinsa nagdapit kanamo sa pagsulod sa balay. Alang kang Alla ang kinabuhi walay kahulogan tungod kay ang mga tawo matig-a na kaayo ug kasingkasing. Nagsabot kami nga mobalik pagduaw. Paglabay sa pipila ka adlaw, samtang ako ug ang mao gihapong sister naglakaw, kami nakadungog ug babaye nga nanawag kanamo. Si Alla diay ang nanawag. Kami iyang gipasalamatan sa brosyur nga iyang nadawat,  gikuha kini gikan sa iyang bag, ug iyang gipakita kanamo ang mga punto nga iyang gilinyahan. Siya karon gidumalahan na ug regular nga pagtuon sa brosyur nga Gikinahanglan.”

Sa usa ka dapit sa Rusya, si Vera ug ang iyang bana, si Vitaliy, mihapit sa usa ka kiosko diha sa daplin sa dalan diin si Lyuda, nga kaila ni Vera, nagtrabaho. Si Lyuda miingon nga dili siya gustong makighisgot sa Bibliya uban sa mga Saksi, busa si Vera nagpanuko sa pagtanyag sa brosyur. Apan kay gidasig ni Vitaliy, iyang gitanyag kini, ug sa iyang katingala, napahimutang niya ang brosyur. Paglabay sa duha ka adlaw, si Lyuda mitelepono. “Kon daghan kaayo ako ug nakat-onan sa usa lamang ka brosyur,” siya miingon, “mas labaw na segurong daghan ako ug makat-onan gikan sa regular nga pagtuon sa Bibliya!” Bisan pag nasuko ang mga paryente ni Lyuda, siya nagsugod dayon sa pagtuon ug pagtambong sa mga tigom. Ang iyang anak nga lalaki ug babaye nagtuon usab. “Makaikag kaayo,” miingon si Vera, “nga sa miaging mga tuig, gihatagan si Lyuda ug librong Kahibalo pero wala siya mainteres. Apan, nainteres siya sa brosyur nga Pagbantay!”

Venezuela: Nahinabi sa asawa sa magtatan-aw sa sirkito ang usa ka tawo, iyang asawa, ug ilang upat ka anak diha sa pultahan. Nagtudlo sa ilustrasyon sa Paraiso diha sa mga panid 16 ug 17 sa brosyur nga Pagbantay!, gipatin-aw sa sister nga kinahanglang ang tanan sa pamilya magbaton ug kahibalo bahin sa Diyos. Dayon iyang gidapit silang tanan sa miting sa Huwebes sa gabii ug nagsabot nga magkita sila sa duol nga hunonganan sa bus. Ang sister ug ang iyang bana miadto sa hunonganan sa bus sa gikasabotang oras, apan walay miabot. Sila wala makahibalo nga ang pamilya nakasakay na ug bus ug nakaabot na sa Kingdom Hall! Lima ka membro niini nga pamilya regular na nga nagtuon sa Bibliya ug nagtambongan sa mga tigom, bisan pa sa dugay nga biyahe ug mahal nga plete.

Usa ka payunir nga sister nanuktok sa usa ka balay, apan walay migawas sa pultahan. Siya mibalik sa ulahi ug nakahibalag ug usa ka tawong tigulang, nga mao pay paggawas sa balay. Siya miingon nga siya bungol-bungol na ug dili makadungog kon may  manuktok o dili dayon makaabli sa pultahan. Gihatagan siya sa sister ug kopya sa brosyur nga Pagbantay! ug gidapit siya sa tigom sa kongregasyon.

Sa panahon sa tigom, giasoy sa sister kini nga eksperyensiya, nga walay kalibotan nga diha ang tigulang! Siya karon regular nga gitun-an sa Bibliya sa usa ka brader, tigtambongan na sa tanang mga tigom, ug buot na nga mosangyaw sa maayong balita. Sa gipangutana kon nganong mitambong siya nianang unang tigom, iyang giisa ang iyang kopya sa brosyur nga Padayon sa Pagbantay! ug miingon, “Tungod niini nga brosyur!”

Paghubad sa Bibliya

Sugod sa ulahing bahin sa katuigang 1800, ang organisasyon ni Jehova namalit ug daghan kaayong Bibliya ug giapod-apod kini sa mga interesado, usahay 65 porsiyento nga mas ubos sa kantidad niini. Sa 1926, ang mga igsoon nagsugod sa pag-imprenta ug pagtagik sa ubang mga Bibliya sa ilang kaugalingong imprentahan, lakip sa The Emphatic Diaglott ug King James ug American Standard nga mga bersiyon. Dayon, sa 1961 giluwat ang Iningles nga Bag-ong Kalibotang Hubad sa Balaang Kasulatan sa usa ka tomo.

Komosta ang ubang mga pinulongan? Sa unang bahin sa ika-20ng siglo, ang mga sanga nagsugod sa pagpamalit ug mga hubad sa Bibliya gikan sa nagkalainlaing mga imprentahan ug sa pag-apod-apod niini sa samang kantidad sa pagkapalit niini. Ang pipila niini nga mga Bibliya giimprenta sa sinsero nga mga maghuhubad kinsa migamit pa gani sa ngalan sa Diyos​—si Jehova—​sa lumad nga pinulongan. Apan, sa ngadto-ngadto, gitangtang sa kadaghanang maghuhubad ang ngalan sa Diyos gikan sa ilang mga hubad. Karon gipulihan pa gani sa uban ang ngalan sa Diyos ug ngalan sa ilang lumad nga mga diyos-diyos! Pananglitan, ang Bibliyang Chichewa nga Buku Loyera, nga gigamit sa Malawi, Mozambique, ug Zambia, naghubad sa Tetragrammaton ingong “Chauta,” ang ngalan sa diyos-diyos sa tribo nga nagkahulogang “Dakong Usa nga Naghawid ug Bangkaw.”

 Daghan usab kaayo ang giusab nga mga pulong gikan sa orihinal nga pagkapamulong niini. Pananglitan, gitawag sa usa ka hubad sa Aprika si Lucas ingong albularyo. Gituis sa Tuvaluan Bible ang Judas 23, nga nag-ingon: “Pagpasundayag ug mainit nga gugma alang sa mga sodomanhon; pag-amping lang nga dili kamo maapektohan sa ilang sodomiya.” Apan, ang orihinal nga teksto wala maghisgot ug mga sodomanhon ni sodomiya!

Sa miagi, ang mga sosyedad sa Bibliya nanguna sa pag-imprenta ug pag-apod-apod ug mga Bibliya. Apan, karong bag-o, gitugyan sa ubang mga sosyedad sa Bibliya ang ilang katungod sa pag-imprenta ug pag-apod-apod ngadto sa mga relihiyon sa Kakristiyanohan. Gawas pa nga mahal, ang mga relihiyon sa ubang kayutaan dili mobaligya sa ilang mga Bibliya ngadto sa mga Saksi ni Jehova. Pananglitan, sa Kyrgyzstan gipalit sa usa ka Protestanteng relihiyon ang katungod sa pag-imprenta sa modernong hubad sa Kristohanon Gregong Kasulatan sa Kirghiz. Kon mopalit ang mga igsoon ug kopya, sila pangutan-on, “Saksi ni Jehova ka ba?” o “Nakaila ka ba sa ngalan sa Diyos?” Kon motubag gani sila ug oo, sila dili baligyaan.

Tungod niini ug sa ubang mga katarongan, ang Nagamandong Lawas midesisyon nga ang paghubad sa Bibliya kinahanglang hatagan ug pangunang pagtagad. Sa pagkakaron, ang kompletong Bag-ong Kalibotang Hubad mabatonan na sa 35 ka pinulongan, ug ang Bag-ong Kalibotang Hubad sa Kristohanon Gregong Kasulatan, sa 20 ka pinulongan. Karon, sa 33 ka tem sa maghuhubad sa Bibliya sa tibuok kalibotan, 19 ang naghubad sa Hebreohanong Kasulatan, 11 sa Kristohanon Gregong Kasulatan, ug 3 sa Reference Bible. Usa ka tem sa maghuhubad sa Bibliya sa naandan gilangkoban ug tulo ngadto sa unom ka tawo. Pinaagi sa kompiyuterisadong mga gamit sa paghubad ug sa gipauswag nga mga pamaagi, natapos sa ubang mga tem ang Kristohanon Gregong Kasulatan nga walay duha ka tuig.

Unsay gibati sa mga igsoon dihang ilang nadawat ang Bag-ong Kalibotang Hubad sa ilang kaugalingong pinulongan? Gipadayag sa usa ka payunir sa Albania ang gibati sa daghan. “Ako  nakahilak,” siya miingon. “Wala pa gayod ako makabatyag ug sama niini sa dihang magbasa sa Pulong sa Diyos. Buot nakong sabton ang matag bersikulo!”

Kinaulahiang Balita Bahin sa Legal nga mga Panghitabo

Armenia: Human sa 15 ka aplikasyon, ang mga Saksi ni Jehova sa kataposan narehistro ingong legal nga organisasyon sa Oktubre 8, 2004. Bisan pa niana, ang batan-ong mga brader prisohon gihapon kay dili sila magsundalo tungod sa diktar sa konsensiya. (Isa. 2:4) Kay legal na man ang organisasyon, kami malaomon nga ang atong mga igsoon makabaton na ug kagawasan sa pagsimba, nga makapasulod na ug literatura gikan sa gawas ug makahimog mga kombensiyon. Sa pagkatinuod, sa Hunyo 2005, ang unang literatura gikan sa gawas nga miabot sa Armenia gihatagan ug clearance sa aduwana ug giapod-apod ngadto sa mga igsoon.

Austria: Kapin na sa 30 ka tuig nga ang mga Saksi ni Jehova dinhi kanunayng midangop sa korte aron ilhong legal ingong relihiyon. Mahitungod niini nga problema, lima ka aplikasyon ang gipasaka ngadto sa European Court of Human Rights. Sa Pebrero 1, 2005, ang Korte mihukom sa pagsusi sa duha ka kaso nga naglangkit sa duha ka brader nga wala hatagi ug eksepsiyon sa pagserbisyo sa militar tungod kay ang mga Saksi ni Jehova wala ilha ingong usa ka relihiyon. Sa Hulyo 5, ang Korte misugot sa pagsusi sa kaso, apan wala nila isulti kon unsaon nila kini pagdesisyon.

Eritrea: Sa Enero 24, 2004, gidakop sa mga awtoridad ang 38 ka lalaki, babaye, ug mga bata nga membro sa Kongregasyon sa Saba sa Asmara. Ang edad nila maoy gikan sa 6 ngadto sa 94. Ang uban wala pay bawtismo. Human sa tulo ka gabii nga gitener sa kapolisan, ang kinabataan kanila gibuhian. Ang nahibiling 28 gibalhin ngadto sa prisohan sa gawas sa Asmara ug gibalhog diha sa puthawng mga kontiner sa barko nga init kaayo kon maadlaw ug tugnaw kaayo kon magabii. Sa Septiyembre 2, 2004​—paglabay sa kapin sa pito ka bulan​—ang duha sa kinatigulangang mga igsoon,  nga nag-edad ug 94 ug 87, gibuhian. Ang uban gibuhian usab human niana. Apan, ang unom, gipriso gihapon uban sa 16 pang mga brader, 3 kanila napriso na sulod sa 11 ka tuig. Palihog hinumdomi kining atong minahal nga mga igsoon sa inyong mga pag-ampo.​—Buh. 12:5.

Pransiya: Sama sa gitaho diha sa 2001 Tinuig nga Basahon, gipabuhisan sa mga awtoridad ang mga donasyon sa atong mga igsoon, apil ang mga donasyon sa milabayng upat ka tuig (1993-96)​—ang tanan gipatongan ug dako kaayong interes nga 60 porsiyento, dugang pa sa mga multa! Miapelar ang mga igsoon apan napildi sa ubos nga korte, korte sa apelasyon, ug sa hataas nga korte. Sa Pebrero 25, 2005, sila midangop sa European Court of Human Rights, nga miapelar tungod sa klaro nga pagpihig sa relihiyon.

Republika sa Georgia: Milurang na ang grabe nga paglutos. Ang atong literatura mahimo nang ipasulod sa nasod, ug wala nay nagsamok-samok sa Kristohanong mga tigom. Bisan pa niana, ang mga pag-abuso sa miagi wala gihapon mahusay sa mga korte. Ang mga igsoon nagpasaka ug upat ka kaso batok sa Georgia diha sa European Court of Human Rights. Kining mga kasoha may kalabotan sa grabe nga paglutos nga giantos sa mga igsoon, pagpapha sa atong legal nga mga korporasyon, ug sa pagkawalay aksiyon sa mga korte sa paghusay sa kaso. Sa Hulyo 6, 2004, ang Korte misugot sa paghusay sa kaso sa Gldani Congregation of Jehovah’s Witnesses v. Georgia.

Alemanya: Sa dihang ang nasod nausa pag-usab, ang mga igsoon nangayog kalig-onan gikan sa gobyerno nga ang Relihiyosong Asosasyon sa mga Saksi ni Jehova maoy usa ka legal nga korporasyon sumala sa balaod. Busa dinhi nagsugod ang 12 ka tuig nga kaso. Usa ka paborableng desisyon nga gipakanaog sa Federal Constitutional Court sa 2000 misupak sa ideya nga ang Estado makapugos sa mga Saksi ni Jehova sa pagbaton ug bisag gamayng pagkamakinasodnon nga makadaot sa ilang Kristohanong konsensiya. Ang mga problema nasulbad human sa mga paghusay. Sa Marso 24, 2005, gimandoan sa Hataas nga Administratibong Korte sa Berlin ang Estado sa Berlin sa pag-ila sa mga Saksi ni Jehova  ingong legal nga korporasyon sumala sa balaod. Ang Estado nagplano sa pag-apelar sa maong desisyon.

Rusya: Sumala sa gitaho sa 2005 Tinuig nga Basahon, ang Intermunicipal District Court sa Golovinsky midesisyon sa Marso  26, 2004, sa pagdili sa atong tanang mga kalihokan sa Moscow. Sukad niadto, problema na ang pagkuhag mga kontrata sa mga dapit nga abangan alang sa tigom sa kongregasyon ug sa mas dagkong mga panagkatigom. Apan, ang mga igsoon nakapanag-iya ug usa ka dakong Kingdom Hall nga may lima ka awditoryum, nga gigamit sa 44 ka kongregasyon ug 2 ka grupo. Sa dakong gasto ug kahasol, 17 ka kongregasyon sa Moscow nagtigom sa gawas sa siyudad, samtang 31 nagdumala sa pipila o sa tanan nilang mga tigom sa ginagmayng mga grupo sa pribadong mga apartment. Ang mga polis nagpanghasi, apan walay gipanakop. Ang desisyon sa Marso 26 giapelar pa.

Sa Septiyembre 9, 2004, girepaso ang kaso ni Kuznetsov and Others v. Russian Federation atubangan sa European Court of Human Rights. Sa Oktubre 4, ang Korte nagkausa sa paghusay pag-usab sa kaso. Kini nga kaso naglangkit sa usa ka opisyal nga nagsugo sa mga polis sa pagpahunong sa usa ka tigom sa kongregasyon sa sign language didto sa Chelyabinsk sa Abril 2000. Ang kaso nakomplikar tungod sa grabeng pagpihig panahon sa unang paghusay. Kami naghulat pa sa desisyon.

Turkmenistan: Tulo ka brader​—si Mansur Masharipov, Atamurat Suvkhanov, ug Vepa Tuvakov​—gisentensiyahan ug 18 ka bulan nga pagkapriso kay dili sila magsundalo tungod sa diktar sa konsensiya. Ang ikaupat​—si Begench Shakhmuradov​—gisentensiyahan ug usa ka tuig. Sa Pebrero 16, 2005, gisulatan sa mga opisina sa mga Saksi ni Jehova nga nag-atiman sa panglegal nga mga butang ang embahada sa Turkmenistan sa Washington, D.C., nga naghangyo sa pagbuhi sa atong upat ka brader. Sa Abril 16, ang tanan gibuhian ilalom sa espesyal nga amnestiya nga gihatag sa presidente sa Turkmenistan. Nianang tuiga, gitener ug giimbestigar sa kapolisan ang daghang igsoon sa pagpugos kanila sa pagsalikway sa ilang pagtuo, apan ang kapolisan napakyas.

 Tuig sa mga Kalamidad

Diha sa ubang kayutaan, daghan kaayong nahitabo nga dagkong kalamidad sa tuig 2004. Sa unsang paagi naapektohan niini nga mga trahedya ang atong mga igsoon?

Carriacou, Grenada, ug Petite Martinique: Sa Septiyembre 7, 2004, gidabodabohan sa Bagyong Ivan kining maong mga isla, nga nakalumpag o nakapayhag sa kapin sa 90 porsiyentong kabalayan. Sa pagkaalaot, ang kapildihang gipahinabo sa kaylap nga pagpangawat lagmit sama ka daghan sa kapildihang gipahinabo sa bagyo! Ang mga igsoon napildihan sa kadaghanan nilang mga kabtangan diha sa kalamidad, ug duha sa unom ka Kingdom Hall sa Grenada ang naguba. Walay igsoon ang grabeng nasamdan.

Ang sanga sa Barbados, nga maoy nagdumala sa buluhaton niining maong mga isla, naghatag nang daan ug instruksiyon sa mga kongregasyon sa pag-eskedyul ug bahin sa Tigom sa Pag-alagad maylabot sa pagkahimong mainandamon kon ugaling may moabot nga bagyo, bisan tuod niadto pang 1955 mihapak ang kataposang bagyo sa maong lugar. “Nganong mag-usik-usik pa man kita ug panahon sa paghisgot bahin sa bagyo nga aduna pa may mas hinungdanong mga butang nga atimanonon?” nangutana ang usa ka sister sa Grenada. Apan, sa dihang mihampak ang bagyong Ivan, siya nakaingon nga dili na gayod siya mokuwestiyon pa sa mga instruksiyon sa organisasyon! Ang sanga nag-organisar dayon ug komite nga magtaganag hinabang, ug ang mga sanga sa Guyana ug Trinidad mitabang usab. Ginatos sa mga igsoon gikan sa Caribbeano ug Tinipong Bansa mitabang sa pagpanukod pag-usab.

Jamaica ug ang Cayman Islands: Walay igsoon ang namatay sa bagyong Ivan, apan daghan ang napildihan ug mga kabtangan. Sa dihang milurang na ang bagyo, ang mga ansiyano sa 199 ka kongregasyon sa isla miduaw dayon sa mga magmamantala. “Kamo nag-inatimanay gayod sa usag usa,” miingon ang mga nakaobserbar.

Haiti: Sa tunga-tunga sa Septiyembre, gilunopan sa Bagyong Jeanne ang amihanan sa Haiti, nga tungod niini ang lungsod sa  Gonaïves nga duol sa baybay ug ang kanait nga mga lugar nalunopan. Bisan ang mga tawo nga mikatkat sa mga atop naabtan pa ug tubig nga kutob sa tuhod! “Tibuok gabii nga nakadungog kami ug mga balay nga nangahagsa ug mga tawo nga naninggit,” miingon ang usa ka brader. Ang baha nakakalas ug duolan sa 2,900 ka kinabuhi, lakip sa 83 anyos nga sister.

Ang usa ka brader miingon, “Nagpasalamat ako kang Jehova nga gibiyaan sa among pamilya ang among mga kabtangan ug nakalabang buhi.” Paglabay sa pipila ka adlaw, ang mga Saksi sa silingang mga lungsod nagdalag pagkaon ug tubig nga mainom, ug ang sanga nanghatag ug tinrak nga mga tagana. Bisan pag nagkapuliki sa pagpanghinlo, sa pag-abot sa hinapos sa semana ang tanan nanambong na usab sa Kristohanong mga tigom ug nanangyaw. “Upat ka adlaw nga giayo sa kap-atan ka boluntaryo ang akong balay,” miingon ang usa ka sister. “Ila pa gani kining gipintalan! Ang mga membro sa akong pamilya nga dili mga Saksi nakadayeg kaayo. Usa kanila nagsugod na sa pagtuon.”

Tinipong Bansa: Sa Agosto ug Septiyembre 2004, ang estado sa Florida gimakmakan sa upat ka bagyo: si Charley, Frances, Ivan, ug Jeanne. a Kapin sa 4,300 ka balay sa mga igsoon ug labing menos napulo ka Kingdom Hall ang naguba. Human sa bagyo, gisusi sa tsirman sa Emergency Operations Committee (EOC) sa lokal nga pamunoan sa Florida kon ang mga suplay gikan sa EOC nakaabot ba sa hingtungdan. Siya miingon nga walay laing grupo ang sama ka organisado sa mga Saksi ni Jehova. Iyang gisultihan ang komite nga nagtaganag hinabang nga sila makapangayo ug bisan unsang mga suplay nga ilang gikinahanglan.

Temporaryong gigamit sa usa ka kongregasyon ang usa ka bilding nga ilang giabangan ug $50 matag tigom. Apan kining maong bilding nadaot usab sa pagmakmak sa unang bagyo. Ang mga tag-iya nagsuhol ug mga tawo sa pag-ayo niini, apan wala nila taposa ang trabaho. Ang mga igsoon mitanyag sa mga tag-iya nga silay motapos sa pagtrabaho, misugot ang mga tag-iya ug ang trabaho  dali nga natapos. Agig balos, sila wala pabayra sa abang sa tulo ka bulan.

Japan: “Ang gidaghanon sa mga bagyo nga mihampak sa Japan [sa 2004] mao ang kinadaghanan sukad nga ang Japan nagsugod sa pagrekord sa mga bagyo sa 1551,” miingon ang usa ka balita. Sa mga distrito sa Niigata ug Fukui, ang bagyo sa Hulyo nakaguba ug kapin sa 34,000 ka balay ug ubang mga bilding, lakip sa usa ka Kingdom Hall ug 60 ka balay sa atong mga igsoon. Gatosang Saksi gikan sa duol nga mga kongregasyon miadto dayon sa pagtabang. Ang Kingdom Hall naayo sulod lamang sa duha ka semana.

Ang mga igsoon mitabang usab sa paghinlo ug sa paghingagaw sa mga balay sa dili mga Saksi nga nagpuyo duol sa tigomanan. Usa ka tawo nga dili modawat sa mensahe sa Gingharian nakahilak nga mapasalamaton kaayo. Ang lokal nga gobyerno nagpadala pa gani ug sulat sa komite nga nagtaganag hinabang agig pasalamat sa gihimo sa mga igsoon.

Sa dihang gimakmak sa duha ka bagyo ang Japan sa Septiyembre ug Oktubre, ang pagbaha ug pagdahili nakapatay sa usa ka brader ug usa ka sister ug nakahatag ug kalisod sa duolan sa 100 pang mga Saksi. Ang Toyooka City sa Hyogo Prefecture nalunopan. Bisag gibahaan ang iyang sak-anan, ang magtatan-aw sa sirkito mitabang sa pag-organisar sa buluhaton sa paghatag ug hinabang.

Human mihubas ang kapin sa usa ka metro nga giladmon sa lapokong tubig sa apartment sa payunir nga sister, gilimpiyohan kini sa lokal nga mga magmamantala. Ang tag-iya nga dili Saksi natandog pag-ayo. Ang sister miingon: “Nakadungog na ako bahin sa kalihokan sa organisasyon ni Jehova sa paghatag ug hinabang, apan niining higayona ako na mismo ang nakaeksperyensiya niini. Ako mapasigarbohon kaayo sa atong Diyos, si Jehova, ug sa pagkahimong bahin sa iyang organisasyon.”

Sa Oktubre usab, usa ka kusog kaayong linog miuyog sa amihanang Japan, nga nakakalas ug 40 ka kinabuhi ug nakapugos sa  kapin sa 100,000 sa pagbakwet. Walay igsoon ang nasamdan o namatay, bisan pag kapin sa 200 ka pamilya ang naapektohan ug usa ka Kingdom Hall ang naguba. Ang mga pag-uyog nagsugod samtang ang mga ansiyano sa sirkito nagmiting sa pagpangandam alang sa sirkitong asembliya. Unsay ilang gihimo? Sumala sa instruksiyon sa sangang buhatan ug sa lokal nga Regional Building Committee, sila nag-organisar dihadiha ug panghinabang. “Kami napahinumdoman sa paglantaw niining mga hitaboa sa espirituwal nga paagi,” miingon ang usa ka ansiyano. Ang sirkitong asembliya gihimo, ug bisan kadtong naapektohan sa linog mitambong.

“Ang linog nakatandog sa kasingkasing sa akong bana,” miasoy ang usa ka sister kansang bana dili Saksi ug kansang balay nadaot. Kay nakakita sa Kristohanong gugma nga gipasundayag sa buhat panahon sa paghatag ug hinabang, ang bana mitambong sa tigom sa kongregasyon sa unang higayon sa iyang kinabuhi. “Ako may bug-os nga pagsalig sa inyong organisasyon,” siya miingon. “Dili ka gayod pasagdan niini.”

Pilipinas: Sa dihang gimakmakan sa bagyo ang mga probinsiya sa Quezon ug Aurora sa ulahing mga bulan sa 2004, usa ka pamilya  sa mga Saksi, lakip sa upat ka bata, namatay sa dihang ang ilang balay gibanlas sa baha ug lapok. Ang magtatan-aw sa sirkito nga si Felimon Maristela didto niadtong tungora sa Quezon sa dihang nagbaha. “Ang Kingdom Hall giapawan dayon sa tubig,” siya misulat, “ug nadala sa baha ang akong dyip. Ako ug ang akong asawa ug duha ka igsoon nagpalabay sa kagabhion diha sa atop sa tigomanan, diin ang tubig miabot sa balisbisan. Sa alas 3:00 s.h. pagkasunod adlaw, ako nanaog. Ang tubig kutob gihapon sa dughan.”

Bisan pag delikado, gipangita ni Brader Maristela ang mga magmamantala sa pagsusi sa ilang kahimtang. Sa Dingalan, Aurora, usa ka ansiyano may higayon unta nga makabiya pinaagi sa pagsakay ug helikopter, apan siya nagpabilin aron makatabang siya sa iyang Kristohanong mga igsoon.

Ang Kinagrabehang Tsunami nga Nahitabo Sukad

Sa Disyembre 26, 2004, ang gikusgong 9.0 nga linog sa lawod sa amihanang Sumatra, Indonesia, maoy nakaingon sa labing malaglagong tsunami nga narekord sa kasaysayan. Sumala sa mga banabana, kapin sa 280,000 ang nangamatay ug wala na igkita pa! Bisan sa Somalia, Aprika, nga nahimutang sa kasadpang bahin sa dagat, ang higanteng mga balod nakakalas ug mga 290 ka kinabuhi.

Indonesia: Bisan pag daghang nangamatay niining nasora, walay igsoon o interesado ang namatay. Tungod sa mga kapintasan nga nahitabo sa miagi, daghang Saksi mikalagiw sa rehiyon sa Aceh​—ang kinagrabehan nga naapektohang dapit​—ug mibalhin sa interyor sa nasod. Ang isla sa Nias grabe usab nga naapektohan, apan ang mga igsoon nakakalagiw na.

India: Walay igsoon ang namatay, apan daghan ang napildihan ug mga balay ug ubang mga kabtangan. Sa siyudad sa Pondicherry, si Lakshmi nagsangyaw sa dihang nakadungog siya bahin sa tsunami. Siya mipauli sa iyang balay nga gama sa lapok nga mga tres kilometros painteryor, ug iyang nakita nga kini naguba. Kini gilimpiyohan ug giayo sa mga igsoon.

 Sa Madras, ang 13 anyos nga si Naveen nagdula ug cricket sa dihang nakakita siya ug dako kaayong balod. Iyang giingnan ang iyang inahan ug igsoong babaye ug sila dungan nga mikalagiw. Bisan pa niana, ilang giubog ang nagbul-og nga tubig nga nagbanlas sa tanang matang sa mga gamit sa balay maingon man daghang patayng lawas.

Ang siyete anyos nga si Lini miuban sa iyang uyoan ug ig-agaw sa baybay duol sa Kanniyākumāri sa dihang siya gidagsa sa balod diha sa mala ug siya napaod sa kahoyng koral. Siya gilamba-lambahan sa balod. Ang iyang uyoan ug ig-agaw wala malumos, apan ang antipara sa iyang uyoan nawala ug dili kaayo siya makakita. Bisan pa niana, siya nagpadayon sa pagpangita kang Lini. Wala magdugay, iyang nadunggan ang pagpakitabang ni Lini kang Jehova diha sa mga bul-og sa tubig ug iyang naluwas siya. Karon bisag kinsa sultihan ni Lini nga gidungog ni Jehova ang iyang pag-ampo.

Andaman ug Nicobar Islands: Si Mary ug ang iyang otso anyos nga anak nga lalaki, si Alwyn, miduaw sa mga paryente sa dihang giuyog sa linog ang balay. Ang tanan nanagan sa gawas. Nakita ni Mary ang taas kaayong bul-og sa tubig nga nagpaingon sa baybay. Niana mismong tungora dihay miabot nga bus. Siya ug ang iyang anak misaka dayon sa bus ug nakalingkawas. Apan, ang uban namalik sa ilang mga balay aron sa pagkuhag mga butang ug nabanlas sa balod. Human makadagan ug pipila ka distansiya, ang tanan diha sa bus nakabatyag ug laing pag-uyog sa yuta. Sila mikawas sa bus ug nanagan paingon sa habog nga dapit diin 500 ka tawo na ang atua didto. Ilang nakita mismo nga naanod ang bus sa nagbul-og nga tubig ug nahaungot nga mga tunga sa metros na lang gikan sa gitindogan sa mga tawo.

Sa dihang mihubas ang tubig, si Mary mibalik makadiyot sa iyang balay. Iyang nakit-an ang iyang Bibliya ug ang pulyetong Pagsusi sa Kasulatan sa Adlaw-Adlaw, nga nakahatag ug kalig-on kaniya sa misunod nga mga adlaw. Sa dihang gibalita nga may moabot nga mga barko nga maghakot sa mga tawo, ginatos ang nanagan paingon sa baybay ug giubog ang dagat nga nagpaabot  nga makasakay ug barko. Daghang oras matag adlaw, si Mary ug ang iyang anak naghulat diha sa kutob sa hawak nga tubig, nga gilibotan sa naglutaw-lutaw nga mga patayng lawas. Paglabay sa unom ka adlaw human sa tsunami, nakasakay sila ug barko. Kay gibasol man sa kadaghanan ang Diyos nga maoy nagpahinabo niini nga trahedya, si Mary nakahigayon sa pagsangyaw. Gani, ang iyang bayaw nga babaye karon nagtuon na sa Bibliya ug nagtambongan na sa Kristohanong mga tigom.

Si Prasanthi ug ang iyang singko anyos nga anak nga lalaki, si Jehoash, miadto sa Hut Bay aron sa pagduaw sa iyang tigulang nga amahan, si Brader Prasad Rao. Samtang didto, ilang nabatyagan ang linog, nakakita sa mga balod, ug midagan paingon sa taas nga dapit. Ang tubig misaka ug singko metros ibabaw sa dalan ug naapawan sa tubig ang balay ni Prasad. Ang iyang katre, repridyeretor, ug telebisyon ug ang suplay sa kongregasyon nga librong Labing Bantogang Tawo naglutaw-lutaw. Sa ulahi, nakit-an sa uban nga naluwas ang pipila sa mga libro ug nagsugod sa pagbasa niini. Sulod sa lima ka adlaw, si Prasad, Prasanthi, ug Jehoash nagkaon ug salin sa lunod nga mga pagkaon ug nag-antos sa hilabihan ka daghang lamok ug langaw. Sa dihang miabot ang mga barko, giubog ni Prasanthi ug Jehoash, duyog sa daghan pang uban, ang kutob sa dughan nga tubig paingon sa lansa, bisan pag may mga buaya nga naglangoy sa duol! Lain pay ato, si Prasanthi maoy unom ka bulan nga mabdos. Ang iyang amahan nakasakay usab sa ulahi.

Ang tanang balay sa Teressa Island nabanlas. Ang 13 ka igsoon didto unom ka adlaw nga natanggong sa lasang, nga nag-antos sa kagutom ug sa paak sa mga insekto, sa wala pa sila gibakwet ngadto sa Camorta Island. Sila misaka sa balay ni Mark Paul, usa ka brader nga nagpuyo sa bungtod ug kansang balay gigamit ingong Kingdom Hall. Una pa niana, sa adlaw sa tsunami, imbes sa naandang 10 ngadto sa 12 nga tigtambong sa tigom sa kongregasyon, 300 ang nanambong! Sukad niadto, 18 ka bag-ong mga estudyante sa Bibliya ang nagtambongan na sa mga tigom, nga nakasinati mismo sa mahigugmaong pagtinabangay sa katawhan ni Jehova.

 Sri Lanka: Gilamba-lambahan sa higanteng mga balod ang dos-tersiya sa gilapdon sa baybay niini nga isla, nga nakahatag ug dakong kapildihan. Ang tsunami mihampak sa Dominggo sa buntag sa panahon nga ang kadaghanan sa mga igsoon nanambong sa mga tigom sa kongregasyon diha sa dapit nga layo-layo sa nahitaboan. Napulo ka kongregasyon ang apektado, ug usa ka sister ang namatay sa dihang naanod ang iyang balay. Naguol kaayo ang mga igsoon sa kamatayon niining buotang sister. Dihay mga interesado usab nga namatay, ug daghang igsoon ang namatyan ug mga paryente. Ang usa ka ansiyano namatyan ug 27 ka membro sa pamilya! Bisan pa niana, “nalahutay sa mga igsoon kini nga trahedya nga malig-on gihapon ug espirituwalidad,” nagsulat ang sanga.

Ang Bethel naghuot sa mga suplay sa hinabang, ug ang kadaghanan sa pamilyang Bethel okupado sa buluhaton sa pagtaganag hinabang. Gihakot sa lokal nga mga igsoon nga may mga sakyanan ang mga suplay ngadto sa dapit nga naapektohan. Sulod sa upat ka adlaw, ang tanang igsoon nakontak ug natagan-an ug pagkaon ug sinina. Sa dihang gipangutana kon unsa pay ilang gikinahanglan, sila mitubag: “Mga Bibliya ug libro! Ang among mga libro nangaanod.” Sila gihatagan dayon sa ilang gipangayo.

Ang magtatan-aw sa sirkito nga si Gerrad Cooke didto niadtong higayona sa Colombo. Pito ka oras siyang nagmaneho diha sa usa ka dalan nga kuyaw kaayo kon ngitngit na tungod sa ihalas  nga mga elepante. Sa dihang miabot siya sa alas 10:30 s.g., siya ug ang lokal nga igsoon​—kansang balay naapawan sa tubig​—miadto dayon sa pagduaw sa mga pamilya ug sa pag-apod-apod sa mga suplay, nga nagtrabaho hangtod sa banagbanag.

Thailand: Walay lokal nga igsoon ang nasamdan o namatay, ug walay napildihan sa ilang panginabuhian. Apan, may pipila ka langyawng mga bakasyonista ang wala na igkita, ug gituohang patay na. Lakip kanila mao ang brader nga taga-Finland, usa ka magtiayong taga-Sweden, usa ka brader nga taga-Austria, ug ang dili-magtutuo nga bana sa usa ka sister. Duha ka magtiayong taga-Sweden miuban sa lokal nga grupo sa pagsangyaw nga layo sa baybay. Sa dihang mibalik sila sa ilang hotel, pulos mga patayng lawas ug kalumpagan ang ilang nakita.

Sa Lunes sa buntag human sa linog, ang nagadumalang magtatan-aw sa Kongregasyon sa Phuket nakadawat ug tawag sa telepono gikan sa sanga sa Thailand nga nagpahibalo kaniya nga usa ka sister nga taga-Finland, nga si Kristina, atua sa ospital nga biyaheon ug 90 minutos. Siya ug usa ka brader miadto dayon sa ospital. Ang nagadumalang magtatan-aw misulat: “Wala pa gayod ako sukad makakita ug grabeng kagul-anan​—ang mga tawo namatyan ug mga kapikas, ang mga ginikanan namatyan ug mga anak, ang mga anak namatyan ug mga ginikanan. Ang pipila nagpakitabang; ang uban nagtutok sa kisame o sa salog. Ang kahimtang makahilap kaayo sa kasingkasing nga kami mogawas usahay sa lawak aron magpahuwas sa among nagpuot nga dughan ug sa pag-ampo nga makabaton ug kalig-on.”

Nakit-an sa mga brader si Kristina samtang giandam siya nga operahan sa iyang nabali nga batiis. Ang tanan niyang mga dokumento nawala. Human sa operasyon, ang duha ka brader nag-ampo uban kaniya ug nagbantay kaniya hangtod sa tungang gabii. Paglabay sa pipila ka adlaw, siya mipauli sa Finland. Bisan pa sa iyang pait nga naagoman, “si Kristina maisogon ug malig-on,” ang mga brader mitaho. Makasubo nga ang iyang bana namatay sa tsunami.

 Mga Dedikasyon sa mga Sanga

Angola, Enero 8, 2005: Kining linaing adlaw hinungdanon kaayo sa buluhatong pagsangyaw sa Angola, usa ka nasod nga nakaagom ug giyera sibil sa halos 40 ka tuig. Si Stephen Lett nakabaton ug tagsaong pribilehiyo sa paghatag ug pakigpulong sa dedikasyon sa mga pasilidad sa sanga sa Angola ug sa pagkahimong unang membro sa Nagamandong Lawas nga nakaduaw nianang yutaa. Duolan sa 730 ka delegado nga gikan sa 11 ka nasod mitambong sa programa. Nganong gikinahanglan ang bag-ong sanga? Sa 1975 ang sanga mitaho ug kinatas-ang gidaghanon nga 3,055 ka magmamantala. Sa hapit nang matapos ang 2004, ang gidaghanon misaka ug 18 ka pilo nga miabot ug kapin sa 54,000!

Bulgaria, Oktubre 9, 2004: Sa kapin sa tulo ka tuig nga yugto, 150 ka internasyonal nga mga boluntaryo ug mga 300 ka lokal nga mga igsoon mitabang sa pagtukod sa bag-ong mga pasilidad sa sanga sa Sofia. Si Gerrit Lösch sa Nagamandong Lawas ang mihatag sa pakigpulong sa dedikasyon ngadto sa tumatambong nga 364 nga naghawas sa 24 ka nasod.

Ethiopia, Nobyembre 20, 2004: Sa unang bahin sa 2004, ang 60 ka membro sa pamilyang Bethel nakatag sa kapin sa siyam ka dapit nga nakahasol kaayo! Ang ilang bag-o ug nindot nga Bethel nahimutang sa bungtod sa sidlakang kadaplinan sa kaulohan, ang Addis Ababa, ug kapin sa 2,400 metros ibabaw sa lebel sa dagat. Sa ubang mga kagabhion, ang kahilom matugaw sa pagkatawa sa mga hyena. Si Gerrit Lösch naghatag ug pakigpulong sa tumatambong nga 2,230, lakip sa 200 ka langyawng mga delegado gikan sa 29 ka nasod. Uban niadtong giinterbiyo mao ang pipila nga gipriso ug gisakit pa gani tungod sa ilang pagtuo. Ang anak nga babaye sa usa ka brader nga gipatay miingon, “Sa pagkabanhaw, si Papa malipay gayod dihang mahibalo nga ako nagsunod sa iyang panig-ingnan sa paghigugma sa Diyos ug nga ako nag-alagad sa Bethel.”

Ghana, Marso 5, 2005: Atubangan sa mamiminaw nga 3,243, si Malcolm J. Vigo sa sanga sa Nigeria mihatag sa pakigpulong sa dedikasyon. Ang bag-ong gipahinungod nga mga gidugang sa naglungtad nang mga bilding naglakip ug tulo ka bilding nga puy-anan,  50 ka opisina, bilding para sa maintenance, usa ka Kingdom Hall, ug komedor, kosina, ug labhanan.

Guam, Hunyo 25, 2005: Kini ang ikatulong programa sa dedikasyon nga gihimo sukad niadtong 1980, sa dihang usa pa lang ang kongregasyon sa Guam. Karon napulo na. Gawas sa gihimong mga pag-ayo, ang kinaulahiang proyekto naglakip sa usa ka bag-ong Kingdom Hall ug dos-andanas nga puy-anan. Ang 100 ka internasyonal nga mga boluntaryo naggikan sa Australia ug Tinipong Bansa​—sa ilang kaugalingong gasto. Sa dihang nadunggan kini sa lokal nga inspektor sa bilding ug nakakita sa kalidad sa trabaho, “siya nakapanglingo-lingo kay dili-makatuo,” nagsulat ang sanga. Si Lorence Shepp sa sanga sa Peru ang nagpakigpulong sa dedikasyon.

Mauritius, Nobyembre 6, 2004: Si Gerrit Lösch nakapribilehiyo sa paghatag sa pakigpulong sa dedikasyon sa gidugang nga mga bilding sa sanga. Kini naglakip sa 12 ka opisina alang sa Departamento sa Paghubad ug usa ka bag-ong bilding sa maintenance. Ang mga bisita gikan pa sa Habagatang Aprika, Madagascar, Mayotte, Réunion, Seychelles, ug Uropa.

Nicaragua, Disyembre 4, 2004: Kapin sa 330 ka internasyonal nga mga boluntaryo maingon man ginatos ka lokal nga mga igsoon ang nagtukod sa bag-ong mga opisina ug mga puy-anan sa sanga ug maingon man walay-bungbong nga Assembly Hall nga makapalingkod ug 2,400. Ang membro sa Nagamandong Lawas nga si Samuel Herd maoy mihatag sa pakigpulong sa dedikasyon. Ang mga delegado naglakip sa mga misyonaryo nga nakaalagad sa Nicaragua. Pagkamalipayon nila nga nakita pag-usab dili lamang ang ilang mga estudyante sa Bibliya kanhi kondili ang mga anak ug ang ubang mga apo sa ilang mga estudyante!

Panama, Marso 19, 2005: Si Samuel Herd nagpakigpulong sa tumatambong nga 2,967, nga kadaghanan kanila nag-alagad kang Jehova kapin na sa 20 ka tuig. Sa dihang gisugdan ang proyekto, ang mga igsoon nag-abang ug crane ug nagsuhol ug operitor aron ibalhin ang pipila ka treyler nga gihimong bodega. Sa dihang miabot ang operitor, mibalibad siya sa pagtrabaho, nga nag-ingon  nga ang luna wala pa maandam. Ang mga igsoon nangatarongan kaniya apan mibalibad gihapon siya. Dayon dihang molakaw na unta siya, siya nangutana, “Lain pay ato, unsay inyong relihiyon?”

“Saksi ni Jehova,” mitubag ang mga igsoon.

Siya namalandong makadiyot ug miingon, “OK, mosugot ko.” Nganong kalit man nga nausab ang iyang hunahuna? Ang iyang mga anak gidumalahan ug pagtuon sa Bibliya sa duha ka sister, ug siya mapasalamaton sa gihimo sa mga sister.

Slovakia, Abril 16, 2005: Si Theodore Jaracz sa Nagamandong Lawas naghatag ug pakigpulong sa dedikasyon ngadto sa 448 ka bisita gikan sa 21 ka kayutaan. Usa ka linain nga tigom ang gihimo diha sa usa ka estadyum pagkasunod adlaw, ug daghang delegado nangabot sakay sa bus. “Maayo ug malipayon kamo nga mga tawo,” miingon ang usa ka drayber, “ug ang tanan motimbaya gayod nako! Ako nahibalo kon ngano. Tungod kini sa inyong pagtuo. Tighatod ako sa mga batang nagtungha ug sa mga magtutudlo. Akoy unang motimbaya sa mga bata; ug ang mga magtutudlo dili gani manumbaling sa pag-ingon ug hello!”

Wallkill, New York, U.S.A., Mayo 16, 2005: “Kitang tanan nagkauyon sa pagpahinungod niining matahom nga bag-ong imprentahan ug sa A, C, ug D nga mga bilding nga puy-anan ngadto sa bugtong matuod nga Diyos, si Jehova,” miingon ang membro sa Nagamandong Lawas nga si John Barr panahon sa iyang pakigpulong sa dedikasyon. Giugbok ang pundasyon sa bag-ong imprentahan sa Mayo 1, 2003, ug sa paglabay lamang ug kapin sa walo ka bulan, ang unang mga makina sa pag-imprenta gibalhin ngadto sa bag-ong imprentahan.

Ang mga Regional Building Committe sa tibuok Tinipong Bansa, ilabina sa duol nga mga estado, nagpadalag hanas nga mga trabahante. Ang ubang mga trabaho gihimo sa mga kontraktor sa gawas. “Ang akong mga trabahante dili sama kaninyo ka debotado sa pagtrabaho bisag may suweldo pa sila,” miingon ang usa ka kontraktor. “Kamo kinasingkasing nga nagtrabaho.” Laing manedyer sa proyekto miingon, “Ako mas daghag nasabtan  ug nakat-onan bahin sa akong trabaho sa pipila ka bulan diha sa Watchtower kay sa akong nakat-onan sa lima ka tuig sa tunghaan!” Usa ka hawas sa kompaniya nga nagsuplay ug conveyor system miingon: “Tungod ninyo, kini pa ang unang higayon nga natapos dayon namo ang pag-instalar. Ang tanang tawo dinhi malipayon kaayo mao nga ako malipayon usab! Talagsaon kaayo kining dapita.”

Sa pipila ka tuig nga milabay, ang sanga sa Tinipong Bansa dunay 15 ka web-offset nga makina sa pag-imprenta​—11 sa Brooklyn ug 4 sa Wallkill. Karon lima na lang, tungod kini sa mas episyenteng teknolohiya ug sa pag-apod-apod sa trabaho ngadto sa ubang mga sanga ilalom sa rehiyonal nga kahikayan sa pag-imprenta. Ang bag-ong imprentahan naglakip usab ug sistema sa paghipos sa papel nga mohakot sa tinabas nga papel gikan sa imprentahan agi sa hungawanan sa hangin sa ibabaw paingon sa awtomatikong mga makina nga mobangan. Ang binangan nga mga papel iresiklo sa usa ka kompaniya sa gawas, nga nakapadaginot sa sanga ug $200,000 sa usa ka tuig!

Zambia, Disyembre 25, 2004: Sa duolan sa 700 nga mitambong sa dedikasyon sa gipadakong mga pasilidad, 374 ang nakaalagad kang Jehova kapin nag 40 ka tuig! Sa iyang pakigpulong sa dedikasyon, gisultihan ni Stephen Lett kadtong nakatabang sa pagtukod nga sama sa mga ulipon diha sa usa sa mga sambingay ni Jesus, sila takos sa kinasingkasing nga komendasyon nga “Maayong pagkabuhat!”​—Mat. 25:23.

Ang mga igsoon nakahatag usab ug maayong pagpamatuod panahon sa pagtukod. “Kamo nagpuyo sa usa ka paraiso,” miingon ang usa ka kontraktor.

“Pisikal ba o espirituwal?” nangutana ang mga igsoon.

“Sa pisikal ug espirituwal!” siya mitubag.

[Footnote]

 [Kahon/Mga hulagway sa panid 29]

“Diyosnong Pagkamasinugtanon” nga mga Kombensiyon

Sama sa gisaysay diha sa “Diyosnong Pagkamasinugtanon” nga Distritong mga Kombensiyon, kadto lamang ‘nakaila sa Diyos’ ug ‘nagsunod sa maayong balita’ ang makalabang buhi sa adlaw sa pagpanimalos ni Jehova. (2 Tes. 1:​6-9) Busa, atong himoon kutob sa maarangan ang pagtabang niadtong naglibog bahin sa Diyos ug nasakit ang buut kaniya tungod sa pag-antos nga naagoman sa kalibotan. Ang maayo, bag-ong mga giya sa pagtabang kanato mao ang tract nga Ang Tanang Pag-antos Matapos na sa Dili-Madugay! ug ang librong Unsay Tinuod nga Gitudlo sa Bibliya?

Ang bag-ong tract seguradong makahatag ug kahupayan sa daghang biktima sa mga gubat, kawalad-on, mga kalamidad, inhustisya, ug sakit pinaagi sa pagtabang kanila sa pagkasabot nga dili pagbuot sa Diyos kining mga butanga. Sa susama, ang bag-ong libro makaikag alang niadtong nagpangita ug espirituwal nga kamatuoran. Ang pagkasulat niini makaikag, simple, ug tin-aw, ug ang pangunang mga punto maayo nga pagkailustrar, kon sa mga hulagway man ug sa mga pulong. Sa dili pa nimo kini gamiton sa pagdumala ug mga pagtuon sa uban, basaha gayod ang dugang nga 14 ka ulohan diha sa apendise.

 [Chart/Mga hulagway sa panid 12, 13]

PIPILA KA PANGHITABO SA 2005 NGA TUIG SA PAG-ALAGAD

Septiyembre 1, 2004

Oktubre 8: Legal nga narehistro ang mga Saksi ni Jehova sa Armenia.

Oktubre 9: Dedikasyon sa sanga sa Bulgaria.

Oktubre 18: Nagsugod ang kampanya sa brosyur nga Pagbantay!

Nobyembre 6: Dedikasyon sa sanga sa Mauritius.

Nobyembre 20: Dedikasyon sa sanga sa Ethiopia.

Disyembre 4: Dedikasyon sa sanga sa Nicaragua.

Disyembre 25: Dedikasyon sa sanga sa Zambia.

Disyembre 26: Ang gikusgong 9.0 nga linog duol sa Sumatra, Indonesia, miresulta ug labing malaglagong mga tsunami nga nahitabo sukad sa kasaysayan.

Enero 1, 2005

Enero 8: Dedikasyon sa sanga sa Angola.

 Marso 5: Dedikasyon sa sanga sa Ghana.

Marso 19: Dedikasyon sa sanga sa Panama.

Marso 24: Ang Hataas nga Administratibong Hukmanan sa Berlin nagpakanaog ug mando sa paghatag sa mga Saksi ni Jehova sa Berlin ug katungod sa pagbaton ug legal nga korporasyon.

Abril 16: Dedikasyon sa sanga sa Slovakia.

Mayo 1, 2005

Mayo 16: Dedikasyon sa imprentahan ug mga puy-anan sa Wallkill, New York.

Hunyo 25: Dedikasyon sa sanga sa Guam.

Agosto 31, 2005

[Hulagway sa panid 20]

Nanghinlo sa Kingdom Hall nga nadaot sa baha sa Niigata Prefecture, sa Japan

[Hulagway sa panid 24]

Nag-atiman sa mga suplay sa panghinabang sa Sri Lanka