Sulat Gikan sa Nagamandong Lawas

“HINAOT nga kamo adunay dili-takos nga kalulot ug kalinaw gikan sa Diyos nga atong Amahan ug sa Ginoong Jesu-Kristo.” Mao kini ang kasagarang pangomosta ni Pablo diha sa iyang mga sulat ngadto sa mga kongregasyon. Kini tukma kaayong nagpahayag sa among gipanghinaot alang kaninyong tanan.​—Efe. 1:2.

Kita mapasalamaton kaayo sa dili-takos nga kalulot ni Jehova pinaagi sa halad lukat ni Kristo Jesus! Pinaagi sa lukat, kita nakabaton ug inuyonang baroganan atubangan sa Diyos. Dili gayod nato kini mabatonan pinaagi sa atong kaugalingong paningkamot, bisag unsa pa nato ka kugihan sa pagtuon sa Bibliya, pagsangyaw sa maayong balita, o pagbuhat ug maayo. Ang kapasayloan sa mga sala ug kinabuhing walay kataposan gihatag kanato, dili ingong bayad sa atong pagkugi, kondili ingong mga gasa nga nagpabanaag sa dili-takos nga kalulot ni Jehova pinaagi ni Jesu-Kristo.​—Roma 11:6.

Si Pablo nagsulat sa mga isigkamagtutuo: “Kami nangaliyupo . . . kaninyo nga dili dawaton ang dili-takos nga kalulot sa Diyos ug sipyaton ang katuyoan niini. Kay siya nag-ingon: ‘Sa usa ka panahong dalawaton ikaw akong gidungog, ug sa usa ka adlaw sa kaluwasan ikaw akong gitabangan.’ Tan-awa! Karon mao na ang panahon nga ilabinang dalawaton. Tan-awa! Karon mao na ang adlaw sa kaluwasan.” Dihay usa ka “panahong dalawaton” sa wala pa malaglag ang Jerusalem sa unang siglo. Ang mga tawo nga tim-os  ug kasingkasing nga nahigugma kang Jehova naluwas sa espirituwal nga paagi. Kini sa ulahi nakaluwas sa pisikal nga paagi sa tanang matinumanon nga mikalagiw sa Jerusalem sa wala pa kini malaglag sa tuig 70 K.P.​—2 Cor. 6:​1, 2.

Karon, usab, kita nagkinabuhi na sa “panahong dalawaton” ug sa “adlaw sa kaluwasan.” Kadtong gidawat ni Jehova ingong iyang mga alagad ug naluwas sa espirituwal nga paagi makalaom nga maluwas sa pisikal nga paagi sa “dakong adlaw ni Jehova” nga karon haduol na kaayo.​—Sof. 1:14.

Kita gisangonan ug dako nga responsibilidad niining umaabot nga adlaw ni Jehova. Kita gisugo sa pagpasidaan sa mga tawo bahin niana ug sa pagtabang sa mga tim-os ug kasingkasing sa pagpahimulos sa dili-takos nga kalulot ni Jehova aron sila usab maluwas. Nahibalo si Pablo nga mabug-at kini nga responsibilidad. Siya nagsulat: “Sa pagkatinuod, alaot ako kon dili ko ipahayag ang maayong balita!” Iyang gipahayag usab ang iyang gibati niining mga pulonga: “Sa mga walay salabotan ako utangan: busa ako may kaikag nga ipahayag usab ang maayong balita.”​—1 Cor. 9:​16; Roma 1:​14, 15.

Kita dunay tulubagon kang Jehova kon dili nato tumanon ang hinungdanong buluhaton sa pagpasidaan sa mga tawo. Kita nahibalo sa giingon ni Jehova ngadto kang manalagnang Ezequiel: “Anak sa tawo, gihimo ko ikaw nga tigbantay sa balay sa Israel, ug pamati sa pulong gikan sa akong baba ug pasidan-i sila gikan kanako. Sa dihang ako moingon sa daotan, ‘Ikaw sa pagkatinuod mamatay,’ ug ikaw wala magpasidaan kaniya ug mosulti aron sa pagpasidaan sa daotan gikan sa iyang daotang dalan aron sa pagtipig kaniya nga buhi, tungod kay siya daotan, siya mamatay sa iyang kasaypanan,  apan ang iyang dugo paninglon ko gikan sa imong kamot.”​—Ezeq. 3:​17, 18.

Kining kataposang mga adlaw lisod kaayong sagubangon. Dili lalim ang pag-atiman sa balanseng paagi sa mga butang maylabot sa pamilya, sekular nga kalihokan, buluhaton sa kongregasyon, ug pagsangyaw. Dugang pa, daghan kaninyo ang nag-antos sa sakit, depresyon, pagkatigulang, ug bisan pagsupak. Ang kadaghanan kaninyo “nabug-atan.” Buot namong ipahayag ang among inigsoong pagbati kaninyo, nga kaharmonya sa giingon ni Jesus: “Umari kanako, kamong tanang nabudlayan ug nabug-atan, ug ako magapalagsik kaninyo.” (Mat. 11:28) Buot namong ipadangat ang among mainitong komendasyon kaninyong tanan nga nagkugi sa pag-alagad kang Jehova nga nagpabiling matinumanon bisan pa sa daghang dagko ug gagmayng mga problema.

Tungod sa inyong madasigong pagsangyaw ug pagpanudlo ug tungod sa panalangin ni Jehova, sa tibuok-kalibotan 4,762 ang nabawtismohan matag semana sa aberids. Sa miaging tuig sa pag-alagad, 1,375 ka bag-ong mga kongregasyon ang natukod. Kami nanghinaot nga ang bag-ong libro nga Unsay Tinuod nga Gitudlo sa Bibliya?, nga mabatonan na sa kapin sa 120 ka pinulongan, makatabang sa minilyon pa sa pagpahimulos sa dili-takos nga kalulot ug pakigdait gikan kang Jehova niining “adlaw sa kaluwasan.”

Kamo makasalig nga ang Nagamandong Lawas nahigugma kaninyo ug nga kami mag-ampo alang kaninyo. Kami nagpasalamat usab sa inyong mga pag-ampo alang kanamo.

Inyong mga igsoon,

Nagamandong Lawas sa mga Saksi ni Jehova