Tibuok-Kalibotang Taho

◼ ASIA UG TUNGANG SIDLAKAN

Gidaghanon sa kayutaan: 47

Populasyon: 3,896,182,946

Gidaghanon sa mga magmamantala: 582,360

Gidaghanon sa mga pagtuon sa Bibliya: 453,069

Kyrgyzstan: Matag duaw ni Svetlana, nga oksilyare payunir, sa usa ka partikular nga balay sa iyang teritoryo, kini walay tawo kanunay. Sa dihang miagi siya niini usa ka adlaw niana, siya naghunahuna nga walay kapuslanang adtoon pa niya kini, kay wala gayoy maabtang tawo dinhi. Apan, siya midesisyon sa pagduaw pag-usab niining balaya ug nakalitan nga dihay usa ka batan-ong babaye. Ang batan-on nahinangop nga nakahibalag ug Saksi ni Jehova ug miingon nga siya nagtuon sa Bibliya kaniadto apan nawad-an ug kontak sa mga igsoon. Gipangutana ni Svetlana ang batan-on kon siya gusto bang regular nga makabaton ug mga magasin, ug siya  mitubag nga dili lamang mga magasin ang iyang gikinahanglan kondili regular nga pagtuon sa Bibliya sa balay! Ang pagtuon gisugdan dihadiha, ug karon kining interesadong batan-on nagtambongan na sa Kristohanong mga tigom.

Japan: Duha ka sister nga nagsangyaw sa teritoryo sa negosyo misulod sa bupiti sa abogado nga ilado nga matinabangon sa mga kabos. Sila gibalibaran dayon sa usa ka babaye kinsa miingon nga siya daghag trabaho apan midawat sa mga magasin. Kining babayhana nag-inusara sa bupiti sa dihang siya giduaw pag-usab sa mga sister. Wala pa gani sila makahatag ug pangatahoran kaniya, siya suko kaayong miingon: “Nganong ang inosenteng mga bata gipamatay man? Nganong ingon niini ang kalibotan? Gusto kong makadungog ug katuohan nga tubag! Kon kamo may tubag, nan, saysayi ako!” Paglabay sa usa ka oras samtang ilang gipatin-aw ang isyu bahin sa unibersohanong pagkasoberano, ang tinamdan sa babaye anam-anam nga nausab. Iyang gipasalamatan ang mga sister sa paggamit sa Bibliya sa pagtubag sa mga pangutana nga iyang gituohan nga dili nila matubag. Sa molakaway na ang mga sister, gihatagan sila sa babaye ug adres sa iyang balay ug numero sa telepono ug miingon: “Mohatag lamang ako sa akong adres sa mga tawo nga suod kaayo nako, apan kamo lahi. Gusto kong makigsulti kaninyo pag-usab. Dili ordinaryong butang ang atong nahisgotan.” Nasugdan ang pagtuon sa Bibliya.

Nepal: Usa ka babaye tigsimba sa daghan nang katuigan apan gilainan sa kahakog ug sa mga away-away nga iyang naobserbahan sa mga membro sa iyang relihiyon. Bisag pastor ang iyang bana kaniadto, dihay panagbingkil nga mitungha maylabot sa mga donasyon, ug ang iyang bana gipalagpot. Siya nagsugod sa pag-inom-inom ug mihunong sa pagsustento sa pamilya. Ang babaye naningkamot gayod sa pagpangita sa kamatuoran ug nag-ampo kada adlaw. Aron masustentohan ang iyang pamilya, siya nagsugod sa pagtrabaho diha sa pasilidad nga nangolektag basurang mga papel. Usa ka adlaw samtang naghagpat sa mga libro, mga magasin, ug mga mantalaan, siya nakakitag librong Nahiusa sa Pagsimba sa Bugtong Matuod nga Diyos. Iyang gitagoan kini diha sa  iyang sinina ug gidala sa balay. Adlaw-adlaw niyang gibasa ang libro ug nagpadayon sa pag-ampo. Usa ka adlaw niana si Bishnu, nga espesyal payunir nga sister, nanuktok sa iyang pultahan. Ang babaye nainteres sa gisaysay ni Bishnu ug gidapit siya sa babaye sa pagsulod sa balay. Sa hinay-hinay, ang babaye nakamatikod nga ang gisulti ni Bishnu susama sa gipamulong sa libro. Sa ngadto-ngadto gipakita niya kang Bishnu ang libro ug nalipay si Bishnu tungod kay usa kini sa atong mga libro. Karon siya regular na nga nagtuon sa Bibliya ug nagtambongan sa tanang tigom uban sa iyang mga anak.

Sri Lanka: Bisag wala pa siya mahimong dili-bawtismadong magmamantala, si Punchibanda midesisyon sa pagpaambit sa mensahe sa Gingharian sa impormal nga paagi ngadto sa uban. Nakigsulti siya sa usa ka makililimos kinsa miingon nga ang iyang kamagulangang anak nga babaye nag-antos ug namatay sa sakit. Una pa niana sila nakasimba sa simbahan sa Assemblies of God nga naglaom nga mamaayo ang iyang anak sa milagrosong paagi, apan walay nahitabo. Si Punchibanda nagpatin-aw nga ang Diyos dili na maghimog mga pagpang-ayo karon kondili ang pagpang-ayo sa mga sakit mahitabo ilalom sa Gingharian sa Diyos. Iyang gihatagan ang makililimos ug mga magasin nga naghisgot bahin niini. Sa ulahi, iyang gidapit ang makililimos sa pagtambong sa Kingdom Hall. Ang makililimos mipauli ug iyang gisultihan ang iyang pamilya bahin sa imbitasyon ug gipakita kanila ang mga magasin. Ang asawa miingon nga siya usab nakadawat ug mga magasin ug gidapit usab sa pagtambong sa Kingdom Hall. Kining tawhana midesisyon nga siya una ang motambong sa Kingdom Hall. Didto mainiton siyang giabiabi sa mga igsoon. Karon siya, iyang asawa, ilang anak nga lalaki, ug duha ka anak nga babaye nagtambongan na sa mga tigom ug malipayong nagpakig-uban sa katawhan ni Jehova.

Lebanon: Usa ka espesyal payunir nga sister nga taga-Pilipinas miasoy: “Nakahibalag ako ug Pilipina samtang nagsangyaw sa dalan. Gibisitahan nako siya sa trabahoan ug siya akong gidumalahan ug pagtuon sa Bibliya. Daghan kaayo siya ug pangutana; usahay dili pa gani ako makatiwas pagtubag sa usa ka pangutana, mangutana  na usab siya ug lain. Apan, sa ngadto-ngadto, ang iyang suod nga mga higala nga aktibong mga membro sa ilang relihiyon misupak. Makasubo nga siya nagpadaog sa ilang pagsupak ug mihunong sa pagtuon sa Bibliya bisag gidasig nako siya sa pagpadayon. Bisan pa niana, miingon ako sa akong kaugalingon, ‘Kon siya karnerohon gayod, siya magpatuon ra pag-usab sa Bibliya.’ Milabay ang usa ka tuig, ako naghunahuna gihapon niya, busa gisulatan nako siya ug akong giingnan siya nga ako naghunahuna kaniya ug malipay ako nga makigkita kaniya pag-usab. Mitawag siya sa telepono, ug giduaw nako siya. Niining higayona akong nasuta nga mas interesado siya kay sa kaniadto. Ang mga butang nga among nahisgotan sa una anaa gihapon sa iyang kasingkasing, ug kini iyang gipabilhan pag-ayo. Ako iyang gisultihan nga nakaadto na siya ug daghang simbahan apan walay usa niini ang nagtudlo sa kamatuoran. Busa mibalik siya sa pagtuon, miuswag, ug karon bawtismado na. Ang iyang 12-anyos nga anak nga lalaki maoy usa na ka dili-bawtismadong magmamantala.”

India: Usa ka sister misulat: “Samtang namalaybalay, kami nakamatikod ug dalagita nga sa pagkakita niya namo siya misulod sa iyang balay. Dayon nakasugat kami ug lalaki ug kami iyang giabog. Sa talilakaw na kami, namatikdan namo nga nakigsulti ang dalagita sa lalaki. Sa ulahi, samtang naghulat ug bus, miduol ang dalagita nga nagsakayg bisikleta ug miingon: ‘Nahibalo ako nga si Jehova mao ang matuod nga Diyos. Palihog tudloi ako sa Bibliya. Misulod ako sa akong balay sa pagdapit kaninyo sa pagsulod, apan ang tag-iya sa balay wala mosugot.’ Among gipangutana ang dalagita kon nganong nakahibalo siya nga si Jehova mao ang matuod nga Diyos. Siya miingon nga sa miaging duha ka tuig siya nagsakay ug bus dihang nakakita siya ug dakong Kristohanong panagtigom. Usa kadto sa among distritong mga kombensiyon. Siya mikawas sa bus ug mitambong sa tanang tulo ka adlaw nga programa. Siya dugay nang naghulat nga duawon sa mga Saksi ni Jehova. Kay nakakita sa iyang interes, siya among gidala sa balay sa usa ka sister ug nasugdan ang pagtuon sa Bibliya. Siya nagtambongan na sa mga tigom ug mauswagon sa espirituwal.”

 ◼ APRIKA

Gidaghanon sa kayutaan: 56

Populasyon: 781,767,134

Gidaghanon sa mga magmamantala: 1,015,718

Gidaghanon sa mga pagtuon sa Bibliya: 1,820,540

Uganda: Si Lucy maoy usa ka Saksi nga nagtrabaho sa usa ka dakong dispensaryo. Siya ug ang uban niyang mga kauban sa trabaho gipatawag aron sa pagpanumpa nga walay sala dihang nadiskobrehan sa pagtuki sa libro sa kompaniya nga dihay nawalang dakong kantidad nga salapi. Dihang turno na ni Lucy sa paghawid sa Bibliya ug sa pagpanumpa nga siya walay sala, iyang gibuksan hinuon ang Proverbio 15:3 ug gibasa kini sa kusog: “Ang mga mata ni Jehova anaa sa tanang dapit, nga nagpadayon pagbantay sa mga daotan ug sa mga maayo.” Migahom ang kahilom, dayon ang sad-an miduol sa superbisor ug miangkon sa sala. Ang superbisor  miingon nga sa umaabot ilang hinumdoman ang “teksto ni Lucy.” Ang suweldo ni Lucy sa ulahi giumentohan, ug siyay gihatagan sa responsibilidad sa paggunit sa yawi sa dispensaryo.

Benin: Si Josué gibugalbugalan sa eskuylahan. Kon makatubag siya ug sayop diha sa klase, biaybiayon siya sa uban niyang mga klasmet, nga moingon, “Pari ka man kaha ni Jehova, nganong sayop man ang imong tubag?” Ang uban moduyog sa pagbiaybiay, sama sa, “Magpunay lang siya ug lakaw-lakaw nga magdala-dalag bag.”

Si Josué miadmitir, “Mahadlok kaayo ako nga makasugat ug mga klasmet kon mosangyaw ako sa hinapos sa semana.” Iyang giampo kining butanga ug mikonsulta ug ansiyano, kinsa nagdasig kang Josué sa paghimog kusganong lakang pinaagi sa pagpausbaw sa iyang panahon sa pag-alagad sa kanataran ug pinaagi sa maisogong pagtanyag ug literatura ngadto sa iyang mga klasmet. Si Josué milampos sa tulo ka natad. Siya miingon: “Ako karon kanunay nang mag-alagad ingong oksilyare payunir. Duha ka klasmet nga nagbugal-bugal kanako kaniadto karon mga estudyante na nako sa Bibliya. Taas usab kaayo ang akong nakuhang grado.”

Ethiopia: Mga duha ka tuig sa miagi, si Asnakech nakakitag lisensiya sa pagmaneho ug nakigsabot sa pag-uli niini sa tag-iya, nga usa ka babaye nga ginganlag Elsa. Siya nahingangha sa pagkamatinud-anon ni Asnakech ug gustong mohatag kaniya ug kuwarta. Wala dawata ni Asnakech ang kuwarta kondili gitanyagan hinuon niya si Elsa ug brosyur nga Unsay Gikinahanglan sa Diyos Kanato? Pagkasunod adlaw si Elsa nagsugod sa pagtuon sa Bibliya. Siya miingon nga nakadungog na siya sa ngalang Jehova kaniadto tungod kay ang iyang amahan, nga usa ka pari, maoy nagsulti kaniya bahin niining ngalana. Human nga mitambong ang iyang tibuok pamilya sa usa ka distritong kombensiyon, ang iyang bana nagsugod usab sa pagtuon sa Bibliya. Apan sa dihang nahibaloan kini sa iyang amahang pari, siya nasuko pag-ayo, nga nagtawag sa mga Saksi ni Jehova nga mga walay silbi. Kay determinado sa pagpadayon sa iyang pagtuon, matinahorong gisultihan ni Elsa ang iyang  amahan nga ang mga Saksi dili sama sa iyang gipanulti. Sa kabalaka, hilom nga gikuha sa iyang amahan ang brosyur nga Gikinahanglan gikan sa iyang anak nga babaye. Kini iyang gibalik-balik ug basa ug natandog niini. Dayon, kon magbendisyon siya sa mga lumalabay, dili na niya kini himoon sa ngalan sa Trinidad. Wala magdugay siya ginganlan ug “apostata,” ug ang pipila naglungot-lungot sa pagkulata kaniya. Busa, siya mibalhin sa Addis Ababa, diin didto siya usab nagsugod sa pagtuon sa Bibliya. Si Elsa bawtismado na nga Saksi, uban sa pito ka membro sa iyang pamilya. Ang iyang bana ug anak mauswagon usab.

Côte d’Ivoire: Si Anderson nagbilin ug brosyur nga Unsay Gikinahanglan sa Diyos Kanato? sa tag-iyag tindahan nga tigbasa ug Bibliya. Wala madugay usa ka pagtuon sa Bibliya ang nasugdan. Ang lalaki interesado ilabina sa leksiyon nga nag-ulohang “Pamilyahanong Kinabuhi nga Makapahimuot sa Diyos.” Siya miasoy: “Wala ako mahibalo nga ang matag kapikas dunay papel nga dulaon diha sa kaminyoon. Kon gabii na kaayo ako mouli, dili nako palabyon ang isulti sa akong asawa. Ako siyang sultihan, ‘Ako ang padre de pamilya, ug walay makabuot nako kon molakaw ako; ikaw ang asawa, busa atimana ang panimalay.’ Karon ako mopauli dayon human sa trabaho ug motabang sa akong asawa sa mga dukidukion sa balay.”

Kenya: Usa ka siyete anyos nga batang lalaki nga segunda grado nakadungog bahin sa umaabot nga pagduaw sa magtatan-aw sa sirkito. Sa semana una pa sa duaw, iyang giduol ang prinsipal sa iyang eskuylahan ug nangayog permiso sa pagtambong sa mga tigom sa Martes sa hapon. Siya gitugotan. Apan, pagkasunod adlaw gipapauli ang bata gikan sa eskuylahan ug gisugo sa pagbalik nga dala ang iyang mga ginikanan ug ang giingon nga bisita. Busa, ang magtatan-aw sa sirkito miadto sa eskuylahan uban sa amahan sa bata. Ang prinsipal nakurat sa pagkakita nga miadto gayod ang bisita ug nga siya nagbaktas ug kapin sa usa ka oras sa titip kaayong mga bungtod aron makigkita sa prinsipal. Ang prinsipal midawat ug literatura ug sukad niadto mahigalaon ug masinabtanon na kaayo.

 Malawi: Samtang magsangyaw sa kanataran, usa ka brader hasion kanunay sa usa ka lalaki nga tigbisikleta. Sa dihang makakita sa brader nga magsangyaw, ang lalaki mohunong ug mosugod sa pagpakiglalis. Siya misulay pa gani sa pag-agaw sa Bibliya sa igsoon. Usa ka adlaw niana miagi ang lalaki samtang nagdumala ang brader ug pagtuon sa Bibliya. Sa dihang ang lalaki dihay gikawhat sa iyang bisikleta aron kini tul-iron, ang iyang kamot naipit sa mga rayos sa ligid sa atubangan, nga tungod niini grabe ang pagkasamad sa iyang mga tudlo. Bisan nag-antos sa grabeng kasakit ang lalaki, walay laing tawo ang mitabang kaniya kondili ang brader, kinsa nagbendahe sa iyang mga tudlo ug nagpadala kaniya sa ospital. Sa ulahi, giduaw sa brader ang lalaki diha sa iyang balay. Naulaw sa iyang gihimo sa miagi, ang lalaki miangkon nga ang iyang tinamdan naimpluwensiyahan sa bakak nga mga hungihong. Siya miingon: “Tinuod nga kamo nagsimba sa bugtong matuod nga Diyos. Wala gayod ako magtuo nga imo akong tagdon sa malulotong paagi human sa akong pagmaltrato kanimo.”

Cameroon: Usa ka batan-ong sister naglingkod sa punog tawo nga lawak nga hulatanan sa usa ka ospital sa dihang misulod ang usa ka tawong tigulang ug may sakit. Kay okupado man ang tanang mga lingkoranan, ang tawo napugos sa pagtindog. Ang sister nahinumdom: “Naluoy ako sa tigulang ug siyay akong gipalingkod sa akong gilingkoran. Madungog sa tibuok lawak ang hinagawhaway sa mga tawo tungod kay sa paghatag nako sa akong luna sa lingkoranan, gihatag ko usab ang akong turno sa pagpakonsulta. Dayon dihay babaye nga miduol nako ug nangutana kon unsay akong relihiyon. Mitubag ako nga Saksi ni Jehova ako. Nakadayeg siya nako tungod kay sa iyang opinyon pipila na lang ang mga batan-on nga mobuhat ug sama niini. Gipahimuslan nako ang higayon sa pagsangyaw kaniya ug sa uban ginamit ang mga tract nga akong dala. Akong natubag ang daghang pangutana. Nausab ang tinamdan sa uban nga akong napakigsultihan bahin sa mga Saksi ni Jehova ug mosugot na nga bisitahan sila sa mga Saksi diha sa ilang mga balay.”

 Togo: Samtang nagsangyaw sa hilit nga teritoryo, ang pipila ka igsoon nakakita ug batan-ong lalaki nga nalipay nga nakakita kanila. Iyang gipakitaan sila ug duha ka notbok nga diha niana iyang gikopya ang tibuok librong Ikaw Mabuhing Walay Kataposan sa Paraiso sa Yuta ug ang usa ka bahin sa librong “Make Sure of All Things.” Iyang nakita kining mga libroha sa balay sa usa ka ebanghelikal nga pastor nga iyang gipuy-an sa dugay-dugay nga panahon. Ang pastor dunay duha ka estante sa libro, ang usa alang sa iyang paboritong mga libro ug ang usa alang sa mga libro nga “dili importante.” Niining ikaduhang estante nakit-an sa batan-on ang atong mga libro. Human makabasa ug pipila ka panid sa usa niini, siya nainteres pag-ayo sa mensahe. Kay dili man niya madala ang libro ug wala mahibalo kon asa kini paliton, iya kining gikopya. Sa dihang nagsugod siya sa pagsulti sa uban bahin sa iyang nabasahan, ang iyang inahan ug ang pastor nasuko niya. Siya gibinlan sa mga igsoon ug literatura ug gitabangan aron mouswag ang iyang espirituwalidad.

Habagatang Aprika: Si Thandi, nga usa ka Saksi, gihangyo sa iyang amo sa pagpakigsulti sa kauban sa trabaho nga ginganlag Bella, nga dunay problema sa kaminyoon. Ang bana ni Bella, nga usa ka polis, nag-abuso kaniya sa pisikal ug sa emosyonal nga paagi, busa siya nakadesisyon sa pagdiborsiyo kaniya. Gihatagan ni Thandi si Bella ug duha ka kopya sa librong Ang Sekreto sa Kalipay sa Pamilya ug siya giingnan sa paghatag ug usa niini ngadto sa iyang bana. Paglabay sa usa ka semana, si Thandi nakigsulti kaniya ug iyang nahibaloan nga gibasa sa iyang bana ang libro ug nga malinawon na ang ilang pamilya. Paglabay sa tulo ka bulan, gisultihan ni Bella si Thandi nga giluwas sa Diyos ang ilang kaminyoon pinaagi sa pag-ampo ug sa librong Kalipay sa Pamilya. Sa dihang nakabalita bahin niini ang amo ni Bella, siya nagsugyot nga ang tanang 2,000 ka empleyado magbaton ug kopya sa libro. Sa pagkakaron, si Thandi nakapahimutang ug 96 ka Kalipay sa Pamilya nga mga libro sa iyang mga kauban sa trabaho. Ang kompaniya mihatag ug donasyon sa tibuok-kalibotang buluhaton sa mga Saksi ni Jehova.

 ◼ MGA NASOD SA AMERIKA

Gidaghanon sa kayutaan: 56

Populasyon: 879,073,403

Gidaghanon sa mga magmamantala: 3,199,835

Gidaghanon sa mga pagtuon sa Bibliya: 3,022,276

Venezuela: Usa ka pamilya sa mga Saksi dili pa dugay nga gitaoran ug bag-ong linya sa telepono diha sa ilang balay. Apan, tungod sa teknikal nga diperensiya, sila makadawat ug mga tawag sa telepono gikan sa mga tawo nga gustong mokontak sa lokal nga estasyon sa telebisyon aron makigsulti sa usa ka babayeng mananagna. Gipahimuslan sa pamilya ang kahimtang. Pinaagi sa tabang sa librong Nangatarongan Pinasukad sa Kasulatan, sila nag-andam ug pipila ka impormasyon ug pipila ka teksto sa Bibliya nga ilang ikapaambit niining mga tawo nga nanawag. Ang inahan, nga si Graciela, hanas na kaayo niini. Usa ka adlaw niana  usa ka tumatawag miingon: “Hello. Ikaw ba ang diyosa sa mga bituon?”

“Hello. Si Graciela ako, ikaw kinsa ka man?”

“Si Carmen.”

“Carmen, nganong gusto ka mang makigsulti sa diyosa sa mga bituon? Mangayo ka ba ug tabang o tambag?”

Dayon, gisultihan ni Carmen ang atong sister bahin sa usa ka personal nga problema. Sa mahigugmaong tono sa tingog, gipadayag ni Graciela kon asa nato makuha ang labing maayong tambag, ug iyang gibasahan si Carmen ug mga teksto sa Bibliya. Unya iyang gipangutana si Carmen, “Sa imong hunahuna dili ba angay nga sa atong Maglalalang kita modangop kon kita nagkinahanglan ug kasaligang tambag karon ug sa umaabot?” Dayon si Carmen miingon nga siya nakatuon na sa Bibliya sa mga Saksi ni Jehova kaniadto, busa nagsabot sila aron siya makapadayon sa iyang pagtuon. Human niana, ang pamilya ni Graciela nakapakigsulti ngadto sa daghan pa nga nangayog tabang, nga kasagaran naghatag kanila ug maayong pamatuod, nagdasig kanila sa pagpamati sa mga Saksi kon sila mobisita, ug nagtultol kanila sa lokal nga Kingdom Hall.

Colombia: Niadtong Marso 2005, ang awto sa usa ka sister nga nagpuyo sa Cali gikawat. Kini nakit-an paglabay sa pipila ka adlaw. Siya ug ang iyang dili-magtutuong bana naghulat sa mga polis diha sa awto, apan sa dihang nalangan sila pag-abot, ang magtiayon midesisyon sa pagkuha sa awto. Apan, kay gigamit man ang sakyanan sa usa ka krimen nga nahitabo, ang magtiayon gihunong sa mga polis, gidakop, ug gipriso. Sa pagsulod sa sister sa prisohan, siya nagsugod dayon sa pagsangyaw, ug sa mubong panahon, siya nakasugod ug daghang pagtuon sa Bibliya. Ang usa sa mga estudyante gibuhian apan mihangyo sa sister nga ilang ipadayon ang pagtuon sa dihang siya buhian na unya. Gisultihan usab niini nga estudyante ang lalaki nga iyang gipuyopuyo nga siya gustong magpakasal aron mapahimut-an ang Diyos.

Bisan pag ang sister dili pa dugay nag-ampo nga makagugol unta siya ug dugang panahon sa pagsangyaw, wala gayod sa iyang  hunahuna nga kini iyang magugol diha sa prisohan! Siya may higayon na unta nga makagawas, apan kay siya nagtuo man nga gipanalipdan ni Jehova ug malipayon sa pagsangyaw didto, iyang gibalibaran kini. Human nakagugol ug 45 ka adlaw sa prisohan, siya ug ang iyang bana gibuhian. Siya miingon nga ang iyang pagtuo napalig-on. Sulod niining mga panahona, ang iyang bana giduaw ug gitabangan sa mga igsoon. Human sa 20 ka tuig nga wala kaayoy gihimo sa pag-alagad sa Diyos, ang bana nagsugod sa pagtambong sa mga tigom ug gusto nang magtuon sa Bibliya. Ang sister karon tig-adtoan sa prisohan aron sa pagdumala ug upat ka pagtuon sa Bibliya uban sa mga babayeng piniriso. Siya mapasalamaton kang Jehova kay gitubag ang iyang mga pag-ampo ug sa pagpanalangin kaniya sa daghang paagi.

Brazil: Sa miaging duha ka tuig lamang, sagad makita si Renildo, nga usa ka tawong buta, nga nagpakilimos sa mga merkado sa iyang lungsod ug sa duol nga mga siyudad. Bisan tuod siya nagpakilimos aron madugangan ang iyang pensiyon sa pagkabaldado, ang pagpakilimos maayog kita, nga tungod niini siya dunay kaugalingong awto ug balay nga dunay nindot nga mga muwebles ug makapalit ug daghang pagkaon nga dili maabot sa mga tawo nga nagpuyo nianang dapit sa mga kabos. Ang iyang pagtuon sa Bibliya uban sa mga Saksi ni Jehova anam-anam nga nakatabang kaniya sa pagbaton ug espirituwal nga panglantaw sa kinabuhi. Human nakigsulti sa iyang asawa ug tulo ka anak kon unsay mahimo sa pamilya sa pagpahiangay sa menos nga kita, si Renildo mihunong sa pagpakilimos. Wala magdugay, siya ug ang iyang pamilya miuswag sa espirituwal ug nabawtismohan sa usa ka distritong kombensiyon. Karon si Renildo nailhan, dili ingong makililimos, kondili ingong masibotong magmamantala sa maayong balita, nga sa aberids nagagugol ug 40 ka oras sa usa ka bulan sa pag-alagad sa kanataran.

Ecuador: Usa ka payunir tigbilin ug mga magasin sa pinulongang Ininsek sa tag-iya sa usa ka restawran. Kanang tawhana ginabisitahan sa usa ka higala nga dunay restawran usab. Nakita sa higala ang mga magasin ug iya kining gibasa. Siya interesado kaayo  mao nga iyang gisulatan ang sanga sa Hong Kong, nga naghangyo ug dugang nga mga magasin, usa ka Bibliya, ug librong Pakigsuod Kang Jehova. Siya mihangyo usab ug pagtuon sa Bibliya. Gikontak sa Hong Kong ang sanga sa Ecuador, ug wala magdugay ang tawo giduaw sa mga payunir nga dala ang literatura nga iyang gihangyo. Paglabay sa upat ka adlaw sila mibalik. Iya bang nabasa ang literatura? Siya miingon: “Nagsugod ako pagbasa sa Genesis ug nakaabot na ako sa basahon sa Ezequiel, apan may mga pangutana ako. Nganong si Jehova maluloton man kaayo kanato nga tawo lamang? Siya ang tag-iya sa tanang butang, busa nganong nagtinguha man siya sa pagtabang sa mga tawo? Unsa may iyang makuha niini?” Usa ka pagtuon sa Bibliya ang nasugdan, ug ang tawo nagsugod dayon sa pagtambong sa mga tigom. Siya mihunong sa pagpanigarilyo ug sa pag-adto sa mga kasino. Manira pa gani siya sa iyang restawran aron makatambong sa mga tigom. Ang tawo karon hapit nang mahimong dili-bawtismadong magmamantala ug nagtudlo ug Ininsek sa lokal nga mga igsoon nga gustong motabang sa ubang mga tawo sa nasod nga Ininsek ug sinultihan.

Honduras: Sa Guatemala sa Enero 2005, usa ka sister nga ginganlag Flor nagsangyaw sa impormal nga paagi sa usa ka 15 anyos  nga ginganlag Sebastián, nga tigpakatawa sa sirkos. Siya nagpakitag interes apan walay panahon sa pagpakigsulti. Usa ka adlaw niana siya nahulog gikan sa ibabaw sa dako nga tolda, busa gisementohan ang usa ka bahin sa iyang lawas. Siya karon daghan nag panahon sa pagpamalandong sa espirituwal nga mga butang. Duawon siya ni Flor kada adlaw aron sa pagtubag sa iyang daghang pangutana. Wala magdugay ang iyang inahan, si Doris, nga usa ka sirkador nga tiglatay sa pisi, nagpakita usab ug interes, ug siya gisugdan ni Flor sa pagtuon sa Bibliya. Si Dalila, nga tiglabyog-labyog diha sa trapes, ug si Sofía, nga usa ka mananayaw nga nakatuon uban sa mga Saksi kaniadto, miduyog sa pagtuon uban sa ilang mga anak nga babaye. Busa ang grupo miabot ug pito ka tawo. Silang tanan gidumalahan ni Flor ug pagtuon gikan sa lima ngadto sa pito ka beses sa usa ka semana sulod sa duha ka bulan.

Sa miabot ang panahon nga mobalhin na ang sirkos ngadto sa Honduras, gidasig ni Flor ang grupo sa pagpangita sa mga Saksi diha sa mga lungsod nga ilang hunongan aron makapadayon sila sa ilang pagtuon ug makatambong sa mga tigom. Sa dihang miabot sila sa lungsod sa Copán, gipadayon sa pipila ka espesyal payunir nga nag-alagad sa maong lugar ang pagtuon sa Bibliya. Sa dihang mibalhin ang grupo sa lungsod sa Gracias, lain na usab nga espesyal payunir ang nagdumala sa pagtuon. Sa miabot ang panahon nga mobalhin na usab sila ngadto sa lungsod sa Santa Rosa de Copán, nakadawat ang magtiayong misyonaryo ug tawag sa telepono nga naghangyo kanila nga tun-an sila sa sunod nga tulo ka semana.

Talagsaon kini nga pagtuon tungod kay pito ngadto sa napulo ka tawo ang magtuon ilalom sa dakong tolda sa sirkos. Duha ka beses sa usa ka semana sila magtuon ug sila mangandam ug maayo, apil sa kinamanghoran, ang nuybe-anyos nga batang babaye nga ginganlan ug Julietta, nga tiglabyog-labyog diha sa trapes. Kon motambong ang grupo sa mga tigom, sila magdali sa pagpauli ug magkadipodipo sa pag-ilis sa ilang mga costume sa untop nga panahon nga magsugod ang pasundayag. Apan sila malipayon sa ilang pagpaningkamot.

 ◼ OCEANIA

Gidaghanon sa kayutaan: 30

Populasyon: 35,237,787

Gidaghanon sa mga magmamantala: 93,961

Gidaghanon sa mga pagtuon sa Bibliya: 47,864

New Zealand: Samtang nagbasa ug brosyur nga binase sa Bibliya panahon sa iyang paghunong sa trabaho sa tingpaniudto, usa ka batan-ong sister nga ginganlan ug Cecilia gipangutana sa kauban sa trabaho kon unsay gihisgotan sa iyang gibasa. Sa nagpatin-aw si Cecilia, 15 ka tawo ang miduol ug namati, apil ang iyang amo, kinsa sa ulahi nagdapit kaniya sa pag-adto sa iyang opisina. Iyang gisultihan siya nga nakaangay kaayo siya sa iyang nadunggan. Iyang gisultihan usab ang mga empleyado nga ang komedor mahimong gamiton sa panaghisgot bahin sa Bibliya ug ang 30 minutos nga paghunong sa trabaho sa tingpaniudto ni Cecilia iyang  gihimong 60 minutos aron siya may panahon sa pagkaon ug sa pagpatin-aw sa Bibliya. Sulod sa upat ka semana, ang mitambong niining mga diskusyon miabot ug mga 9 ngadto sa 15 ka tawo. Duha ka babaye karon regular na nga nagtuon sa Bibliya, nga nagmauswagon, ug nagsangyaw na sa mga membro sa pamilya ug mga higala.

Tuvalu: Si Peteli, kansang ngalan sa Iningles nagkahulogang “Bethel,” maoy 14 anyos nga batang babaye nga bungol. Ang iyang mga paryente mga Saksi ni Jehova, busa siya nakatambong ug pipila ka tigom apan wala kaayoy nakat-onan tungod kay bungol ug dili makabasa. Sa iyang kaugalingong paningkamot, si Peteli nakakat-on sa pag-lip-read o pagkahibalo kon unsay gipamulong sa kaestorya pinaagi sa pagtan-aw sa lihok sa baba. Di pa dugay, gisugdan siya sa pagtuon sa brosyur nga Tagamtama ang Kinabuhi sa Yuta sa Walay Kataposan! sa usa ka misyonarya nga ginganlan ug Dale. Gigamit ni Dale ang mga hulagway sa pagtudlo kang Peteli bahin sa Bibliya ug ang mga pulong niini aron siya makakat-on sa pagbasa. Kini lisod kang Dale tungod kay bag-o siya nga misyonarya nga nagtuon pa sa pinulongan, ug si Peteli nagkinahanglan ug tabang kon asa ipahiluna ang iyang dila aron malitok ang mga pulong sa hustong paagi. Si Peteli interesadong mokat-on ug kugihan motuon. Human sa tulo lamang ka bulan, siya makabasa na. Siya ug ang iyang magtutudlo dungan nga mag-andam ug mga komento alang sa mga tigom. Magbansay-bansay daan si Peteli ug magarbohong mokomento sa mga tigom. Siya molingkod sa atubangan diha sa Kingdom Hall aron makita niyag klaro ang baba sa mamumulong. Si Dale misulat: “Si Jehova nahimong tinuod nga higala kang Peteli, ug molugmaw ang mga luha sa iyang mga mata kon mag-estoryahay  kami bahin sa panahon nga ‘ang igdulungog sa mga bungol mabuksan.’”​—Isaias 35:5.

Samoa: Si Elena, nga usa ka payunir nga sister, nagdumala ug pagtuon sa Bibliya sa usa ka babayeng Metodista kansang balay atbang sa balay sa pastor. Ang pagtuon gidumala diha sa walay-bungbong nga bahin sa balay nga klarong makita sa pastor. Usa ka adlaw samtang sila nagtuon, ang pastor miduaw. Siya gipangutana sa estudyante sa Bibliya kon unsay iyang tuyo. Ang pastor mitubag: “Nangita ko sa akong baktin. Usa ka bulan na nga wala nako kini makita.” Dayon siya nangutana kang Elena, “Nahibalo ka ba kon nganong nagpalayo kanako ang akong baktin?” Kay naghunahuna nga literal nga baktin ang iyang gipasabot, si Elena miingon nga tingali milayas ang baktin tungod kay kini gipul-an na sa mao ra gihapong pagkaon nga iyang gilawog. Siya misugyot nga iyang lawgan ang baktin ug laing matang sa pagkaon. Sa kahibulong ni Elena, gitudlo sa pastor ang estudyante sa Bibliya ug miingon, “Siya ang akong baktin!” Dayon siya midugang: “Imo siyang gikawat kanako. Hunonga dayon kining imong pagtuon kaniya ug ayaw nag balik.” (Ang mga pastor dako kaayog impluwensiya sa mga baryo sa Samoa.) Ang babaye mihilak. Gipakalma siya ni Elena ug miingon nga ang Bibliya nagtagna nga ang ingon niini mahitabo niadtong nagtuon sa Bibliya.

Gipasibo ni Elena ang ilang eskedyul pinaagi sa pag-usab sa adlaw, oras, ug dapit sa pagtuon.

Siya miingon: “Imbes magtuon diha sa atubangang bahin sa walay-bungbong nga balay, nga maoy estilo sa Samoa, kami mibalhin sa usa ka gamayng lawak sa likod sa balay sa babaye. Init kaayo kini nga dapit, apan labing menos makapadayon kami sa pagtuon. Among gihimo kini sulod sa duha ka bulan. Dayon usa ka adlaw human sa pangbukas nga pag-ampo, ang pastor miabot ug kami nakalitan. Abi nako ug miduaw siya aron ipahunong ang pagtuon, apan siya nausab.”

Siya miduyog sa pagtuon ug nangutana pa gani. Human sa pagtuon, siya miingon sa babaye: “Duna koy isulti nimo. Kagabii miadto ako sa lungsod, apan sa akong pagpauli, ang akong sakyanan  naaberiya duol sa usa ka baryo. Usa ka batan-ong magtiayon ug laing batan-ong lalaki mitabang sa pag-ayo sa sakyanan. Ang sakyanan wala moandar, busa mitanyag sila sa paghatod kanako human nga akong gibilin ang akong sakyanan diha sa ilang balay. Sa pagsulod nako sa sakyanan nakakita ako ug mga Bantayanang Torre ug ubang mga publikasyon. Namalandong ako nga tingali kining mga tawhana sama ug relihiyon sa babaye nga tigduawan nimo.”

Karon siya gitubag sa babaye: “Husto ka. Sila mga anak ni Elena.” Siya nangayo ug pasaylo ug dayon miingon: “Padayon sa imong ginahimo. Karon nahibalo na ako nga buotan ug mahigugmaon kaayong mga tawo ang mga Saksi ni Jehova. Pasensiya ka na sa akong gisulti nimo. Kining matanga sa programa makatabang sa mga tawo sa akong simbahan sa pag-usab sa ilang mga tinamdan.” Sukad niadto, imbes magtuon diha sa gamay, init nga lawak sa likod sa balay, ilang gihimo kini diha sa walay-bungbong nga atubangang bahin sa balay, nga klarong makita sa pastor, nga wala na manghilabot kanila sukad niadto.

Saipan: Niini nga isla, ang kamatuoran sa Gingharian sa Diyos nakatandog pag-ayo sa usa ka babaye nga ginganlan ug Helen. Siya nagtuon sa Bibliya sa tabang sa usa ka misyonarya ug buot magpakita sa iyang apresasyon sa mga butang nga iyang nakat-onan. Pagkatapos sa usa ka sesyon sa pagtuon, gitunolan ni Helen ang misyonarya ug gamayng bag nga panapton ug miingon, “Wala kaayo koy kuwarta, apan gusto nakong ihatag kini ingong kontribusyon sa buluhatong pagsangyaw.” Sa sulod sa bag mao ang usa ka maanindot nga perlas gikan sa iyang natawhan nga isla sa Pohnpei. Si Helen misugyot sa pagbaligya sa perlas aron iamot ang halin. Ang perlas maayog kalidad, ug ang tag-iya sa tindahag alahas malipayong mipalit sa perlas sa kantidad nga $100. Ang kuwarta gitunol ngadto kang Helen aron siyay magbuot kon pilay iyang iamot, apan iyang gitunol pag-usab ang kuwarta, ug miingon, “Ibutang lang kanang tanan diha sa kahon.” Unsay nagtukmod kaniya sa paghatag ug dako-dako nga kantidad? Sama sa sambingay nga giasoy ni Jesus, si Helen nakakita ug perlas nga mas dakog kantidad, ang paglaom sa Gingharian.​—Mat. 13:​45, 46.

 ◼ UROPA

Gidaghanon sa kayutaan: 46

Populasyon: 731,536,437

Gidaghanon sa mga magmamantala: 1,498,142

Gidaghanon sa mga pagtuon sa Bibliya: 717,797

Belarus: Ang magtiayong si Pavel ug Mayya, nga nag-alagad ingong mga espesyal payunir, nagtambong sa klase sa mga payunir. Usa ka gabii niana sila midesisyon sa pagpasiyo, nga wala magplanong mosangyaw. Apan, sila nagdalag pulyeto nga Good News for People of All Nations. Sa dihang nakakita sila ug duha ka lalaking langyaw, sila nakadesisyon sa pagsangyaw kanila. Ilang nahibaloan nga taga-Pakistan ang duha ka lalaki ug Urdu ug pinulongan. Kay nakahinumdom nga sila nagdalag pulyeto, ilang gitunol kini sa mga lalaki aron ilang basahon. Usa kanila nagpakitag interes ug misugot sa pagtuon sa Bibliya. Niana  mismong semanahona siya mitambong sa tigom sa kongregasyon. Kay nadasig kaayo sa pagpakig-uban sa katawhan ni Jehova, siya nakaingon, “Sa akong tulo ka tuig sa Minsk, karon pa lang ako nakahibalag ug tinuod nga mga Kristohanon.” Kining tawhana nagpadayon sa pagtuon sa Bibliya.

Britanya: Si Richard maoy usa ka ansiyano nga buta ug dunay tiggiya nga iro nga ginganlag Irvin. Ang pagpamalaybalay lisod alang kang Irvin tungod kay siya linain nga gibansay sa paghinumdom sa tanang dapit nga adtoon ni Richard. Sa dihang gisulti ni Richard kining situwasyona ngadto sa mga tawo nga nagtagana sa iro, sila miingon nga kining matanga sa ministeryo lisod kaayo alang kang Irvin. Sila misugyot nga ipakuyog ni Richard si Irvin sa lugar sa negosyo aron ang iro masuheto sa nagkalainlaing dapit nga adtoan ni Richard. Si Richard maglisod sa pagsangyaw sa teritoryo sa negosyo, apan sa tabang ni Irvin siya sa wala madugay nahimong eksperto niining matanga sa pagsangyaw.

Hungaria: Usa ka magtatan-aw sa sirkito misulat: “Sa Mayo 2004, may nakaila kami nga lalaki nga ginganlag Csaba nga nag-areglar sa tanaman. Siya miingon nga membro siya sa konsilyo sa simbahan. Human sa makadiyot nga pag-estoryahanay, kami milakaw. Paglabay sa duha ka adlaw mibalik kami nga nagdalag librong Kahibalo ug nasugdan ang pagtuon sa Bibliya. Sa natapos ang duaw, kami iyang gisultihan nga naguba ang iyang kosenilya. Miingon ako nga may kaila ako nga usa ka brader nga maayong moayo niini ug akong ihatag sa brader ang numero sa telepono ni Csaba. Sa dihang miduaw ang mga igsoon aron sa pagpukaw sa iyang interes, giuli ni Csaba ang libro ug mihunong sa pagtuon. Kasamtangan, ang brader nga akong girekomendar nga motabang sa pag-ayo sa kosenilya mitawag kaniya bahin niini. Tulo ka adlaw nga giayo sa brader ang kosenilya ni Csaba, ug sulod niining panahona gisigehan niyag sangyaw si Csaba bahin sa kamatuoran. Ang tawo mibalik sa  pagtuon sa Bibliya, ug ang iyang asawa miapil sa pagtuon. Pagka-Mayo 2005, siya maoy usa na ka dili-bawtismadong magmamantala. Sa panahon sa akong duaw sa kongregasyon, akong giubanan siya sa dihang nakigbahin siya sa ministeryo sa unang higayon. Ang iyang espirituwalidad miuswag tungod sa mahigalaon, matinabangong tinamdan sa mga igsoon ug sa kalainan nga iyang nakita tali sa panggawi sa mga Saksi ug niadtong kauban niya sa iyang simbahan.”

Belgium: Gibalik-duaw kanunay sa brader ang usa ka babaye diha sa balay nga nahimutang sa eskina sa dalan, ug ang iyang pagpakigsulti sa tagbalay kutob ra gayod sa pultahan. Usa ka adlaw sa migikan ang brader sa iyang balay, giduol siya sa usa ka lalaki ug miingon: “Ang akong mga higala miingon nga kamong mga Saksi ni Jehova dili maayo nga ikauban. Apan akong gilabanan kamo ug miingon nga dili kana tinuod. Sultihan ta mo, sa daghang higayon sa isuroy nako ang akong iro, motindog ako sa may eskina ug mamati sa inyong panagsultihay sa babaye nianang balaya. Ikaw maghisgot kanunay bahin sa pagkabanhaw ug Paraiso. Gusto kong makahibalo pag dugang bahin niini. Ang akong asawa naospital nga nagpaayo sa lawas tungod kay siya giatake ug gidunggab 17 ka beses. Ako nawad-an nag paglaom, ug naglibog kon unsay himoon.” Nasugdan ug pagtuon sa Bibliya kining maong lalaki.

Italya: Sa usa ka sayo nga kahaponon, usa ka brader nagmaneho paingon sa iyang balay gikan sa trabahoan. Sa nagkaduol na siya sa iyang balay, siya naapsan ug duha ka lalaki nga nagmotorsiklo. Ang lalaki nga nag-angkas mihulbot ug pusil ug gisenyasan ang brader sa paghunong sa iyang sakyanan, ug siya mihunong. Dayon, gibuksan sa lalaki nga nagdalag pusil ang pultahan sa sakyanan ug gimandoan ang brader sa paggawas ug sa paghatag sa tanang kuwarta diha sa iyang bulsa. Ang brader misugot. Dayon ang lalaki nga nagdalag pusil milingkod sa lingkoranan sa drayber, nga andam na nga magpadagan. Apan, sa pagkakita ug  Tinuig nga Basahon sa mga Saksi ni Jehova diha sa atubangan, siya nangutana, “Saksi ni Jehova ka ba?”

Ang brader mitubag, “O, ngano man diay?” Walay tubag-tubag, ang lalaki migawas sa sakyanan, nangayog pasaylo sa nahitabo, ug ang brader gipasulod ug balik sa iyang sakyanan. Unya, iyang gisugo ang iyang kaubang hold-aper sa pag-uli sa kuwarta nga ilang gikuha.

“Pasayloa mi ha,” miingon ang lalaki nga nagdalag pusil samtang nagsira sa pultahan alang sa brader. Ang duha wala maghatag ug katarongan kon nganong nausab ang ilang hunahuna, apan tingali dako sila ug pagtamod sa mga Saksi.

Sweden: Sa Abril 2003 usa ka magmamantala nakahibalag ug tawo nga midawat sa librong Kahibalo. Ang tawo maoy mga 90 anyos na ang edad. Sa batan-on pa, siya nakabiyahe sa tibuok nasod ug nakakuhag mga hulagway sa daghang simbahan. Tungod niini siya nahimong pinasidunggang membro sa usa ka grupo diha sa Sweko nga Simbahan. Gipangutana sa magmamantala ang tawo kon nakakita ba siya sa ngalan sa Diyos diha sa mga simbahan ug ang tawo gipakitaan ug hulagway sa ngalan sa Diyos diha sa usa sa mga simbahan sa Sweden. Kini nakapukaw sa interes sa tawo. Siya midawat sa usa ka pagtuon sa Bibliya, nga iyang gikahinangpan pag-ayo. Siya miingon: “Nagbasa na ako ug Bibliya sukad sa bata pa ako, ug abi nakog daghan ako ug nasabtan. Apan wala diay akoy nasabtan kon itandi sa akong nahibaloan karon.” Wala magdugay siya nagsugod sa pagtambong sa mga tigom sa Kingdom Hall. Sa Hunyo 2005, sa edad nga 91, iyang gihatag ang iyang unang asaynment sa Teokratikanhong Tunghaan sa Ministeryo​—ang pagbasag Bibliya. Siya karon maoy usa na ka dili-bawtismadong magmamantala ug naningkamot aron mabawtismohan. Siya namati sa mga Saksi ni Jehova sa 2003 tungod sa usa ka programa sa TV nga negatibo ug gisulti bahin kanamo. Gusto siyang mahibalo sa tinuod bahin kanamo, ug karon siya nahibalo na.

[Hulagway sa panid 43]

Si Svetlana, sa Kyrgyzstan

[Hulagway sa panid 47]

Si Lucy, sa Uganda

[Hulagway sa panid 52]

Si Graciela, sa Venezuela

[Hulagway sa panid 55]

Si Renildo uban sa iyang pamilya, sa Brazil

[Hulagway sa panid 57]

Si Dale ug Peteli, sa Tuvalu

[Hulagway sa panid 57]

Si Cecilia, sa New Zealand

[Hulagway sa panid 58]

Si Elena, sa Samoa

[Hulagway sa panid 61]

Si Pavel ug Mayya, sa Belarus

[Hulagway sa panid 61]

Si Richard ug ang iyang iro, si Irvin, sa Britanya