Ang Labing Makaiikag nga mga Bahin sa Miaging Tuig

“PAGADAYEGON ko si Jehova sa tibuok kong kinabuhi. Magaawit ako ug mga pagdayeg sa akong Diyos samtang ako buhi pa.” (Sal. 146:2) Kon buhi pa ang salmista karon, seguro malipay gayod siyang makita nga si Jehova mas gidayeg karon! Usa sa nakahatag kaniya ug dugang kadayeganan mao ang librong Unsay Tinuod nga Gitudlo sa Bibliya? nga nakatandog sa kasingkasing sa daghan nga nagapangita sa kamatuoran bahin sa Diyos.—Buhat 17:27.

Aron mas madayeg pa si Jehova, daghang sanga naghikay ug mga klase sa pagtuon ug pinulongan aron ang mga magmamantala ug payunir makasangyaw bahin sa maayong balita ngadto sa mas daghan pang tawo. Basin mapukaw ka sa pagtimbang-timbang sa pagpalambo sa imong ministeryo pinaagi sa pagtuon ug laing pinulongan.

 Ang laing pananglitan sa kadayeganan nga nahatag kang Jehova mao ang tulo ka semana nga tibuok-kalibotang kampanya sa pag-apod-apod ug linain nga handbill nga nag-anunsiyo sa “Ang Kaluwasan Haduol Na!” nga Distritong mga Kombensiyon, nga gihimo sa duolan sa 155 ka kayutaan. Minilyong magmamantala sa Gingharian sa kapin sa 99,000 ka kongregasyon ang nakigbahin sa kampanya, nga wala pa mahimo sukad. “Kini nakadasig sa ubang mga bag-ohan sa pagsugod sa pagsangyaw, ug ang uban nga dugay nang dili-aktibo nadasig sa pag-alagad pag-usab,” misulat ang Komite sa Kombensiyon. Usa ka igsoon nga dili aktibo sa 35 ka tuig nga nakadawat ug handbill diha sa iyang balay regular na nga tigtambongan! Ang mosunod maoy pipila lamang sa mga eksperyensiya nga nadawat gikan sa nagkalainlaing mga sanga.

Pransiya

Samtang nagduaw sa paryente, usa ka babayeng Katoliko ug ang iyang bana nakakitag handbill diha sa balay ug naikag sa gipatugbaw niini nga mga pangutana. Mitambong sila sa kombensiyon uban sa ilang tulo ka anak. Sa dihang miabot sila, mainiton silang giabiabi sa atendant, gihatagan sila ug mga Bibliya, ug gipalingkod tapad sa Saksi nga pamilya nga nagpuyo mga tres kilometros lang gikan sa ilang balay! Tibuok adlaw nga nag-uban ang duha ka pamilya ug naghikay ug pagtuon sa Bibliya. Paglabay sa usa ka semana human sa kombensiyon, mitambong ang interesadong pamilya sa tigom sa kongregasyon panahon sa duaw sa magtatan-aw sa sirkito.

India

Usa ka popular nga mag-aawit nga ginganlag Sunita miadto sa Canada aron magpasundayag. Ang mga Saksi nga nakahimamat kaniya didto nagdapit kaniya sa tigom sa kongregasyon nga Punjabi ug pinulongan. Siya mitambong ug naikag sa tigom tungod kay Bibliya man ang gipasiugda. Sa dihang iyang nadawat ang handbill sa kombensiyon, iyang gikanselar dihadiha ang iyang mga pasundayag niana nga hinapos sa semana aron iyang matambongan ang tulo ka adlaw. Wala magbasol si Sunita sa iyang desisyon. “Kini ang kamatuoran,” siya miingon sa natapos ang unang adlaw. Sa mibalik na siya sa India, siya miadto sa lokal nga Kingdom Hall, uban sa iyang inahan, anak nga  lalaki, pag-umangkong lalaki, ug usa ka higala. Sa giduol siya sa iyang mga pastor kanhi, iyang gisulti nga gusto siya nga mahimong Saksi ni Jehova. Gani, iyang giagda sila sa pagtambong usab sa Kingdom Hall!

Serbia

Usa ka Insek nga babaye nga nganlan nato ug Mei Li nagpuyo sa Belgrade. Sa 2006 siya nagsugod sa pagbasa sa Ang Bantayanang Torre sa Ininsek nga pinulongan. Sa dihang nadawat ni Mei Li ang handbill nga nagdapit kaniya sa pagtambong sa Ininsek ug pinulongan nga kombensiyon sa Leipzig, Alemanya, siya porsigidong motambong bisag duolan sa 1,000 kilometros pa ang Liepzig gikan sa Belgrade. Siya nakakuha ug tulo ka adlaw nga bisa, misakay ug ayroplano paingon sa Munich, ug misakay ug tren paingon sa Leipzig, usa ka biyahe nga mokantidad ug duha ka bulan nga suweldo. Ang iyang nakat-onan gikan sa programa ug sa iyang pagpakig-estorya sa ubang mga delegado nakatandog kaayo kaniya. Sa dihang mipauli si Mei Li sa Belgrade, siya ug ang iyang inahan midawat ug pagtuon sa Bibliya ug nagsugod sa pagtambong sa Ininsek ug pinulongan nga pagtuon sa libro.

Tinipong Bansa

“May mga bisita nga namatikdan nga mitambong sa tulo ka adlaw,” nagreport ang Komite sa Kombensiyon. “Usa ka bisita maoy babaye nga nakadawat ug imbitasyon sa adlaw human nga miampo sa Diyos sa pagtultol sa iyang kinabuhi. Duha ka oras nga nagmaneho siya paingon sa kombensiyon sa Sabado ug Dominggo ug midawat ug pagtuon sa Bibliya.” Ang report nagpadayon: “Giagpas sa usa ka tawo ang brader nga nagbilin ug imbitasyon sa iyang anak nga lalaki. Ang brader nahibulong apan nalipay sa dihang ang miapas kaniya malulotong mihangyo kaniya sa pagbalik ngadto sa iyang balay aron sila magkasultihanay. Ang lalaki, nga nagkapot ug Bibliya, daghag gipangutana, ug nasugdan ang usa ka pagtuon sa Bibliya.”

Gihatagan sa usa ka brader ug handbill ang usa ka tawo sa dapit nga may gitukod nga bilding. “Mahimo bang ipahibalo nako kini sa uban?” nangutana ang tawo.

“O sige!” miingon ang brader, nga wala mahibalo nga ang tawo duna diay kaugalingong programa sa radyo mabuntag sa Sabado.  Tinuod man, iyang gipahibalo sa uban ang bahin sa imbitasyon pinaagi sa pagbasa niana diha sa iyang programa! Busa, daghang tawo ang nagpakisayod bahin sa handbill.

Ang 12-anyos nga si Morgan nag-oksilyare payunir. Usa ka semana sa wala pa magsugod ang linain nga kampanya, nakahibalag siyag tawo nga daghag pangutana bahin sa Bibliya ug iyang gidapit siya sa pakigpulong publiko diha sa Kingdom Hall. Siya miabot apan milakaw dayon human sa tigom kay may adtoan pa nga paglubong sa membro sa pamilya. Sa nagsugod ang linain nga kampanya, gihatagan ni Morgan ug handbill kining tawong interesado. “Motambong gayod ako sa Sabado ug Dominggo, apan motrabaho ako sa Biyernes,” siya miingon. Dayon nangutana siya kon unsay himoon sa mga Saksi sa mga kahimtang nga sama niini. “Kasagaran mobakasyon sila sa trabaho, apan usahay mapugos sila sa paghawa sa trabaho,” mitubag si Morgan.

Sa dihang miduaw pag-usab si Morgan, ang tawo miingon nga nananghid siya sa iyang amo nga mobakasyon siya sa trabaho sa Biyernes, nga nagsulti kaniya nga kon dili siya hatagan  ug bakasyon, mohawa siya sa iyang trabaho. Giingnan siya sa iyang amo nga maayo siya nga trabahante ug anugon nga taktakon siya busa gitugotan siya sa pagbakasyon sa Biyernes ug hasta pa Huwebes aron siya makapangandam.

Ang tawo mitambong sa tanang tulo ka adlaw nga kombensiyon ug may miuban kaniya. Miuban kaniya ang 8 ka sakop sa iyang pamilya ug 12 ka higala ug ilang mga pamilya—35 ka tawo tanan! Sa sinugdan, sa dihang iyang gisultihan si Morgan nga mga 30 ang mouban kaniya, si Morgan mitubag, “Dili ako makareserba ug daghang lingkoranan.”

“Nakasabot ako,” siya miingon. “Manglingkod lang kami bisag asa.” Siyempre, silang tanan nakakitag komportableng kalingkoran.

“ANG LIBRO . . . NAGTUDLO SA KON UNSA GAYOY GITUDLO NI JESUS”

Ang mga report nagpakita nga ang giya sa pagtuon sa Bibliya nga Unsay Tinuod nga Gitudlo sa Bibliya? mapuslanon kaayo sa buluhatong pagsangyaw. “Kini makapabuka sa mga mata ug makapadasig sa kasingkasing ug hunahuna,” miingon ang usa ka estudyante sa Bibliya. Usa ka magtatan-aw sa distrito miingon: “Ang libro makaikag kaayo kay kini nagtudlo sa kon unsa gayoy gitudlo ni Jesus. Kini laktod, prangka ug tin-aw, apan makapadasig kaayo.” Tagda ang mosunod nga mga eksperyensiya.

Australia

Samtang nag-ayo ang usa ka brader sa balay sa usa ka babaye nga nagsakit, gisultihan sa brader ang babaye bahin sa paglaom sa Gingharian. Paglabay sa pipila ka adlaw, sa dihang giduaw siya sa brader uban sa usa ka payunir nga sister, ang babaye nangutana bahin sa kataposang mga adlaw. Gibuksan sa mga Saksi ang librong Gitudlo sa Bibliya sa kapitulo 9, nga nag-ulohang “Nagkinabuhi na ba Kita sa ‘Kataposang mga Adlaw’?” ug ilang gihisgotan kini. Ang babaye nahibulong sa mga butang nga nahisulat sa Bibliya. “Ang akong relihiyon wala gayod magtudlo bahin niini,” siya miingon.

Ang brader misulat: “Sa mibalik kami, among gitun-an ang kapitulo 1, ‘Unsa ang Kamatuoran Bahin sa Diyos?’ ug ang apendise, nga nagsaysay kon nganong ang ngalan sa Diyos gitangtang  gikan sa ubang mga Bibliya. Sa nabasa sa babaye diha sa pasiunang pamulong sa iyang Bibliya nga gipulihan sa mga maghuhubad ug ‘Ginoo’ ang ‘Jehova,’ siya nasuko, kay gisultihan siya nga husto nga pagkahubad ang iyang Bibliya. Ang babaye miingon nga buot niyang motambong ug Kristohanong mga tigom.

Belgium

Usa ka sister nga ginganlag Ingrid nakahibalag ug Aprikana nga dili gustog mga Saksi ni Jehova. Dihang malulotong gipakita ni Ingrid kaniya ang librong Gitudlo sa Bibliya, nabag-o ang iyang tinamdan, kay maikagon man siya sa pagsabot sa Pulong sa Diyos. Midawat pa gani siya sa gitanyag nga pagtuon, apan mihangyo nga kinahanglang basahon ang tanang teksto. Kining babayhana karon motambong na sa mga tigom, kanunay mokomento, ug nagtinguha nga mahimong magmamantala sa Gingharian.

Brazil

Si Paulo gitudloan sa mga Saksi bahin sa Bibliya sa bag-o pa siyang nagtin-edyer. Makasubo, sa nag-edad siya ug 16, ang iyang pamilya nabungkag. Aron makasuportar sa iyang inahan, si Paulo miduyog sa banda nga nagtugtog ug samba apan siya nahimong imoral ug palahubog. Bisan pa niana, may pipila ka kamatuoran nga natisok diha sa iyang kasingkasing. Pananglitan, kay nahibalo nga nalangkit ang voodoo sa demonismo, natugaw siya dihang nagtugtog siya diha sa usa ka sentro sa voodoo. Iyang naamgohan usab nga ang iyang kinabuhi wala gayoy kahulogan. Sa gipakita sa usa ka batan-ong brader kang Paulo ang librong Gitudlo sa Bibliya sa 2005, dihadiha nga napukaw pag-usab ang iyang interes, ug siya nagsugod sa pagtuon. Wala magdugay, siya miundang sa banda, ug karon motambong na sa Kristohanong mga tigom.

Britanya

Samtang nagsangyaw sa balay ug balay, nakaila ni Marilyn si Melanie, nga usa ka batan-ong inahan nga interesado sa Bibliya. Gibinlan siya ni Marilyn ug tract, ug misaad nga mobalik. Human sa pagbalik-balik, naabtan ra gayod ni Marilyn si Melanie. “Gigamit ko dayon ang librong Gitudlo sa Bibliya,”  miingon si Marilyn, “ug kini miresulta ug mauswagong pagtuon sa Bibliya. Sa wala pa moabot ang Pasko, nakurat ako sa dihang gisultihan ako ni Melanie nga kini na ang kataposang higayon nga magdekorar siya ug Christmas tree. Daghan na siyag nabasa sa libro ug nahibaloan niya ang kamatuoran bahin sa Pasko.”

Colombia

Gitugotan si Consuelo sa iyang superbisor nga babaye sa pagbakasyon sa trabaho aron sa pagtambong ug distritong kombensiyon. Sa mibalik si Consuelo sa trabaho, ang superbisor nangomosta sa kombensiyon, ug nasugdan ang bibo nga pagsultihanay. Sa gipakitaan siya ni Consuelo sa librong Gitudlo sa Bibliya, siya mihangyo sa paghulam niini. Paglabay sa duha ka adlaw, iya kining giuli ug miingon nga makaikag kaayo kining basahon. “Dili lamang kini para basahon kondili para tun-an usab,” miingon si Consuelo, ug dayon iyang gipakita kon sa unsang paagi kini pagatun-an. “Buot mong ipasabot nga makatuon ako niining libroha?” nangutana ang superbisor. Sa laktod, nahikay ang pagtuon, ug wala magdugay ang babaye nagsugod sa pagsangyaw ngadto sa iyang pamilya ug mga higala. Nagsugod usab siya pagtambong sa Kristohanong mga tigom, usahay mouban kaniya ang iyang anak nga lalaki ug ang iyang apohang babaye.

Guyana

Si Joseph, nga usa ka regular payunir, nakasugod ug pagtuon sa  librong Gitudlo sa Bibliya uban sa usa ka tawo nga nakahibalag ug mga Saksi mga tuig nang milabay sa Georgetown, ang kaulohan. Sa miabot si Joseph alang sa unang pagtuon, iyang nakit-an nga naghulat ang tawo ug ang iyang duha ka anak nga lalaki ug ilang mga asawa. Sila usab midawat ug mga kopya sa libro. Pagkasunod semana, ang amahan miingon nga gihulaman sa usa ka maestro sa ilang lugar ang iyang librong Gitudlo sa Bibliya ug gibasa kana. “Kamatuoran ang unod niini,” matod pa sa maestro. Ang maestro miapil usab sa pagtuon. Kasamtangan, usa ka silingan nakadungog bahin sa pagtuon ug mihangyo kon siya makaapil ba. Nianang mga panahona, gidapit silang tanan ni Joseph sa pagtambong sa Memoryal. Bisan tuod wala makatambong ang tawo nga unang gidumalahan ni Joseph sa pagtuon tungod kay nagsakit, ang pamilya sa maong tawo mitambong sa Memoryal, ug hasta usab ang maestro ug ang iyang pamilya. Ang tanan nagpadayon sa pag-uswag.

Polandia

Samtang nagsangyaw sa kadalanan, nahibalag ni Lucjan ang 50-anyos nga si Jan, nga iyang higala sa tunghaan kinsa dugay nang wala niya makita. Sa nag-estoryahay sila, nakahisgot sila ug pipila ka mga punto sa librong Gitudlo sa Bibliya, ug si Jan miingon nga namatay na ang iyang asawa ug nga siya nagsugod sa pagpanabako ug nahimong palainom. “Sa dihang  giduaw nako siya uban sa akong higala paglabay sa pipila ka adlaw,” si Lucjan miingon, “si Jan naghulat namo. Sumala sa iyang hangyo, gisugdan dayon namo ang pagtuon sa librong Gitudlo sa Bibliya.” Ang iyang kasingkasing natandog sa kamatuoran, ug siya naningkamot sa pagbuntog sa iyang mga bisyo ug sa pagpugong sa iyang sinultihan, nga medyo bastos.

Espanya

Nganong ang usa ka hematologist motambag ug pasyente nga may depresyon sa pagtuon sa Bibliya? Duha ka membro sa Hospital Liaison Committee miduaw niining maong doktor ug nakapahimutang kaniya ug librong Gitudlo sa Bibliya. Siya ug ang iyang pasyente may depresyon tungod sa grabeng sakit. Kay nakadayeg sa librong Gitudlo sa Bibliya, iyang gipakita kini ngadto sa iyang pasyente, nga nagpasalig kaniya nga pinaagi sa pagtuon uban sa mga Saksi, silang duha makalantaw nga masaligon sa umaabot. Paglabay sa pipila ka adlaw, nahimamat sa payunir nga sister nga nagsangyaw sa kadalanan ang babaye, ug siya midawat sa pagtuon. Ang hematologist usab nagsugod sa pagtuon ug nagtambongan na sa Kristohanong mga tigom.

Zambia

Si Goliath, nga usa ka lider sa baryo, duha ug asawa kaniadto ug may napulo ka anak. Siya ug ang iyang pamilya miuswag pag-ayo sa espirituwal. Si Goliath nagsugod sa pagbag-o sa iyang kinabuhi human makabasa sa librong Gitudlo sa Bibliya. Sa Enero 2006 siya ug ang iyang pamilya nagsugod pagtambong sa Kristohanong mga tigom, ug pagka-Pebrero iyang gibulagan ang iyang ikaduhang asawa ug gipakaslan ang iyang unang asawa. (Mat. 19:4-6; 1 Tim. 3:2) Sa Marso siya miretiro ingong lider sa baryo, ug sa Abril siya ug ang iyang asawa nga si Esther nahimong di-bawtismadong mga magmamantala. Ang ilang desisyon sa pag-alagad kang Jehova dayag nga nakapasuko sa mga demonyo, nga nagsugod sa paghasi kang Esther. Apan, iyang gisuklan sila, sumala sa gisugo sa Santiago 4:7. Ang resulta? “Ako ug ang akong bana nakalingkawas na sa demonismo,” siya miingon.

NANINGKAMOT NGA MAKASANGYAW DIHA SA LAING PINULONGAN

Ubay-ubayng mga nasod ang gidagsaan ug mga imigrante nga nagsulti ug langyawng pinulongan, ug daghan niining mga  tawhana naggikan sa kayutaan nga tago-tago ang pagsangyaw. Tungod niini, “nabuksan ang usa ka dakong pultahan nga nagatultol ngadto sa kalihokan,” ug daghang igsoon misulod nianang maong pultahan pinaagi sa pagtuon ug laing pinulongan. (1 Cor. 16:9) Dugang pa, ang ubang mga nasod dunay dako-dakong lumad nga populasyon kansang pinulongan pipila lang ang makamaong mosulti. Ang mga magmamantala sa Gingharian nagtuon usab niining mga pinulongana ug sila dagayang gigantihan.

Aron molambo ang buluhaton niining maong mga teritoryo, ubay-ubayng mga sanga naghikay ug mga klase sa pagtuon ug pinulongan. Ang leksiyon, nga giandam aron dali nga makat-onan, sagad nagpasiugda ug tinuod-kinabuhing mga kahimtang sa ministeryo. “Ang klase mopukaw kanimo sa pagtuon pag maayo sa maong pinulongan,” matod pa ni Elisa, kinsa nagtuon ug pinulongang Albanian.

Belgium

Ang sanga nagreport nga kapin sa 300 ka magmamantala ang nakatambong ug 17 ka klase diha sa napulo ka pinulongan, ang aberids nga edad sa mga estudyante maoy 9 ngadto sa 71 anyos. “Nakakat-on ako sa pinulongang Turko ug nakakat-on ako sa paghigugma sa mga tawo,” miingon si Enora. Si Annelies nagtuon ug Ininsek, ug siya giinterbiyo sa usa ka reporter sa telebisyon sa nasod. Ang reporter buot mosibya ug sugilanon bahin sa usa ka tawo nga naghimog bag-ong butang sa kinabuhi. Siyempre, gisaysay ni Annelies kon nganong nagtuon siya ug Ininsek. Paglabay sa usa ka tuig sa dihang mibalik ang reporter, giasoy ni Annelies ang maayong mga resulta sa iyang ministeryo. Ang reporter daw nakadayeg, kay ang programa gisibya sa telebisyon sa nasod sa oras nga daghag tumatan-aw, ug gipakita ang interbiyo uban kang Annelies ug ang seksiyon sa videotape diin siya nagsangyaw sa usa ka Insek diha sa hunonganan sa bus.

Netherlands

“Gawas nga nadasig ang mga igsoon sa pag-alagad sa langyaw ug pinulongan nga teritoryo, ang mga klase sa pagtuon sa pinulongan nakatabang sa mga brader sa pagpanguna diha sa mga kongregasyon,” nagsulat ang sanga. Sa Netherlands, dunay dinaliang panginahanglan diha sa medyo bag-ong teritoryo nga Romaniano ug pinulongan. Ang sanga naghikay  panagsa ug mga tigom, apan usa lamang ka brader ang makapanguna, ug may problema siya sa panglawas. Karon, tungod sa klase sa pagtuon ug pinulongan, dugang kuwalipikadong mga brader makapanguna na sa kongregasyon. Usa ka brader maoy magdumala sa senemanang pagtuon sa libro, lain ang magdumala sa Pagtuon sa Bantayanang Torre, ug ang ikatulo mag-alagad ingong maghuhubad sa mga pakigpulong nga ihatag sa pinulongang Olandes.

Espanya

Sukad sa 2003 ang sanga nakahimog 48 ka klase diha sa napulo ka pinulongan, nga tungod niini miuswag pag-ayo ang gidaghanon sa mga pagtuon sa Bibliya ug halos 50,000. Si Juan ug si Mari Paz, usa ka magtiayon nga nag-alagad ingong mga espesyal payunir, gipasulod sa balay sa Romaniano nga pamilya. Ngadto-ngadto 16 ka tawo miduol sa pagpamati, lakip sa 19 anyos nga si Mario, kinsa namati pag-ayo. Bisag dili siya makamaong mosultig Kinatsila ug ang mga payunir dili makamaong mosultig Romaniano, iyang gidawat ang brosyur nga Gikinahanglan sa iyang pinulongan. Pagkasunod semana, si Mario mihangyo ug pagtuon sa Bibliya ug mitambong ug espesyal nga asembliya, bisag gamay ra kaayo ang iyang nasabtan. Sa pipila lang ka semana, siya nagtambongan na sa tanang tigom sa kongregasyon ug nagsugod sa paghatag ug simpleng mga komento sa Kinatsila. Iyang gihusay ang iyang panagway ug nagsugod sa pagpaambit sa iyang bag-ong nakaplagang paglaom ngadto sa uban. Siya karon nagdumala ug pagtuon sa Bibliya uban sa Romaniano nga magtiayon nga nagmauswagon sa espirituwal.

Kasamtangan, si Juan ug Mari nagsugod sa pagtuon ug Romaniano nga pinulongan, ug wala magdugay sila nagdumala na ug 30 ka pagtuon sa Bibliya nianang pinulongana! Si Juan usab nagdumala ug pagtuon sa libro sa kongregasyon sa Romaniano nga pinulongan. Human sa ilang pagtuon, motambong ang napulo ka magmamantala ug klase sa pagtuon ug Romaniano nga pinulongan nga ang nagtudlo walay lain kondili si Mario, nga orihinal nga estudyante sa Bibliya.

Tinipong Bansa

Kapin sa 50 ka milyong tawo ang nagsultig laing pinulongan gawas sa Iningles. Taliwala sa mga Saksi ni Jehova,  duolan sa 254,000 ka magmamantala ang nag-alagad sa 3,052 ka kongregasyon ug 53 ka grupo nga Kinatsila ug pinulongan. Laing 26,000 ka magmamantala ang nag-alagad sa 690 ka langyaw ug pinulongan nga mga kongregasyon ug mga grupo gawas sa Kinatsila. Aron madali ang buluhaton niining dakong teritoryo nga lainlain ug pinulongan, ang sanga nagdumalag kapin sa 450 ka klase diha sa 29 ka pinulongan. “Sa miaging duha ka tuig, upat ka bag-ong mga kongregasyon ang natukod sa among sirkito,” matod pa sa usa ka magtatan-aw sa sirkito. “Tulo niini natukod tungod sa mga klase sa pagtuon ug Pranses nga pinulongan.”

“Damgo kini nga natuman alang kanamo,” miingon ang usa ka brader kinsa nakakat-on ug Kinatsila. “Ako ug ang akong asawa dugay nang nangandoy nga mahimong mga misyonaryo, apan kami dunay duha ka anak nga gibuhi. Karon dagko na ang among mga anak, ug ako retirado na sa sekular nga trabaho. Busa, sa miaging tulo ka bulan, mibalhin kami sa kongregasyon nga Kinatsila ug pinulongan, ug gihatagan na kami ug mga asaynment sa mga pakigpulong sa Teokratikanhong Tunghaan sa Ministeryo. Daghan usab kami ug mga pagbalik-duaw ug posibleng makabaton ug lima ka pagtuon sa Bibliya. Sa edad nga 67 ug 64, among naamgohan nga dili babag ang pangedaron sa pagkakat-on ug langyawng pinulongan.”

Kon wala kaayoy maani nga bag-ong mga tinun-an diha sa imong teritoryo ug kon itugot sa imong kahimtang, nganong dili iampo ang pagtuon ug laing pinulongan aron makabalhin diha sa langyaw o lahi ug pinulongan nga teritoryo? Kana nga pagbalhin tingalig magmabungahon, ug basig makapaikag pa kini sa imong ministeryo.

Alemanya

Ang mga klase sa pagtuon ug pinulongan nagsugod kapin sa 30 ka tuig nang milabay niining nasora, ug kapin na sa 1,000 ka estudyante ang nakakat-on ug siyam ka pinulongan, gikan sa Albanian ngadto sa  Vietnamese. “Mas maayo pa kini kay sa kurso nga akong gikuha sa unibersidad,” miingon ang usa ka sister. Kay makat-onan man sa mga estudyante kon unsay panghunahuna sa mga tawo gikan sa ubang mga nasod, sila mas maayong mopalihok sa mga kasingkasing dihang magsangyaw.

Si Paula, nga 82 anyos, nagsugod sa pagtuon ug pinulongang Vietnamese ug mobiyahe ug duolan sa 100 kilometros aron motambong ug mga tigom. “Dili ako abilidaran kon bahin sa pinulongan,” siya miingon, “apan mapasalamaton ako kang Jehova nga ako malipayon kaayo.” Nagdumala si Paula ug pagtuon sa usa ka pamilyang Vietnamese. Ang bana mao ang unang nagpakitag interes sa kamatuoran, ug dayon ang iyang asawa. Silang duha bawtismado na.

Sukad sila nabawtismohan, natuman ang pangandoy sa magtiayon ug sa ilang anak nga babaye nga makaalagad kang Jehova diha sa ilang kaugalingong nasod. Sila nagtukod ug balay nga may bastanteng lugar alang sa mga tigom sa kongregasyon, ug ang bana nag-alagad ingong ansiyano ug oksilyare payunir. Ang iyang asawa regular payunir. Nalipay kaayo si Paula sa dihang nakadawat siya ug sulat gikan niini nga pamilya nga nag-ingon nga ang amahan maoy nagbawtismo mismo sa iyang anak nga babaye. Diha sa sulat ngadto kang Paula, ang dalagita misulat: “Minahal kong ‘Lola.’ Gimingaw ko nimo. Wala gayod ako malimot nimo. Ikaw magpabilin nga akong Lola Paula. Gimahal ti ka.” Makapalipay gayod kini alang sa atong minahal nga sister, kinsa nagtuon ug lisod nga pinulongan sa ulahing bahin sa iyang kinabuhi!

Canada

Sukad sa 2002, 554 ka estudyante na ang nakatungha sa 31 ka klase sa pagtuon ug pinulongan diha sa napulo ka siyudad. Si Paul, nga usa ka ansiyano ug bakol, nagtuon ug Mandarin. Si Linda, nga iyang partaym nga nars, Insek. Kay gidaot man sa iyang simbahan ang mga Saksi, si Linda dili gustong mamati sa mensahe sa Gingharian. Usa ka adlaw niana, gihangyo siya ni Paul sa paghatod kaniya ngadto sa Kingdom Hall aron makapamati siya ug pakigpulong publiko sa Mandarin. Si Linda misugot apan wala magtingog-tingog ug wala magpakitag  interes. Wala magdugay human niadto, iyang gihatod si Paul sa pagtuon sa libro sa kongregasyon. Niining higayona si Linda, nga nag-inusara nga ginikanan, namati pag-ayo tungod kay ang pagtuon naghisgot bahin sa pamilyahanong kinabuhi. Human niana, gitanyagan sa payunir nga sister si Linda ug pagtuon sa Bibliya, ug misugot siya. Dali siya miuswag sa espirituwal ug karon usa na siya sa atong mga sister.

Ang Canada daghag lumad nga mga tawo nga nagsultig ilang kaugalingong pinulongan. Pipila ka tuig sa miagi, ang payunir nga sister nga ginganlag Carma nagsangyaw sa usa ka lalaki nga Blackfoot nga Indian. “Sa misulay ako sa pagsangyaw kaniya sa Iningles, siya wala maminaw,” miingon si Carma, nga nagpuyo sa reserbadong puy-anan alang sa mga Blackfoot uban sa iyang mga ginikanan. “Iya akong giingnan nga sakop ako sa relihiyon sa mga puti ug ang Bibliya maoy libro sa mga puti. Ako namalandong, ‘Kon nahibalo pa lang unta ako sa kultura ug pinulongan sa mga Blackfoot, basig mamati siya nako.’” Si Carma midesisyon sa pagtuon sa pinulongan ug sa ulahi nakatabang ug 23 ka magmamantala aron makatuon ug pinulongang Blackfoot nga senemanang ginahimo.

Gisangyawan sa usa sa mga estudyante ang Blackfoot nga magtiayon nga miduaw sa ilang nagsakit nga anak nga lalaki diha sa ospital. Kay nalipay nga ang sister interesado sa ilang pinulongan, ilang  gihatag ang ilang adres ngadto kaniya. Nahibaloan ni Carma nga ang bana mao ra diay gihapong tawhana nga iyang nahibalag sa milabayng tuig! Busa, iyang giubanan ang sister sa pagbalik-duaw. “Sila wala lamang namati kondili miuyon usab sa gipamulong sa Bibliya,” miingon si Carma. “Gitanyagan sila sa sister ug giya sa pagtuon sa Bibliya. Nagluha-luha nga gihalog sa babaye ang duha ka publikasyon ug miyango ang iyang bana. Karon siya nagtuon na, ug ang iyang bana mamati sa ilang pagtuon.”

Naghisgot sa kalamposan niini nga klase sa pagtuon ug pinulongan, ang sanga nagreport nga 34 ka Blackfoot ang mitambong sa Memoryal niadtong 2006 sa ilang kaugalingong pinulongan!

Italya

May gidumalang mga klase sa pagtuon ug 18 ka pinulongan ug duolan sa 7,200 ka magmamantala ang nakatambong. Ang usa niining mga estudyanteha nakahimamat kang Samson, nga gikan sa usa ka nasod diin ang buluhaton sa Gingharian gidili. Sa nag-edad siya ug 24, si Samson mibiyahe nianang iyang gitawag nga biyahe sa paglaom, mitabok una siya sa desyerto ug dayon milawig paingon sa Italya. Didto nakahimamat siya ug usa ka brader nga nagtuon sa iyang pinulongan. Si Samson maikagong namati ug mitambong pa gani ug Kristohanong tigom. Human nga walay kontak sa usag usa sulod sa napulo ka bulan, sila nagkita pag-usab, ug gidumalahan sa brader ug pagtuon sa  Bibliya si Samson. Magtuon sila diha sa fast-food nga mga restawran, mga estasyon sa subwey, ug mga parkinganan. Human makatambong sa Memoryal, si Samson nagsugod sa pagbag-o sa iyang kinabuhi, ug gitapos pa gani niya ang iyang relasyon sa babaye nga iyang gipuyopuyo ug mga usa ka tuig. Siya igsoon na nato karon.

Nicaragua

Sa 2006, ang mga igsoon nakasangyaw sa lumad nga mga tawong Mayangna sa unang higayon. Ang kadaghanan sa mga Mayangna sakop sa Moraviano nga relihiyon, nga usa ka Protestanteng grupo, ug ang mayor-mayor sa matag lungsod sagad mao ang pastor. Gilapas sa usa niini nga mga pastor ang tradisyon ug gitugotan si Hamilton ug Abner—mga espesyal payunir—sa pagpuyo sa lungsod. Nakakita pa gani siya ug ilang kasak-an ug gihatagan sila ug kompleto nga Bibliya sa pinulongang Mayangna. Nakat-onan sa mga brader ang pinulongan ug wala magdugay nakasugod sila ug mga pagtuon sa Bibliya. Gani, ang mga payunir nahimong mga maghuhubad sa dihang 13 ka tawo ang mitambong sa tigom panahon sa unang duaw sa magtatan-aw sa sirkito, ug 90 ang mitambong sa Memoryal. Sa ulahi nga higayon, gihubad sa mga brader ang duha ka alawiton sa pinulongang Mayangna, ug madasigong nanganta ang tanan.

Tungod sa talagsaong interes nga gipakita, ang sanga miuyon nga magpabilin ang mga payunir sa ilang asaynment. Apan mosugot kaha ang mga awtoridad niining dapita? Sa miting sa lungsod, giakusar sa uban ang mga Saksi ni Jehova nga antikristo. Apan, dihay tawo nga nakatuon uban sa mga Saksi, ug membro siya sa konseho sa lungsod. “Sukad nga kining duha ka batan-ong lalaki miabot sa atong lungsod,”  matod pa niya, “wala akoy nakita nga may nagluto alang kanila ni may naglaba alang kanila. Sila maoy nag-atiman sa ilang kaugalingon. Makamao na gani silang mosulti sa atong pinulongan! Dugang pa, ila kitang gitudloan ug mga butang gikan sa Bibliya nga wala gayod nato mahibaloi kaniadto. Kon kining mga tawhana dili pa gikan sa Diyos, seguradong nangundang na unta sila karon.” Ang mga brader gitugotan sa pagpabilin.

PAGHUBAD ALANG SA MGA BUNGOL

Tinipong Bansa

Sa 2006, giluwat ang usa ka set sa mga DVD nga The Good News According to Matthew sa American Sign Language. Sa unang higayon, mabasa na sa bungol nga mga magmamantala ang tibuok kapitulo sa Bag-ong Kalibotang Hubad diha sa ilang kaugalingong pinulongan. “Kini ang labing maayong personal nga sulat nga akong nabasa sukad gikan ni Jehova,” miingon ang usa ka bungol nga ansiyano. May miingon, “Karon nasabtan na nako nga ang matag teksto kaharmonya sa konteksto niini.” Usa ka sister nga gihimong tumong ang pagbasa ug usa ka kapitulo sa usa ka adlaw misulat: “Wala ako makamatikod nga hapit  akong malangan sa akong lakaw tungod kay upat o lima ka kapitulo na diay ang akong nabasa ug wala ko makadiparal sa oras!”

Brazil

Kusog kaayo ang pagtubo sa buluhaton sa teritoryo sa senyas nga pinulongan. Sa pagkakaron duna nay 232 ka senyas-ug-pinulongan nga kongregasyon, ug kini molangkob ug napulo ka sirkito ug usa ka distrito. Kapin sa 1,000 ka ansiyano ug ministeryal nga mga alagad maingon man 146 ka espesyal payunir, nga 8 kanila mga bungol, nag-alagad sa senyas-ug-pinulongan nga mga kongregasyon ug teritoryo. Bahin sa mga ansiyano ug ministeryal nga mga alagad, kapin sa 100 kanila miingon nga sila miuswag sa espirituwal tungod sa maayong mga publikasyon nga ginatagana sa organisasyon ni Jehova alang sa mga bungol. Ang mga giya sa pagtuon naglakip sa Kahibalo nga Motultol sa Kinabuhing Walay Kataposan, Unsa ang Tinuod nga Gitudlo sa Bibliya?, Padayon sa Pagbantay!, Unsay Gikinahanglan sa Diyos Kanato?, ug Ang Bantayanang Torre. Sugod sa 2006, ang Teokratikanhong Tunghaan sa Ministeryo gipahiangay alang sa senyas nga pinulongan, ginamit ang mga publikasyon nga mabatonan nianang pinulongana.

“Kay nakasimba sa nagkalainlaing mga simbahan,” miingon ang usa ka 30 anyos nga maestra, “ako nahibalo na karon nga ang mga Saksi ni Jehova lamang ang may katakos sa pagtudlo sa Bibliya ngadto sa mga bungol.” Ang gitudlo sa iyang simbahan, matod pa niya, nagkasumpaki ug dili epektibo. Bisan pag gipugngan sa iyang mga higala, siya determinado sa pagpadayon sa pagtambong sa Kristohanong mga tigom. Hinaot nga si Jehova magpadayon sa pagkabig niining mga tim-os ug kasingkasing ngadto sa iyang Anak!—Juan 6:44; Pin. 14:6.

MGA BUTANG MAY KALABOTAN SA BALAOD

Eritrea

Kay wala man mobotar ang atong mga igsoon sa eleksiyon sa nasod, ginulo sa 1994 nga balaod sa presidente ang pagkalungsoranon sa mga Saksi ni Jehova. Tungod niini, ang atong mga igsoon nagkapangka-pangka, ug ginatos ang nanghawa sa nasod, ug nangadto sa laing dapit. Ang uban nagpabilin, lakip sa uban nga may mga anak nga nagtungha. Sa ika-siyam nga  ang-ang, ang tanang estudyante—mga batang lalaki ug babaye—girehistro aron bansayon sa pagsundalo. Busa, daghang batan-on midesidir sa pag-eskuyla kutob lang sa ikawalong ang-ang.

Peligroso ang pagtambong sa mga tigom sa kongregasyon ug pagpakigbahin sa buluhatong pagsangyaw; tibuok nga mga kongregasyon nadakpan! Bisan pa niana, ang atong maisogong mga igsoon nagpadayon sa ‘pagsugot sa Diyos ingong magmamando inay mga tawo.’ (Buhat 5:29) Sa pagkakaron, 31 ka igsoon ang napriso, lakip sa 73 anyos nga brader nga lungsoranon sa Netherlands. Ang uban napriso tungod sa pagdumili sa pagserbisyo sa militar. Tulo ka brader—si Paulos Eyassu, Isaac Mogos, ug Negede Teklemariam—napriso sukad pa sa 1994.

Pransiya

Sa Pebrero 25, 2005, usa ka petisyon ang gipasaka ngadto sa European Court of Human Rights (ECHR) bahin sa dili-makataronganong pagpabayad ug buhis sa Asosasyon sa mga Saksi ni Jehova. Kapin sa 874,000 ka tawo mipirma ug tibuok-nasod nga petisyon batok niini nga inhustisya, ug ang dokumento gisumiter ngadto sa Korte. Bisan pa niana, sa Enero 2006 gimandoan sa mga opisyal sa pamuhis ang mga igsoon sa pagbayad sa restante sa bayranang buhis.

Nakigkomunikar dayon ang mga Saksi ni Jehova sa ECHR sa pagpahibalo kanila bahin niini. Ang Korte mihimog pasiuna nga pagsusi sa petisyon. Sa Mayo 4, 2006, gimandoan sa Korte ang gobyerno sa Pransiya sa pagpatin-aw sa ilang bahin. Ang tumong maoy sa pagtino kon ang relihiyosong kagawasan sa mga Saksi ni Jehova gilapas ba ug kon may pagpihig bang nalangkit.

Alemanya

Sa Pebrero 10, 2006, ang Pederal nga Administratibong Hukmanan sa Leipzig midesisyon nga kinahanglang ilhon sa Estado sa Berlin ang Relihiyosong Asosasyon sa mga Saksi ni Jehova sa Alemanya ingong usa ka publikong korporasyon. Kining 15 ka tuig nga kaso natapos. Ang Relihiyosong Asosasyon karon may katungod na sa dili pagbayad ug buhis ug ubang mga benepisyo nga gitagamtam sa dagkong mga relihiyon. Sa Hulyo 5, 2006, ang Estado sa Berlin nagpahibalo nga opisyal nang giila ang asosasyon sa mga Saksi ni Jehova, nga  nagpresentar sa dokumento niini ngadto sa duha ka membro sa Komite sa Sanga.

Gresya

Sulod sa daghang tuig, ang mga permit sa pagtukod ug paggamit sa mga Kingdom Hall gilangan-langan o gihikaw kay kinahanglang aprobahan kini sa usa ka obispo sa Grego Ortodokso nga relihiyon. Sa Mayo 30, 2006, ang parliamento nagbaod nga ang Ministri sa Nasodnong Edukasyon ug mga Relihiyon lamang ang modumala sa mga permit sa mga relihiyon nga dili Ortodokso.

Sa Hulyo 15, 2005, miatras ang tagdumala sa estadyum sa Loutraki, Corinth, sa ilang desisyon nga ipaabang sa mga igsoon ang pasilidad alang sa distritong kombensiyon. Gikuwestiyon sa tagdumala kon giila ba ingong relihiyon ang mga Saksi ni Jehova. Ang ombudsman nangilabot, ug sa Pebrero 2006, ang mga opisyal sa estadyum nanaad nga sa sunod higayon nga moabang sila, ila kining konsiderahon basta giila ingong relihiyon ang mga Saksi ni Jehova.

Nepal

Ang mga Saksi ni Jehova narehistro na gayod ingong usa ka relihiyosong sosyedad sa Oktubre 2005. Ang usa sa mga katuyoan nga giingon diha sa karta sa organisasyon mao ang “pagpauswag sa espirituwal nga edukasyon.” Kini makatabang sa pagpauswag sa maayong balita niining nasod nga naglabi ang mga Hindu.

Romania

Bisag narehistro na niadtong 1990 ang mga Saksi ni Jehova ingong relihiyon, sila gitangtang sa 1997 gikan sa listahan sa mga relihiyon nga giila sa gobyerno. Busa, ang mga igsoon wala tugoti sa pagtukod ug mga Kingdom Hall, ug sila wala hatagig eksemsiyon sa pagserbisyo sa militar—mga katungod nga gihatag ngadto sa mga relihiyon nga giila sa gobyerno. Gimandoan sa Korte Suprema sa Romania ang gobyerno sa pag-ila sa mga Saksi ni Jehova ingong relihiyon, apan subsob nga gisupak kini sa gobyerno. Sa Marso 2006, tungod sa tabang sa ECHR, ang gobyerno nakig-areglo sa mga Saksi ni Jehova, nga nagtapos sa siyam ka tuig nga kaso. Ang gobyerno miadmitir nga ang atong organisasyon angay nga makapahimulos usab sa “tanang katungod ug mga obligasyon nga ihatag sa balaod” ngadto sa giila nga mga relihiyon.

 Turkey

Human nagparehistro ang sanga aron ilhong relihiyon ang mga Saksi ni Jehova, ang gobyerno miingon nga imposible kining mahitabo, bisan pag giamendar ang balaod aron makaabot sa mga sukdanan sa European Union. Ang kaso gihusay pa diha sa lokal nga mga korte, apan kon wala gihapoy resulta basin ipasaka kini ngadto sa ECHR.

Ang laing problema maoy bahin sa pagsundalo. Ang mga brader gipatawag sa pagsundalo kutob tulo o upat ka beses sa usa ka tuig hangtod nga molapas na sa edad nga gikinahanglan. Sa matag tawag kanila sa pagsundalo, sila sentensiyahan. Ang uban daghang higayon nga gipabayad ug multa, ang uban gipriso. Sa 2004, si Yunus Erçep miapelar sa ECHR. Bisan pag daghang beses na nga gipamulta, si Brader Erçep gipriso niadtong Oktubre 2005 ug gibuhian human makaserbisyo ug 5 ka bulan sa iyang 12 ka bulan nga sentensiya. Sa adlaw nga siya gibuhian, siya gipatawag na usab sa korte ug gipamulta tungod sa pagdumili sa pagsundalo sa miaging mga panahon.

Uzbekistan

Sa milabayng upat ka tuig kapin sa 1,100 ka dokumentadong mga kaso sa pagdakop, pagdetini, pagmulta, o pagbunal ang naagoman sa atong mga igsoon. Kapin sa 800 niini nga mga insidente nahitabo panahon sa Memoryal sa 2005 ug 2006. Diha sa daghang dapit, ang mga polis nga nagdalag batuta miabot sakay sa mga bus ug gidakop ang tanan nga nanambong. Daghan ang gipamulta; ang uban gibunalan ug maayo.

Bisan pa niana, ang mga igsoon nakahatag ug maayong pamatuod. Tagda ang kaso sa usa ka brader ug usa ka sister nga gikiha tungod kay mitambong sa mga tigom sa kongregasyon ug misangyaw. Ang abogado mihangyo nga ipasusi sa korte ang literatura nga gikompiskar panahon sa pagdakop. Ang librong Kahibalo ug ang brosyur nga Gikinahanglan gibasa ug kusog, ang huwes midungan pagbasa. Tungod kay interesado man siya sa kapitulo 5 sa librong Kahibalo, “Kansang Pagsimba ang Dawaton sa Diyos?” ang huwes mimando nga ang pagbasa ipadayon bisan panahon na sa pagpaniudto.

Sa dihang ang Mateo 28:19, 20 gikutlo, ang huwes miingon, “Mao diay nga mosangyaw kamo!” Sa dihang siya nangutana kon nganong gilutos sa Nazi nga rehimen ni Hitler ang mga Saksi ni  Jehova, siya gihatagan ug mga kopya sa tulo ka videocassette: Purple Triangles, Jehovah’s Witnesses Stand Firm Against Nazi Assault, ug The Bible—Accurate History, Reliable Prophecy. Bisag gipamulta ang atong mga igsoon, sila nakapamatuod sa mga opisyal sa korte ug sa mga kadagkoan sa kapolisan sa paagi nga wala nila madahom.—Lucas 21:12, 13.

Sudan

Sa pagka-Hunyo 2006, ang mga Saksi ni Jehova narehistro ingong relihiyon sa walo ka estado. Ang mga igsoon nagtukod ug mga Kingdom Hall niining mga dapita ug bukas nga naghimog mga asembliya. Ang among literatura libre nang makasulod gikan sa laing nasod, ug ang mga igsoon dunay buhatan sa Khartoum.

Rusya

Sa Abril 12, 2006, usa ka kongregasyon sa Moscow nga may 200 ka magmamantala nagsaulog sa Memoryal sa inabangang pasilidad dihang nanungha ang kapin sa 50 ka armadong mga polis. Gipahunong sa hepe sa Departamento sa Kapolisan sa Lyublino ang tigom, nga nag-ingon nga ang mga Saksi ni Jehova dili mahimong magtigom kay sila gidili man sa Moscow. Gisusi sa mga polis ang mga papeles sa identipikasyon sa nanambong, gikompiskar ang literatura, ug gidala ang 14 ka brader ngadto sa estasyon sa kapolisan sa Lyublino, diin gidetini  sila kapin sa upat ka oras. Sa dihang miadto ang usa ka brader sa estasyon sa kapolisan sa pagtabang kanila sa legal nga paagi, siya gitumba ug gitionan ug kutsilyo. Siya gidid-an sa pagkiha. Bisan pa niana, gikiha sa 4 sa 14 ka brader ang Departamento sa Kapolisan sa Lyublino sa Abril 17.

Ang husay nagsugod sa Mayo 16 sa Korte sa Distrito sa Lyublino sa Moscow diin si Huwes Z. V. Zubkova ang nagdumala. Walay usa sa mga polis nga nanulong ang mitambong, kondili abogado lang nila. Walay popatin-aw, gidismis sa huwes ang 50 ka pagtutol nga gibangon sa mga abogado sa mga igsoon ug ang kadaghanan sa ilang mga pagtutol gisalikway. Sa laing bahin, gitugotan sa huwes ang hangyo sa abogado sa departamento sa kapolisan sa pagdawat ug kopya sa desisyon sa Golovinsky Intermunicipal District Court nga nagdili sa mga Saksi ni Jehova sa Moscow ug sa opinyon sa sikologo nga si L. V. Kulikov, kinsa mitestigo batok sa mga Saksi ni Jehova panahon sa miaging husay.

Sa Hunyo 15, 2006, ang huwes nagpakanaog ug hukom nga ang pagdetini sa mga akusado supak sa balaod apan walay gipakanaog nga hukom batok sa pagbalda sa Memoryal. Giingon usab diha sa desisyon nga ang giabangang awditoryum wala makaabot sa sukdanan aron magamit alang sa relihiyosong serbisyo. Ang mga Saksi ni Jehova miapelar sa City Court sa Moscow sa Hunyo 30, 2006, ug usa sa mga butang nga gihisgotan mao ang mga paglapas sa pamaagi sa paghusay diha sa District Court sa Lyublino sa panahon sa bista. Ang Memoryal gihimo nga walay kababagan diha sa 22 pa ka lokasyon sa Moscow.

Ang pangbukas nga parapo niining artikuloha naghisgot sa tinguha sa salmista: “Magaawit ako ug mga pagdayeg sa akong Diyos samtang ako buhi pa.” (Sal. 146:2) Karon, minilyon sa mga alagad ni Jehova nakahatag ug daghang pamatuod nga sama usab niana ka mainiton ang ilang tinguha. Oo, samtang magpadayon pa kining presenteng sistema sa mga butang, hinaot nga dili nato tugotan nga ang mga paril sa mga prisohan, mga balaod, o kababagan sa pinulongan makapahunong kanato sa pag-awit ngadto sa atong langitnong Amahan!

[Kahon/Hulagway sa panid 9]

Dili Kay Usa Lamang ka Imbitasyon

Gipatik diha sa handbill ang kupon nga pagasulatan sa mga tawo nga buot mohangyo ug pagtuon sa Bibliya, usa ka kopya sa librong Gitudlo sa Bibliya, o mohangyo niining duha. Wala magdugay ang nakompletong mga kupon nagsugod sa pagpangabot sa mga sangang buhatan sa tibuok kalibotan. Pananglitan, ang sanga sa Tinipong Bansa nagtaho nga sila nakadawat ug ubos sa 2,000 ka kupon, ug 300 ka hangyo nga magpatuon ug Bibliya. Tin-aw, ang paningkamot sa atong mga igsoon sa pagpanagtag ug handbill magpadayon sa pagpamunga.

[Kahon/​Mga hulagway sa panid 12, 13]

Ang Librong Gitudlo sa Bibliya Pinangita!

Sa hinapos sa Hulyo 2006, kapin sa 47 ka milyong kopya sa librong Gitudlo sa Bibliya ang napatik diha sa 155 ka pinulongan, walay labot sa 10 ka edisyong Braille. Sa usa lang ka bulan, ang mga kongregasyon sa Tinipong Bansa nakapedido ug aberids nga 42,000 ka libro matag adlaw. Ikatulong bahin niini maoy dinalian nga pedido. Ang pamilyang Bethel sa tibuok kalibotan nag-isip nga usa ka pribilehiyo ang pagtrabahog maayo sa pagtaganag sama niini nga literatura alang sa atong mga igsoon.

 [Kahon/​Mga hulagway sa panid 28, 29]

 Mga Pagpahinungod sa Sanga

Albania

Ang 50 ka tuig nga pagdili sa atong buluhaton natapos sa 1992. Ang 325 ka igsoong lalaki ug babaye nga mitambong sa pagpahinungod sa bag-ong sanga, nga nahimutang layo-layo sa Tiranë, naglakip sa upat ka tigulang nga mga Saksi nga nag-alagad sa Diyos sa mga tuig nga gidili pa ang buluhaton. May mga delegado usab gikan sa 32 ka langyawng mga nasod. Sa dihang nangabot ang mga misyonaryo sa 1992, siyam lamang ang bawtismadong mga magmamantala sa nasod. Karon 3,617 na. Ang mga membro sa Nagamandong Lawas nga si Theodore Jaracz ug Gerrit Lösch may bahin sa programa, nga gihimo sa Hunyo 3, 2006. Pagkasunod adlaw, sila nagpakigpulong diha sa usa ka estadyum sa tumatambong nga 5,153, kinsa naminaw pag-ayo bisan nagbunok ang ulan.

Croatia

Dobleng panalangin ang natagamtam sa miaging tuig: ang pagluwat sa kompletong Bag-ong Kalibotang Hubad sa Balaang Kasulatan sa pinulongang Croatian sa distritong kombensiyon ug ang pagpahinungod sa bag-o pang natapos nga mga ekstensiyon sa sanga sa Zagreb. Sa Biyernes, Agosto 11, ang tumatambong nga 142 namati samtang si Brader Jaracz nagpahayag sa pakigpulong sa dedikasyon. Ang unang pagpahinungod gihimo sa pito ka tuig nang milabay, sa 1999.

Slovenia

Sa Sabado, Agosto 12, si Brader Jaracz nagpahayag sa pakigpulong sa dedikasyon sa bag-ong sanga sa Kamnik, usa ka lungsod nga mga 20 kilometros sa amihanan sa kaulohan, ang Ljubljana, ug duolan sa 130 kilometros sa kasadpan sa Zagreb, Croatia. Sa miagi, ang pamilyang Bethel nagpuyo sa nagkalainlaing mga apartment sa kaulohan, busa sila nalipay pag-ayo nga magkauban na sila pagpuyo ingong usa ka pamilya sa kataposan! Ang tumatambong nga 144 naghawas sa 20 ka nasod.

[Mga hulagway]

Bilding sa sangang buhatan sa Albania

Usa ka linain nga tigom gitambongan ug 5,153

Gipadak-ang mga pasilidad sa sanga sa Croatia

Sanga sa Slovenia

[Hulagway sa panid 6]

Nagsangyaw sa usa ka babayeng bungol, sa Brazil

[Hulagway sa panid 17]

Unang klase sa pinulongang Hindi, sa Alemanya

[Hulagway sa panid 19]

Si Linda ug Paul

[Hulagway sa panid 19]

Si Carma nagsangyaw sa pinulongang Blackfoot

[Hulagway sa panid 20]

Klase sa Kinatsila nga pinulongan, sa Roma, Italya

[Hulagway sa panid 20]

Nagsangyaw kang Samson

[Hulagway sa panid 21]

Si Hamilton ug Abner nagtudlo ug Bibliya sa Mayangna

[Hulagway sa panid 27]

Kingdom Hall sa habagatang Sudan